1. Faandi mbei u sa taki taa Jehovah hën abi hii soni? (Luku di peentje a bigi u di woto.)

JEHOVAH hën abi hii soni! Hën abi „liba ala ku hii soni di dë a liba ala, söseei hën abi di goonliba ku hii soni di dë nëën” (Detolonomi 10:14; Akoalimbo 4:11). U di Jehovah hën mbei libisëmbë, mbei hën abi hii libisëmbë (Psalöm 100:3). Ma Gadu bi tei so u dee sëmbë dee libi a goonliba aki, ko dë sëmbë fëën seei vö.

2. Ambë di Bëibel ta taki taa bi dë apaiti sëmbë u Gadu?

² Psalöm 135 ta taki taa dee dinima u Jehovah fu awooten Isaëli bi dë kuma „wan apaiti gudu fëën” (Psalöm 135:4). Hosea seei bi taki a fesi taa so sëmbë di an bi dë u Isaëli bi o ko dë sëmbë u Jehovah (Hosea 2:23). Di tjabukama woto aki bi pasa tuutuu di Jehovah bigi tei sëmbë di an bi dë u Isaëli u go tii ku Keesitu a liba ala (Tjabukama 10:45; Loomë 9:23-26). Di Bëibel ta taki taa dee sëmbë di Gadu salufu ku di santa jeje  fëën, dë „wan föluku u Gadu di dë fëën vö”. A ta taki tu taa de dë „wanlö apaiti sëmbë dee Gadu tei ko fëën seei” (1 Petuisi 2:9, 10). Ma nöö unfa Gadu ta si dee sëmbë dee ta hoi deseei nëën a di ten aki, di dë ku di mëni taa de o libi u teego a goonliba aki? Wë Jehovah ta taki taa de dë ’sëmbë fëën’, söseei ’sëmbë di a tei’.​—Jesaaja 65:22.

3. (a) Ambë dë apaiti sëmbë u Jehovah a di ten aki? (b) Fuun soni woo taki a di woto aki?

³ A di ten aki, dee sëmbë u di „piki hipi”, dee o go libi u teego a liba ala, ku „dee oto sikafu”, dee o libi u teego a goonliba aki, ta dini Jehovah makandi kuma wan „kodo hipi sikapu” (Lukasi 12:32, NW; Johanisi 10:16). U kë lei Jehovah taa u dë ku tangi a hati, u di a tei u ko sëmbë fëën. A di woto aki, woo luku unfa u sa lei taa u ta tei di gaan soni di Jehovah du da u aki u bigi.

4. Unfa u sa da Jehovah tangi u di a ta da u pasi fu sa ko dë sëmbë fëën, söseei unfa Jesosi bi du di wan seei soni?

⁴ U ta lei Jehovah taa u ta tei dee soni dee a du da u u bigi, te u buta u libi nëën maun, nöö u tei dopu. A di lö fasi aki hii sëmbë sa ko si taa u da u Jehovah, söseei taa u dë kabakaba u piki hën buka a soni (Hebelejën 12:9). Jesosi seei bi tei dopu u lei di soni aki. Hii fa a bi dë sëmbë u Gadu kaa u di a bi dë wan Isaëli sëmbë, tökuseei a bi buta hën libi a Jehovah maun. A bi dë kuma a bi ta piki Jehovah taa: „Gadu o, mi ta wai u du andi i kë e.”​—Psalöm 40:7, 8.

5, 6. (a) Andi Jehovah bi taki di Johanisi dopu Jesosi? (b) Andi sa heepi u fuu ko fusutan unfa Jehovah ta si di tei di u tei dopu?

⁵ Unfa Jehovah bi feni di tei di Jesosi tei dopu? Di Bëibel ta taki taa: „Nöö di [Johanisi] dopu ën te a kaba, hën Masa Jesosi ta kumutu a di wata. Nöö wantewante dë, hën mundu jabii wajaa gbegedee nëën liba, hën a si di [santa jeje] u Masa Gadu kuma wan pomba saka ko nëën liba. Hën de jei wan töngö piki te a liba ala taa: ’Ja si di sëmbë aki ö? Hën wë da di lobi womi mii u mi. Libi fëën ta kai ku mi’” (Mateosi 3:16, 17). Jesosi bi dë u Jehovah kaa. Ma Jehovah bi wai di a si taa Jesosi bi dë kabakaba u tei hën libi u dini hën wanwan. Jehovah ta wai tu te u buta u libi nëën maun, nöö a o paka u u di soni dë.​—Psalöm 149:4.

