Na wan woto buku u keiki dë kuma di Bëibel. Di Bëibel da di wan kodo buku di mbei sëmbë ko ta biibi a Gadu te kuma tide. Na wan buku bi mbei sëmbë go öndösuku soni sö wan daka, söseei na wan buku dë di sëmbë kuutu sö wan daka tu.

Wantu öndösukuma ta feni taa de an dë seiki taa dee Bëibel u di ten aki sikifi kumafa dee fesiten soni bi sikifi tuutuu. Wan sëmbë di ta öndösuku soni u keiki bi taki taa: „Wa sa dë seiki ee de tja dee pisi u Bëibel ko a wan kumafa de bi dë tuutuu. Dee soni dee u abi, da soni di dë ku te a hia föutu, nöö gaansë u de da soni di de puu höndöhöndö jaa buta ko a woto pampia lolu, nöö de tooka gaanfa.”

Di fasi fa so sëmbë kiija, ta mbei de ta si kuma di Bëibel an ta taki tuutuu soni. Dee famii u wan womi de kai Faizal, bi lei ën taa di Bëibel da wan santa buku, ma de bi tooka soni nëën. Faizal taki taa: „Di soni aki bi mbei taa te sëmbë bi ta kë konda soni u Bëibel da mi, nöö ma bi ta kë biibi. Te i luku ën bunu, nöö de an abi di fosu Bëibel möön. De bi tooka soni nëën!”

I si kuma a dë fanöudu fii ko sabi ee di Bëibel tooka u? Wë buta pakisei a dee hakisi aki: I sa biibi dee soni di di Bëibel paamusi da di ten di ta ko, ee ja dë seiki taa dee soni aki dë u feni a di fosu Bëibel ö? (Loomë 15:4) Ee dee Bëibel dee dë u feni a di ten fuu aki abi gaan hia föutu, nöö i bi o wooko ku dee mama wëti u Bëibel te i musu du wan soni di nama ku di wooko fii, ku i wosudendu, nasö ku di dini i ta dini Gadu ö?

Hii fa dee fosu Bëibel buku an dë u feni möön, tökuseei u sa feni awoo soni di sëmbë bi sikifi, söseei u sa feni dusudusu pisi u Bëibel di de bi sikifi. Unfa a du ko taa de dë u feni jeti, hii fa de bi sa poi, hii fa sëmbë bi ta mbei möiti u woto sëmbë an ko sabi soni fëën, ku hii fa de bi kë tooka dee soni dee sikifi nëën? Dee woto dee ta ko o piki dee hakisi aki.