1. Unfa u du sabi taa Jehovah kë fuu ku ën dë mati?

 JEHOVAH ta piki u fuu pusa go nëën (Jak. 4:8). A kë dë Gadu fuu, a kë dë Tata fuu, söseei a kë dë mati fuu. A ta piki dee begi fuu, söseei a ta heepi u te soni ta taanga da u. Boiti di dë, a ta tei di ölganisaasi fëën u lei u soni, söseei u tjubi u. Wë nöö andi u musu du fuu ku Jehovah ko dë gaan mati?

2. Unfa u sa ko dë mati u Jehovah?

² U sa ko dë mati u Gadu te u ta begi ën, söseei te u ta lesi di Wöutu fëën, ta kai pakisei nëën. Te u ta du sö, nöö u ta ko lobi ën, söseei u ta tei dee soni dee a ta du da u u bigi. Di soni aki o mbei taa woo kë piki hën buka a soni, söseei woo kë gafëën, u di a fiti gafa (Ako. 4:11). Möön u ta ko sabi Jehovah, möön woo ta futoou hën ku di ölganisaasi fëën, di a buta u heepi u.

3. Unfa Didibi ta pooba u paati u ku Jehovah, ma andi o heepi u fu wa disa Jehovah ku di ölganisaasi fëën? (Psalöm 31:13, 14)

³ Ma Didibi ta pooba u paati u ku Jehovah, möönmöön te u dë ku fuka. Unfa a ta du di soni aki? A ta mbei möiti pikipiki fu wa ko ta futoou Jehovah ku di ölganisaasi fëën möön. Ma u sa köni be an kisi u. Te u abi wan taanga biibi, söseei te u ta futoou Jehovah ku hii u hati, nöö wa o disa di Gadu fuu ku di ölganisaasi fëën.​—Lesi Psalöm 31:13, 14.

4. Andi woo taki a di woto aki?

⁴ A di woto aki, woo taki u dii soni di sa pasa ku u a döösë u di kemeente. Hiniwan u dee soni aki sa mbei taa wa ko ta futoou  Jehovah ku di ölganisaasi fëën möön. Unfa dee soni aki sa du paati u ku Jehovah? Nöö andi u sa du u Saatan an feni u kisi ku de?

5. Unfa dee bookohedi dee u ta abi sa mbei taa wa ko ta futoou Jehovah ku di ölganisaasi fëën möön?

⁵ So juu a sa pasa taa soni ko taanga da u, u di dee famii fuu ta du ku u, nasö u di u lasi di wooko fuu. Unfa dee lö soni aki sa mbei taa wa ko ta futoou di ölganisaasi u Jehovah möön, söseei unfa de sa paati u ku ën? Te u dë ku wan bookohedi wan hii pisiten, nöö a sa pasa taa u lasi hati, nasö taa u fii bookosaka. Nöö te soni dë sö, nöö Saatan sa wooko ku dee lö okasi aki u mbei u ko ta si kuma Jehovah an lobi u. Saatan kë fuu si kuma Jehovah nasö di ölganisaasi fëën ta mbei soni ta miti u. Sö wan soni bi miti so Isaëli sëmbë a di köndë Egepiti. Bigibigi de bi ta biibi taa Jehovah hën bi manda Mosesi ku Alon u de ko puu de a katibo (Ëki. 4:29-31). Ma bakaten, di Falao bi mbei di libi ko möön taanga da de, hën de bi taki taa Mosesi ku Alon de bi mbei di soni dë ta miti de. De bi piki de taa: „Un mbei Falao ku dee futuboi fëën ko ta buuse u. A dë kuma un da de wan feti ufangi u de kii u” (Ëki. 5:19-21). De bi ta taki taa dee dinima u Gadu de bi mbei hogi ta miti de. Tjali soni wë e! Andi sa heepi i fii futoou Jehovah ku di ölganisaasi fëën go dou, hii fa fuka ta miti i wan hii pisiten kaa?

