1. Fuun soni u musu ta dë ku ën mëni, ma fuun soni u sa dë seiki?

 U SA dë ku di mëni taa sëmbë o du ku u te u ta du di peleikiwooko. Nöö a sa ko möön hogi a di ten di ta ko (Dan. 11:44; 2 Tim. 3:12; Ako. 16:21). Ma u sa dë seiki taa Jehovah o heepi u ka u abi heepi fanöudu. Faandi mbei u sa taki sö? Wë, u di hii juu Jehovah ta heepi dee dinima fëën u de du dee soni di a ta hakisi de u de du, aluwasi ee a dë wan taanga soni u du. Boo luku wantu soni di bi miti di tjabukama Ezekiëli, di bi ta peleiki da dee Dju dee bi dë a Babilon.

2. Unfa Jehovah bi taki taa dee sëmbë dee Ezekiëli bi musu peleiki da bi dë, nöö fuun soni woo taki a di woto aki? (Ezekiëli 2:3-6)

² Un pei sëmbë Ezekiëli bi musu peleiki da? Jehovah bi taki taa dee sëmbë dë bi abi „dëë wojo”, de bi abi „taanga jesi”, söseei de „an bi ta saka deseei” a Gadu basu. De bi hogi kuma maka, söseei kuma kukutulabu. Fëën mbei sömëni pasi Jehovah bi ta piki Ezekiëli taa: „Na fëëë”! (Lesi Ezekiëli 2:3-6.) Ezekiëli bi sa du di peleikiwooko u di Jehovah hën bi mandëën faa du di wooko dë, u di di jeje u Gadu bi ta dëën kaakiti, söseei u di di Wöutu u Gadu bi ta mbei di biibi fëën ko möön taanga. Unfa dee dii soni aki bi heepi Ezekiëli? Unfa de sa heepi u a di ten aki?

3. Un soni bi musu u da Ezekiëli taanga, nöö unfa Jehovah bi mbei a ko dë seiki taa a o heepi ën?

³ Jehovah bi piki Ezekiëli taa: „Mi ta manda i” (Eze. 2:3, 4).  Di soni aki bi musu u da Ezekiëli taanga. Faandi mbei? U di a kan taa Ezekiëli bi ta mëni taa sö wan soni Jehovah bi piki Mosesi ku Jesaaja tu di a bi mbei de ko dë tjabukama fëën (Ëki. 3:10; Jes. 6:8). Ezekiëli bi sabi tu unfa Jehovah bi heepi dee tu tjabukama dë u de du gaangaan wooko. Fëën mbei di Jehovah bi piki ën tu pasi taa: „Mi ta manda i”, nöö Ezekiëli bi sa dë seiki taa Jehovah bi o heepi ën tuutuu. Boiti di dë, sömëni pasi Ezekiëli bi sikifi taa: „Jehovah bi fan ku mi” (Eze. 3:16). An dë u taki taa Ezekiëli bi dë seiki taa Jehovah hën bi mandëën a di wooko. Ezekiëli tata bi dë wan mindima, nöö a kan taa a bi lei ën taa hii juu Jehovah ta piki dee tjabukama fëën taa a o ta dë ku de. Jehovah bi piki Isaki, Jakopu, ku Jelemia taa: „Mi dë ku i.”​—Ken. 26:24; 28:15; Jel. 1:8.

4. Un soni bi musu u da Ezekiëli taanga?

⁴ Unfa gaansë u dee Isaëli sëmbë bi o du te de bi o jei di buka? Jehovah bi taki taa: „Dee Isaëli sëmbë an o kë haika i, u di de an kë haika mi tu” (Eze. 3:7). U di de an bi ta haika Ezekiëli, mbei u sa taki taa de an bi ta haika Jehovah. Di soni di Jehovah bi piki Ezekiëli, bi mbei a fusutan taa na du an bi du di wooko fëën bunu mbei sëmbë an bi kë haika ën. Jehovah bi piki ën tu taa te dee soni di a konda da dee sëmbë pasa tuutuu, nöö „de o fusutan taa wan tjabukama bi dë ku de” tuutuu (Eze. 2:5; 33:33). Dee soni aki bi da Ezekiëli taanga faa ta du di peleikiwooko.

