1, 2. Andi a kë taki taa pakisei fuu musu ta dë a Jehovah?

U TA libi „a dee lasiti daka u di goonliba aki”, nöö di ten aki dë wan „tumisi hogi ten” (2 Timoteo 3:1). Ma soni o ko möön hogi seei ufö Jehovah poi di hogi goonliba aki, söseei ufö a tja bööböö libi ko a goonliba aki. Fëën mbei u musu ta hakisi useei di soni aki: ’Na ambë pakisei u mi ta dë, nasö na ambë mi ta suku heepi?’ Kandë wantewante u bi o piki taa „a Jehovah”, nöö di soni dë da wan bunu soni seei.

² Ma andi a kë taki taa pakisei fuu musu ta dë a Jehovah? Nöö andi u sa du fuu sa ta buta pakisei fuu nëën hii juu te u dë ku bookohedi? Longi ten kaa wan Bëibel sikifima bi konda unfa u musu buta pakisei fuu a Jehovah tjika, te u dë ku bookohedi. (Lesi Psalöm 123:1-4.) A bi taki taa te u ta buta pakisei fuu a Jehovah, nöö u dë kuma wan futuboi di nango nëën masa faa heepi ën. Unfa sö? Wan futuboi ta hoi taa hën masa o dëën soni u njan, söseei taa a o ta tjubi ën u hogi an miti ën.  Ma a musu ta buta pakisei fëën a di masa fëën tu faa sa sabi andi di masa o kë faa du, nöö a musu du ën tu. Wë sö nöö useei musu ta tei ten ta lei soni a di Wöutu u Gadu hiniwan daka, fuu sa ko fusutan andi da dee soni dee Jehovah kë fuu du, nöö u musu du de tu. Te u du sö, nöö u sa dë seiki taa Jehovah o heepi u te u dë a fuka.​—Efeise 5:17.

3. Andi sa puu pakisei fuu a Jehovah?

³ Hii fa u sabi taa u musu ta buta pakisei fuu a Jehovah hii juu, tökuseei so juu soni sa ta puu u pakisei nëën. Di soni aki hën bi pasa ku wan mati u Jesosi de kai Maita. A bi „dë ku bookohedi ta seeka soni” (Lukasi 10:40-42). Wë ee wan mujëë kuma Maita di bi ta hoi hënseei a Gadu seei bi mbei soni puu hën pakisei a Jehovah, hii fa Jesosi bi sai leti dë, nöö an musu bigi da u taa soni sa puu u pakisei a Jehovah tu. Wë nöö andi ku andi sa puu u pakisei a Jehovah? A di woto aki, woo luku unfa soni di wotowan ta du, sa puu u pakisei a Jehovah. Söseei woo luku andi u sa du fuu sa ta buta pakisei fuu a Jehovah hii juu.

4. Faandi mbei a sa bigi da u taa Mosesi an bi sa go a di Paamusi köndë?

⁴ Mosesi bi dë wan sëmbë di bi ta buta pakisei a Jehovah. Di Bëibel ta piki u taa „a hoi go dou leti kuma hënseei wojo ta si Gadu nëën fesi dë, di libisëmbë wojo an sa si”. (Lesi Hebelejën 11:24-27.) Di Bëibel ta taki tu taa „nöiti wan tjabukama bi dë kuma Mosesi a Isaëli. Jehovah bi sabi ën bumbuu” (Detolonomi 34:10). Hii fa Mosesi bi dë wan gaan mati u Jehovah, tökuseei Jehovah bi piki ën taa an o dëën pasi faa go a di Paamusi Köndë (Nöbu 20:12). Andi bi pasa?

5-7. Andi bi pasa kölö sö baka di dee Isaëli sëmbë bi kumutu a Egepiti, nöö andi Mosesi bi du?

⁵ Bëina tu liba baka di dee Isaëli sëmbë kumutu a Egepiti, nasö bifö de dou a di kuun de kai Sinai, hën wan gaan soni ko pasa. Dee sëmbë bi bigi ta kuutu taa de an abi wata. De bi bigi ta guunjan Mosesi, söseei hati u de bi ko boonu tee taa „Mosesi bai kai Jehovah. Hën a taki taa: ’Andi mi musu du ku dee sëmbë aki? De dë fa u naki mi ku sitonu kii!’” (Ëkisodesi 17:4) Jehovah bi piki ën gbelingbelin andi a musu du. Jehovah bi piki ën faa tei di pau fëën, nöö a naki di gaan sitonu di dë a Holeb. Di Bëibel ta taki taa: „Mosesi bi du di soni aki a dee gaan womi u Isaëli fesi.” Di a du sö, hën wata kumutu a di gaan sitonu. Dee Isaëli sëmbë bi feni te a hia wata u bebe, nöö sö a ko pasa taa di taki aki bi seeka.​—Ëkisodesi 17:5, 6.

