1. Andi da wantu wëti di sikifi a di Bëibel, nöö un wini u ta feni te u ta hoi de?

JEHOVAH buta wëti da u a di Bëibel di ta piki u gbelingbelin andi a kë fuu du. A ta piki u taa wa musu ta dini poipoi gadu, wa musu ta fufuu, wa musu ta bebe dööngö, söseei taa wa musu libi fanafiti a di së u manu ku mujëë (1 Kolenti 6:9, 10). Jesosi, di Womi Mii u Jehovah, bi piki dee bakama fëën gbelingbelin taa: „Un musu ta waka a dee köndëköndë u goonliba ta paaja di buka u mi da hii sëmbë, be de bia ko dë bakama u mi kuma unu. Nöö un musu dopu de a di në u mi Tata ku di në u mi di Mii fëën aki ku di në u di Akaa [santa jeje, NW] fu mi Tata tu. Nöö un musu ta lei de u de piki hii dee soni tuu dee mi manda unu fuun musu ta du kaa. Nöö fa woon nango dë, nöö mi taki da unu taa mi o dë ku unu hiniwanten e, u tee a kaba u di goonliba aki” (Mateosi 28:19, 20). Hii soni di Jehovah ku Jesosi piki u taa u musu du, da soni di bunu da u. Dee wëti u Jehovah ta lei u unfa u musu sölugu useei ku dee famii fuu, de ta heepi u fuu sa abi wan möön bunu gösöntu, söseei fuu sa ta dë waiwai. Ma te u ta du dee soni dee Jehovah ta piki u fuu du, kuma di peleiki di u ta peleiki, nöö a ta wai ku u, söseei a ta mbei u feni bunu tu.

2, 3. (a) Faandi mbei di Bëibel an ta piki u andi u musu du a hii pikipiki soni di u kë du? (b) Un hakisi woo luku a di woto aki? (Luku di peentje a bigi u di woto.)

 ² Ma di Bëibel an ta piki u andi u musu du a hiniwan soni di u kë du. Kandë u kë bisi wan soni, ma di Bëibel an ta piki u gbelingbelin andi ku andi u musu bisi. Di soni aki ta lei u fa Jehovah köni tjika. Hii fa dee modo ta tooka hiniwan juu, ku hii fa sëmbë a hii së a goonliba abi peipei fasi u bisi, tökuseei dee wëti u Bëibel an ta tooka. Söseei di Bëibel an abi te hia wëti di ta taki un wooko u musu tei nasö un piizii u musu mbei nasö andi u musu du fuu sa dë gösöntu. Jehovah da hiniwan sëmbë pasi u taki da hënseei andi a o du te a nama ku dee soni aki, nöö a da dee hedima u dee wosudendu pasi u de du sö tu.

³ Fëën mbei te u musu du wan gaan soni a u libi, ma na wan wëti an dë a Bëibel di ta lei u andi u musu du, nöö u sa hakisi useei di soni aki: ’Jehovah a’ toobi ku di soni di mi kë du ö? A o wai ku hiniwan soni di mi o du solanga ma pasa dee wëti u Bëibel ö? Unfa mi sa dë seiki taa a o wai ku dee soni dee mi ta du?’

4, 5. Unfa dee soni dee u ta du sa tja bunu nasö hogi ko da u ku wotowan tuu?

⁴ So sëmbë ta si kuma de sa du andi de kë. Ma uu kë mbei Jehovah hati piizii. Fëën mbei ufö u du wan soni, u musu pakisei andi di Bëibel ta taki u di soni dë, nöö u musu du kumafa di Bëibel taki. Di Bëibel ta lei u unfa Gadu ta si di fasi fa sëmbë ta wooko ku buuu, nöö fëën mbei u ta du di soni di di Bëibel ta taki (Kenesesi 9:4; Tjabukama 15:28, 29). U sa begi Jehovah faa heepi u fuu du soni di ta kai ku ën.

⁵ Dee soni dee u ta du sa tja bunu nasö hogi ko da u. Te u ta du soni a wan bunu fasi, nöö woo sa ko dë gaan mati ku Jehovah. Ma te wa ta du soni a wan bunu fasi, nöö a sa mbei u ku ën an dë mati möön. Dee soni dee u ta du sa tja bunu nasö hogi ko da wotowan tu. Wa kë du na wan soni di sa mbei dee baaa ku dee sisa fuu hati boonu ku u, nasö di sa mbei di biibi u de ko suwaki. Söseei wa kë du soni di sa mbei dee baaa ku dee sisa fuu kisi toobi ku deseei a di kemeente. Fëën mbei a dë fanöudu fuu ta du soni a wan bunu fasi.​—Lesi Loomë 14:19; Galasia 6:7.

