1. Andi a kë taki u dë ku limbo pakisei? (2 Timoteo 4:5)

 TE SONI ta miti u, nöö a sa taanga da u fuu hoi useei a Jehovah ku di ölganisaasi fëën. Andi sa heepi u fuu hoi dou te a dë sö? Wë u musu dë ku limbo pakisei, u musu dë setiseti u soni an puu u a pasi, söseei u musu dë gingin a di biibi. (Lesi 2 Timoteo 4:5.) U ta lei taa u dë ku limbo pakisei te wa ta booko u hedi pasa maaka, te u ta wegi soni luku bunu, söseei te u ta mbei möiti u si soni kumafa Jehovah ta si soni. Te u ta du dee soni dë, nöö wa o mbei dee fii fuu tii u.

2. Andi woo luku a di woto aki?

² A di woto di pasa, u bi taki u dii soni di bi sa miti u a döösë u di kemeente. A di woto aki, woo taki u dii soni di sa pasa ku u a di kemeente, di sa mbei a taanga da u fuu hoi useei a Jehovah. Dee soni aki da: Te wan baaa nasö wan sisa du wan soni ku u di hati u, te de bë wojo da u, nasö te a ta taanga da u fuu hoi useei a Jehovah, u di soni tooka a di ölganisaasi. Unfa u sa dë ku limbo pakisei, söseei unfa u sa hoi useei a Jehovah ku di ölganisaasi fëën te dee lö soni aki ta miti u?

3. Andi sa pasa ee wan baaa nasö wan sisa du wan soni ku u di hati u?

³ A pasa kaa taa wan baaa nasö wan sisa, nasö kandë wan gaanwomi u kemeente du wan soni ku i di hati i ö? Wë di baaa nasö di sisa an du di soni dë ku hënseei kë u hati i (Lom. 3:23; Jak. 3:2). Ma hii fa a dë sö, tökuseei di soni di a du hati i. A kan tu taa ja bi sa duumi a ndeti, u di i bi ta pakisei di soni di bi pasa. Kandë i bi bia ko ta hakisi iseei taa: ’Ee wan baaa nasö wan sisa hën du di soni aki, nöö a dë sö taa di ölganisaasi u Gadu hën disi tuutuu ö?’ Di soni dë Saatan bi o kë fii pakisei  (2 Kol. 2:11). Ee u ta pakisei sö, nöö di soni dë sa paati u ku Jehovah ku di ölganisaasi fëën. Wë nöö ee wan baaa nasö wan sisa du wan soni ku u di hati u, nöö andi sa heepi u fuu dë ku limbo pakisei, sö taa wa ko ta si soni kumafa Saatan kë?

4. Unfa Josëfu bi lei taa a bi dë ku limbo pakisei di sëmbë bi libi hogi ku ën, nöö andi u sa lei a di fasi fa a bi du soni? (Kenesesi 50:19-21)

⁴ Na hoi sëmbë a bëë. Di Josëfu bi dë wan njönku kijoo, hën dee baaa fëën bi libi hogi ku ën. De bi ta buuse ën, nöö so u de bi kë kii ën seei (Ken. 37:4, 18-22). Te u kaba fëën, de bi sei ën faa go ta wooko da sëmbë kuma saafu. Di soni dë bi mbei taa tesi bi miti Josëfu söwan 13 jaa longi. Josëfu bi sa ko ta hakisi hënseei ee Jehovah lobi ën tuutuu. Söseei a bi sa ko ta hakisi hënseei ee Jehovah bi disëën di soni bi ta miti ën. Ma Josëfu an bi hoi sëmbë a bëë. Ma a bi dë ku limbo pakisei, söseei a bi hoi hënseei. Di a bi feni okasi u toona du wan soni ku dee baaa fëën baka, nöö an bi du soni ku de, ma a bi lei de taa a lobi de, hën a da de paadon (Ken. 45:4, 5). Josëfu bi du soni a di lö fasi dë, u di a bi sa’ u wegi soni luku a wan bunu fasi. An bi buta pakisei a dee soni dee bi ta miti ën, ma a bi buta pakisei a di soni di Jehovah kë. (Lesi Kenesesi 50:19-21.) Andi u ta lei a di soni aki? Ee sëmbë libi hogi ku i, nöö hati fii an musu boonu ku Jehovah, söseei ja musu ko ta si kuma a disa i. Ma a bunu fii kai pakisei a di fasi fa a ta heepi i fii hoi dou. Boiti di dë, te wotowan libi hogi ku i, nöö mbei möiti fii da de paadon, u di i lobi de.​—1 Pet. 4:8.