6. Andi u ta lei a di tjabukama de kai Habaki, te a nama ku dee fuka dee ta miti u? (Habaki 3:17-19)

⁶ Konda hii soni di dë a i hati da Jehovah, nöö dëën pasi faa heepi i. Sömëni soni bi miti di tjabukama de kai Habaki. A wan pisiten, a bi djei kuma an bi dë seiki möön ee Jehovah bi ta booko hën hedi ku ën. Fëën mbei a bi begi Jehovah, hën a bi konda hii soni di bi dë nëën hati dëën. A bi taki taa: „Jehovah o, un longi mi musu bai kai i fii ko heepi mi? . . . Faandi mbei i ta dë piii ta luku fa sëmbë ta du hogi?” (Hab. 1:2, 3) Jehovah bi piki di begi u di futuboi fëën (Hab. 2:2, 3). Di Habaki bi pakisei unfa Jehovah bi heepi dee sëmbë fëën, hën a bi ko ta dë waiwai baka. A bi ko dë seiki taa Jehovah ta booko hën hedi ku ën, söseei taa a bi o heepi ën faa hoi dou aluwasi un tesi ta miti ën. (Lesi Habaki 3:17-19.) Andi u sa lei a di soni aki? Wë te tesi ta miti i, nöö begi Jehovah, nöö i konda dëën unfa i ta fii. Baka di dë, nöö i dëën pasi faa heepi i. Te i du sö, nöö i sa dë seiki taa Jehovah o da i di kaakiti di i abi fanöudu fii sa hoi dou. Te i ko si taa a dë ku i tuutuu, nöö di biibi fii o ko möön taanga.

7. Andi dee famii u Sisa Shirley bi kë faa pakisei, ma andi bi heepi ën faa biibi Jehovah go dou?

⁷ Du dee soni dee i musu ta du a di biibi. Luku andi bi heepi wan sisa de kai Shirley, di tesi bi miti ën. b Di sisa aki ta libi a di köndë de kai Papua New Guinea. Dee sëmbë fëën bi pooti, nöö so juu a bi ta taanga da de u de feni soni u njan. Wan famii fëën bi suku u mbei an ko ta futoou Jehovah möön. A bi piki ën taa: „Di i taki taa di santa jeje u Gadu ta heepi i, nöö faandi mbei ja feni heepi jeti? U pooti jeti. Lasi i ta lasi i ten ku di peleiki soni fii dë.” Shirley bi taki taa: „Mi bi hakisi miseei taa: ’Gadu ta booko hën hedi ku u, naa aan toobi ku u?’ Fëën mbei wantewante dë mi bi begi Jehovah, hën mi konda hii soni di dë a mi hati dëën. Mi bi ta lesi di Bëibel ku dee woto buku fuu go dou, söseei ma bi disa u go a dee komakandi ku di peleikiwooko.” An bi tei longi möön, hën a bi ko si taa  Jehovah bi ta sölugu hën ku dee sëmbë fëën. De bi ta feni soni u njan, nöö de bi ta dë waiwai tu. Shirley bi taki tu taa: „Mi bi ko si taa Jehovah bi ta piki dee begi u mi” (1 Tim. 6:6-8). Ee ja disa u du dee soni dee i musu ta du a di biibi go dou, nöö dee tesi dee ta miti i an o sa paati i ku Jehovah.

8. Andi sa pasa ku dee baaa dee ta tei fesi a di ölganisaasi u Jehovah?

⁸ Dee felantima fuu ta wooko ku soni kuma ladio, teefei, ku Internet u paaja mindimindi soni u dee baaa dee ta tei fesi a di ölganisaasi u Jehovah (Ps. 31:13). De bi kisi so baaa, hën de lesi sitaafu da de taa de da hogiduma. Dee soni aki bi miti dee fesiten Keesitu sëmbë tu. Sëmbë bi mindi soni da apösutu Paulosu, hën de kisi ën tja go söötö. Ma unfa dee baaa ku dee sisa bi du soni?

9. Andi so Keesitu sëmbë bi du di de bi kisi apösutu Paulosu tja go söötö?

⁹ So Keesitu sëmbë an bi ta heepi apösutu Paulosu möön di de bi kisi ën tja go söötö a Loomë (2 Tim. 1:8, 15). Faandi mbei? A sa kan taa sen bi ta kisi de, u di sëmbë bi ta si Paulosu kuma hogiduma u? (2 Tim. 2:8, 9) Naa de bi ta fëëë taa sëmbë bi o du ku de tu? Wa sabi faandi mbei de bi du soni a di lö fasi dë. Ma pakisei luku unfa Paulosu bi sa fii. Sömëni soni bi miti ën, söseei piki fika a bi lasi ën libi u de hedi (Tjab. 20:18-21; 2 Kol. 1:8). Nöiti u musu ko dë kuma dee sëmbë dee an bi heepi Paulosu di a bi abi heepi fanöudu! Andi u musu hoi a pakisei te sëmbë ta du ku dee baaa dee ta tei fesi?

10. Andi wa musu fëëkëtë te de ta du ku dee baaa dee ta tei fesi, nöö faandi mbei wa musu fëëkëtëën?

¹⁰ Na fëëkëtë faandi mbei sëmbë ta du ku u, ku ambë ta mbei de ta du ku u. Tu Timoteo 3:12 ta taki taa: „Ee wan sëmbë i kë libi gbelingbelin kumafa Gadu kë, fii ta waka a Jesosi Keesitu baka, nöö i musu u feni sitaafu a libisëmbë maun nöömö.” Fëën mbei an musu bigi da u taa Saatan ta möön kë du ku dee baaa dee ta tei fesi. A kë taa dee baaa aki  musu bia baka da Jehovah, söseei a kë fuu fëëë.​—1 Pet. 5:8.

