1. Un soni u sa ta hakisi useei?

I TA booko i hedi ku dee soni dee o pasa a di ten di ta ko u? Kandë i ta pakisei unfa soni o dë te de o poi di dee poipoi keiki, te Gögi u Magögi o ko feti ku u, nasö te di feti u Amagedon o bigi. Kandë i ta hakisi iseei taa: „Mi o sa hoi miseei a Gadu te dee soni aki o pasa u?” Ee i ta pakisei dee soni aki, nöö dee soni dee Jesosi taki a di tëkisi u di woto aki o heepi i. Jesosi bi piki dee bakama fëën taa: „Wan musu dë fukafuka e. Un biibi Gadu” (Joh. 14:1). Te u abi wan taanga biibi, nöö wa o ta fëëë andi o pasa a di ten di ta ko.

2. Andi u sa du u mbei di biibi fuu ko möön taanga, nöö andi woo luku a di woto aki?

² Di fasi fa u ta du soni te fuka ta miti u a di ten aki, sa heepi u fuu mbei di biibi fuu ko möön taanga. Fëën mbei te u ta pakisei fa u ta du soni te tesi ta miti u a di ten aki, nöö woo ko sabi andi u musu du fuu ko abi wan möön taanga biibi. Hiniwan tesi di miti u ka u hoi dou, ta mbei u ko abi wan möön taanga biibi. Di soni aki o heepi u fuu hoi dou te woto fuka o miti u a di ten di ta ko. A di woto aki, woo luku fö soni di bi pasa, di bi ta lei taa dee bakama u Jesosi bi musu ko abi wan möön taanga biibi. Woo taki söseei unfa dee lö soni aki sa miti u tu, söseei unfa dee soni aki sa seeka u da di ten di ta ko.

3. Andi dee soni dee Jesosi taki a Mateosi 6:30, 33 ta heepi u fuu ko fusutan?

³ Wan womi ta kë taa hën mujëë ku dee mii fëën musu abi soni u njan, soni u bisi, söseei wan kamian u libi. Ma so juu dee soni aki sa taanga u feni, u di di libi taanga seei. So u dee baaa ku dee sisa fuu lasi wooko, nöö hii fa de ta mbei hii möiti, tökuseei de an sa feni wan woto wooko. Wotowan bi ko feni  wooko, ma di wooko di de feni an fiti wan Keesitu sëmbë, nöö de an bi tei di wooko. Te dee lö soni aki ta miti u, nöö u musu ta biibi taa Jehovah o mbei u feni dee soni dee u abi fanöudu. Di soni aki Jesosi bi lei dee bakama fëën a di taki di a bi hoi a di kuun liba. (Lesi Mateosi 6:30, 33.) Te u ta biibi taa Jehovah an o disa u, nöö woo sa buta hii u pakisei a soni u di Könukönde u Gadu. Nöö te u ta si fa Jehovah ta da u dee soni dee u abi fanöudu, nöö u ku ën o ko dë möön gaan mati, söseei woo ko abi wan möön taanga biibi.

4-5. Andi bi heepi wan wosudendu di bi ta booko de hedi ku dee soni di de abi fanöudu?

⁴ Boo taki u sëmbë u wan wosudendu a di köndë Venezuela, di bi si fa Jehovah bi heepi de di de bi ta booko de hedi, u di de an bi sabi unfa de bi o feni dee soni di de abi fanöudu u de sa libi. Famii Castro bi abi wan goon u de ka de ta kiija mbeti, nöö de bi abi möni tjika u de sa bai dee soni di de abi fanöudu. Bakaten, hën wanlö sëmbë ku goni bi ko tei di goon u de, hën de buta ku de u de go kumutu dë. Baaa Miguel, di dë di hedima u di wosudendu, bi taki taa: „Nöunöu u ta wooko a wan piki pisi goon di wan sëmbë leni u, nöö u musu libi ku dee soni dee u feni a di goon dë. Hiniwan daka mi ta hakisi Jehovah faa da u andi u abi fanöudu di daka dë.” Hii fa di libi ta taanga da famii Castro, tökuseei de ta biibi taa di lobihati Tata fuu o ta da de dee soni di de abi fanöudu hiniwan daka. De nango a hii dee komakandi, söseei de ta du di peleikiwooko tu. De ta buta di Könuköndë u Gadu a di fosu kamian a de libi, nöö Jehovah ta da de dee soni di de abi fanöudu.