5. Unfa Baaa Miqueas bi lei taa a dë ku limbo pakisei, di sëmbë bi du soni ku ën di hati ën?

⁵ Buta pakisei a di soni di bi miti wan gaanwomi u kemeente de kai Miqueas b, di ta libi a Zuid-Amerika. A ta mëni jeti taa wanlö baaa di bi abi faantiwöutu a di ölganisaasi u Jehovah, bi du wan soni ku ën di bi hati ën gaanfa seei. A bi taki taa: „Nöiti mi bi booko mi hedi ku soni sö wan daka. Ma bi sa ta duumi a ndeti, söseei mi bi ta këë, u di mi bi ta fii kuma saanfa-u-du u mi bi kaba.” Hii fa soni bi dë sö, tökuseei Miqueas bi dë ku limbo pakisei, söseei a bi mbei hii möiti u hoi hënseei. A bi ta begi Jehovah sömëni pasi, ta hakisi ën faa dëën di santa jeje fëën, söseei faa dëën taanga faa sa hoi dou. A bi öndösuku soni a dee buku fuu tu di bi o sa heepi ën. Andi u ta lei a di soni aki? Ee wan baaa nasö wan sisa du wan soni di hati i, nöö na hopo ligei, söseei mbei möiti fu ja pakisei soni di an bunu. Kandë wan soni pasa di mbei di sëmbë taki di soni di a taki, nasö di mbei a du di soni di a du. Fëën mbei i musu begi Jehovah, nöö i hakisi ën faa heepi i fii si di soni kumafa di sëmbë ta si ën. Di soni dë sa heepi i fu ja ko ta si kuma ku sabi di sëmbë du di soni ku i, söseei a sa heepi i fii dëën paadon (Nöng. 19:11). Hoi a pakisei taa Jehovah ta si andi ta miti i, nöö a o da i taanga fii sa hoi dou.​—2 Klon. 16:9; Peleik. 5:8.

6. Faandi mbei a dë fanöudu fuu si di bë di Jehovah ta bë wojo da u kuma wan fasi fa a ta lei taa a lobi u? (Hebelejën 12:5, 6, 11)

⁶ Te de bë wojo da u, nöö di soni dë sa hati u gaanfa seei. Ma ee u buta pakisei tumisi a di fasi fa u ta fii, nöö u sa bigi si kuma di sitaafu di u kisi an bi dë fanöudu, nasö taa de an kuutu soni a wan leti fasi. Di soni aki sa mbei taa wa si di sitaafu kumafa u musu si ën. A sa mbei taa wa si taa u di Jehovah lobi u mbei a ta sitaafu u. (Lesi Hebelejën 12:5, 6, 11.) Nöö ee u da dee fii fuu pasi u de tii u, nöö woo da Saatan pasi faa mbei u du soni di an bunu. An kë fuu tei di sitaafu di Jehovah ta da u, söseei an kë fuu nama ku Jehovah ku di  kemeente möön tu. Ee de bë wojo da i, nöö andi sa heepi i fii dë ku limbo pakisei go dou?

7. (a) Unfa Jehovah bi tei Petuisi faa wooko dëën, di a tei di leti di de leti ën buta a pasi, kumafa u ta si a di peentje? (b) Andi i ta lei a di fasi fa Petuisi bi du soni?

⁷ Tei di leti di de leti i buta a pasi, nöö i du soni woto fasi. Na wan kodo pasi nöö Jesosi bi leti Petuisi buta pasi a dee woto apösutu fesi (Maik. 8:33; Luk. 22:31-34). Di soni dë bi musu u mbei Petuisi fii wan fasi. Ma tökuseei Petuisi bi hoi hënseei a Jesosi go dou. A bi tei dee soni dee Jesosi bi piki ën, hën a mbei möiti u du soni woto fasi. Jehovah bi pakëën u di a bi du soni a di lö fasi dë. A bi dëën gaangaan faantiwöutu a di kemeente (Joh. 21:15-17; Tjab. 10:24-33; 1 Pet. 1:1). Andi u ta lei a di fasi fa Petuisi bi du soni? Te wa ta buta pakisei tumisi a di fasi fa u ta fii te de leti u buta a pasi, söseei te u tei di soni di de piki u, hën u mbei möiti u du soni woto fasi, nöö u ku wotowan tuu ta feni wini fëën. Te u ta du soni a di lö fasi dë, nöö Jehovah ku dee baaa tuu o sa möön wooko ku u.