11. Andi u ta lei u di fasi fa Onësifolu bi du soni? (2 Timoteo 1:16-18)

¹¹ I musu ta heepi dee baaa fii hii juu, söseei ja musu disa de. (Lesi 2 Timoteo 1:16-18.) Wan Keesitu sëmbë u fesiten di de bi ta kai Onësifolu bi du soni woto fasi di de bi söötö Paulosu. ’Sen an bi kisi ën faa nama ku Paulosu, hii fa Paulosu bi dë buibui a dunguwosu’. Ma a bi suku baka u Paulosu, hën di a ko feni ën, hën a bi mbei möiti u heepi ën faa feni dee soni dee a bi abi fanöudu. Onësifolu bi du di soni aki, hii fa a bi sa lasi hën libi. Andi u ta lei a di soni aki? Wa musu mbei fëëë tapa u fuu heepi dee baaa fuu te sëmbë ta du ku de. Ma boo mbei hii möiti u heepi de (Nöng. 17:17). A dë fanöudu seei fuu lei de taa u lobi de, söseei taa u kë heepi de.

12. Andi u ta lei a dee baaa ku dee sisa fuu u Losiaköndë?

¹² Buta pakisei a di fasi fa dee baaa ku dee sisa fuu a Losiaköndë ta heepi de na de, te lanti söötö so u de a dunguwosu. Te de ta tja de go a kuutu, nöö sömëni baaa ku sisa nango luku de, u da de taanga. Andi u ta lei a di soni aki? Te sëmbë ta mindi soni da dee baaa dee ta tei fesi, ta kisi de ta söötö, nöö wa musu fëëë. Ma u musu ta begi da de, u musu ta heepi dee sëmbë u de, söseei u musu ta luku unfa u sa heepi de ku dee soni di de abi fanöudu.​—Tjab. 12:5; 2 Kol. 1:10, 11.

13. Unfa di mbei di sëmbë ta mbei u fa sa mbei wa ko ta futoou Jehovah ku di ölganisaasi fëën möön?

¹³ Dee famii fuu, dee sëmbë dee u ku de taa wooko, nasö dee mii dee u ku de nango a di wan siköö, dee an ta dini Jehovah, sa mbei u fa, u di u ta peleiki, söseei u di u ta hoi dee wëti u Jehovah (1 Pet. 4:4). De sa piki u taa: „Mi lobi fa i dë e, ma di keiki fii abi hia wëti poi, söseei dee soni dee i ta lei an dë da di ten fuu aki.” So u de sa kuutu u u di fasi fa u ta libi ku dee sëmbë di de puu a di kemeente. De sa piki u taa: „Unfa un sa taki taa un lobi woto sëmbë?” Dee lö soni aki sa mbei u ko ta hakisi useei ee dee wëti u Jehovah bunu da u tuutuu. U sa bigi ta hakisi useei taa: ’A sa kë taa Jehovah ta suku fini a mi poi ö? Di ölganisaasi fëën ta tapa u fuu du andi u kë u?’ Ee sö wan soni ta pasa ku i, nöö andi sa heepi i fu ja disa Jehovah ku di ölganisaasi fëën?

14. Andi u musu du te sëmbë ta mbei u fa, u di u ta hoi dee wëti u Jehovah? (Psalöm 119:50-52)

¹⁴ Dë kabakaba u hoi dee wëti u Jehovah go dou. Jöpu bi dë wan womi di bi ta hoi dee wëti u Jehovah, aluwasi sëmbë bi ta mbei ën fa. Wan womi di bi ta mbei taa hën ku Jöpu bi dë mati, bi suku u mbei Jöpu ko ta si kuma Gadu aan toobi ee Jöpu ta hoi dee wëti fëën, nasö ee an ta hoi de (Jöpu 4:17, 18; 22:3). Ma Jöpu an bi kë biibi dee mindimindi soni dë. A bi sabi taa dee wëti u Jehovah bunu, nöö a bi dë kabakaba u hoi de go dou. An bi da woto sëmbë pasi u mbei an ko ta hoi hënseei a Jehovah möön (Jöpu 27:5, 6). Andi u ta lei a di soni aki? Di mbei di sëmbë ta mbei i fa an musu mbei i ko ta si kuma dee wëti u Jehovah an bunu da i. Pakisei luku fa soni bi dë da i. A musu u dë sö taa iseei si sömëni pasi taa libi fii ta waka möön bunu te i ta hoi dee wëti u Jehovah. Dë kabakaba u wooko makandi ku di ölganisaasi di ta heepi u fuu sa ta hoi dee wëti aki. Nöö aluwasi sëmbë ta mbei u fa gaanfa seei, tökuseei wa o disa u dini Jehovah.​—Lesi Psalöm 119:50-52.