⁵ Di soni bi ta taanga da Miguel ku hën mujëë Yurai, nöö de bi ta buta pakisei a di fasi fa Jehovah bi ta heepi de. So juu Jehovah bi ta tei baaa ku sisa u da de dee soni di de bi abi fanöudu, nasö u heepi Miguel feni wooko. Söseei Jehovah bi ta mbei de feni dee soni di de abi fanöudu te dee baaa u di bëikantoo bi ta manda soni ko da de. Na wan daka seei Jehovah bi go disa de. Di soni aki bi mbei di biibi u di wosudendu u de ko möön taanga. Baka di de taki u wan okasi ka de bi si fa Jehovah bi heepi de, hën di gaan mujëë mii u de de kai Yoselin, bi taki taa: „A ta da mi taanga te mi si fa Jehovah heepi u. Hën da mi mati, nöö mi dë seiki taa hii juu a o ta heepi mi.” A taki tu taa: „Dee fuka dee miti u, seeka u da dee möön gaan fuka dee dë a u fesi ta ko.”

6. Unfa i sa ko abi wan möön taanga biibi te i abi moni fuka?

⁶ I dë ku möni fuka u? Ee sö a dë, hën da soni musu u ta taanga da i. Ma hii fa soni ta taanga da i, tökuseei i sa mbei di biibi fii ko möön taanga a di pisiten aki. Begi Jehovah, nöö lesi dee soni dee Jesosi taki a Mateosi 6:25-34, nöö i kai pakisei a de. Pakisei woto u sëmbë u di ten aki di Jehovah bi heepi, u di de bi ta buta hii de pakisei a di diniwooko u de (1 Kol. 15:58). Te i ta du di soni dë, nöö joo dë möön seiki taa Jehovah o heepi i, u di a bi heepi wotowan di bi miti dee seei soni kuma i. A sabi  andi i abi fanöudu, nöö a sabi unfa a musu heepi i. Te i ta si fa Jehovah ta heepi i nöunöu kaa, nöö di biibi fii o ko möön taanga, söseei a o heepi i fii hoi dou te möön gaan fuka o miti i a di ten di ta ko.​—Hab. 3:17, 18.

7. Kumafa Mateosi 8:23-26 ta taki, nöö unfa wan seki wata di bi ko, bi lei ee dee bakama u Jesosi bi abi biibi tjika?

⁷ Di Jesosi ku dee bakama fëën bi nango a wan kamian ku boto, hën di wata bigi seki gaanfa. Jesosi bi tei di soni di pasa dë u heepi de u de si taa de musu ko abi möön biibi. (Lesi Mateosi 8:23-26.) Di wata bi ta seki sö tee taa a bi ta ko a di boto dendu, ma di ten dë Jesosi bi ta duumi seei piii. Dee bakama bi ta fëëë te na soni, hën de weki Jesosi faa heepi de. Hën a hakisi de taa: „Womi, andi un ta fëëë sö u du? Piki nöö di biibi fuunu piki sö nö?” Dee bakama u Jesosi bi musu fusutan taa an bi dë wan taanga soni da Jehovah faa bi tjubi Jesosi ku dee sëmbë dee bi dë ku ën, u hogi an miti de. Andi u ta lei a di woto aki? Wë u ta lei taa te u abi wan taanga biibi, nöö a sa heepi u fuu pasa hiniwan fuka di ta miti u.

8-9. Un gaan soni bi miti Anel, nöö andi bi heepi ën faa hoi dou?

⁸ Pakisei fa di biibi u wan sisa de kai Anel bi ko möön taanga di wan gaan soni bi miti ën. Di sisa aki da wan sisa di an tööu jeti, nöö a ta dë a di paati de kai Pelito Liko. Di gaan soni di bi miti ën bi dë wan gaan ventu di bi ko a di kamian ka a ta libi. A di jaa 2017 hën di gaan ventu de kai Maria, bi booko di wosu u Anel. Di soni aki bi mbei a lasi di wooko fëën. Anel bi taki taa: „Di di soni aki pasa mi bi ta booko mi hedi. Ma mi bi lei u futööu Jehovah u di mi bi ta begi ën. Nöö ma bi mbei dee bookohedi u mi tapa mi u ma du dee soni dee mi bi musu du.”

