Jehovah an dë wan Gadu di ta du soni fanjanfanjan (1 Kolenti 14:33). Fëën mbei dee sëmbë fëën an ta du soni fanjanfanjan tu. Unfa soni seti a di kemeente u dee Keesitu sëmbë? Andi u sa du u soni ta waka bunu a di kemeente?

1. Ambë da di hedima u di kemeente?

„Keesitu da di hedima u di kemeente” (Efeise 5:23). A dë a liba ala ta tii di wooko u dee sëmbë u Jehovah a hii së u goonliba. Jesosi buta „di köni saafu di dë u futoou” u tei fesi. Di saafu aki da wan piki kulupu u gaanwomi di taanga a di biibi, nöö u ta kai de, di Tii Kulupu. (Lesi Mateosi 24:45-47.) Leti kumafa dee apösutu ku dee gaanwomi a Jelusalen a fesiten bi ta tii dee kemeente, sö nöö di Tii Kulupu ta tii dee kemeente a hii di goonliba a di ten aki (Tjabukama 15:2). Ma na dee womi aki da fesima u di ölganisaasi fuu. De ta mbei Jehovah ku di Wöutu fëën tii de, nöö de ta saka deseei a Jesosi basu.

2. Ambë da dee gaanwomi, nöö un wooko de ta du?

Dee gaanwomi da womi di taanga a di biibi, nöö de ta lei sëmbë soni ku di Wöutu u Gadu. Boiti di dë, de ta tii dee sëmbë u Jehovah, nöö de ta heepi de, ta da de taanga. De an ta paka de u di wooko di de ta du. Ma tökuseei de ta du ën ku piizii, ku wai a hati seei . . . Nöö de an ta du ën u di de giii u möni hedi, ma u di de abi wan gaan hangi a de hati u heepi sëmbë (1 Petuisi 5:1, 2). Dee dinai ta wooko makandi ku dee gaanwomi, nöö bakaten deseei sa ko toon gaanwomi tu, te de ta du dee soni di di Bëibel ta taki taa de musu du u de sa tja di faantiwöutu dë.

Di Tii Kulupu ta buta so gaanwomi kuma keling-gaanwomi. Dee keling-gaanwomi aki nango ta luku dee peipei kemeente u tii de, söseei u da dee baaa ku dee sisa taanga. De ta buta baaa kuma gaanwomi nasö dinai te de ta du dee soni dee sikifi a Bëibel, di wan baaa musu du faa sa tja dee faantiwöutu dë.​—1 Timoteo 3:1-10, 12; Titusi 1:5-9.

3. Un faantiwöutu hiniwan Kotoigi u Jehovah abi?

Hii sëmbë a di kemeente ta „gafa di në u Jehovah”, te de ta kanda, te de ta da piki, söseei te de ta du di peleikiwooko kumafa de sa du ën.​—Lesi Psalöm 148:12, 13.

 WOTO SONI DI I SA LEI

4. Jesosi da wan fesima di ta libi ku sëmbë a wan suti fasi

Jesosi ta kai u a wan suti fasi fuu tei ën kuma fesima fuu. Lesi Mateosi 11:28-30, nöö piki di hakisi aki:

• Un fasi di fesima fuu Jesosi abi, nöö unfa a kë fuu ta fii?

5. Dee gaanwomi ta lei sëmbë soni ku di fasi fa de ta tja deseei

1. Dee gaanwomi ta mbei möiti u di biibi u de ko taanga, söseei de ta heepi dee sëmbë u de wosudendu u di biibi u de ko taanga tu

2. Dee gaanwomi ta booko de hedi ku hii sëmbë a di kemeente

3.   Dee gaanwomi ta peleiki hii juu

4. Dee gaanwomi da sëmbë di ta lei wotowan soni. Söseei de ta heepi ta seeka di kamian ka de ta ko makandi, nöö de ta du woto soni tu

6. U musu ta wooko makandi ku dee gaanwomi

Di Bëibel ta piki u faandi mbei a dë fanöudu fuu ta wooko makandi ku dee gaanwomi. Lesi Hebelejën 13:17, nöö piki dee hakisi aki:

• A dë wan bunu soni taa di Bëibel ta da u taanga fuu ta haika dee sëmbë dee ta tei fesi, söseei fuu ta saka useei a de basu ö? Faandi mbei i taki sö?

Lesi Lukasi 16:10, nöö piki di hakisi aki:

• Faandi mbei u musu ta haika dee gaanwomi a pikipiki soni seei?

 ANDI I LEI?

Jesosi da di hedima u di kemeente. Ku piizii u ta wooko makandi ku dee gaanwomi dee ta saka deseei nëën basu, u di de ta heepi u fuu sa feni kaakiti baka, söseei de dë sëmbë di u sa djeesi a di biibi.

Andi i bi o piki?

• Ambë da di hedima u di kemeente?

• Unfa dee gaanwomi ta heepi di kemeente?

• Un faantiwöutu hiniwan Kotoigi u Jehovah abi?