WOTO 09

Begi o heepi i fii sa ko dë wan mati u Gadu

PËË

Soni pasa ku i kaa a i libi ka i bi abi heepi fanöudu ö? I abi wan bookohedi di i kë u sëmbë heepi ku ën u? I abi kötöhati fanöudu ö? I kë toon wan mati u Jehovah u? Begi sa heepi i ku hii dee soni aki. Ma andi da di möön bunu fasi u begi? Gadu ta haika hii begi ö? Andi i sa du fii sa dë seiki taa a o haika dee begi fii? Boo luku andi i sa du.

1. Ambë u musu begi, nöö fuun soni u sa begi?

Jesosi bi lei u taa di Tata fuu a liba ala wanwan u musu ta begi. Jesosi seei bi ta begi Jehovah tu. A bi taa: „A di fasi aki un musu ta begi e: ’U Tata a liba ala . . . ’” (Mateosi 6:9). Te u ta begi Jehovah, nöö u ku ën ta ko dë möön gaan mati.

U sa begi Gadu u hii soni. Ma ee u kë u Gadu piki dee begi fuu, nöö de musu ta kai ku di kë fëën. Di Bëibel ta taki taa: „Ee di begi ta kai ku di pakisei fëën, nöö a o jei” (1 Johanisi 5:14). Jesosi bi lei u fuun soni u sa ta begi. (Lesi Mateosi 6:9-13.) Boiti di begi di u ta begi Gadu fa heepi u ku dee bookohedi fuu, wa musu fëëkëëtë u dëën tangi u dee soni di a du da u, söseei wa musu fëëkëëtë u hakisi ën faa heepi woto sëmbë tu.

2. Unfa u musu begi?

Di Bëibel ta piki u taa u musu ’konda hii dee soni dee dë a u hati da Gadu’ (Psalöm 62:8). Hën da u musu konda da Gadu unfa u ta fii tuutuu, ku unfa u ta pakisei. U sa begi taanga, söseei u sa begi a u hati dendu. Jehovah an ta piki u taa u musu sindo nasö tjökö kini nasö taanpu te u ta begi. Di möön fanöudu soni, hën da u musu lei taa u ta lesipeki ën te u ta begi ën. U sa begi ën hiniwan juu, söseei a hiniwan kamian ka u dë.

3. Unfa Gadu ta piki dee begi fuu?

A ta piki dee begi fuu a peipei fasi. Jehovah da u di Wöutu fëën di Bëibel, nöö nëën u ta feni dee piki u dee hakisi dee u ta abi. Di Wöutu u Gadu ta „mbei sëmbë di an abi öndöfeni ko köni” te de ta lesi ën. (Psalöm 19:7; lesi Jakobosi 1:5.) Jehovah sa heepi u fu wa buuja te tesi ta miti u. Nöö a sa mbei dee dinima fëën heepi u te u abi heepi fanöudu.

WOTO SONI DI I SA LEI

Boo luku andi i musu du ee i kë u Gadu haika dee begi fii, söseei boo luku un wini i ta feni te i ta begi.

4. Gadu ta haika hii begi ö?

Andi sa mbei Gadu haika dee begi fuu nasö an haika de? Pëë di FËLÖN.

FËLÖN: Gadu ta haika hii begi ö?—Wan sati pisi (2:42)

Jehovah kë fuu ta begi ën. Lesi Psalöm 65:2, nöö piki dee hakisi aki:

I si kuma di „Sëmbë di ta haika begi” kë fii begi ën u? Faandi mbei i taki sö?

U musu ta mbei möiti fuu ta hoi dee wëti u Gadu ee u kë faa ta haika dee begi fuu. Lesi Mika 3:4 ku 1 Petuisi 3:12, nöö piki di hakisi aki:

Andi u musu du fuu sa dë seiki taa Jehovah o ta haika dee begi fuu?

Te feti ta feti, nöö hii dee tu sodati kulupu tuu ta begi gadu u heepi de u de wini di feti. Ma i si kuma Gadu ta piki dee lö begi dë u?

5. U musu ta konda hii soni di dë a u hati da Jehovah

So sëmbë lei taa te de ta begi, nöö de musu ta taki dee seei soni hiniwan juu baka. Ma a di lö fasi dë Gadu kë taa u musu ta begi ën u? Lesi Mateosi 6:7, nöö piki di hakisi aki:

Andi i sa du „fu ja ta taki dee seei soni hiniwan juu baka” te i ta begi?

Hiniwan daka i sa ta pakisei u wan bunu di Jehovah mbei i feni, nöö i sa dëën tangi u di bunu dë. Pooba di soni aki wan wiki longi, nöö joo si taa i begi u seibi tookatooka soni söndö fii taki dee seei soni baka.

Leti kumafa wan bunu tata kë u di mii fëën ta konda hii soni dëën, sö nöö Jehovah kë fuu ta konda hii soni dëën te u ta begi ën

6. Begi da wan kado di Gadu da u

Unfa u ta feni taanga te u ta begi aluwasi soni nango bunu nasö soni an nango bunu? Pëë di FËLÖN.

FËLÖN: Begi ta heepi u te soni ta taanga da u (1:32)

Di Bëibel ta paamusi u taa woo feni kötöhati te u ta begi. Lesi Filipi 4:6, 7, nöö piki dee hakisi aki:

Hii fa begi an ta puu dee fuka fuu hii juu, ma unfa a ta heepi u?
Andi da wantu soni di i bi o kë begi u de?

I bi sabi di soni aki ö?

Di wöutu „amën” kë taki „sö a dë tuu” nasö „a tan sö”. Sensi na awooten de ta taki „amën” a kaba u wan begi.—1 Kloniki 16:36.

7. Buta ten a wan së fii ta begi

So juu u ta abi sömëni soni ta du taa u ta fëëkëtë u begi. Unfa begi bi dë fanöudu tjika da Jesosi? Lesi Mateosi 14:23 ku Maikusi 1:35, nöö piki dee hakisi aki: