WOTO 22

Unfa i sa paaja di bunu buka?

PËË

Te i ta lei soni u Bëibel, nöö kandë i ta pakisei taa: ’Hii sëmbë musu ko sabi di soni aki!’ Awa, sö a dë, hii sëmbë musu ko sabi di soni aki! Ma tökuseei, a sa pasa taa i ta fëëë u konda dee soni dee i lei da wotowan. Woo luku andi sa heepi i fu ja ta fëëë möön, söseei woo luku andi sa heepi i fii ta konda di bunu buka di sikifi a Bëibel da sëmbë waiwai.

1. Unfa i sa konda dee soni dee i lei da sëmbë di i sabi?

Dee bakama u Jesosi bi taki taa: „Wa sa tjubi dee soni dee u wojo bi si ku dee u jesi bi jei” (Tjabukama 4:20). De bi lobi dee soni di de bi lei sö tee taa de bi kë kondëën da hii sëmbë. I kë du di wan seei soni tu ö? Ee i kë du di wan seei soni tu, nöö suku okasi fii sa konda dee soni dee i lei a wan lesipeki fasi da dee famii fii ku dee mati fii.—Lesi Kolosën 4:6.

Wantu fasi fa i sa bigi taki u dee soni dee i lei

Te i ta fan ku dee famii fii, nöö i sa taki u wan soni di i lei a Bëibel. Fii sa bigi taki u di soni dë, nöö kandë i sa taki taa: „Di wiki aki mi lei wan bunu soni seei”.
Lesi wan Bëibel tëkisi da wan mati fii di dë ku siki nasö di abi bookohedi u dëën kötöhati.
Piki dee sëmbë dee i ku de ta wooko a di wan kamian andi i lei a Bëibel nasö a komakandi, te de hakisi i unfa di wiki fii bi go.
Lei dee mati fii di jw.org website fuu.
Kai woto sëmbë u ko sindo makandi ku i te wan Jehovah Kotoigi o ko lei i soni u Bëibel, nasö lei de unfa de sa sikifi hakisi a jw.org, u wan Jehovah Kotoigi ko lei de soni u Bëibel.

2. Faandi mbei a dë fanöudu fii mbei möiti u peleiki makandi ku di kemeente?

Dee bakama u Jesosi, an bi ta konda di bunu buka da dee sëmbë di de bi sabi nöö. Jesosi bi „manda de tu tu be de fosu go a hii köndë ku hii kamian ka hënseei bi o go tu”, u go paaja di bunu buka (Lukasi 10:1). Di fasi fa de bi ta peleiki aki bi mbei taa sömëni sëmbë bi feni di okasi u jei soni u di bunu buka. Di peleiki di dee bakama u Jesosi bi ta peleiki makandi bi mbei de bi ta dë waiwai (Lukasi 10:17). I si kuma i bi o sa mbei möiti u peleiki makandi ku di kemeente tu ö?

WOTO SONI DI I SA LEI

Woo luku andi i sa du fu ja ta fëëë u konda dee soni dee i lei da wotowan, söseei woo luku unfa di konda di joo ta konda di bunu buka da sëmbë o ta mbei i ta dë waiwai.

3. Jehovah o dë ku i

Wan sëmbë di kë peleiki sa ta fëëë te a pakisei andi wotowan o taki fëën nasö unfa de o si ën.

I ta fëëë u konda dee soni dee i lei da wotowan u? Faandi mbei?

Pëë di FËLÖN, nöö piki di hakisi aki.

FËLÖN: Mi bi begi Jehovah faa da mi degihati (4:05)

Andi dee njönkuwan a di fëlön bi du u de an ta fëëë möön u peleiki da sëmbë?

Lesi Jesaaja 41:10, nöö piki di hakisi aki:

Unfa begi sa heepi i te i ta fëëë u peleiki?

I bi sabi di soni aki ö?

Sömëni Jehovah Kotoigi bi ta pakisei taa nöiti de bi o sa go peleiki da sëmbë. Sö nöö wan womi mii di de ta kai Sergey bi ta fii kuma an bunu tjika, nöö a bi ta taanga dëën u fan ku sëmbë. Ma baka di a bi bigi lei soni u Bëibel, hën a taki taa: „Hii fa mi bi ta fëëë, tökuseei mi bi bigi ta konda dee soni dee mi bi ta lei da wotowan. Di soni di bi ta bigi da mi, hën da möön mi bi ta konda soni u Bëibel da wotowan, möönmöön ma bi ta fëëë möön, söseei a bi heepi mi u mi ko abi wan möön taanga biibi.”

4. I musu ta fan a wan lesipeki fasi

Te i ta konda di bunu buka da sëmbë, nöö na pakisei nöö andi joo taki, ma pakisei unfa joo kondëën da sëmbë. Lesi 2 Timoteo 2:24 ku 1 Petuisi 3:15, nöö piki dee hakisi aki:

Unfa i sa du dee soni dee sikifi a dee tëkisi aki te i ta peleiki da sëmbë?
So u dee famii fii ku dee mati fii an o ta kë biibi hii soni di i ta konda da de. Ma andi i sa du, nöö andi ja musu du?
Faandi mbei a möön bunu fii buta hakisi da de u heepi de u de ko fusutan wan soni, ka fii piki de andi de musu biibi?

5. Te i ta paaja di bunu buka, nöö i ta dë waiwai

Jehovah bi da Jesosi di wooko u paaja di bunu buka. Unfa Jesosi bi ta si di wooko dë? Lesi Johanisi 4:34, nöö piki dee hakisi aki:

Te u ta njan bunu soni, nöö a ta heepi u fuu dë a libi, söseei a ta mbei u fii bunu. Faandi mbei Jesosi bi tei di du di u ta du di kë u Gadu, kuma di paaja di u ta paaja di bunu buka, maaka ku di njan di u ta njan bunu njanjan?
Unfa i si kuma joo ta fii te i ta konda di bunu buka da sëmbë?

Soni di i sa du

Te i dë a di mindiwiki komakandi, nöö luku andi da wantu fasi fa i sa bigi fan ku wan sëmbë.
Hakisi di sëmbë di ta lei i soni u Bëibel andi i musu du fii sa ta hoi dee pisi di de ta hoi a dee mindiwiki komakandi. Dee pisi aki sa heepi i fii sa konda dee soni dee i ta lei da woto sëmbë.
Wooko ku dee pisi „So sëmbë ta taki taa” nasö „So sëmbë sa hakisi i taa”, fii ta pooba luku unfa i bi o piki wan sëmbë di hakisi i wan soni, nasö di taki wan soni di sëmbë guwenti u taki te de an kë haika.

WAN SËMBË SA HAKISI I TAA: „Naasë i ta dë sö, a longi ma si i?”