6. Andi musu heepi u te u kë du wan soni?

⁶ Unfa u sa du soni a wan bunu fasi te di Bëibel an piki u gbelingbelin andi u musu du? Ka fuu du andi useei bi o kë du, nöö u musu pakisei andi di soni dë sa tja ko da u, nöö u musu du soni di o mbei Jehovah hati piizii. Te u du sö, nöö u sa dë seiki taa a o heepi u u soni waka bunu da u.​—Lesi Psalöm 37:5.

7. Unfa u sa ko sabi andi Jehovah bi o kë fuu du, te na wan wëti dë a di Bëibel di ta piki u gbelingbelin andi u musu du?

⁷ Ma unfa u sa ko sabi andi o mbei Jehovah hati piizii? Efeise 5:17 ta piki u taa: „I musu mbei möiti fii sabi andi Gadu kë a i.” Te na wan wëti dë a di Bëibel di ta piki u gbelingbelin andi u musu du, nöö u musu mbei möiti fuu ko fusutan andi Jehovah kë fuu du. Unfa u sa du di soni dë? Wë u musu begi ën, nöö u musu mbei di santa jeje fëën tii u.

8. Unfa Jesosi bi fusutan andi Jehovah bi o kë faa du?

⁸ Hii juu Jesosi bi ta fusutan andi Jehovah bi kë faa du. Dee tu pasi di hangi bi ta kii dee gaan hia sëmbë, Jesosi bi begi, hën a bi du wan foombo wooko u dee sëmbë bi sa feni soni u njan (Mateosi 14:17-20; 15:34-37). Ma di Didibi bi piki Jesosi faa mbei dee sitonu ko toon bëëë di hangi bi ta kii ën a di sabana, hën a niinga u du di soni dë. (Lesi Mateosi 4:2-4.) Jesosi bi sabi hën Tata bumbuu, nöö fëën mbei a bi sabi taa Jehovah an bi o kë faa wooko ku di santa jeje u du soni da hënseei. A bi dë seiki taa hën Tata bi  o lei ën andi a musu du, nöö a bi sabi tu taa a bi o dëën soni u njan te a dë fanöudu.

9, 10. Andi o heepi u fuu sa du soni a wan köni fasi?

⁹ Useei sa du soni a wan bunu fasi kuma Jesosi tu, te u abi di futoou taa Jehovah o lei u andi a musu du. Di Bëibel ta taki taa: „Buta futoou a Jehovah ku hii i hati. Na buta futoou a iseei. Buta mëni nëën, a hii dee pasi i ta waka, nöö hënseei o leti i buta a pasi. Na si kuma i köni. Abi lesipeki da Jehovah, nöö disa soni di na bunu” (Nöngö 3:5-7). Te u ta lei soni u Bëibel, söseei te u ko sabi unfa Jehovah ta pakisei, nöö woo ko fusutan andi a kë fuu du, te musu du wan soni. Möön u ta ko sabi unfa Jehovah ta pakisei, möönmöön „hati fuu o ko moi”, nöö woo sa du dee soni dee a kë a u.​—Ezekiëli 11:19.

¹⁰ Boo taa wan mujëë di tööu go bai soni a wan wënkë, hën a si wan hanse susu. Ma di susu dii seei. Hii fa hën manu an sai dë, tökuseei a sabi andi hën manu bi o pakisei ee a bi o bai di dii susu dë. Unfa a du sabi? Wë hën ku ën tööu longi kaa, nöö fëën mbei a sabi unfa hën manu bi o kë faa wooko ku di möni di de abi. A di wan seei fasi te u ko sabi unfa Jehovah ta pakisei, ku te u ko sabi andi a bi du a di ten di pasa, nöö woo ta sabi andi a kë fuu du, te u musu du wan soni.

11. Andi u sa hakisi useei te u ta lesi di Bëibel nasö te u ta lei useei soni u Bëibel? (Luku di pisi „ Te i ta lei soni a di Bëibel, nöö hakisi iseei dee soni aki”.)

