Hii u tuu abi möni fanöudu fuu sa sölugu di wosudendu fuu ku dee soni de abi fanöudu (Nöngö 30:8). Te i luku ën bunu, „möni ta tjubi sëmbë” (Peleikima 7:12). A sa dë wan taanga soni da sëmbë di toou u taki u möni soni a di toou libi u de. Ma na mbei möni tja toobi ko a di toou libi fii (Efeise 4:32). Wan womi ku wan mujëë di toou musu ta futoou deseei, nöö de musu ta taki makandi u luku un mëni möni de o ta puu u ta bai soni.

DI BËIBEL TA TAKI TAA: „Ee wan fuunu kë mbei wan wosu nöö unfa joo du? Ja o go sindo pakisei te i kaba luku ee di möni fii tjika u du di wooko bifö i go seti mbei ën ö?” (Lukasi 14:28). A dë fanöudu u ta taki makandi a fesi unfa woon wooko ku di möni fuunu (Amösi 3:3). Un musu ta taki a fesi andi ku andi un musu bai, söseei un mëni möni woon sa ta puu (Nöngö 31:16). Na te i a’ möni u bai wan soni, hën da i musu u bai ën nömönömö. Pooba u na ta tei paima buta a i liba. Na puu möni pasa di möni di i abi.​—Nöngö 21:5; 22:7.

SONI DI I SA DU:

• Ee a kaba u di liba, hën un si taa möni fika jeti, nöö un tu sëmbë musu taki makandi andi woon du ku di möni dë

• Ee un puu möni pasa di möni di un ta kisi, nöö un seeka soni sö taa wan ta puu sö hia möni möön. Wan soni di un sa du, hën da a bi o möön bunu fuun ta boi soni a wosu ka fuun ta bai njanjan a sitaati

DI BËIBEL TA TAKI TAA: „Fëën mbei u ta köni fu hii soni musu waka a tatai liba, na a Masa Gadu wojo wanwan nöö e, ma te dou a libisëmbë wojo seei tu” (2 Kolenti 8:21). Na ganjan di sëmbë di i ku ën toou te a nama ku un mëni möni i ta kisi nasö ku un mëni möni i ta puu u bai soni.

Hii juu i ku i mujëë nasö i ku i manu musu ta taki fiti bifö i buta taa joo go du wan gaan soni ku möni (Nöngö 13:10). Te un ta taki makandi fa woon wooko ku di möni fuunu, nöö di soni dë o mbei taa wan o ta mbei toobi a di toou libi fuunu. Ja musu ta si di möni fii di i ta wooko kuma fii wanwan möni nöö, ma fii ku i wosudendu.​—1 Timoteo 5:8.

SONI DI I SA DU:

• Un taki fiti a fesi un mëni möni hiniwan fuunu sa puu sö taa ja a’ fu ta hakisi di wotowan fii hii juu ufö i go puu wan möni

• Na wakiti te möni fuka ko a unu ufö un taki u möni soni