WOTO 13
Timoteo bi kë heepi sëmbë
Timoteo bi dë wan njönku kijoo di bi dë kabakaba u heepi sëmbë. A bi nango a sömëni kamian u heepi woto sëmbë. Di soni aki mbei a bi abi wan piizii libi. I bi o kë sabi möön soni u Timoteo u?—
Timoteo mama ku hën avo bi lei ën soni u Jehovah
De bi kiija Timoteo a di foto de kai Lisita. Hën mama Euniki ku hën avo Loisi bi ta lei ën soni u Jehovah sensi di a bi dë piki mii. Di Timoteo bi ko möön bigi, nöö a bi kë heepi woto sëmbë u de ko lei sabi soni u Jehovah.
Di Timoteo bi dë wan njönku kijoo, hën Paulosu bi hakisi ën faa go peleiki ku ën a woto kamian. Hën a piki ën taa: ’Aai, mi kë.’ A bi dë kabakaba u go heepi wotowan.
Timoteo bi go ku Paulosu a wan foto de kai Tesalonika di dë a Masadonia. De bi musu waka wan longi pasi u de bi sa dou ala, nöö baka di dë de bi musu tei boto. Di de go dou a Masadonia, nöö de bi heepi sömëni sëmbë u de ko sabi soni u Jehovah. Ma so u dee sëmbë hati bi ta boonu ku de, nöö de bi kë du hogi ku de tu. Fëën mbei Paulosu ku Timoteo kumutu a di foto, hën de go peleiki a woto kamian.
Timoteo bi abi wan piizii libi
Baka wantu liba, hën Paulosu hakisi Timoteo u de toona go baka a Tesalonika u go luku unfa a nango ku dee baaa ku dee sisa ala. Ee Timoteo bi kë toona go baka a di hogi foto dë, nöö a bi musu dë wan sëmbë di an ta fëëë. Ma Timoteo go ala, u di a bi ta booko hën hedi ku dee baaa ku dee sisa dee bi ta libi a di foto. A toona tja bunu buka ko da Paulosu. Soni bi nango bunu seei ku dee baaa ku dee sisa a Tesalonika!
Sömëni jaa longi Timoteo wooko ku Paulosu. Wan daka Paulosu bi sikifi wan soni. A bi taki taa Timoteo da di möön bunu sëmbë di a bi sa manda go heepi dee kemeente. Timoteo bi lobi Jehovah, nöö a bi lobi woto sëmbë tu.
I lobi woto sëmbë u, nöö i kë lei de soni u Jehovah tu ö?— Ee sö a dë, nöö iseei sa abi wan piizii libi kuma Timoteo tu!