¹¹ Unfa u sa ko sabi unfa Jehovah ta pakisei? Wë, di möön fanöudu soni di u sa du, hën da u musu ta lesi di Bëibel, nöö u musu ta lei soni nëën hii juu. Te u ta du sö, nöö u sa hakisi useei dee soni aki: ’Andi di soni aki lei mi u Jehovah? Faandi mbei Jehovah du soni a sö wan fasi?’ Leti kumafa Dafiti bi hakisi Jehovah faa heepi ën faa ko sabi ën möön bunu, sö nöö useei musu hakisi Jehovah di soni dë tu. Dafiti bi sikifi taa: „Jehovah o, lei mi dee pasi fii. Lei mi unfa mi  musu waka a dee pasi fii. Heepi mi be mi waka a di tololoo pasi fii, nöö lei mi soni, biga ju da di Gadu di ta heepi mi. Hii di daka mi ta mëni i” (Psalöm 25:4, 5). Te u lei wan soni u Jehovah, nöö u sa pakisei na un ten u sa wooko ku di soni di u lei dë. U sa wooko ku di soni dë a di wosudendu fuu ö? U sa wooko ku ën te u dë a wooko u, te u dë a siköö u, nasö te u dë a di peleikiwooko u? Te u ta pakisei na un ten u sa wooko ku dee soni dee u lei, nöö an o taanga da u fuu sabi unfa Jehovah bi o kë fuu wooko ku de.

12. Unfa dee buku fuu ku dee komakandi fuu sa heepi u fuu ko sabi unfa Jehovah ta pakisei u wan soni?

¹² Wan woto soni di sa heepi u fuu ko sabi unfa Jehovah ta pakisei, hën da te u ta buta pakisei a dee soni u di Bëibel di di ölganisaasi ta lei u. Boo taa u kë du wan soni. Wë nöö u sa tei di Saanatöngö Watchtower Library di dë a CD ku di buku Ondrosuku Bijbel moro fini​—Gi Yehovah Kotoigi, u heepi u fuu ko sabi andi Jehovah ta pakisei u di soni dë. U sa feni wini a dee kemeente komakandi fuu te u ta haika bunu, te u ta da piki, ku te u ta pakisei fundu u dee soni di de ta lei u. Di soni aki o heepi u fuu ko ta pakisei kumafa Jehovah ta pakisei. Te u kaba fëën, woo sa du soni a wan bunu fasi di o mbei Jehovah hati piizii, nöö a o mbei u feni gaan bunu tu.

13. Konda wan woto di ta lei unfa u sa du soni a wan köni fasi, te u ta luku unfa Jehovah ta pakisei u wan soni.

¹³ Boo luku unfa u sa du soni a wan köni fasi te u ta mbei möiti u ko sabi unfa Jehovah ta pakisei. Kandë i kë du di pioniliwooko. I tooka sömëni soni a i libi fii sa peleiki möön gaanfa. Ma ja dë seiki ee joo ta dë waiwai möön te ja o ta kisi hia möni sö möön, söseei te ja o abi hia soni sö möön. A dë sö tuu taa di Bëibel an ta taki taa u musu du di pioniliwooko ufö u sa dini Jehovah. U sa dë peleikima di ta dini ën ku hën hati. Ma Jesosi bi taki taa Jehovah o mbei dee sëmbë dee ta disa soni u di Könuköndë hedi, feni gaan bunu. (Lesi Lukasi 18:29, 30.) Di Bëibel ta taki tu taa Jehovah ta wai te u ta du hii soni di u sa du u gafëën, nöö a kë fuu ta dë waiwai te u ta dini ën (Psalöm 119:108; 2 Kolenti 9:7). Te u ta begi u dee soni aki, ku te u ta pakisei fundu u de, nöö woo sa du soni di o tja wini ko da u, söseei di o mbei Jehovah mbei u feni gaan bunu.

14. Unfa i sa ko sabi ee wan pei fasi u bisi, ta kai ku Jehovah?

¹⁴ Luku wan woto aki möön: Kandë i lobi wan pei fasi u bisi soni, ma i sabi taa a o toobi wotowan a di kemeente te i bisi di soni dë. Di Bëibel an ta taki gbelingbelin u di fasi u bisi dë. Wë nöö unfa i sa ko sabi unfa Jehovah ta pakisei? Di Bëibel ta piki u taa: „Dee mujëë . . . an musu bisi a wan fasi u tja sen ko da de e, ma de musu bisi kumafa a fiti. Biga di gafa u de an musu dë a di fa de ta beei uwii, ta tuusi sömëni goutu soni nasö djamati ta bisi dee gaan diidii koosu. Nönö. Ma a musu dë a di fa de ta libi bunu ku sëmbë. Biga di lö gafa dë hën fiti dee mujëë dee ta abi di në taa de ta dini Gadu” (1 Timoteo 2:9, 10). Wë hii dee dinima u Jehovah sa lei wan soni a di tëkisi aki, te kisi dee womi seei tu. Te u abi sakafasi, nöö woo ta pakisei andi wotowan o pakisei u dee soni dee u ta bisi. Söseei u di u lobi dee baaa ku dee sisa fuu, mbei wa o kë du soni u mbei hati u de boonu, nasö wa o kë du soni u hati de (1 Kolenti 10:23, 24; Filipi 3:17). Te u ta hoi a pakisei andi di Bëibel ta taki, söseei unfa Jehovah ta pakisei, nöö woo sa du soni di ta kai ku ën.