5. Andi o mbei u ko abi degihati, te u luku Jesaaja 44:8?

⁵ Useei ta ko abi degihati, u di u sabi taa Jehovah hën manda u fuu du di peleikiwooko. A kai u gaan soni, u di a kai u dee „kotoigi” fëën (Jes. 43:10). Wan gaandi di dë! Leti kumafa Jehovah bi piki Ezekiëli taa: „Na fëëë”, sö nöö  a ta piki u tu taa: „Wan musu fëëë.” Faandi mbei wa musu fëëë dee felantima fuu? U di leti kuma Ezekiëli, Jehovah hën manda u fuu du di wooko, söseei u di a dë ku u.​—Lesi Jesaaja 44:8.

6. (a) Unfa Jehovah ta lei u taa a o heepi u tjika? (b) Andi ta da u taanga?

⁶ Jehovah ta paamusi u taa a o heepi u. Kölö sö ufö Jehovah bi taki taa: „Unu da kotoigi u mi”, hën a bi taki taa: „Ee un dë a wata liba, mi o dë ku unu. Ee un musu bazia lio, ma o mbei un singi. Ee un musu pasa a faja dendu, wan o tjuma. Na wan faja o tjuma unu” (Jes. 43:2). Dee fuka dee ta miti u so juu te u ta du di peleikiwooko, ta hia sö te taa u sa tei de maaka ku gaan wata. Söseei dee tesi ta hebi sö te taa u sa tei de maaka ku faja. Ma hii fa a dë sö, tökuseei Jehovah ta heepi u fuu ta peleiki go dou (Jes. 41:13). A di ten aki, gaansë u sëmbë an ta haika di bosikopu di u ta tja, leti kumafa a bi dë a di ten u Ezekiëli. Ma di soni dë an kë taki taa wa ta du di peleikiwooko a wan bunu fasi. U ta feni taanga u di u sabi taa Jehovah ta wai ku u, te a ta si taa u ta paaja di buka fëën go dou. Apösutu Paulosu bi taki taa: „Hiniwan [sëmbë] o kisi ën paima kumafa a bi wooko” (1 Kol. 3:8; 4:1, 2). Wan sisa di ta du di pioniliwooko sömëni jaa longi kaa bi taki taa: „A ta mbei mi fii bunu seei fa mi sabi taa Jehovah ta paka u u dee möiti dee u ta mbei.”

7. Unfa Ezekiëli bi ta fii di a bi ta mëni dee soni dee a bi si a di wojolimbo sunjan? (Luku di peentje u di kafiti.)

⁷ Ezekiëli bi si unfa di jeje u Gadu bi taanga tjika. Di soni di Ezekiëli bi si a wan wojolimbo sunjan, bi heepi ën faa fusutan taa di santa jeje bi ta heepi dee taanga ëngëli, söseei taa di jeje dë bi ta tja di gaan wagi u Jehovah (Eze. 1:20, 21). Andi Ezekiëli bi du di a si di soni aki? Wë a bi sikifi andi bi pasa. A bi taki taa: „Di mi si di soni aki, hën mi bendi hedi.” Di soni aki bi bigi da Ezekiëli sö tee taa a kai a goon bendi hedi (Eze. 1:28). Di a bi ta mëni di wojolimbo sunjan dë, nöö a bi musu u mbei a ko dë möön seiki taa di jeje u Gadu sa heepi ën faa du di peleikiwooko go dou.

8-9. (a) Andi bi pasa ku Ezekiëli di Jehovah bi piki ën faa „hopo taanpu”? (b) Na un woto fasi möön Jehovah bi da Ezekiëli taanga faa du di wooko fëën?

