WOTO 16
Andi Jesosi bi du di a bi dë a goonliba aki?
Sömëni sëmbë ta si Jesosi te kuma tide jeti, kuma wan beibi nasö kuma wan womi di dëdë. Woto sëmbë ta pakisei taa a bi dë wan bunu womi nöö. Ma u sa ko sabi möön soni fëën te u öndösuku unfa di libi fëën bi dë, di a bi dë a goonliba aki ö? A di woto aki, woo luku so u dee fanöudu soni di Jesosi bi du, söseei woo luku un wini i sa feni u dee soni dë.
1. Andi bi dë di möön fanöudu wooko di Jesosi bi ta du?
Di möön fanöudu wooko di Jesosi bi ta du, bi dë di konda di a bi ta „konda di bunu buka u di Könuköndë u Gadu” da sëmbë. (Lesi Lukasi 4:43.) A bi ta paaja di bunu buka taa Gadu o seti wan könuköndë, nasö wan tii, di o puu hii dee fuka u libisëmbë. a Dii ku hafu jaa longi Jesosi bi wooko taanga u paaja di bunu buka aki.—Mateosi 9:35.
2. Faandi mbei Jesosi bi ta du foombo wooko?
Di Bëibel ta taki taa Gadu mbei Jesosi du „sömëni foombofoombo soni” (Tjabukama 2:22). Ku di kaakiti u Gadu, Jesosi bi sa basi soni kuma taanga ventu ku tjuba, a bi sa da dusudusu sëmbë soni u njan, a bi sa kula sëmbë di bi siki, söseei a bi sa weki sëmbë di bi dëdë ko a libi baka (Mateosi 8:23-27; 14:15-21; Maikusi 6:56; Lukasi 7:11-17). Dee foombo soni dee Jesosi bi ta du bi ta lei gbelingbelin taa Gadu hën bi mandëën ko, söseei de ta lei taa Jehovah abi di makiti u puu hii dee fuka fuu.
3. Andi u sa lei u di fasi fa Jesosi bi ta libi?
Jesosi bi ta piki Jehovah buka a hii soni. (Lesi Johanisi 8:29.) Hii fa sëmbë bi ta du ku Jesosi, tökuseei a bi du hii soni di hën Tata bi piki ën faa du hii ën libi longi. A bi lei taa libisëmbë sa dini Gadu aluwasi soni ta taanga da de. Jesosi lei u unfa u sa „waka soifi nëën baka” te soni ta taanga da u.—1 Petuisi 2:21.
WOTO SONI DI I SA LEI
Woo luku unfa Jesosi bi ta paaja di bunu buka, söseei woo luku dee foombo wooko dee a bi ta du.
4. Jesosi bi ta paaja di bunu buka da sëmbë
Jesosi bi ta waka höndöhöndö kilomëti a sandu pasi nango ta konda di bunu buka da hii sëmbë di a bi ta miti. Lesi Lukasi 8:1, nöö piki dee hakisi aki:
-
Dee sëmbë dee bi ta ko a Jesosi ko haikëën nöö a bi ta peleiki da u?
-
Andi Jesosi bi ta du faa bi sa miti sëmbë?
Gadu bi taki a fesi taa di Mësiasi bi o ta paaja bunu buka da sëmbë. Lesi Jesaaja 61:1, 2, nöö piki dee hakisi aki:
-
Unfa Jesosi mbei di tjabukama woto aki pasa tuutuu?
-
I si kuma dee sëmbë u di ten aki musu jei di bunu buka tu ö?
5. Jesosi bi ta lei sëmbë fanöudu soni
Boiti di paaja di Jesosi bi ta paaja di bunu buka u di Könuköndë u Gadu, a bi ta lei sëmbë soni tu di bi ta heepi de a de libi. Luku wantu soni di a bi lei sëmbë a di nëbai taki fëën di a bi hoi a di kuun liba. Lesi Mateosi 6:14, 34; 7:12, nöö piki dee hakisi aki:
-
Andi da wantu fanöudu soni di Jesosi lei u a dee tëkisi aki?
-
I si kuma dee soni aki sa heepi u a di ten aki ö?
6. Jesosi bi du sömëni foombo wooko
Jehovah bi da Jesosi di kaakiti faa bi sa du sömëni foombo wooko. Ee i kë si wan u dee foombo wooko di a bi du, nöö lesi Maikusi 5:25-34 nasö pëë di FËLÖN, nöö piki dee hakisi aki.
-
Andi di mujëë di bi dë ku suwaki a di fëlön bi ta biibi?
-
Andi i lobi te i luku di foombo wooko di bi pasa aki?
Lesi Johanisi 5:36, nöö piki di hakisi aki:
-
Andi dee foombo wooko dee Jesosi bi ta du ta lei u fëën?
I bi sabi di soni aki ö?
Gaansë u dee soni dee u ko sabi u Jesosi, dë u feni a dee fö Bëibel buku dee u ta kai dee evangelie. Dee buku aki da Mateosi, Maikusi, Lukasi ku Johanisi. Hii dee sikifima u dee buku aki sikifi tookatooka soni u Jesosi. Ma hii dee soni di de sikifi ta kai a wan, nöö de ta heepi u fuu ko sabi soni u Jesosi.
-
MATEOSI
fosu sikifi di buku fëën. A ta taki u dee soni dee Jesosi bi ta lei sëmbë, möönmöön di lei di a bi ta lei sëmbë soni u di Könuköndë u Gadu.
-
MAIKUSI
sikifi di möön sati buku. A ta taki u sömëni sipansipan soni di bi pasa.
-
LUKASI
ta taki unfa begi bi dë wan gaan fanöudu soni da Jesosi, söseei unfa Jesosi bi ta libi ku mujëë sëmbë.
-
JOHANISI
ta taki u dee fan dee Jesosi bi ta fan ku dee mati fëën ku woto sëmbë, nöö di soni aki ta heepi u fuu ko sabi dee fasi dee Jesosi abi.
SO SËMBË TA TAKI TAA: „Jesosi bi dë wan bunu womi nöö.”
-
Unfa ii pakisei?
ANDI I LEI?
Jesosi bi ta konda soni u di Könuköndë u Gadu da sëmbë, a bi du sömëni foombo wooko, söseei a bi ta piki Gadu buka a hii soni.
Andi i bi o piki?
-
Andi bi dë di möön fanöudu wooko di Jesosi bi ta du di a bi dë a goonliba?
-
Andi dee foombo wooko dee Jesosi bi ta du ta lei?
-
Andi da wantu fanöudu soni di Jesosi bi lei sëmbë?
WOTO SONI DI I SA LUKU
Fuun soni Jesosi bi lo’ u taki möön hia?
„Fu san ede Gado Kownukondre prenspari gi Yesus?” (A Waktitoren, 1 u tinimu-liba 2014)
Lesi di woto aki fii si faandi mbei u sa biibi taa Jesosi bi du dee foombo wooko fëën tuu.
„Den wondru fu Yesus—San yu kan leri fu den?” (A Waktitoren, 15 u baimatu-liba 2004)
Lesi di woto aki fii si unfa di booko di Jesosi bi ta booko hën hedi ku sëmbë bi tooka di libi u wan womi.
„Mi ben e libi soso gi misrefi” (A Waktitoren, 1 u tinimu-liba 2014)
Lesi di woto aki fii si wantu fanöudu soni di Jesosi bi du, söseei na un ten a bi du de.
„Prenspari sani di abi fu du nanga Yesus libi na grontapu” (Studeri Gado Wortu moro fini, pisi 4)
a Woto 31-33 o taki möön soni u di Könuköndë u Gadu finifini.
