Lobi baaa ku lobi sisa:

Di lobi di u lobi Gadu ku di lobi di u lobi sëmbë ta mbei u ’go a hii nasiön sëmbë, nöö u heepi de u de ko dë bakama u Jesosi, nöö u dopu de’ (Mat. 28:19, 20; Maik. 12:28-31). Te u lobi sëmbë tuutuu, nöö woo sa dou di hati u dee sëmbë dee „ta si soni a di soifi fasi u de feni di libi u teego.”​—Tjab. 13:48.

A di ten di pasa, u bi ta buta pakisei seei a di möiti di u bi musu ta mbei u hoi soni a hedi, fuu bi sa peleiki da sëmbë, söseei fuu bi sa disa soni u lesi da de. Ma nöunöu u musu mbei möiti fuu ko ta fan möön bunu ku sëmbë. U kë lei sëmbë taa u lobi de u di woo ta taki u woto di de lobi. Fëën mbei u musu sa abi di köni u peleiki a tookatooka fasi. Boiti di dë, u musu ta buta pakisei bunu a dee bookohedi di hiniwan sëmbë di u miti ta abi, söseei a soni di de lobi. Wë unfa di buku aki o heepi u fuu du di soni dë?

Di buku aki abi 12 woto di ta taki u fasi di o heepi u fuu sa lei taa u lobi sëmbë, nöö u heepi de u de ko dë bakama u Jesosi. Hiniwan u dee woto ta taki u wan apaiti fasi di Jesosi nasö wan bakama fëën bi lei taa a bi abi di a bi ta peleiki da sëmbë. Wa sikifi dee woto u di buku fii hoi a hedi andi i musu ta taki te joo peleiki, ma u heepi i fii ko sabi unfa i sa lei taa i lobi sëmbë. U abi hii dee fasi aki fanöudu a hii dee peipei fasi fa u ta du di peleikiwooko. Ma woo luku unfa so u dee fasi aki dë fanöudu tjika te woo bigi fan ku wan sëmbë, te woo toona go luku wan sëmbë, nasö te woo hoi wan Bëibel studie.

Te i ta luku hiniwan u dee woto, nöö pakisei bunu fa i sa lei taa i abi di fasi di di woto ta taki fëën te i ta fan ku wan sëmbë u di kamian ka i ta dë. Mbei hii möiti fii lei taa i lobi Jehovah ku woto sëmbë. Kandë i abi di köni u peleiki a peipei fasi. Ma di möön fanöudu soni di o heepi i fii sa heepi sëmbë u de ko dë bakama u Jesosi, hën da te i abi lobi.

U ta tei ën u bigi seei taa u abi di gaandi u wooko makandi ku i (Sef. 3:9). Be Jehovah mbei i feni gaan bunu fa i ta mbei möiti go dou aki u lobi sëmbë, ta heepi de u de ko dë bakama u Jesosi!