U ta hoi taa sö wan 12 milion sëmbë nasö möön hia seei o ko mëni di dëdë u Jesosi makandi ku u a 23 u gaanliba. Di takima di o hoi di taki o mbei de si gbelingbelin taa di lusupaima da wan kado di Gadu da u, söseei a o taki u dee gaan bunu dee Gadu o mbei libisëmbë feni! (Jes 11:6-9; 35:5, 6; 65:21-23; Jo 3:16) Ma na di takima wanwan nöö o da kotoigi a di apaiti okasi dë. Hii u tuu sa du ën tu, ku di da di woo da dee sëmbë dee o ko wan suti ko (Lo 15:7). Luku wantu soni di u sa du.

• Ka fuu go sindo ta wakiti u di komakandi bigi, u sa go taanpu ta da dee koma ku dee sëmbë dee an ta peleiki möön, wan suti ko. U musu ta lafu ta da de odi a wan suti fasi

• Hii fa joo ta buta pakisei a dee sëmbë dee i bi kai, tökuseei i musu buta pakisei a dee woto sëmbë dee ko a di komakandi tu u di de bi feni wan kai. Kai de u de ko sindo a i bandja, nöö be de luku dee Bëibel tëkisi makandi ku i, söseei be de kanda makandi ku i

• Baka di komakandi i sa piki dee hakisi di de abi. Ee ten an dë tjika fii du ën, u di wan woto kemeente musu ko hoi komakandi, nöö seti soni u go luku ën a di seei wiki dë. Ee ja sabi hën tëlëfön nöbu, nöö i sa taki taa: „Mi bi o kë sabi unfa i feni di komakandi. Unfa u sa miti?”