⁸ Jehovah bi piki Ezekiëli taa: „Womi o, hopo taanpu, biga mi kë fan ku i.” Di piki di Jehovah bi piki Ezekiëli faa hopo taanpu, söseei di jeje u Gadu, bi da Ezekiëli di taanga di a bi abi fanöudu faa hopo. Ezekiëli bi taki taa: „Jeje ko a mi liba. A mbei mi hopo taanpu” (Eze. 2:1, 2). Di santa jeje u Gadu bi ta tja Ezekiëli, hii di pisiten di bi ta du di peleikiwooko (Eze. 3:22; 8:1; 33:22; 37:1; 40:1). Di jeje u Gadu bi da Ezekiëli di taanga di a bi abi fanöudu. A bi dëën taanga faa peleiki da dee sëmbë u di pisiwata ka a bi dë, dee bi abi „taanga jesi” (Eze. 3:7). Jehovah bi piki Ezekiëli taa: „Mi mbei di fesi fii ko taanga kuma di u de, söseei mi mbei mindifesi fii ko taanga kuma di u de. Mi mbei mindifesi fii ko kuma djamati sitonu. Awa, mi mbei a ko möön taanga möön di möön taanga sitonu di dë. Ja musu fëëë de, söseei ja musu tëëmë te i si de fesi” (Eze. 3:8, 9). A bi dë kuma Jehovah bi ta piki Ezekiëli taa: ’Na mbei di abi di dee sëmbë aki abi taanga jesi, mbei i fii bookosaka e. Mi o da i taanga.’

⁹ Baka di dë, di jeje u Gadu bi heepi Ezekiëli go dou ku di peleikiwooko. A bi taki taa: „Jehovah bi dë ku mi.” A bi tei wan wiki u di tjabukama aki fusutan di buka di Jehovah bi dëën faa paaja. Ma di soni aki bi mbei taa a bi sa dë seiki u dee soni dee a bi ta taki (Eze. 3: 14, 15). Te u kaba fëën, hën Jehovah piki ën faa go a wan lagi kamian, nöö ala di jeje u Gadu bi ko nëën liba (Eze. 3:23, 24). Ezekiëli bi sa bigi du diniwooko fëën awaa!

10. Un heepi u abi fanöudu fuu sa du di peleikiwooko, nöö faandi mbei u abi di heepi dë fanöudu?

¹⁰ Un heepi u abi fanöudu fuu sa du di peleikiwooko? Fuu sa piki di hakisi aki, nöö pakisei unfa soni bi waka da Ezekiëli. Ufö a bi bigi di peleikiwooko seei, nöö di jeje u Gadu bi dëën di kaakiti di a bi abi fanöudu. Leti kuma Ezekiëli, u sa ta du di peleikiwooko u di di jeje u Gadu ta heepi u. Faandi mbei u taki sö? Wë u di Saatan ta feti ku u fuu sa tapa ku di peleikiwooko (Ako. 12:17). Sömëni sëmbë ta si kuma Saatan taanga sö tee taa libisëmbë an o sa feti wini ën. Ma u ta wini ën ku di peleiki di u ta peleiki! (Ako. 12:9-11) Unfa sö? Te u ta du di peleikiwooko, nöö u ta lei taa wa ta fëëë Saatan. Hiniwan pasi te u peleiki da wan sëmbë, nöö Saatan ta lasi wan feti. Andi u ta ko fusutan te u ta peleiki go dou, hii fa sëmbë ta du ku u? Wë a ta dë gbelingbelin u si taa Jehovah ta heepi u ku di santa jeje fëën, söseei taa a ta wai ku u.​—Mat. 5:10-12; 1 Pet. 4:14.