⁶ Ma Jehovah abi hii soni kaa! Andi seei u bi o sa dëën? Pakisei di woto aki. Wan tata da wan mujëë mii fëën wan busukutu, hën di mujëë mii booko wan pisi u di busukutu da hën tata. Wë na di tata hën abi di busukutu kaa nö? Nöö unfa di mujëë mii sa toona dëën wan soni di bi dëën fëën kaa? Wë wan tata di lobi di mii fëën an o pena luku a di soni dë seei, ma a o wai ku ën. Sö nöö Jehovah ta wai te u buta u libi nëën maun ku hii u hati.​—Ëkisodesi 34:14.

7. Unfa Maleaki heepi u fuu fusutan unfa Jehovah ta si dee sëmbë dee ta dini ën ku hii de hati?

⁷ Lesi Maleaki 3:16. Faandi mbei di buta di i musu buta i libi a Jehovah maun nöö i tei dopu, dë fanöudu sö? Wë sensi di de pai i kaa, hën i dë u Jehovah. Hën da di Gadu di mbei i. Ma pakisei fa Jehovah o wai te i tei ën kuma Tiima fii, nöö i buta i libi nëën maun! (Nöngö 23:15) Jehovah sabi dee sëmbë dee dë kabakaba u dini ën, nöö a ta sikifi de në buta a di ’buku fëën faa mëni de’.

8, 9. Andi Jehovah kë taa dee sëmbë dee në u de sikifi a di ’buku fëën’ musu du faa mëni de?

⁸ Ee u kë u di në fuu dë sikifisikifi a di ’buku u Jehovah faa mëni u’, nöö u musu du  wan soni. Maleaki bi taki taa u musu abi gaan lesipeki da Jehovah, söseei a bi taki taa u musu ta pakisei fundu u di në fëën. Ee u ta dini woto sëmbë nasö woto soni, nöö Jehovah o puu di në fuu a di buku fëën!​—Ëkisodesi 32:33; Psalöm 69:28.

⁹ Hën da na paamusi nöö u musu paamusi Jehovah taa woo du andi a kë fuu du, nöö u tei dopu. Wan pasi nöö u ta paamusi Jehovah dee soni dë, ma di dini di u ta dini Jehovah, da wan soni di u musu ta du nöömö. Solanga u dë a libi, nöö hiniwan daka u musu ta lei taa u ta piki Jehovah buka.​—1 Petuisi 4:1, 2.

10. Andi sëmbë musu ta si te de luku dee sëmbë dee ta dini Jehovah, ku dee sëmbë dee an ta dini ën?

¹⁰ A di woto ufö disi, u bi si taa Kain, Salumon, ku dee Isaëli sëmbë bi ta taki taa de bi ta dini Jehovah, ma te i luku ën bunu, nöö de an bi ta hoi deseei nëën. Dee woto u dee sëmbë aki ta lei u taa na taki nöö u musu ta taki taa u ta dini Jehovah. U musu ta buuse soni di an bunu, nöö u musu ta lobi soni di bunu (Loomë 12:9). Jehovah taki taa sëmbë bi o si gbelingbelin „ambë da wan limbohati sëmbë, ku ambë da wan hogihati sëmbë, ambë ta dini Gadu, ku ambë an ta dini ën”.​—Maleaki 3:18.

11. Faandi mbei hii sëmbë musu sa si gbelingbelin taa Jehovah wanwan tö u ta dini?

¹¹ U ta da Jehovah tangi u di a tei u ko sëmbë fëën! Hii sëmbë musu sa si gbelingbelin taa u dë a Jehovah së (Mateosi 5:16; 1 Timoteo 4:15). Hakisi iseei dee soni aki: ’Woto sëmbë sa si taa mi ta hoi miseei a Jehovah te dou ö? A ta dë wan piizii soni da mi u piki sëmbë taa mi da wan Jehovah Kotoigi ö?’ Pakisei fa Jehovah o tjali ee sen ta kisi u fuu piki sëmbë taa u da sëmbë fëën.​—Psalöm 119:46; lesi Maikusi 8:38.