⁹ Anel bi taki taa di haika di a bi ta haika dee lai u di ölganisaasi bi heepi ën faa hoi dou. A bi taki taa: „Te mi bi ta du dee soni dee di ölganisaasi bi ta piki u, nöö a bi ta heepi mi u mi dë bööböö. Jehovah bi tei dee baaa ku sisa u heepi mi. De bi ta da mi taanga, söseei de bi ta da mi dee soni dee mi bi abi fanöudu.” A taki söseei taa: „Jehovah da mi möön leki sa mi bi mëni seei, nöö di soni aki bi mbei di biibi u mi ko möön taanga.”

10. Andi i sa du te wan gaan „fuka” miti i?

¹⁰ I dë ku wan gaan „fuka” nöunöu ö? Kandë i dë ku wan fuka u di gaan ventu nasö gaan wata ko a di pisiwata ka i ta dë. Nasö kandë wan fuka miti i di dë kuma wan gaan ventu. Kandë i dë ku wan suwaki di ta mbei i fii bookosaka, nöö ja saandi i musu du. Kandë joo ta booko i hedi so juu, ma na mbei dee bookohedi fii mbei taa ja ta futoou Jehovah möön. Mbei möiti fii ta begi ën fajafaja fii ku ën sa ko dë möön gaan mati. Kai pakisei a dee fasi fa Jehovah bi heepi i kaa, sö taa di biibi fii sa ko möön taanga (Ps. 77:11, 12). I sa dë seiki taa nöiti a o go disa i.

11. Faandi mbei u musu dë kabakaba u haika dee baaa dee ta tei fesi?

 ¹¹ Un woto soni sa heepi i te fuka miti i? Kumafa Sisa Anel bi taki, u musu ta haika. Lei u futoou dee sëmbë dee Jehovah ku Jesosi ta fuoou. So juu, dee baaa dee ta tei fesi sa piki u fuu du wan soni di wa ta kaba fusutan faandi mbei u musu du ën. Ma Jehovah o mbei u feni gaan bunu te u ta haika. Dee woto dee dë a di Wöutu fëën, söseei dee woto u dee baaa ku dee sisa fuu ta lei u taa te u ta haika, nöö di soni dë sa tjubi u libi (Ëki. 14:1-4; 2 Klon. 20:17). Kai pakisei a dee woto aki. Te i ta du di soni dë, nöö a o heepi i fii dë kabakaba u du dee soni di di ölganisaasi u Jehovah ta piki i fii du (Heb. 13:17). Di soni dë o heepi i fu ja fëëë di gaan fuka di dë a u fesi ta ko.​—Nöng. 3:25.

12. Te u luku andi Lukasi 18:1-8 ta taki, nöö unfa biibi sa heepi u fuu hoi dou te soni an ta pasa a wan leti fasi?

¹² Jesosi bi sabi taa di biibi u dee bakama fëën bi sa ko suwaki te de ta si taa soni an ta pasa a wan leti fasi. U de bi sa hoi dou, a bi konda wan woto da de di sikiifi a di buku Lukasi. Jesosi bi konda wan woto u wan mujëë di manu fëën bi dëdë kaa. Di mujëë aki bi ta këë nöömö da wan kuutuma di an bi ta kuutu soni a wan leti fasi, faa bi sa kuutu di woto fëën a wan leti fasi. A bi dë seiki taa a bi o feni heepi ee a bi hoi dou. Te u kaba fëën, di kuutuma bi haikëën. Andi u sa lei a di woto aki? Jehovah ta kuutu soni a wan leti fasi. Fëën mbei Jesosi bi taki taa: „We nöö Masa Gadu di abi sö bunuhati wë? Ee wan sëmbë fëën ta begi ën nöömö a ndeti ku didia, an sa heepi ën nö? Biga a bi puu de a oto sëmbë kaa, nöö a o buuja ufö a ko a de nö?” (Lesi Lukasi 18:1-8.) Jesosi bi taki tu taa: „Te mi di ko dë libisëmbë mii aki toona ko, nöö mi o feni sëmbë möönsö di ta biibi a mi eti nö?” Te u abi pasensi, söseei te u ta hoi dou te de an ta kuutu soni da u a wan leti fasi, nöö u ta lei taa u abi wan taanga biibi kuma di mujëë di manu fëën bi dëdë kaa. Te u abi sö wan taanga biibi, nöö u sa dë seiki taa Jehovah o heepi u. U musu ta biibi tu taa begi o heepi u. So juu Jehovah sa piki dee begi fuu a wan fasi di wa bi mëni.

