A bi pasa wan daka taa ja bi sabi andi i bi musu piki wan mati fii di bi ta tjali u di wan sëmbë fëën dëdë u? So juu wa ta kaba sabi andi u musu taki, nasö andi u musu du. Nöö te u kaba fëën wa ta piki di sëmbë na wan soni, söseei wa ta du na wan soni dëën tu. Ma soni dë di sa heepi i fuu sabi andi u musu du.

So juu di wan kodo soni di i sa du, hën da fii go luku di sëmbë nöö i taki nöö taa „U ta këë pena makandi e”. A sömëni u dee föluku te i baasa di sëmbë nasö te i dëën maun, nöö i ta lei taa i ta booko i hedi ku ën. Ee di sëmbë di ta tjali kë fan ku i, nöö haikëën ku hii i pakisei. Ma di möön bunu soni di i sa du, hën da i sa du wan soni da dee famii u di sëmbë ta tjali. Kandë i sa du wan soni da di sëmbë di ta tjali di hënseei an sa du di juu dë. I sa boi soni dëën, i sa heepi ën luku dee mii fëën, söseei i sa heepi ën seeka soni da di bei ee a kë. Te i ta du dee soni aki dëën, nöö a o möön heepi ën möön dee soni dee i bi o piki ën.

So juu i sa taki bunu soni u di sëmbë di dëdë. Kandë i sa taki u dee bunu fasi dee a bi abi, nasö u dee bunu soni dee a bi du. Dee lö soni aki o mbei di sëmbë di ta tjali lafu baka. Sö nöö wan mujëë de kai Pam bi taki. Di manu fëën de kai Ian dëdë söwan sikisi jaa kaa. A bi taki taa: „So juu sëmbë ta piki mi dee bunu soni dee Ian bi du di ma bi sabi seei, nöö di soni dë ta mbei mi fii bunu seei.”

Dee öndösukuma seei taki taa sömëni sëmbë ta ko heepi dee sëmbë di ta tjali u di wan sëmbë u de dëdë, ma hesihesi seei de ta fëëkëtë de, u di de nango dou ku di hiniwan daka libi u de. Fëën mbei ee wan mati fii ta tjali u di wan sëmbë fëën dëdë, nöö mbei möiti fii bëli ën nasö fii nango ta luku ën hii juu. * Sömëni u dee sëmbë di ta tjali u di wan sëmbë u de dëdë ta tei ën u bigi seei te i go luku de, nasö te i bëli de. A sö wan fasi de sa konda da i unfa de ta fii.

Luku di woto u wan njönku mujëë u di köndë Japan de kai Kaori. Libi fëën bi ko buuja seei di hën mama bi dëdë, söseei di hën gaan sisa bi dëdë 15 liba baka di dë. Ma kölöku taa dee mati fëën bi ta heepi ën nöömö. Wan u dee mati u Kaori de kai Ritsuko di bi gaanwan fëën gaanfa seei bi hakisi ën fu hën ku ën ko dë mati. Kaori bi taki taa: „Ma o ganjan unu e, ma bi kë u mi ku ën dë mati. Biga ma bi kë u na wan sëmbë tei mi mama kamian, nöö ma bi ta si kuma wan sëmbë bi o sa du ën tu. Ma di fasi fa Ritsuko bi ta libi ku mi, bi mbei mi ku ën ko dë mati. Hiniwan wiki u bi nango makandi a di peleikiwooko, nöö u bi nango makandi a dee komakandi tu. A bi ta hakisi mi u mi go bebe te ku ën, a bi ta tja soni u njan ko da mi, a bi ta manda biifi da mi, söseei hiniwan juu a bi ta sikifi soni a wan kaita manda da mi. Di fasi fa Ritsuko bi libi ku mi kuma wan mama bi heepi mi seei.”

Kaori mama dëdë tuwalufu jaa kaa, nöö nöunöu hën ku ën manu tei di peleikiwooko ta du kuma di wooko u de. Kaori taki taa: „Ritsuko bi ta lei taa a ta booko hën hedi ku mi jeti. Hii juu mi nango luku ën te mi go a di kamian ka de kiija mi. Mi ta fii bunu seei te mi dë makandi ku ën.”

Wan woto mujëë di wotowan bi ta heepi nöömö da wan Jehovah Kotoigi de kai Poli di ta libi a di köndë Cyprus. Di manu u Poli de kai Sozos bi dë wan womi di bi aki sutifasi. A bi dë wan gaanwomi di bi lo’ u kai sëmbë ko nëën pisi. A bi ta kai dee mii dee an bi abi mama ku tata möön ku mujëë di manu u de bi dëdë. De bi ta da woto ta njan makandi (Jakobosi 1:27). Ma a tjali taa di Sozos bi abi 53 jaa hën a ko dëdë, u di a bi kisi wan taku siki nëën töönzön. Poli bi taki taa: „Mi lasi di lobi manu u mi. Mi ku ën bi tööu sö wan 33 jaa.”

Baka di bei hën Poli ku di womi mii fëën Daniel, di abi 15 jaa foloisi go libi a di köndë Kanada.  Hën de bi bigi nango a di kemeente u Jehovah Kotoigi di dë a Kanada. Poli bi taki taa: „Dee mati dee u bi ko abi a di kemeente an bi sabi andi pasa a u libi, nöö de an bi sabi fa soni bi taanga da u tu. Ma di soni dë an bi tapa de u ko fan ku u, nöö de bi ta da u kötöhati ku dee soni de bi ta taki, söseei ku di heepi di de bi ta heepi u. Di fasi fa de bi ta libi ku u bi heepi di womi mii u mi seei, möönmöön fa a bi ta hangi hën tata! Dee sëmbë dee ta tei fesi a di kemeente bi lei taa de ta booko de hedi ku Daniel seei. Wan u dee sëmbë dë bi ta kai Daniel faa go ku ën te a bi nango sindo da woto ku dee mati fëën ku te a bi nango pëë bali.” Nöunöu soni nango bunu seei ku di mujëë ku di mii fëën.

U ko si taa sömëni soni dë di u sa du u heepi wan sëmbë di ta tjali u di wan sëmbë fëën dëdë. Di Bëibel seei ta da u kötöhati u di a ta piki u andi Gadu o du a di ten di ta ko da dee sëmbë fuu di dëdë.