11. Andi di jeje u Gadu o du da u, nöö andi u musu du fuu sa ta feni di soni dë nöömö?

¹¹ Un woto soni u ta lei te u pakisei di fasi fa Jehovah bi heepi Ezekiëli faa bi sa peleiki go dou? U ta lei taa di jeje u Gadu sa da u di kaakiti di u abi fanöudu fuu sa pasa hiniwan tesi di sa miti u a di peleikiwooko (2 Kol. 4:7-9). Andi u sa du ee u kë dë seiki taa Gadu o ta da u di jeje fëën go dou? Wë u musu ta begi ta hakisi Gadu di jeje fëën nöömö, nöö u musu dë seiki taa a o haika dee begi fuu. Jesosi bi piki dee bakama fëën taa: ’I musu ta begi Masa Gadu nöömö e, ta suku di soni i abi fanöudu nëën, ta naki di döö fëën.’ Nöö Jehovah o da u di santa jeje fëën.​—Luk. 11:9, 13; Tjab. 1:14; 2:4.

12. Naasë di pampia lolu bi kumutu, nöö andi bi dë sikifisikifi nëën, te u luku Ezekiëli 2:9–3:3?

¹² Di jeje u Gadu bi da Ezekiëli di degihati di a bi abi fanöudu faa peleiki go dou. Ma boiti di dë, di Wöutu u Gadu bi mbei di biibi u Ezekiëli ko möön taanga. A wan wojolimbo sunjan Ezekiëli bi si wan maun ta panjan wan pampia lolu. (Lesi Ezekiëli 2:9–3:3.) Naasë di pampia lolu dë bi kumutu? Andi bi sikifi nëën? Unfa a bi da Ezekiëli taanga? Wë boo taki u dee soni aki. Di pampia lolu bi kumutu a di könubangi u Gadu. Ezekiëli bi si fö ëngëli, nöö a kan taa Jehovah bi mbei wan u de dëën di pampia lolu (Eze. 1:8; 10:7, 20). Dee soni dee bi dë sikifisikifi a di pampia lolu bi dë wan langa kuutu bosikopu di bi kumutu a Gadu. Ezekiëli bi musu konda di bosikopu aki da dee taanga jesi Isaëli sëmbë (Eze. 2:7). Di bosikopu bi dë sikifisikifi a dee tu së u di pampia lolu tuu.

13. Andi Jehovah bi piki Ezekiëli faa du ku di pampia lolu, nöö faandi mbei di pampia lolu bi suti u njan?

¹³ Jehovah bi piki di tjabukama fëën faa njan di pampia lolu ’u te bëë fëën fuu’. Nöö di soni dë a du. A njan di pampia lolu kaba fiaa. Andi di soni aki bi kë taki? A bi kë taki taa Ezekiëli bi musu fusutan di bosikopu di a musu paaja bumbuu. A bi musu biibi di bosikopu, sö taa a bi sa dë kabakaba u paajëën da sëmbë. Baka di dë, hën wan foombo soni ko pasa. Ezekiëli bi ko si taa di pampia lolu „bi suti kuma höniwata” (Eze. 3:3). Unfa sö? Wë di wooko di a bi sa wooko da Jehovah bi dë wan gaan suti soni dëën (Ps. 19:8-11). A bi tei ën u bigi seei taa Jehovah bi tei ën faa du tjabukama wooko dëën.

14. Andi bi heepi Ezekiëli faa dë kabakaba u du di wooko di Gadu bi dëën?

¹⁴ Bakaten, Jehovah bi piki Ezekiëli taa: „Haika dee soni dee mi o konda da i, nöö i tjubi hii de tuu a i hati” (Eze. 3:10). Wë Jehovah bi kë piki Ezekiëli fu an fëëkëtë dee soni dee bi dë sikifisikifi a di pampia lolu, söseei taa a bi musu kai pakisei a de. Di Ezekiëli bi du dee soni aki, hën di biibi fëën bi ko möön taanga. Boiti di dë, a bi ko abi wan apaiti bosikopu u konda da dee sëmbë (Eze. 3:11). U di Ezekiëli bi fusutan di bosikopu u Gadu bunu, söseei u di a bi ta biibi ën ku hii hën hati, mbei a bi dë kabakaba u bigi du di peleikiwooko, söseei u du ën te dou a di kaba.​—Luku Psalöm 19:14.

