Keesitu sëmbë ta wooko ku dee mama wëti u Bëibel te de musu luku unfa de o tjubi deseei da hogi di sa miti de. Dee mama wëti aki ta lei taa an bi o bunu u wan Keesitu sëmbë abi wan goni u tjubi hënseei u woto sëmbë an du hogi ku ën. Buta pakisei a dee soni aki:

Di libi u wan sëmbë dë wan santa soni da Jehovah. Di Psalöm sikifima bi sikifi taa: „I [Jehovah] wë da di sëmbë di ta da libi” (Psalöm 36:9). Fëën mbei ee wan Keesitu sëmbë kë tjubi hënseei da hogi, nasö ee a kë tjubi dee soni dee a abi, nöö an musu du na wan soni di o mbei taa a abi buuu paima u di a kii wan sëmbë.​—Detolonomi 22:8; Psalöm 51:14.

A dë sö tuu taa hiniwan soni di wan sëmbë ta tei faa tjubi hënseei sa mbei a ko abi buuu paima. Ma wan sëmbë sa kii wan wotowan ku wan goni möön hesi, aluwasi ku hënseei kë, nasö ee na ku hënseei kë. * (Luku di pisi a basu.) Söseei wan hogiduma sa ta dë fëëëfëëë tu ee a si i ku wan goni, nöö a sa pasa taa soni ko möön hogi, nöö wan sëmbë sa dëdë.

Di Jesosi bi piki dee bakama fëën taa de musu tja feti ufangi a di ndeti ufö a dëdë, nöö an bi mbei de tjëën u de tjubi deseei (Lukasi 22:36, 38). Ma Jesosi bi kë lei de di soni aki: Dee bakama fëën an musu feti, aluwasi ee hia sëmbë ko feti ku de ku fetilai (Lukasi 22:52). Baka di Petuisi bi tei di feti ufangi fëën faa feti ku di futuboi u di gaan mindima, hën Jesosi piki ën taa: „Toona tuusi di ufangi fii nëën dosu e.” Hën Jesosi taki wan soni di dë wan mama wëti di u kuma Keesitu sëmbë ta hoi te kisi di ten aki. A bi taki taa: „Di sëmbë di hopo ufangi a liba nöö ju ufangi o kii.”​—Mateosi 26:51, 52.

Kumafa Mika 4:3 bi taki a fesi, nöö dee sëmbë u Gadu o „naki dee së ufangi u de ko toon soni u wooko goon ku dee lanza u de ko toon faka u koti ahun”. Sëmbë sabi dee tuutuu Keesitu sëmbë kuma sëmbë di ta libi fiifii ku wotowan. De ta hoi dee wëti di Gadu bi mbei apösutu Paulosu sikifi. A bi sikifi taa: „Ee wan sëmbë du hogi ku i, nöö ja musu toona du hogi ku ën baka”, nöö „i musu biinga fii libi fiifii ku hii sëmbë” (Loomë 12:17, 18). Hii fa Paulosu bi ta miti sëmbë di bi ta kë du hogi ku ën, te kisi dee „fufuuma” seei, tökuseei nöiti a bi ta pasa dee mama wëti u Bëibel u di a bi kë tjubi hënseei u hogi an miti ën (2 Kolenti 11:26). Ma a bi ta buta futoou a Gadu, söseei a bi sabi taa dee köni lai dee dë a di Bëibel „bunu möön fetilai”.​—Peleikima 9:18.

Wan Keesitu sëmbë ta tei di libi fëën u bigi möön dee gudu dee a abi. U sabi taa „na gudu ta mbei sëmbë ta libi gaandi” (Lukasi 12:15). Fëën mbei ee i si taa i fan a wan suti fasi ku wan fufuuma di hoi goni da i, ma an ta heepi, nöö du di soni di Jesosi bi taki, di a taki taa: „Wan musu puu hatiboonu a wan sëmbë liba taa te a du i hogi nöö joo du ën hogi baka e.” Di soni aki sa kë taki taa u musu disa di sëmbë faa tei andi a kë (Mateosi 5:39, 40; Lukasi 6:29). *  (Luku di pisi a basu.) A möön bunu fii ta köni fu ja du soni di ta hai fufuuma. Te u ta wooko ku di lai dee sikifi a Bëibel, di ta taki taa wa musu ta mbei bigi ku dee gudu u di goonliba aki, nöö kandë fufuuma an o ko fufuu u (1 Johanisi 2:16). Te wotowan sabi u kuma Kotoigi u Jehovah di ta libi fiifii ku wotowan, nöö di soni dë o tjubi u da hogi.​—Nöngö 18:10.

Keesitu sëmbë ta köni u de an du soni di sa toobi wotowan (Loomë 14:21). Ee so baaa ku sisa sabi taa wan baaa nasö wan sisa abi wan goni u tjubi hënseei u sëmbë an du hogi ku ën, nöö a sa toobi de, nasö a sa mbei de kumutu a di biibi. Kandë lanti da u pasi fuu abi wan goni, ma u di u lobi dee baaa ku dee sisa fuu, mbei nöiti u bi o du wan soni di sa mbei de kumutu a di biibi.​—1 Kolenti 10:32, 33; 13:4, 5.

Keesitu sëmbë kë dë sëmbë di wotowan sa djeesi (2 Kolenti 4:2; 1 Petuisi 5:2, 3). Ee wan Keesitu sëmbë abi wan goni u tjubi hënseei u sëmbë an du hogi ku ën, nöö dee gaanwomi o dëën lai di kumutu a Bëibel. Ma ee a taki taa a o hoi di goni, nöö an dë wan sëmbë di wotowan sa djeesi. Fëën mbei an o abi na wan faantiwöutu a di kemeente. Di wan seei soni dë da wan Keesitu sëmbë di ta tja goni u di wooko fëën hedi. A bi o möön bunu faa suku wan woto wooko. *​—Luku di pisi a basu.

Wan Keesitu sëmbë musu luku unfa a o tjubi hënseei, unfa a o tjubi dee sëmbë u di wosudendu fëën, ku dee gudu fëën, nöö a musu luku un pei wooko a o tei. Ma te a luku unfa a o du dee soni aki, nöö a musu wooko ku dee mama wëti u Bëibel. Di köni Gadu fuu da u mama wëti u di a lobi u. Fëën mbei Keesitu sëmbë di dë gaan mati ku Jehovah an o bai goni u tjubi deseei u woto sëmbë an du hogi ku de. De sabi taa ee de buta futoou a Gadu, söseei ee de wooko ku dee mama wëti u Bëibel a di libi u de, nöö de o feni tjubi u nöömö.​—Psalöm 97:10; Nöngö 1:33; 2:6, 7.