„Gadu seei wë mbei sëmbë sikifi hii dee soni dee dë a Gadu Buku.”​—2 Timoteo 3:16, Nyun-Grontapuvertaling.

I sa feni bumbuu piki u dee möön fanöudu soni di sëmbë ta hakisi deseei.​—Nöngö 2:1-5.

I sa ko sabi unfa i musu libi a di hii daka libi fii.​—Psalöm 119:105.

I sa ko abi tuutuu houpu da di ten di ta ko.​—Loomë 15:4.

Aai, u dii soni hedi:

• Hii dee pisi u Bëibel ta kai a wan. Söwan 40 sëmbë bi sikifi di Bëibel a wan pisiten u 1600 jaa. Gaansë u de an bi libi a di wan pisiten. Ma tökuseei hii dee pisi u di Bëibel ta kai a wan, nöö de ta taki u wan fanöudu woto!

• Sikifima di taki soni kumafa de pasa tuutuu. Sikifima u di ten aki an lo’ u taki u feti di di köndë u de lasi. Ma dee sikifima u Bëibel dë woto fasi. De ta taki u dee föutu di deseei mbei, söseei dee föutu di dee sëmbë u di köndë u de mbei tu.​—2 Kloniki 36:15, 16; Psalöm 51:1-4.

• Tjabukama woto di u sa futoou. Di Bëibel bi taki söwan 200 jaa a fesi u di booko di di awooten foto Babilon bi o booko kaba a sösö (Jesaaja 13:17-22). An ta taki u di fasi fa de bi o booko di foto kaba sösö nöö, ma a ta taki söseei u di sëmbë di bi o wini di köndë tei tu!​—Jesaaja 45:1-3.

  Sömëni woto tjabukama woto u Bëibel bi pasa finifini seei kumafa de bi taki de a fesi. Wë an ta foondo u seei, u di a dë di Wöutu u Gadu.​—2 Petuisi 1:21.