⁶ Di Bëibel ta piki u taa Mosesi bi kai di kamian ka di soni bi pasa, Maasa, nöö a kë taki „Tesi”, söseei a bi kai ën Meliba, di kë taki „guunjan”. Faandi mbei a kai di kamian aki sö? Wë u di dee Isaëli sëmbë bi ta guunjan, söseei u di de bi ta pooba Jehovah, u di de bi taki taa: „Jehovah dë ku u tuutuu ö?’”​—Ëkisodesi 17:7.

⁷ Unfa Jehovah bi feni di soni di bi pasa a Meliba? Jehovah bi fii taa dee Isaëli sëmbë bi hopo fia ku ën, söseei taa de an bi lei taa de ta lesipeki ën. An bi si nöö taa ku Mosesi de bi abi ën, ma a bi fii taa ku ën de bi abi ën. (Lesi Psalöm 95:8, 9.) Di soni di dee Isaëli sëmbë bi du aki, an bi bunu seepiseepi. Ma Mosesi bi du soni a wan bunu fasi. A bi buta pakisei fëën a Jehovah, u di a bi  suku lai nëën, hën a du kumafa Jehovah bi piki ën.

8. Andi bi pasa di dee Isaëli sëmbë bi zuntu u de kumutu a di sabana?

⁸ Andi bi pasa söwan 40 jaa baka di di soni aki pasa? Wë a bi fika pikisö möön, nöö dee Isaëli sëmbë bi o kumutu a di sabana. De bi dou a wan kamian di dë zuntu ku Kadesi, di bi dë zuntu ku di Paamusi Köndë. De bi ko ta kai di kamian aki Meliba tu. * (Luku di pisi a basu.) Faandi mbei de toona kai di kamian aki Meliba? Wë u di dee Isaëli sëmbë bi toona ta guunjan taa de an bi abi wata (Nöbu 20:1-5). Ma di pasi aki Mosesi mbei wan gaan föutu.

9. Andi Jehovah bi piki Mosesi, ma andi a bi du? (Luku di peentje a bigi u di woto.)

⁹ Andi Mosesi bi du di dee sëmbë hopo fia ku ën? Wë a bi go suku lai a Jehovah. Ma di pasi aki Jehovah an bi piki Mosesi faa naki di gaan sitonu. A bi piki Mosesi faa tei di pau fëën, nöö a tja dee sëmbë go zuntu u di gaan sitonu, nöö a bi musu fan ku di gaan sitonu u wata sa kumutu nëën (Nöbu 20:6-8). Mosesi bi du di soni aki ö? Nönö. Hati fëën bi boonu sö tee taa a bai dee sëmbë. A bi taki taa: „Un dee taanga jesi sëmbë aki, un haika mi! Un kë taa u musu puu wata a di sitonu aki da unu fuun sa bebe u?” Hën a naki di gaan sitonu tu pasi.​—Nöbu 20:10, 11.

10. Andi Jehovah bi du di Mosesi an bi piki hën buka?

¹⁰ Jehovah hati bi boonu ku Mosesi seei (Detolonomi 1:37; 3:26). Faandi mbei Jehovah hati bi boonu? Wë kandë u di Mosesi an bi wooko ku dee njunjun lai di Jehovah bi dëën.

11. Faandi mbei a bi sa dë sö taa Mosesi bi mbei dee Isaëli sëmbë pakisei taa Jehovah an bi du wan foombo soni di a naki di gaan sitonu?

