WOTO 26

Faandi mbei hogidu ku fuka dë a goonliba?

PËË

Te wan gaan hogi pasa, nöö sëmbë lo’ u hakisi taa: „Faandi mbei sö a musu pasa?” U wai seei taa di Bëibel ta piki di hakisi aki!

1. Andi Saatan bi du mbei hogidu ko dë a goonliba?

Saatan Didibi bi hopo fia ku Gadu. Nöö u di a bi kë tii libisëmbë, mbei a bi ganjan dee fosu libisëmbë, Adam ku Eva, u de hopo fia ku Gadu makandi ku ën. Saatan bi du di soni aki, u di a bi konda wan mindimindi woto da Eva (Kenesesi 3:1-5). A bi mbei a biibi taa Jehovah bi ta tjubi wan bunu soni dëën. Söseei a bi mbei a biibi taa libisëmbë bi o abi wan möön bunu libi te de an bi o ta piki Gadu buka. Saatan bi mindi soni di fosu pasi, di a bi piki Eva taa an bi o dëdë. Fëën mbei di Bëibel ta taki taa „a Saatan mindi soni ku lëgëdë kumutu”.—Johanisi 8:44.

2. Andi Adam ku Eva bi du?

Jehovah bi da Adam ku Eva hii soni di de bi abi fanöudu. A bi piki de taa de bi sa njan hii dee fuuta u hii dee pau dee bi dë a di djai de kai Eden, boiti wan u de (Kenesesi 2:15-17). Ma tökuseei de bi njan di fuuta u di pau di de an bi musu njan. Eva bi „booko di fuuta hën a njan”. Bakaten, hën Adam „seei njan tu” (Kenesesi 3:6). Hii de tuu bi pasa Gadu buka. U di Adam ku Eva an bi abi zöndu, mbei an bi dë wan taanga soni da de u de du bunu soni. Ma u di de bi pasa Gadu buka ku deseei kë, hën de du zöndu, nöö a sö wan fasi de bi lei taa de an bi kë u Gadu tii de möön. Di soni di de bi du aki bi tja gaan fuka ko da de seei.—Kenesesi 3:16-19.

3. Unfa di soni di Adam ku Eva du tja hogi ko da u?

Di Adam ku Eva pasa Gadu buka, hën de ko abi zöndu. Di soni dë mbei hii dee bakamii u de ko abi zöndu tu. Di Bëibel ta taki u Adam taa: „Wan womi tja zöndu ko a goonliba, nöö zöndu tja dëdë ko. Hën mbei dëdë paaja da hii libisëmbë.”—Loomë 5:12.

Ma nöö faandi mbei u ta tja pena ku sitaafu? Wë u ta tja pena ku sitaafu u sömëni soni hedi. So juu u ta tja pena ku sitaafu u di u bi du wan soni di an bunu, nasö u di woto sëmbë bi du wan soni di an bunu. So juu u ta tja pena ku sitaafu tu, u di wan soni miti u di wa bi mëni.—Lesi Peleikima 9:11.

WOTO SONI DI I SA LEI

Woo luku faandi mbei na Gadu hën ta mbei taa hogidu ku fuka dë a goonliba, söseei woo luku unfa a ta fii te u ta tja pena ku fuka.

4. Di sëmbë di mbei taa u ta tja pena ku fuka

Sömëni sëmbë ta biibi taa Gadu hën ta tii di goonliba. Ma sö a dë tuutuu ö? Pëë di FËLÖN.

FËLÖN: Ambë ta tii di goonliba? (1:24)

Lesi Jakobosi 1:13 ku 1 Johanisi 5:19, nöö piki di hakisi aki:

Gadu hën mbei hogidu ku fuka dë a goonliba u?

5. Andi ta pasa sensi di Saatan bigi tii goonliba?

Pëë di FËLÖN.

FËLÖN: Faandi mbei Gadu ta da pasi taa u ta tja pena ku sitaafu?—Di sati pisi (3:07)

Lesi Kenesesi 3:1-6, nöö piki dee hakisi aki:

Un soni Saatan bi mindi?—Luku vers 4 ku 5.
Andi Saatan bi taki u mbei Eva biibi taa Jehovah bi ta tjubi wan bunu soni da libisëmbë?
Andi Saatan bi taki u mbei libisëmbë biibi taa de an abi Jehovah fanöudu u tii de u de sa abi wan bunu libi?

Lesi Peleikima 8:9, nöö piki di hakisi aki:

Andi ta pasa u di na Jehovah hën ta tii di goonliba?

Adam ku Eva an bi abi zöndu, nöö de bi ta libi a di Paladëisi. Ma de bi haika Saatan, hën de hopo fia ku Jehovah
Baka di de bi hopo fia ku Jehovah, hën zöndu, pena, fuka, ku dëdë ko dë a di goonliba
Jehovah o puu zöndu, pena ku fuka, ku dëdë a di ten di ta ko. Nöö libisëmbë an o abi zöndu möön, nöö de o libi a di Paladëisi

6. A ta hati Jehovah te u ta tja pena ku fuka

A ta hati Gadu te u ta tja pena ku fuka u? Luku andi Könu Dafiti ku apösutu Petuisi bi sikifi. Lesi Psalöm 31:7 ku 1 Petuisi 5:7, nöö piki di hakisi aki:

Unfa i ta fii di i ko sabi taa Jehovah ta si unfa u ta tja pena ku fuka, söseei taa a ta booko hën hedi ku u?

7. Gadu o puu dee fuka dee ta miti libisëmbë

Lesi Jesaaja 65:17 ku Akoalimbo 21:3, 4, nöö piki di hakisi aki:

Faandi mbei a ta da i kötöhati di i ko sabi taa Jehovah o puu hii dee hogi soni dee ta miti libisëmbë?

I bi sabi di soni aki ö?

Di fosu pasi di Saatan mindi soni, hën a poi Jehovah në. A mbei sëmbë ko ta biibi taa Jehovah na wan bunu tiima. Te Jehovah o puu dee pena ku dee fuka dee ta miti libisëmbë a di ten di ta ko, nöö a o limbo di në fëën di Saatan poi. Hën da u sa taki taa a o lei taa di tii fëën da di möön bunu tii. Di limbo di di në u Jehovah musu ko limbo, da wan fanöudu soni a hii di mundu.—Mateosi 6:9, 10.

SO SËMBË TA TAKI TAA: „Gadu ta mbei u ta tja pena ku fuka u di a ta pooba u.”

Andi ii bi o taki?

ANDI I LEI?

Saatan Didibi ku dee tu fosu libisëmbë, de mbei taa hogidu ko dë a goonliba. A ta hati Jehovah gaanfa seei te a ta si fa u ta tja pena ku fuka, nöö abiti möön a o puu hii dee soni dë.