15. Faandi mbei sëmbë bi ta mbei Sisa Brizit fa?

¹⁵ Buta pakisei a di woto u wan sisa de kai  Brizit, di ta libi a di köndë de kai India. Brizit bi abi dii mujëë mii, nöö hën manu an bi ta dini Jehovah. Dee famii u Brizit bi ta mbei ën fa u di biibi fëën hedi. Kölö sö baka di a dopu a di jaa 1997, hën de puu hën manu a wooko. Fëën mbei hën manu bi buta taa hën ku Brizit ku dee mujëë mii u de bi o foloisi go libi nëën mama ku hën tata pisi a wan woto foto. Ma möön gaan soni bi o miti Brizit jeti. U di hën manu an bi abi wooko möön, mbei a o abi fu wooko hiniwan daka u heepi dee sëmbë u di wosudendu fëën. Boiti di dë, di möön zuntu kemeente bi dë söwan 350 kilomëti ku ka a bi ta dë. Dee manu bëë fëën seei bi ta du ku ën u di biibi fëën hedi. Soni bi ko hogi sö tee taa de bi musu foloisi baka. Baka di dë, hën hën manu ko lasi libi. Bakaten, hën wan u dee mujëë mii fëën di bi abi 12 jaa ko dëdë, u di a bi abi kankël. Ma na di dë nöö, dee famii u Brizit bi ta taki taa hën bi mbei hii dee soni dë pasa. De bi ta taki taa ee an bi ko dë wan Jehovah Kotoigi, nöö na wan u dee soni dë bi o pasa. Hii fa soni bi dë sö, tökuseei Brizit bi futoou Jehovah go dou, söseei an bi disa di ölganisaasi fëën.

16. Unfa Sisa Brizit bi feni gaan bunu u di a bi hoi hënseei a Jehovah ku di ölganisaasi fëën?

¹⁶ U di Brizit bi ta dë sö longi ku di kemeente, mbei wan keling-gaanwomi bi dëën taanga faa ta peleiki a di kamian ka a bi ta dë, söseei faa ta hoi komakandi nëën pisi. Bigibigi a bi ta si kuma di soni dë taanga poi. Ma tökuseei a bi du soni kumafa di baaa bi piki ën. A bi ta konda soni u di bunu buka da sëmbë, a bi ta hoi komakandi nëën pisi, söseei a bi ta hoi di wosudendu dini makandi ku dee mujëë mii fëën. Andi bi ko pasa? Brizit bi ko abi sömëni sëmbë ta lei soni u Bëibel, söseei sömëni u dee sëmbë dë bi ko dopu. A di jaa 2005, hën a bigi du di kowoonu pioniliwooko. A bi feni gaan bunu u di a bi futoou Jehovah go dou, söseei u di a bi hoi hënseei a Jehovah ku  di ölganisaasi fëën. Dee mujëë mii fëën ta dini Jehovah ku hii de hati, nöö nöunöu tu kemeente dë a di pisiwata ka de ta dë! Brizit dë seiki taa Jehovah bi dëën taanga faa bi sa hoi dou hii fa soni bi miti ën, söseei hii fa sëmbë bi ta mbei ën fa.

17. Andi u musu mbei möiti fuu du?

¹⁷ Saatan kë fuu si kuma Jehovah an o heepi u te soni ta miti u, söseei a kë fuu si kuma di libi o ko möön taanga da u, ee u ta hoi useei a di ölganisaasi u Jehovah. Saatan kë fuu fëëë te sëmbë ta mindi soni da dee baaa dee ta tei fesi, söseei te de ta kisi de ta söötö. A kë tu taa wa musu futoou Jehovah ku di ölganisaasi fëën möön, u di sëmbë ta mbei u fa, söseei a bi o kë u di soni dë mbei taa wa ko ta hoi dee wëti u Jehovah möön tu. Ma u sabi andi a kë du, nöö wa ta mbei a ganjan u kisi (2 Kol. 2:11). Na biibi dee mindimindi soni u Saatan, ma mbei möiti fii hoi iseei a Jehovah ku di ölganisaasi fëën. Hoi a pakisei taa Jehovah an o disa i möönsö (Ps. 28:7). Fëën mbei na mbei na wan soni paati i ku Jehovah!​—Lom. 8:35-39.

18. Andi woo taki a di woto di ta ko?

¹⁸ A di woto aki, u taki u soni di ta miti u a döösë u di kemeente. Ma soni sa miti u a di kemeente tu, di sa mbei taa wa ko ta futoou Jehovah ku di ölganisaasi fëën möön. Andi sa heepi u fuu hoi dou te dee soni dë ta miti u? Woo taki u di soni aki a di woto di ta ko.