WOTO 21
Unfa u ta paaja di bunu buka?
Abiti möön, Jehovah o mbei di Könuköndë fëën puu hii dee bookohedi fuu. Di bunu buka dë bunu poi fuu hoi ën da useei. Jesosi bi kë u dee bakama fëën paaja di bunu buka da hii sëmbë! (Mateosi 28:19, 20) Unfa dee Jehovah Kotoigi ta du di soni di Jesosi bi piki dee bakama fëën u de du?
1. Unfa dee soni dee sikifi a Mateosi 24:14 ta pasa tuutuu a di ten fuu aki?
Jesosi bi taki a fesi taa: „Di bunu buka u di Könuköndë musu paaja te dou hii goonliba e, be hii sëmbë jei” (Mateosi 24:14). Dee Jehovah Kotoigi ta wai seei u du di gaan fanöudu wooko aki. U ta paaja di bunu buka a hii së u di goonliba a möön leki 1000 töngö! Fuu sa du di gaan wooko aki, nöö u musu mbei taanga möiti, söseei soni musu seeka bunu. Wa bi o sa du di wooko aki ee na Jehovah hën bi ta heepi u.
2. Un möiti u ta mbei u peleiki da sëmbë?
U ta peleiki a hii kamian ka u ta miti sëmbë. Leti kuma dee fesiten Keesitu sëmbë, u nango peleiki da sëmbë a de pisi (Tjabukama 5:42). Di fasi u peleiki aki ta mbei taa u ta peleiki da milionmilion sëmbë hiniwan jaa. Ma, u di na hii juu u ta miti sëmbë a wosu, mbei u nango ta peleiki a kamian ka hia sëmbë ta waka pasa. Hii juu u ta suku okasi u konda soni u Jehovah ku dee soni dee a paamusi u da sëmbë.
3. Ambë abi di faantiwöutu u paaja di bunu buka?
Hii tuutuu Keesitu sëmbë abi di faantiwöutu u konda di bunu buka da sëmbë. Di wooko aki dë wan gaan fanöudu wooko da u. U ta mbei möiti u du hii soni di u sa du u peleiki da sëmbë, u di u sabi taa a sa mbei de feni libi. (Lesi 1 Timoteo 4:16.) De an ta paka u fuu du di wooko aki, u di di Bëibel taki taa: „Na bai un bai ën e, nöö wan musu mbei sëmbë paka unu fëën tu” (Mateosi 10:7, 8). Na hii sëmbë ta kë haika di bunu buka. Ma u ta peleiki go dou, u di a dë wan pisi u di dini di u ta dini Jehovah, söseei a ta mbei Jehovah ta wai.
WOTO SONI DI I SA LEI
Woo luku di möiti di dee Jehovah Kotoigi ta mbei u peleiki da sëmbë a hii së u goonliba, söseei woo luku unfa Jehovah ta heepi u.
4. U ta wooko taanga u peleiki da hii sëmbë
Dee Jehovah Kotoigi ta mbei taanga möiti u paaja di bunu buka da sëmbë a hii së u goonliba. Pëë di FËLÖN, nöö piki di hakisi aki.
-
Andi ta bigi da i te i luku di möiti di dee Jehovah Kotoigi ta mbei u peleiki da sëmbë?
Lesi Mateosi 22:39 ku Loomë 10:13-15, nöö piki dee hakisi aki:
-
Unfa di du di u ta du di peleikiwooko ta lei taa u lobi woto sëmbë?
-
Unfa Jehovah ta si dee sëmbë dee ta paaja di bunu buka?—Luku vers 15.
5. U ta wooko makandi ku Gadu
Sömëni woto dë di ta lei taa Jehovah hën ta tii di peleikiwooko di u ta du. Sö nöö a bi pasa a di köndë Njunjun Zeeland, taa wan baaa de kai Paul, bi miti wan mujëë nëën pisi di a bi go a di peleikiwooko a wan sapate. A di mamate dë, di mujëë bi begi Gadu, nöö a bi kai di në u Gadu Jehovah, hën a hakisi ën faa manda wan sëmbë ko nëën. Paul bi taki taa: „Baka dii juu longi, hën mi dou a di mujëë dööbuka.”
Lesi 1 Kolenti 3:9, nöö piki di hakisi aki:
-
Unfa dee woto kuma di wan di pasa a Njunjun Zeeland, ta lei taa Jehovah ta tii di peleikiwooko?
Lesi Tjabukama 1:8, nöö piki di hakisi aki:
-
Faandi mbei u abi di heepi u Jehovah fanöudu fuu sa du di peleikiwooko?
I bi sabi di soni aki ö?
Hiniwan wiki u ta lei a di mindiwiki komakandi unfa u musu peleiki. Ee i go a wan u dee komakandi aki kaa, nöö unfa i feni di lei di de ta lei u fa fuu peleiki da sëmbë?
6. U ta piki Gadu buka u di u ta peleiki da sëmbë
A di ten di pasa, felantima bi kë tapa dee bakama u Jesosi u de an peleiki möön. Dee fesiten Keesitu sëmbë bi du hii soni di de bi sa du, u ’mbei lanti da de di leti u paaja di bunu buka’ (Filipi 1:7). Di wan seei soni dee Jehovah Kotoigi ta du a di ten aki. a
Lesi Tjabukama 5:27-42, nöö piki di hakisi aki:
WAN SËMBË SA HAKISI I TAA: „Faandi mbei dee Jehovah Kotoigi nango peleiki da sëmbë a de pisi?”
-
Andi i bi o piki ën?
ANDI I LEI?
Jesosi bi lei dee bakama fëën u de paaja di bunu buka da hii nasiön sëmbë. Jehovah ta heepi dee sëmbë fëën u de du di wooko aki.
Andi i bi o piki?
-
Unfa u ta paaja di bunu buka a hii së u goonliba tjika?
-
Unfa di du di u ta du di peleikiwooko ta lei taa u lobi woto sëmbë?
-
I si kuma di peleikiwooko da wan wooko di sa mbei u ta dë waiwai ö? Faandi mbei i taki sö?
WOTO SONI DI I SA LUKU
Luku di fëlön aki fii si unfa dee Jehovah Kotoigi ta du di peleikiwooko a dee gaangaan foto.
De ta peleiki a kamian ka hia sëmbë ta waka pasa a di foto de kai Parijs (5:11)
Luku di fëlön aki fii si andi dee Jehovah Kotoigi du u heepi dee sëmbë dee lowe ko a di köndë u de.
A di fëlön aki wan sisa ta konda unfa a du di peleikiwooko hii ën libi longi, söseei unfa a ta piizii u du di wooko aki.
Lesi di woto aki fii si wantu gaan kuutu di u wini, di bi mbei taa u bi sa paaja di bunu buka.
„Kownukondre preikiman go na krutubangi” (Gado Kownukondre e tiri! woto 13)
a Gadu hën manda u fuu du di peleikiwooko. Fëën mbei u kuma Jehovah Kotoigi an ta wakiti dee tiima u de da u pasi ufö u sa peleiki.