8-9. Unfa Baaa Bernardo bi fii bigibigi di de bi bë wojo dëën, ma andi bi heepi ën faa ko ta si soni a di soifi fasi?

⁸ Boo luku andi bi pasa ku wan baaa de kai Bernardo, di ta libi a di köndë de kai Mozambiki. A bi dë wan gaanwomi, hën de bi puu di faantiwöutu dë nëën. Unfa Bernardo bi ta fii bigibigi? A bi taki taa: „Mi bi hoi dee baaa a bëë, u di ma bi lobi di sitaafu di mi bi kisi.” Bernardo bi ta booko hën hedi ku di fasi fa dee sëmbë u di kemeente bi o si ën. A bi taki taa: „A bi tei wantu liba ufö mi ko ta si soni a di soifi fasi, söseei a bi tei wantu liba ufö mi bi bigi futoou Jehovah ku di ölganisaasi fëën baka.” Andi bi heepi Bernardo faa ko ta si soni a di soifi fasi?

⁹ Bernardo bi tooka di fasi fa a bi ta si soni. A bi taki taa: „Di mi bi dë wan gaanwomi jeti, nöö mi bi ta lesi Hebelejën 12:7 da wotowan u heepi de u de si di leti di Jehovah ta leti de buta a pasi, a di soifi fasi. Fëën mbei mi bi ko hakisi miseei taa: ’Ambë ku ambë musu du di soni di di tëkisi aki ta taki?’ Hën mi ko si taa hii dee dinima u Gadu tuu musu du ën, te kisi miseei tu.’” Baka di dë, Bernardo bi du woto soni jeti faa ko ta futoou Jehovah ku di ölganisaasi fëën baka. A bi mbei möiti faa ko ta lesi di Bëibel, ta kai pakisei nëën möön gaanfa. Hii fa a bi ta booko hën hedi jeti ku di fasi fa dee baaa ku dee sisa bi o si ën, tökuseei a bi ta peleiki makandi ku de, söseei a bi ta da piki a dee komakandi. Bakaten Bernardo bi ko dë  wan gaanwomi baka. Ee de leti i buta a pasi kumafa de bi leti Bernardo buta a pasi, nöö mbei möiti fu ja buta pakisei tumisi a di fasi fa i ta fii, ma tei di sitaafu di Jehovah da i, nöö i mbei möiti u du soni woto fasi c (Nöng. 8:33; 22:4). Ee i du di soni dë, nöö i sa dë seiki taa Jehovah o paka i, u di i ta hoi iseei nëën ku di ölganisaasi fëën.

10. Un soni di bi tooka, bi mbei a taanga da so u dee Isaëli sëmbë u de hoi deseei a Jehovah?

¹⁰ A sa taanga da u te wan soni tooka a di ölganisaasi. Ee wa köni, nöö u sa mbei di soni dë paati u ku Jehovah. Pakisei luku unfa soni bi sa dë da dee Isaëli sëmbë. Ufö Jehovah bi da Mosesi di Wëti, nöö dee hedima u wosudendu, de bi ta du wooko kuma mindima. De bi ta mbei begitafa, söseei de bi ta tjuma soni da Jehovah, da deseei ku dee sëmbë u de wosudendu (Ken. 8:20, 21; 12:7; 26:25; 35:1, 6, 7; Jöpu 1:5). Ma baka di Jehovah da dee Isaëli sëmbë di Wëti, nöö an bi da dee hedima u wosudendu pasi u de du dee soni dë möön. A bi buta dee bakamii u Alon ko dë mindima, u de bi sa ta tjuma soni dëën. Sensi di ten dë, ee wan hedima u wosudendu bi du di wooko di wan mindima bi musu du, hii fa an dë wan bakama mii u Alon, nöö a bi sa lasi hën libi d (Leif. 17:3-6, 8, 9). A sa dë sö taa di soni dë bi dë wan u dee soni di bi mbei Koola, Daatan, Abilam ku 250 gaan womi bi hopo fia ku Mosesi ku Alon u? (Nöb. 16:1-3) Wë wa sa taki taa sö a dë. Ma u sabi taa Koola ku dee woto womi dee bi dë ku ën a wan së, an bi hoi deseei a Jehovah möön. Andi i sa du ee a ta taanga da i fii hoi iseei a Jehovah u di soni ko tooka a di ölganisaasi fëën?

