WOTO 2
Lebeka bi kë du soni u mbei Jehovah wai ku ën
Lebeka bi dë wan mujëë di bi lobi Jehovah. Hën manu de bi ta kai Isaki, nöö a bi lobi Jehovah tu. Unfa Lebeka ku Isaki du ko miti? Unfa Lebeka bi lei taa a kë du soni u Jehovah wai ku ën? Boo go lei möön soni u di mujëë aki.
Di mama u Isaki bi dë Sala, nöö hën tata bi dë Abahamu. De bi ta libi a di köndë Kaana, nöö dee sëmbë u di köndë dë an bi ta dini Jehovah. Ma Abahamu bi kë u di womi mii fëën tööu ku wan mujëë di bi ta dini Jehovah. Fëën mbei a bi manda di futuboi fëën de kai Eliazali u go suku wan mujëë da Isaki a di köndë de kai Halan, ka dee famii u Abahamu bi ta libi.
Lebeka bi dë kabakaba u wooko taanga u kisi wata da dee kamëli
Eliazali an bi go hën wanwan. Wantu woto wookoma u Abahamu bi go ku ën tu. De bi musu waka longi u de dou a Halan. De bi tja teni kamëli, nöö dee kamëli bi ta tja kado ku soni u njan. Unfa Eliazali bi o sabi un mujëë a bi musu pidi da Isaki? Di Eliazali ku dee woto futuboi dou a Halan, hën de sindo böö a wan baaku wata bandja. Eliazali bi sabi taa abiti möön sëmbë bi o ko kisi wata. Hën Eliazali begi Jehovah taa: ’Ee mi hakisi wan njönku mujëë u da mi pikisö wata u bebe, hën a da mi ku dee kamëli u mi wata u bebe, nöö sö mi o sabi taa di mujëë dë hën i kë u mi pidi da Isaki.’
Te wan pisi hën di njönku mujëë Lebeka ko dou a di baaku wata. Di Bëibel ta taki taa a bi dë wan gaan hanse mujëë seei. Eliazali bi hakisi ën ee a sa dëën so wata u bebe, hën a taa: ’Sondi seei antoobi. Mi o da i di wata, nöö mi o da dee kamëli fii tu.’ Pakisei di soni aki! Te dëë wata ta kii kamëli, nöö de ta bebe te a hia wata seei. I sa fusutan fa Lebeka bi o nango ta ko u kisi wata da dee kamëli. I ta si a di peentje fa Lebeka ta wooko taanga u?— Jehovah bi du leti kumafa Eliazali bi hakisi ën. Nöö di soni dë bi bigi dëën seei.
Eliazali bi da Lebeka gaan hia waiti kado. Lebeka bi piki Eliazali ku dee woto futuboi dee bi ko ku ën taa de sa tuwë lai a de pisi. Eliazali konda faandi mbei Abahamu bi mandëën ko dë, söseei a bi konda unfa Jehovah piki di bigi fëën. Dee famii u Lebeka bi feni ën bunu taa a bi sa tööu ku Isaki.
Lebeka go ku Eliazali a di köndë Kaana, nöö hën a tööu ku Isaki
Ma i si kuma Lebeka bi o kë tööu ku Isaki ö?— Lebeka bi sabi taa Jehovah hën bi manda Eliazali ko dë. Fëën mbei di dee famii fëën hakisi ën ee a kë go a Kaana u tööu ku Isaki, hën a piki: ’Aai, mi kë go.’ An naanaa, a go wantewante ku Eliazali. Di de dou a Kaana, hën Lebeka tööu ku Isaki.
U di Lebeka bi du andi Jehovah bi kë faa du, mbei Jehovah bi mbei a feni gaan bunu. Baka sömëni jaa, Jesosi bi ko dë wan u dee bakamii u Lebeka! Ee u dë kuma Lebeka, söseei te u ta piizii Jehovah hati, nöö Jehovah o da u gaan bunu tu.
