WOTO 17

Un pei sëmbë Jesosi dë?

PËË

Te woo ko lei sabi dee soni dee Jesosi bi taki ku dee soni dee a bi du di a bi dë a goonliba aki, nöö woo ko sabi dee fasi fëën dee o mbei u kë ko dë wan mati fëën, söseei dee o mbei u kë ko dë wan mati fëën Tata, Jehovah. Andi da wantu u dee fasi fëën? Nöö unfa u sa djeesi ën?

1. Na un fasi Jesosi dë kuma hën Tata?

Jesosi bi dë milionmilion jaa makandi ku hën Tata a liba ala, nöö a bi ta luku unfa hën Tata bi ta du soni, söseei a bi lei sömëni soni nëën. Di soni dë mbei Jesosi ta pakisei kuma hën Tata, nöö a ta fii kumafa hën Tata ta fii, söseei a ta du soni kuma hën. (Lesi Johanisi 5:19.) Awa, Jesosi abi dee seei fasi kuma hën Tata. Fëën mbei a bi taki taa: „Di sëmbë di si mi, nöö mi Tata a si naandë kaa” (Johanisi 14:9). Te joo lei soni u dee fasi dee Jesosi abi, nöö joo ko sabi Jehovah möön bunu. Kuma te i luku fa Jesosi bi ta booko hën hedi ku sëmbë, nöö di soni dë ta lei i unfa Jehovah ta booko hën hedi ku i tjika.

2. Unfa Jesosi bi lei taa a lobi Jehovah?

Jesosi bi taki taa: „U di dee sëmbë u di goonliba aki musu ko sabi gbelin taa mi lobi mi Tata, fëën mbei mi ta hoi miseei tololoo a dee soni dee mi Tata buta da mi u mi du” (Johanisi 14:31). Di Jesosi bi dë a goonliba, nöö a bi lei taa a lobi hën Tata gaanfa seei, u di a bi ta piki ën buka aluwasi soni bi ta taanga dëën. A bi lei taa a lobi hën Tata tu, u di a bi ta konda soni fëën da sëmbë, nöö a bi ta heepi sëmbë u de bi sa ko dë mati fëën.—Johanisi 14:23.

3. Unfa Jesosi lei taa a lobi sëmbë?

Di Bëibel ta taki taa Jesosi „lobi libisëmbë gaanfa seei” (Nöngö 8:31). A bi ta lei taa a lobi sëmbë u di a bi ta da de taanga, söseei a bi ta heepi de söndö faa pakisei hënseei nöö. Dee foombo soni dee a bi ta du, an bi ta lei nöö taa a abi kaakiti, ma de bi ta lei unfa a bi ta fii da sëmbë tu (Maikusi 1:40-42). A bi ta libi bunu ku hii sëmbë, nöö an bi lobi wan sëmbë möön di wotowan. Dee soni dee a bi ta taki bi ta da dee limbohati sëmbë dee bi ta haikëën kötöhati, söseei dee soni dë bi ta mbei di biibi di de bi abi a dee soni dee Gadu paamusi sëmbë ko möön taanga. Jesosi bi dë kabakaba u tja pena fuu hedi, söseei u dëdë da hii libisëmbë u di a lobi de. Ma a bi möön lobi dee sëmbë dee bi ta du dee soni dee a bi ta lei de.—Lesi Johanisi 15:13, 14.

WOTO SONI DI I SA LEI

Woo lei möön soni u dee fasi u Jesosi. Woo luku unfa u sa djeesi ën a di lobi di a bi lobi sëmbë, söseei a di lo’ di a bi lo’ u da sëmbë soni.

4. Jesosi lobi hën Tata

Di fasi fa Jesosi bi lobi Gadu, ta lei u unfa useei sa lobi Gadu tu. Lesi Lukasi 6:12 ku Johanisi 15:10; 17:26. Baka te i lesi hiniwan u dee tëkisi, nöö piki di hakisi aki:

Unfa u sa lei taa u lobi Jehovah leti kuma Jesosi?

Jesosi bi lobi hën Tata di dë a liba ala, nöö hii juu a bi ta fan ku ën a begi

5. Jesosi ta fii da dee sëmbë dee abi heepi fanöudu

Jesosi bi ta booko hën hedi ku woto sëmbë möön fa a bi ta booko hën hedi ku hënseei. Aluwasi a bi wei seei, tökuseei a bi ta tei hën ten ku hën kaakiti u heepi sëmbë. Lesi Maikusi 6:30-44, nöö piki dee hakisi aki:

Andi da wantu fasi fa Jesosi bi lei taa a bi ta booko hën hedi ku sëmbë a di tëkisi aki?—Luku vers 31, 34, 41, ku 42.
Faandi mbei Jesosi bi ta heepi sëmbë?—Luku vers 34.
Jesosi abi dee seei fasi dee Jehovah abi. Andi di soni aki ta lei u u Jehovah?
Andi da wantu fasi fa u sa lei taa u ta booko u hedi ku wotowan leti kuma Jesosi?

6. Jesosi lo’ u da sëmbë soni

Jesosi bi lo’ u da sëmbë soni hii fa an bi abi hia soni, nöö a bi da u taanga fuu du di wan seei soni tu. Lesi Tjabukama 20:35, nöö piki di hakisi aki:

Andi Jesosi bi taki taa u musu ta du ee u ta kë dë waiwai?

Pëë di FËLÖN, nöö piki di hakisi aki.

FËLÖN: „Dee sëmbë dee ta da sëmbë soni, de dë waiwai”—Wan sati pisi (4:00)

Andi da wantu fasi fa u sa da sëmbë soni, aluwasi wa abi hia soni?

I bi sabi di soni aki ö?

Di Bëibel ta piki u taa u musu ta begi Jehovah a di në u Jesosi. (Lesi Johanisi 16:23, 24.) Te u ta du sö, nöö u ta lei taa u dë ku tangi a hati u di soni di Jesosi du u heepi u fuu ku Jehovah ko dë mati.

SO SËMBË TA TAKI TAA: „Gadu an ta booko hën hedi ku u te fuka ta miti u.”