12, 13. Na un futu so Keesitu sëmbë ta mbei a taanga da sëmbë u de sabi taa de da Jehovah Kotoigi?

¹² A ta tjali te u ta si taa so Kotoigi ta pakisei kumafa dee sëmbë u di goonliba aki ta pakisei. Te u kaba fëën, sëmbë an sa ta si möön ee de da sëmbë di ta dini Jehovah (1 Kolenti 2:12). „Di fasi fa dee sëmbë u di goonliba aki ta pakisei”, ta mbei de ta buta pakisei a soni u deseei nöö (Efeise 2:3). Di ölganisaasi u Jehovah ta da u lai fuu sa bisi soni a wan bunu fasi, ma tökuseei so Kotoigi ta bisi soni a wan fasi di an fiti. De ta bisi soni di ta peeta a de sinkii, söseei de ta bisi soni di ta buta sinkii u de a döö. De ta bisi dee soni aki nango a kamian ka de ku woto baaa ku sisa ta dë makandi. Nasö de ta beei uwii, nasö ta seeka uwii kumafa dee sëmbë u di goonliba aki ta du ën (1 Timoteo 2:9, 10). Te u kaba fëën, sëmbë an o sa si möön ee de da Jehovah Kotoigi.​—Jakobosi 4:4.

¹³ Woto soni dë jeti di so Kotoigi ta du, di ta mbei sëmbë an sa ta si möön taa de tooka ku dee sëmbë u di goonliba aki. A bi pasa taa so Kotoigi an bi baja a wan fasi di fiti di de bi go a wan piizii, söseei de an bi tja deseei a wan fasi di fiti. Wotowan bi buta footoo u de a Internet, söseei de bi sikifi soni  di bi ta lei taa de ta si soni kuma dee sëmbë u di goonliba aki. Kandë dee gaanwomi an kuutu de, u di de an du wan gaan zöndu, ma tökuseei de sa mbei a taanga da dee baaa ku dee sisa u de u de hoi deseei a Gadu, hii fa de ta mbei möiti u de an du soni kuma dee sëmbë u di goonliba aki.​—Lesi 1 Petuisi 2:11, 12.

14. Andi u musu du fuu ku Jehovah an poi?

¹⁴ Dee soni u di goonliba aki mbei a sö wan fasi taa de ta mbei sëmbë ta buta pakisei a „dee taku kë u libisëmbë hati”, de ta mbei sëmbë ko abi „langawojo”, söseei de ta mbei sëmbë ko abi ’gaanfasi’ u di de abi gudu (1 Johanisi 2:16). Wa dë kuma dee sëmbë aki, u di u dë sëmbë u Jehovah. U musu ’kaba ku dee libi Gadu an lobi’, söseei u musu „kaba ku dee soni dee sëmbë u di goonliba aki ta hangi u de feni”. Boiti di dë, u musu „ta hoi u seei fu wa du soni di an fiti. U musu libi lesipeki fasi kumafa Masa Gadu kë fuu libi, hii fa u ta libi a di hogi ten u dë aki” (Titusi 2:12). Di fasi fa u ta libi musu ta lei gbelingbelin taa u da sëmbë u Jehovah. Hën da sëmbë musu ta si a di fasi fa u ta fan, a di fasi fa u ta njan ta bebe, ta bisi soni, söseei a di fasi fa u ta wooko, taa u da sëmbë u Jehovah tuutuu.​—Lesi 1 Kolenti 10:31, 32.