¹¹ Kandë wan woto soni bi mbei Jehovah hati bi boonu. Wë dee gaan sitonu dee bi dë a di fosu Meliba, bi dë gaan taanga sitonu. An abi fa wan sëmbë bi naki dee sitonu aki, tökuseei wata an bi o sa kumutu a de. Ma dee gaan sitonu dee bi dë a di woto Meliba, bi tooka seei. Gaansë u dee sitonu dë an bi taanga kuma dee sitonu u di fosu Meliba, nöö dee sitonu aki bi ta hai wata tei. Wë sëmbë bi ta mbei baaku a dee sitonu aki u feni wata. Fëën mbei di Mosesi naki di sitonu, nöö a bi sa dë sö taa dee Isaëli sëmbë bi sa mëni taa di wata kumutu hënseei, ma na u di Jehovah bi du wan foombo soni. * (Luku di pisi a basu.) Ma wa sabi ee sö dee Isaëli sëmbë bi pakisei tuutuu.

12. Andi bi sa dë wan woto soni di bi mbei Jehovah hati bi boonu ku Mosesi ku Alon?

¹² Kandë wan woto soni dë tu di bi sa mbei Jehovah hati bi boonu ku Mosesi ku Alon. Mosesi bi piki dee sëmbë taa: „Un kë taa u musu puu wata a di sitonu aki da unu fuun  sa bebe u?” Di Mosesi bi taa „u”, nöö a ta djei kuma a bi ta taki u hën ku Alon. Di soni di Mosesi bi taki, bi lei taa an bi lesipeki Jehovah seepiseepi, u di an bi mbei Jehovah feni gafa u di foombo soni di bi pasa. Psalöm 106:32, 33, ta taki taa: „De mbei Mosesi hati ko boonu ku de, di de bi dë a Meliba ka di wata bi kumutu. Di soni aki bi mbei soni an bi waka bunu da Mosesi. De bi mbei Mosesi hati ko boonu tee taa a bi taki soni di an bi fiti.” * (Luku di pisi a basu.) (Nöbu 27:14) Mosesi an bi da Jehovah di gafa di a bi musu kisi. Jehovah bi piki Mosesi ku Alon taa: „Wan bi piki mi buka” (Nöbu 20:24). Di soni di de bi du bi dë wan gaan zöndu!

13. Faandi mbei u sa taki taa Jehovah bi du soni a wan leti fasi, di an bi da Mosesi pasi faa go a di Paamusi Köndë?

¹³ Jehovah bi ta hoi taa Mosesi ku Alon bi o du soni a wan möön bunu fasi, u di de a bi buta u tja dee sëmbë fëën (Lukasi 12:48). A di ten di pasa, Jehovah an bi mbei sömëni Isaëli sëmbë pasa go a di Paamusi Köndë u di de an bi piki hën buka (Nöbu 14:26-30, 34). Fëën mbei u sa taki taa Jehovah bi du soni a wan leti fasi, di an da Mosesi pasi faa go a di Paamusi Köndë. Mosesi an bi pasa go a di Paamusi Köndë, leti kumafa wanlö Isaëli sëmbë an bi go a di Paamusi Köndë tu.

14, 15. Andi bi mbei Mosesi an bi piki Jehovah buka?

¹⁴ Andi bi mbei Mosesi an bi piki Jehovah buka? Boo toona luku andi Psalöm 106:32, 33 ta taki. A ta taki taa: „De mbei Mosesi hati ko boonu ku de, di de bi dë a Meliba ka di wata bi kumutu. Di soni aki bi mbei soni an bi waka bunu da Mosesi. De bi mbei Mosesi hati ko boonu tee taa a bi taki soni di an bi fiti.” A dë sö tuu taa dee Isaëli sëmbë bi hopo fia ku Jehovah, ma Mosesi seei hati bi boonu tu. An bi duwengi hënseei, ma a bi taki soni söndö u pakisei andi bi sa miti ën bakaten.

¹⁵ Mosesi an bi buta pakisei fëën a Jehovah möön, u di a bi mbei soni di wotowan du, puu hën pakisei a Jehovah. Di fosu pasi di dee sëmbë bi ta guunjan u di de an bi abi wata, hën Mosesi bi du soni a wan bunu fasi (Ëkisodesi 7:6). Ma kandë a bi ko wei ku dee Isaëli sëmbë, nasö hati fëën bi ko boonu ku de, u di de bi ta hopo fia ku Jehovah sömëni jaa longi kaa. Kandë Mosesi bi buta pakisei a di fasi fa a bi ta fii, ka faa bi buta pakisei a di fasi fa a bi sa gafa Jehovah.