15, 16. (a) Unfa Jehovah ta fii te u ta pakisei fanafiti soni a di së u manu ku mujëë? (b) Unfa u sa ko sabi andi Jehovah lobi te u kë mbei piizii? (c) Andi u musu du te u kë du wan gaan soni a u libi?

¹⁵ A di Bëibel u ta lei taa a ta hati Jehovah seei te sëmbë ta du hogihati soni, ku te de ta pakisei soni di na bunu. (Lesi Kenesesi 6:5, 6.) A dë gbelingbelin u si taa Jehovah an kë fuu ta  pakisei fanafiti soni a di së u manu ku mujëë. Wë ee u ta pakisei dee soni aki nöömö, nöö te u kaba fëën a sa pasa taa u go du de tu. Ma Jehovah kë fuu ta pakisei bunu soni. Jakobosi bi sikifi taa: „Di sëmbë di Gadu da fusutan, nöö a o dë u si nëën libi e. Biga hati fëën o dë limbolimbo, nöö a o ta libi fiifii ku sëmbë. A o ta lesipeki sëmbë. An o a’ taangajesi. A o ta a’ tjalihati u sëmbë. Hiniwanten a o ta mbei möiti faa heepi sëmbë a soni. An o ta luku taa wan sëmbë hei möön di otowan. An o ta ganjan sëmbë a soni tu. Sö dee sëmbë o libi e, dee abi di fusutan u Gadu” (Jakobosi 3:17). Fëën mbei di Bëibel ta lei u taa wa musu mbei na wan piizii di o sa mbei u pakisei soni di na fiti, nasö di o sa mbei u kë du soni di na bunu. Nöö ee u ta fusutan andi Jehovah lobi ku andi a ta buuse, nöö an o taanga da u fuu sabi un buku u sa lesi, un fëlön u sa luku ku un game u sa pëë. An o dë fuu hakisi woto sëmbë andi u musu du.

¹⁶ Te u musu du wan soni, nöö so juu sömëni soni dë di u sa du di sa mbei Jehovah hati piizii. Ma te u musu du wan gaan soni a u libi, nöö a bi o bunu fuu go suku lai a wan gaanwomi nasö a wan baaa nasö a wan sisa di taanga a di biibi (Titusi 2:3-5; Jakobosi 5:13-15). Ma wa musu hakisi di sëmbë dë faa taki da u andi u musu du. U musu pakisei bunu u dee soni u Bëibel dee u sabi, nöö nëën ufö useei musu du di soni di u kë du (Hebelejën 5:14). Apösutu Paulosu bi taki taa: „Hiniwan sëmbë musu piki Gadu hënseei a dee soni dee a ta du.”​—Galasia 6:5.

17. Un wini u ta feni te u ta du soni di ta kai ku Jehovah?

¹⁷ Te u ta du soni di ta mbei Jehovah hati piizii, nöö u ku ën o ko dë gaan mati, libi fuu o ta kai ku ën, söseei a o mbei u feni gaan bunu (Jakobosi 4:8). Nöö woo ko ta biibi Jehovah möön gaanfa tu. Boo ta pakisei fundu u dee soni dee u ta lesi a Bëibel fuu sa ko fusutan unfa Jehovah ta pakisei. Wë hii juu woo sa feni wan njunjun soni di u sa lei u Jehovah (Jöpu 26:14). Ma ee u ta mbei möiti u lei soni fëën nöunöu kaa, nöö woo ko köni, söseei woo sa du soni a wan bunu fasi (Nöngö 2:1-5). Dee soni dee libisëmbë ta pakisei ku dee soni di de ta kë du ta tooka, ma Jehovah an ta tooka nöiti. Di psalöm sikifima bi taki taa: „Dee soni dee Jehovah taki, de a ta du hii juu. Hii juu a ta du dee soni dee a abi a pakisei” (Psalöm 33:11). U ta fusutan gbelingbelin taa u sa du dee möön bunu soni te u ta lei u pakisei kumafa Jehovah ta pakisei, ku te u ta du soni di ta kai ku ën.