11. Andi u ta lei a di fasi fa dee bakamii u Kohati bi du soni?

¹¹ Wooko makandi ku di ölganisaasi u Jehovah te wan soni tooka nëën. Di dee Isaëli sëmbë bi dë a di sabana, nöö dee bakamii u Kohati bi abi wan apaiti faantiwöutu. Te dee Isaëli sëmbë bi o foloisi go a wan woto kamian, nöö so u dee bakamii u Kohati bi ta tja di Këdë u di Buka (Nöb. 3:29, 31; 10:33; Jos. 3:2-4). Wan gaandi seei de bi feni dë! Ma soni bi ko tooka di dee Isaëli sëmbë bi dou a di Paamusi Köndë. An bi dë fanöudu u sëmbë ta tja di Këdë möön. Fëën mbei a di ten di Salumon bi dë könu, a bi buta so u dee bakamii u Kohati u de dë kandama, u de dë sëmbë di ta jabi dee gaandöö, söseei u de dë sëmbë di ta luku kamian ka de bi ta buta soni u njan (1 Klon. 6:31-33; 26:1, 24). Soni an dë di ta lei taa dee bakamii u Kohati bi ta kaagi, nasö taa de bi hakisi u de da de wan woto wooko u di de bi ta du wan apaiti wooko fosu. Andi u ta lei a di soni aki? Wë u ta lei taa u musu ta wooko makandi ku di ölganisaasi u Jehovah te wan soni tooka nëën, aluwasi ee de da u wan woto wooko fuu du. U musu wai ku hiniwan wooko di de da u fuu du. Hoi a pakisei taa na di wooko di i ta du hën ta mbei taa Jehovah kai i gaan soni. Jehovah ta kai di piki di u ta piki hën buka gaan soni möön di wooko di u ta du dëën.​—1 Sam. 15:22.

12. Unfa Sisa Zaina bi fii di de bi dëën wan woto wooko fa du?

¹² Buta pakisei a di woto u wan sisa de kai Zaina, di de bi da wan woto wooko faa du, hii fa a bi lobi di wooko di a bi ta du gaanfa seei. De bi hakisi ën faa go du di  apaiti-pioniliwooko baka di a wooko a Bëtëli möön leki 23 jaa longi. A bi taki taa: „Hati u mi latja seei vau sö, di de hakisi mi u mi go du wan woto wooko. Mi bi fii seei kuma ma ta sa’ u du na wan bumbuu soni möönsö, söseei mi bi ta hakisi miseei hii juu taa: ’Un föutu seei mi mbei?’” A tjali taa so baaa ku sisa u di kemeente bi mbei soni ko möön hebi da Zaina, u di de bi ta piki ën taa: „Ee i bi bunu sö, di ölganisaasi an bi o puu i a Bëtëli.” A wan pisiten Zaina bi ta fii bookosaka sö tee taa a bi ta këë hiniwan ndeti. Ma a bi taki taa: „Ma bi mbei di soni dë mbei ma ko ta futoou di ölganisaasi u Jehovah möön, söseei ma bi mbei a mbei mi ko ta si kuma Jehovah an lobi mi tuutuu.” Andi bi heepi Zaina faa dë ku limbo pakisei?

