GOBAKA
WOTO 7
Mbei möiti go dou u heepi sëmbë
Mama wëti: „De bi nango ta lei sëmbë soni ta konda di bunu buka da lanti.”—Tjab. 5:42.
Andi Paulosu bi du?
1. Luku di FËLÖN, nasö lesi Tjabukama 19:8-10. Baka di dë, nöö i buta pakisei a dee soni aki:
-
Unfa u du sabi taa Paulosu bi ta mbei möiti go dou u heepi dee sëmbë dee bi kë jei di buka di a bi ta paaja?
-
Un hesi Paulosu bi ta toona go luku dee sëmbë dë baka, nöö un longi a du di soni dë?
Andi u ta lei a Paulosu?
2. U musu abi ten, söseei u musu mbei möiti fuu sa toona go luku dee sëmbë baka a sö wan fasi taa u sa bigi lei de soni u Bëibel hiniwan wiki.
Djeesi Paulosu
3. Dë kabakaba u go luku di sëmbë a di juu di bunu dëën. Hakisi iseei dee soni aki: ’Un ten bi o möön bunu da di sëmbë u mi ku ën fan? Naasë bi o möön bunu fuu miti?’ Dë kabakaba u go luku di sëmbë, aluwasi ee a dë taa di juu an kaba bunu da i.
4. Mbei wan buka ku di sëmbë. Hiniwan pasi te i ku di sëmbë kaba fan, nöö mbei möiti fii sabi di daka ku di juu di i ku ën sa toona fan baka. Nöö hoi iseei a di buka di i ku di sëmbë mbei.
5. Biibi taa soni sa tooka. Ja musu ta si kuma wan sëmbë an kë jei soni u di buka di u ta paaja, u di a ta taanga u miti ën nëën pisi nasö u di hii juu a ta abi soni ta du (1 Kol. 13:4, 7). Mbei möiti go dou u miti di sëmbë, ma wooko a wan köni fasi ku di ten fii.—1 Kol. 9:26.
