FASI FA I SA BIGI FAN KU WAN SËMBË
WOTO 3
Lei taa i abi bunufasi
Mama wëti: „Ee i lobi wan sëmbë . . . joo ta fii ku ën.”—1 Kol. 13:4.
Andi Jesosi bi du?
1. Luku di FËLÖN, nasö lesi Johanisi 9:1-7. Baka di dë, nöö i buta pakisei a dee soni aki:
-
Andi Jesosi bi du fosu? A bi konda soni u di bunu buka da di bookowojoma, naa a bi kulëën fosu?—Luku Johanisi 9:35-38.
-
Faandi mbei i si kuma di womi bi kë haika Jesosi?
Andi u ta lei a Jesosi?
2. Wan sëmbë o möön kë haika u ee a ta si taa u ta booko u hedi ku ën.
Djeesi Jesosi
3. Lei taa i ta fii da di sëmbë. Kai pakisei a di fasi fa di sëmbë sa ta fii.
-
Hakisi iseei dee soni aki: ’Ku andi a sa ta booko hën hedi? Ku andi a bi o kë u mi heepi ën? Andi a bi o lobi?’ Te i kai pakisei a dee soni aki, nöö a o heepi i fii lei taa i abi bunufasi, söseei fii du soni u heepi di sëmbë.
-
Haika di sëmbë. Te i ta du di soni dë, i ta lei taa i ta si dee soni dee a ta booko hën hedi ku de, kuma fanöudu soni. Ee a ta piki i unfa a ta fii, nasö a konda da i un bookohedi a abi, nöö na bia taki u wan woto soni. Te i ta haikëën, nöö a o si taa i ta booko i hedi ku ën tuutuu.
4. Fan a wan suti fasi, söseei a wan lesipeki fasi. Di sëmbë sa jei a di fasi fa i ta fan, taa i ta fii dëën, söseei taa i kë heepi ën tuutuu. Köni ku dee soni dee i ta taki, söseei ku di fasi fa i ta fan. Na taki soni di sa mbei di sëmbë fii wan fasi.
5. Heepi di sëmbë a soni. Suku fasi fa i sa heepi di sëmbë. Te i ta du soni u heepi di sëmbë, nöö di soni dë sa mbei a o kë möön fan ku i.
