WOTO 29

Andi ta pasa ku wan sëmbë te a dëdë?

PËË

Sëmbë fii lasi libi wan daka u? Wë a di ten dë, nöö kandë i ta hakisi iseei taa: ’Andi ta pasa ku u te u dëdë? Woo sa si dee sëmbë fuu dee dëdë wan daka baka u?’ A di woto aki ku di woto di ta ko nëën baka, joo feni di piki u dee hakisi aki a di Bëibel, nöö de o da i kötöhati.

1. Andi ta pasa ku u te u dëdë?

Jesosi bi tei dëdë maaka ku di duumi di wan sëmbë ta duumi fundu. Wan sëmbë di ta duumi wan fundu duumi an ta sabi andi ta pasa a di juu dë. Faandi mbei u sa tei dëdë maaka ku duumi? Te wan sëmbë dëdë, nöö an ta fii pen möön. Aluwasi fa a bi lobi dee famii fëën ku dee mati fëën, an ta hangi de möön, u di an sabi na wan soni möön. Di Bëibel ta taki taa: „Dee dëdë sëmbë an sabi na wan hojo soni”.—Lesi Peleikima 9:5.

2. Un wini u ta feni te u ko sabi andi ta pasa ku wan sëmbë te a dëdë?

Sömëni sëmbë ta fëëë u dëdë, söseei de ta fëëë dëdë sëmbë tu! Ma i sa feni kötöhati a dee soni di di Bëibel ta taki u dëdë. Jesosi bi taki taa: „Woon ko sabi soni gbelingbelin, nöö a o mbei un ko fii kumutu a di saafu un sai dë” (Johanisi 8:32). Te i luku dee soni di dee keiki ta lei sëmbë te wan sëmbë dëdë, nöö an ta kai ku dee soni di di Bëibel ta lei u. Di Bëibel an ta lei u taa te wan sëmbë dëdë, nöö wan soni fëën ta libi go dou. Hën da te wan sëmbë dëdë, nöö an ta tja pen ku sitaafu möön. Söseei an sabi na wan soni möön, nöö an sa du hogi ku na wan sëmbë tu. Fëën mbei an dë fanöudu fuu go suku heepi a dee dëdë sëmbë, nasö du soni da de u hati u de an boonu ku u. Söseei an dë fanöudu fuu ta tuwë wata ta begi da de tu.

So sëmbë ta taki taa de sa fan ku dëdë sëmbë. Ma di soni dë na tuu. Kumafa u lei djunsu dë, nöö dee dëdë sëmbë „an sabi na wan hojo soni”. Dee sëmbë dee ta pakisei taa de ta fan ku dee sëmbë u de di dëdë, ta fan ku dee taku jeje di ta du kuma de da dee sëmbë di dëdë. Di sabi di u ko sabi andi ta pasa ku wan sëmbë te a dëdë, ta heepi u u dee taku jeje an feni u ganjan, söseei u de an du hogi ku u. Jehovah ta bai u taa wa musu pooba u fan ku dee dëdë sëmbë, u di a sabi taa te woo go nama ku dee taku jeje, nöö di soni dë o mbei hogi miti u.—Lesi Detolonomi 18:10-12.

WOTO SONI DI I SA LEI

Woo luku andi da woto soni di di Bëibel ta lei u te a nama ku dëdë, söseei woo luku unfa u sa ko ta möön biibi di Gadu di abi lobi, di an ta pena sëmbë te de dëdë.

3. Andi ta pasa tuutuu ku wan sëmbë te a dëdë?

A hii di goonliba, sëmbë ta biibi peipei soni te wan sëmbë dëdë. Ma na hii dee soni di sëmbë ta biibi dë sö tuutuu.

Andi sëmbë lo’ u taki taa ta pasa ku wan sëmbë te a dëdë?

Ee i kë sabi andi di Bëibel ta lei u, nöö pëë di FËLÖN.