13. Andi Sisa Zaina bi du faa bi sa ko ta fii möön bunu?

¹³ Zaina bi ko ta fii möön bunu. Andi bi heepi ën? A bi lesi woto a dee buku fuu di bi ta taki u di soni di bi ta miti ën. Di woto „Yu Kan Kakafutu te wan Sani E Meki Yu Lasi-ati!” bi heepi ën gaanfa seei. Di woto aki dë a di Waktitoren u 1 u bakajailiba u di jaa 2001. Di woto aki ta taki unfa a bi sa taanga da di sikifima u Bëibel de kai Maikusi, di a bi musu du wan woto wooko. Zaina bi taki taa: „Di woto u Maikusi hën bi heepi mi u ma fii bookosaka möön.” Zaina bi ta nama ku dee mati fëën tu. An bi buta taa an bi o ta hulu wotowan möön, söseei an bi ta sindo ta pakisei taa hën wanwan nöö soni ta miti. A bi ko si taa di jeje u Jehovah hën ta tii di ölganisaasi, söseei taa dee baaa dee bi ta tei fesi bi lobi ën tuutuu. Ma a bi ko fusutan tu taa di ölganisaasi u Jehovah musu du hii soni di a sa du, u mbei di wooko u Jehovah go a fesi.

14. Un soni bi taanga da Baaa Vlado, nöö andi bi heepi ën?

¹⁴ Vlado da wan gaanwomi u kemeente di abi 73 jaa, nöö a ta libi a di köndë de kai Solofeinia. A bi taanga da di baaa aki di di kemeente ka a bi dë bi ko mökisi ku wan woto kemeente, hën de tapa di Könuköndë zali ka de bi ta hoi komakandi. A bi taki taa: „Ma bi sa fusutan faandi mbei de bi tapa sö wan waiti Könuköndë zali. A bi hati mi, u di kölö sö baka di u bi kaba u seeka di zali hën de tapa ën. Mi da wan tëmbëma, nöö mi bi mbei so u dee soni dee u bi buta a di zali. Boiti di dë, u di di kemeente fuu bi go mökisi ku wan wotowan, mbei u bi musu du sömëni soni di an bi dë kösökösö da u dee gaansëmbë.” Andi bi heepi Baaa Vlado  faa wooko makandi ku di ölganisaasi? A bi taki taa: „Hii juu i ta feni wini te i du soni kumafa di ölganisaasi u Jehovah taki. Dee lö soni aki ta heepi u fuu sa dë seekaseeka da dee soni dee o tooka a di ten di ta ko.” A ta taanga da i u di di kemeente ka i dë ko mökisi ku wan wotowan, nasö u di de hakisi i fii du wan woto wooko u? I sa dë seiki taa Jehovah ta fusutan unfa i ta fii. Te i ta wooko makandi ku di ölganisaasi u Jehovah, söseei te i ta hoi iseei a Jehovah ku di ölganisaasi fëën, nöö soni o waka bunu da i.​—Ps. 18:25.

15. Andi sa heepi u fuu dë ku limbo pakisei, te soni pasa a di kemeente di sa mbei a taanga da u fuu hoi useei a Jehovah?

¹⁵ U di di kaba u di goonliba aki ta zuntu, mbei u musu ta dë ku di mëni taa soni sa pasa a di kemeente di sa mbei a taanga da u fuu hoi useei a Jehovah. Fëën mbei u musu dë ku limbo pakisei. Ee i fii taa wan baaa nasö wan sisa libi hogi ku i, nöö mbei hii möiti fu ja hoi ën a bëë. Ee de bë wojo da i, nöö mbei möiti fu ja buta pakisei tumisi a di fasi fa i ta fii, ma tei di sitaafu di Jehovah da i, nöö i mbei möiti u du soni woto fasi. Boiti di dë, te di ölganisaasi u Jehovah tooka wan soni di nama ku i, nöö mbei hii möiti u wooko makandi ku ën.

16. Andi sa heepi i fii futoou Jehovah ku di ölganisaasi fëën go dou?

¹⁶ I sa futoou Jehovah ku di ölganisaasi fëën go dou te soni ta taanga da i. Ma fii sa du di soni dë, nöö i musu dë ku limbo pakisei. Hën da ja musu hopo ligei, ma i musu hoi iseei, nöö pakisei te i kaba, nöö mbei möiti fii ko ta si soni kumafa Jehovah ta si soni. Dë kabakaba u öndösuku soni u dee dinima u Gadu u di ten di pasa, dee bi hoi dou di dee soni dee ta miti i bi miti de, nöö i kai pakisei a di fasi fa de bi du soni. Begi Jehovah faa heepi i. Söseei ja musu buta taa ja o ta mökisi ku dee baaa ku dee sisa fii möön. Te i du sö, nöö aluwasi andi ta pasa, Saatan an o sa paati i ku Jehovah ku di ölganisaasi fëën.​—Jak. 4:7.