FASI FA I SA BIGI FAN KU WAN SËMBË
WOTO 5
Fan a wan lesipeki fasi
Mama wëti: „Te woon fan ku sëmbë, nöö un musu fan a wan bunuhati fasi.”—Kol. 4:6.
Andi Paulosu bi du?
1. Luku di FËLÖN, nasö lesi Tjabukama 17:22, 23. Baka di dë, nöö i buta pakisei a dee soni aki:
-
Unfa Paulosu bi pakisei u dee soni dee a bi si dee sëmbë u Atene bi ta du, di nama ku poipoi biibi?—Luku Tjabukama 17:16.
-
Paulosu an bi kuutu dee sëmbë u Atene. Ma unfa a bi taki soni u di biibi u de a wan lesipeki fasi, sö taa a bi konda di bunu buka da de?
Andi u ta lei a Paulosu?
2. Sëmbë o möön kë haika u ee u ta köni ku dee soni dee u ta taki, ku di fasi fa u ta fan, söseei te u sabi na un ten u musu taki wan soni.
Djeesi Paulosu
3. Taki soni di o hai sëmbë pakisei. Boo taa i musu fan ku wan sëmbë di an ta biibi a Jesosi Keesitu. A sa dë fanöudu fii luku unfa i sa hai di sëmbë pakisei go a di Bëibel nasö a Jesosi.
4. Na biinga piki di sëmbë taa di soni di a ta biibi an bunu. Dëën pasi faa sa konda unfa a ta pakisei. Ee a taki wan soni di an ta kai ku di Bëibel, nöö na buja ku ën (Jak. 1:19). Te i ta haikëën, nöö joo sa ko sabi andi a ta biibi, söseei faandi mbei a ta biibi ën.—Nöng. 20:5.
5. Suku u taki wan soni ka i ku di sëmbë o kai a wan, söseei gafëën te i sa. Di sëmbë sa ta biibi ku hii hën hati taa dee soni di di keiki fëën ta lei ën da bumbuu soni. Taki soni di o mbei i ku di sëmbë kai a wan fosu, nöö i heepi ën pikipiki faa ko fusutan andi di Bëibel ta lei.