FËLÖN: Andi ta pasa ku wan sëmbë te a dëdë?—Wan sati pisi (1:19)

Lesi Peleikima 3:20, nöö piki dee hakisi aki:

Te i luku di tëkisi di u lesi djunsu dë, nöö andi ta pasa ku wan sëmbë te a dëdë?
Wan soni dë a sëmbë sinkii dendu ta libi go dou baka te a dëdë u?

Di Bëibel ta taki soni u di dëdë u wan womi de kai Lazalosi, di bi dë wan gaan mati u Jesosi. Lesi Johanisi 11:11-14, nöö luku andi Jesosi bi taki u Lazalosi di a bi dëdë. Baka di dë, piki dee hakisi aki:

Ku andi Jesosi bi tei dëdë maaka?
Andi di tei di Jesosi tei dëdë maaka ku duumi aki ta lei u u dee sëmbë dee dëdë?
I ta biibi di soni di di Bëibel ta taki taa ta pasa ku wan sëmbë te a dëdë u?

4. Di sabi di u ko sabi andi ta pasa ku wan sëmbë te a dëdë ta tja wini ko da u

Di sabi di u ko sabi andi ta pasa ku wan sëmbë te a dëdë, ta mbei wa ta fëëë dëdë möön. Lesi Peleikima 9:10, nöö piki di hakisi aki:

Dee sëmbë dee dëdë sa du hogi ku u ö?

Te u ta biibi dee soni di di Bëibel ta taki taa ta pasa ku wan sëmbë te a dëdë, nöö wa o ta du soni u di u ta fëëë dëdë, söseei wa o ta tuwë wata a goon ta begi dëdë sëmbë. Lesi Jesaaja 8:19 ku Akoalimbo 4:11, nöö piki di hakisi aki:

Unfa i pakisei taa Jehovah ta fii te wan sëmbë ta tuwë wata a goon ta begi dee dëdë sëmbë nasö te wan sëmbë nango suku heepi a dee dëdë sëmbë?

Di sabi di u ko sabi andi ta pasa ku wan sëmbë te a dëdë, ta mbei u ta disa guwenti di an ta kai ku Jehovah

5. U ta feni kötöhati te u sabi andi ta pasa ku wan sëmbë te a dëdë

Sömëni keiki ta lei sëmbë taa te de dëdë, nöö Gadu o sitaafu de u dee hogi soni di de bi du. Ma u ta feni kötöhati u di u ko sabi taa na wan sëmbë ta tja pena ku fuka baka te de dëdë, aluwasi de bi du gaan hogi seei. Lesi Loomë 6:7, nöö piki di hakisi aki:

Ee u lesi djunsu a di tëkisi taa te wan sëmbë dëdë, nöö an fuu paka u dee zöndu fëën möön, nöö i si kuma wan sëmbë di dëdë ta tja pena ku fuka u dee soni di a bi du ö?

Möön u ta ko sabi Jehovah, möön woo ko fusutan taa nöiti a o mbei dee sëmbë dee dëdë tja pena ku fuka. Lesi Detolonomi 32:4 ku 1 Johanisi 4:8, nöö piki dee hakisi aki:

I si kuma wan Gadu di abi dee fasi dee kai a dee tëkisi aki o mbei sëmbë di dëdë tja pena ku sitaafu ö?
Di sabi di i ko sabi andi ta pasa ku wan sëmbë te a dëdë, ta da i kötöhati ö? Faandi mbei i taki sö?

SO SËMBË TA TAKI TAA: „Mi ta fëëë taa mi o tja sitaafu baka te mi dëdë.”

Un Bëibel tëkisi i sa lesi da sö wan sëmbë u dëën kötöhati?

ANDI I LEI?

Te wan sëmbë dëdë, nöö soni fëën an ta fika a baka di ta libi go dou. Dee dëdë sëmbë an ta tja pena ku sitaafu, söseei de an sa du hogi ku dee sëmbë dee dë a libi.