13. Unfa begi bi heepi wanlö sëmbë u wan wosudendu, di soni an bi ta pasa ku de a wan leti fasi?

¹³ Boo luku di woto u wan sisa de kai Vero di ta libi a di Demoklasia Lepubliek u Kongo. Di manu u di sisa aki an dë wan Keesitu sëmbë, nöö hën ku hën manu ku di mujëë mii u de u 15 jaa, bi musu fusi kumutu a di köndë u de di wan kulupu sodati bi ko feti a di pisiwata ka de ta dë. Di de bi dë a pasi nango, hën de ko dou a wan kamian ka de bi tapa di pasi, nöö naandë wanlö sodati bi kë kii de. Di Sisa Vero bi ta këë, hën di mujëë mii fëën bi ta pooba u dëën kötöhati. A bi ta begi taanga, ta kai Jehovah në somëni pasi a di begi fëën. Di a kaba u begi, hën di hedima u di sodati kulupu hakisi ën taa: „Di mii aki, ambë lei i u begi sö?” Hën di mujëë mii taa: „Mi mma wë lei mi e.  A wooko ku di soni di sikifi a Mateosi 6:9-13, u heepi mi u mi ko sa’ u begi.” Di hedima u dee sodati bi taki taa: „Mujëë mii, i ku dee gaansëmbë fii sa go fuunu. Be Jehovah di Gadu fii tjubi unu!”

14. Andi sa suwaki di biibi fuu, ma andi sa heepi u fuu hoi dou?

¹⁴ Dee lö woto aki ta lei u taa begi dë wan gaan fanöudu soni. Ma unfa a dë te ja feni wan piki a di begi fii wantewante, nasö a wan apaiti fasi? Leti kuma di mujëë u di woto u Jesosi, wa musu tapa u begi, nöö u musu ta biibi taa Jehovah an o disa u, söseei taa a o piki di begi fuu nöömö. I musu ta begi Jehovah go dou faa da i di santa jeje fëën (Fil. 4:13). Hoi a pakisei taa abiti möön Jehovah o mbei i feni gaan bunu sö tee taa joo fëëkëtë dee fuka dee be miti i a di ten di pasa. Te Jehovah ta heepi i fii hoi dou te fuka ta miti i, nöö di biibi fii o ko möön taanga, söseei joo sa hoi dou te woto fuka o miti i a di ten di ta ko.​—1 Pet. 1:6, 7.

15. Te u luku Mateosi 17:19, 20, nöö un bookohedi dee bakama u Jesosi bi abi?

¹⁵ Jesosi bi lei dee bakama fëën taa biibi bi o heepi de te soni bi o ta taanga da de. (Lesi Mateosi 17:19, 20.) Wan daka de an bi sa puu wan taku jeje a wan sëmbë liba, hii fa de bi du di soni dë somëni pasi kaa. Andi bi pasa? Jesosi bi lei de taa de bi musu abi möön biibi. A bi piki de taa ee biibi u de bi taanga tjika, nöö de bi o sa pasa fuka di bi o dë kuma hei kuun! A di ten aki, useei sa ta abi fuka di u ta si kuma wa o sa pasa.