16. Faandi mbei u musu buta pakisei a di soni di Mosesi bi du?

¹⁶ Wë ee wan tjabukama u Jehovah di bi ta hoi hënseei nëën, seei bi mbei soni puu hën pakisei a Jehovah u tefa a du zöndu, nöö hën da di wan seei soni sa miti u tu. Mosesi bi zuntu ku di Paamusi Köndë, nöö useei dë zuntu ku di njunjun goonliba tu (2 Petuisi 3:13). An dë u taki taa wa bi o kë lasi di gaan bunu aki. Ma ee u kë go a di njunjun goonliba,  nöö u musu ta buta pakisei fuu a Jehovah hii juu, söseei u musu ta piki hën buka hii juu tu (1 Johanisi 2:17). Andi u sa lei a di föutu di Mosesi mbei?

17. Unfa u sa duwengi useei te hati fuu boonu?

¹⁷ Duwengi iseei te hati fii boonu. So juu di wan seei soni ta miti u hiniwan juu. Ma di Bëibel ta taki taa: „U musu ta du bunu nango nöömö. Wa musu wei möönsö. Nöö ee wa lasi hati nöö te di lepi ten dou nöö woo koti nöömö” (Galasia 6:9; 2 Tesalonika 3:13). I ta pakisei ufö i taki wan soni, te a dë taa hii juu wan soni nasö wan sëmbë ta mbei hati fii ta boonu ö? I ta duwengi iseei te hati fii boonu ö? (Nöngö 10:19; 17:27; Mateosi 5:22) Te wotowan ta suku u a toobi, nöö u musu „disa pasi da di hatiboonu u Gadu”. (Lesi Loomë 12:17-21). Andi di soni aki kë taki? Ka u hati fuu ta boonu, nöö u musu ta wakiti ku pasensi u Jehovah seeka soni te hënseei si taa a dë fanöudu. Ee u ta mbei möiti fu useei seeka soni, ka fuu buta pakisei fuu a Jehovah, nöö a o dë taa wa ta lesipeki ën.

18. Andi u musu hoi a pakisei te a nama ku di wooko di u musu ta wooko ku dee soni dee Jehovah ta piki u?

¹⁸ U musu ta buta pakisei a dee njunjun  lai dee Jehovah ta da u. U ta wooko ku dee njunjun lai dee Jehovah ta da u ö? Wa musu ta du soni u di sö u bi guwenti du ën kaa. Ma u musu ta wooko wantewante ku dee njunjun lai di Jehovah ta mbei di ölganisaasi fëën ta da u (Hebelejën 13:17). Söseei u musu ta köni fu wa „tei oto wëti möön leki dee wëti Gadu da u” (1 Kolenti 4:6). Te u ta wooko ku dee soni dee Jehovah ta piki u, hën da u ta buta pakisei fuu nëën hii juu.

19. Unfa u sa köni fu wa mbei dee soni dee wotowan ta du, mbei u ku Jehovah an dë mati möön?

¹⁹ Na mbei dee föutu u wotowan mbei i ku Jehovah an dë mati möön. Ee u ta buta pakisei fuu a Jehovah, nöö soni an o mbei u ku ën poi, söseei hati fuu an o ta boonu ku dee soni dee wotowan ta du. Di soni aki dë fanöudu seei, möönmöön ee u abi faantiwöutu a di ölganisaasi u Gadu, leti kuma Mosesi. A dë sö tuu taa hiniwan fuu musu mbei taanga möiti fuu piki Jehovah buka, sö taa u sa fika a libi (Filipi 2:12). Ma tökuseei möön u abi faantiwöutu a di ölganisaasi u Jehovah, möön Jehovah o kë fuu du soni a wan bunu fasi (Lukasi 12:48). Ma ee u lobi Jehovah tuutuu, nöö na wan soni o mbei u du soni u Jehovah an lobi u möön.​—Psalöm 119:165; Loomë 8:37-39.

20. Andi u musu dë kabakaba u du?

²⁰ U ta libi a wan ten ka soni taanga gaanfa seei. Fëën mbei u musu ta buta pakisei fuu a Jehovah hii juu, sö taa u sa ko fusutan andi a kë fuu du. Nöiti u musu mbei dee soni dee wotowan ta du mbei u ku Jehovah poi. Di soni di bi miti Mosesi, ta lei u wan gaan fanöudu soni seei. Ka u hati fuu boonu te wotowan mbei wan föutu, u musu dë kabakaba fuu „luku di Gadu fuu Jehovah, u te a ko du bunu da u”.​—Psalöm 123:1, 2.