15. Andi u musu tjubi a u hati ee u kë hoi dou?

¹⁵ Ee u kë ta du di peleikiwooko go dou, nöö a dë fanöudu fuu seei ta lei soni a di Wöutu u Gadu, u di a o heepi u u di biibi fuu ko möön taanga. U musu tjubi hii dee soni dee Jehovah ta lei u tuu a u hati. A di ten aki Jehovah ta fan ku u ku di Wöutu fëën, di Bëibel. Andi u sa du sö taa di Wöutu u Gadu sa ta tooka di fasi fa u ta pakisei, di fasi fa u ta fii, ku dee soni dee ta mbei u ta du so soni?

16. Andi u musu ta du ku di Wöutu u Gadu, nöö unfa u sa mbei a dou u hati?

¹⁶ U ta feni kaakiti te u ta njan, söseei te u ta da di sinkii fuu pasi faa mbei di soni di u njan saka. Wë te u ta lei soni a di Wöutu u Gadu, söseei te u ta kai pakisei nëën, nöö di biibi fuu ta ko möön taanga. Di soni aki Jehovah kë lei u ku di woto u di pampia lolu. A kë fuu ’fuu u bëë’ ku di Wöutu fëën. Di soni dë kë taki taa u musu mbei möiti fuu fusutan di Wöutu fëën bunu. U sa du di soni aki te u ta begi, te u ta lesi, söseei te u ta kai pakisei a dee soni dee u ta lei. Di fosu soni, hën da u musu begi fuu sa seeka u hati faa sa tei dee lei u Gadu. Baka di dë, nöö u musu lesi wan  pisi u di Bëibel. Te u lesi kaa, nöö u musu tapa kölö sö fuu kai pakisei a dee soni dee u lesi. Andi o pasa te u du dee soni aki? Möön u ta kai pakisei a dee soni dee u ta lesi, möön woo ta fusutan di Wöutu u Gadu, nöö möön di biibi fuu o ko möön taanga.

17. Faandi mbei a dë fanöudu fuu ta kai pakisei a dee soni dee u ta lesi a di Bëibel?

¹⁷ Faandi mbei a dë fanöudu fuu ta lesi di Bëibel, söseei fuu ta kai pakisei nëën? Wë u di a o ta da u di kaakiti di u abi fanöudu fuu sa ta paaja di buka u di Könuköndë a di ten aki, söseei fuu sa paaja di kuutu bosikopu, a di ten di ta ko. Boiti di dë, te u ta kai pakisei a dee bunu fasi dee Jehovah abi, nöö u ku ën ta ko dë möön gaan mati. Dee soni aki o mbei u ko ta dë bööböö.​—Ps. 119:103.

18. Andi dee sëmbë u di pisiwata ka u ta peleiki o ko fusutan, nöö faandi mbei de o ko fusutëën?

¹⁸ Ezekiëli bi dë wan tjabukama, ma wa dë tjabukama. Ma tökuseei u dë kabakaba u paaja di buka u Jehovah di dë sikifisikifi a di Wöutu fëën, u te a taki taa a tjika. Te di daka dou ka Gadu o kuutu sëmbë, nöö dee sëmbë u di pisiwata ka u ta peleiki an o sa taki taa de an bi jei na wan bosikopu, nasö taa Gadu an bi manda buka da de (Eze. 3:19; 18:23). Ma de o ko fusutan taa di buka di u bi ta paaja bi kumutu a Gadu tuutuu.

19. Andi o heepi u fuu sa ta du di peleikiwooko?

¹⁹ Andi o heepi u fuu sa ta du di peleikiwooko go dou? Wë dee seei dii soni dee bi heepi Ezekiëli sa heepi u tu. U ta peleiki go dou, u di u sabi taa Jehovah hën manda u fuu du di wooko aki, u di di santa jeje fëën ta da u kaakiti, söseei u di di Wöutu fëën ta mbei di biibi fuu ko möön taanga. Jehovah ta heepi u fuu ta du di peleikiwooko u „tee dou di kaba”.​—Mat. 24:13.