16. Unfa di biibi u sisa Geydi bi heepi ën faa hoi dou baka di de kii hën manu?

¹⁶ Boo luku di woto u Sisa Geydi, di ta libi a di köndë Guatemala. De bi kii di manu fëën de kai Edi, wan daka di de bi kumutu a komakandi. Unfa di biibi di Geydi bi abi, bi heepi ën faa hoi dou hii fa a bi ta tjali? A bi taki taa: „Te mi ta begi nöö mi ta tuwë hii dee fuka u mi da Jehovah, nöö a ta heepi mi u mi de bööböö. Jehovah ta tei dee famii u mi ku dee mati u mi a di kemeente u heepi mi. Di diniwooko di mi ta du da Jehovah ta heepi mi u ma ta tjali poi, söseei a ta heepi mi u mi ta hoi dou hiniwan daka. Baka di di soni aki miti mi, hën mi ko lei taa aluwasi un fuka miti mi a di ten di ta ko, tökuseei mi o sa hoi dou u di Jehovah, Jesosi ku di olganisaasi u Jehovah o heepi mi.”

17. Andi u sa du te u abi wan fuka di dë kuma wan kuun da u?

¹⁷ I ta tjali u di wan sëmbë di i lobi dëdë u? I sa mbei di biibi fii ko möön taanga, te i ta tei ten u lesi woto u sëmbë a Beibel di bi toona ko a libi baka. I ta tjali u di de puu wan famii fii a di kemeente u? I sa öndösuku soni a di Wöutu u Gadu di o lei taa di fasi fa Gadu ta sitaafu u da di möön bunu fasi. Aluwasi un fuka ta miti i, i sa tei di okasi dë u mbei di biibi fii ko möön taanga. Konda hii soni di dë a i hati da Jehovah. Na ta dë i wawan, ma mbei möiti fii ta dë makandi ku dee baaa ku dee sisa fii (Nöng. 18:1). Mbei möiti fii ta du soni di o  heepi i fii hoi dou, aluwasi joo ta këë te i mëni dee soni dee bi pasa (Ps. 126:5, 6). Go a dee komakandi ku di peleikiwooko, söseei ta lesi di Bëibel go dou kumafa i bi naa. Boiti di dë, ta pakisei dee gaan bunu dee Jehovah o da i a di ten di ta ko. Te i ta si fa Jehovah ta heepi i nöunöu, nöö di biibi fii o ko möön taanga.

18. Andi i sa du ee i ko si taa di biibi fii an taanga tjika?

¹⁸ Ee wan fuka bi miti i di heepi i fii ko si taa di biibi fii an taanga tjika, nöö na lasi hati. Tei di okasi dë u mbei di biibi fii ko möön taanga. I sa hakisi di seei soni di dee apösutu u Jesosi bi hakisi. De bi hakisi taa: „U begi i gaantangi, heepi u be di biibi fuu ko möön taanga” (Luk. 17:5). Söseei kai pakisei a dee woto dee u taki u de a di woto aki. Pakisei hii dee pasi dee Jehovah bi heepi i, leti kumafa Baaa Miguel ku hën mujëë Yurai bi ta du. U musu ta begi Jehovah te fuka ta miti u, leti kumafa Sisa Anel ku di mujëë mii u Sisa Vero bi du ën. Boiti di dë, hoi a pakisei taa Jehovah sa tei dee famii fii ku dee baaa ku dee sisa fii u heepi i, leti kumafa a bi du da Geydi. Te i ta da Jehovah pasi faa heepi i te fuka ta miti i nöunöu, nöö joo möön dë seiki taa a o heepi i fii hoi dou te fuka o miti i a di ten di ta ko.

19. Fuun soni Jesosi bi dë seiki, nöö fuun soni i sa dë seiki tu?

¹⁹ Jesosi bi si taa dee bakama fëën bi abi möön biibi fanöudu, ma a bi dë seiki taa Jehovah bi o heepi de u de hoi dou te fuka bi o miti de a di ten di ta ko (Joh. 14:1; 16:33). A bi dë seiki taa gaan hia sëmbë o pasa di gaan fuka, u di de o abi wan taanga biibi (Ako. 7:9, 14). Joo dë wan u dee sëmbë dë u? Jehovah sa heepi i fii dë wan u dee sëmbë dë, ee i du hii soni di i sa du fii sa ko abi wan taanga biibi nöunöu kaa!​—Heb. 10:39.