15. Faandi mbei u musu ta lobi dee baaa ku dee sisa fuu, ta libi bunu ku de?

¹⁵ U ta lei taa u ta tei ën u bigi taa u ku Jehovah dë mati, ku di fasi fa u ta libi ku dee baaa ku dee sisa fuu. U ku de tuu da sëmbë  u Jehovah. Ee u ta hoi di soni aki a pakisei, nöö hii juu woo ta libi bunu ku de, söseei woo ta lobi de (1 Tesalonika 5:15). Unfa di soni aki dë fanöudu tjika? Jesosi bi piki dee bakama fëën taa: „Te un ta lobi sö kaa, nöö hii sëmbë o si taa bakama u mi gbelin un dë e.”​—Johanisi 13:35.

16. Andi u ta lei u di lobi di Jehovah lobi dee sëmbë fëën, te u luku di Wëti di a bi da Mosesi?

¹⁶ Wan soni di bi sikifi a di Wëti di Gadu bi da Mosesi, sa heepi u fuu ko fusutan unfa u musu ta libi ku wotowan a di kemeente. Soni bi dë a di wosu u Jehovah di de bi ta tei u du soni da hën wanwan. Di Wëti bi ta lei dee Leifi sëmbë gbelingbelin unfa de bi musu ta seeka dee soni aki. Nöö ee wan sëmbë an bi du soni kumafa di Wëti taki, nöö a bi musu dëdë (Nöbu 1:50, 51). Ee Jehovah bi ta booko hën hedi sö gaanfa ku di fasi fa sëmbë bi ta wooko ku dee soni di de bi ta tei u dini ën, nöö u sa dë seiki taa a ta möön booko hën hedi ku di fasi fa sëmbë ta libi ku dee dinima fëën! Jehovah ta lei u unfa u dii nëën wojo tjika. A bi taki taa: „Di sëmbë di panjan unu, panjan di wojo mii u mi.”​—Sakalia 2:8.

17. Na andi Jehovah „ta buta pakisei”?

¹⁷ Maleaki bi taki taa Jehovah „ta buta pakisei” a di fasi fa dee sëmbë fëën ta libi ku de na de, nöö a „ta haika de tu” (Maleaki 3:16). Jehovah „sabi ambë da dee sëmbë fëën” (2 Timoteo 2:19). A ta si hii soni di u ta du, nöö a ta jei hii soni di u ta taki (Hebelejën 4:13). Jehovah ta si te wa ta libi bunu ku dee baaa ku dee sisa fuu. Ma u sa dë seiki ta Jehovah ta si tu te u ta tei sëmbë ku wai, te u ta da sëmbë soni, te u ta da sëmbë  paadon, söseei te u ta libi bunu ku de.​—Hebelejën 13:16; 1 Petuisi 4:8, 9.

18. Unfa u sa da Jehovah tangi u di a tei u ko sëmbë fëën?

¹⁸ U kë lei Jehovah taa u ta tei ën u bigi taa u ko dë sëmbë fëën. U sabi taa di buta di u buta u libi nëën maun da di möön köni soni di u bi sa du. Hii fa u ta libi ’a sëmbë mindi di libi u de an ta kai ku Gadu möönsö’, tökuseei ’libi fuu sa ko dë gbelingbelin söndö föutu fu sëmbë sa si’, „leti kuma dee teeja a liba dee ta sëndë faja ta tuwë limbo a mundu” (Filipi 2:15). Fëën mbei u dë kabakaba u buuse soni di Jehovah ta buuse (Jakobosi 4:7). Boiti di dë, u ta lobi dee baaa ku dee sisa fuu, ta lesipeki de, u di deseei da sëmbë u Jehovah tu.​—Loomë 12:10.

19. Unfa Jehovah ta mbei dee sëmbë fëën feni bunu?

¹⁹ Di Bëibel ta paamusi u taa: „Jehovah an o go disa dee sëmbë fëën” (Psalöm 94:14). U sa dë seiki u di soni aki. Jehovah o dë ku u, aluwasi andi ta pasa. Aluwasi u ko lasi libi seei, tökuseei Jehovah an o fëëkëtë u (Loomë 8:38, 39). „Ee u dë ku libi, u dë u [Jehovah]. Ee u dëdë, u dë u [Jehovah]. Fëën mbei ee u dë ku libi, ee u dëdë, fu [Jehovah] nöö u dë nöömö” (Loomë 14:8). U ta wakiti di ten ka Jehovah o weki hii dee mati fëën dee dëdë u de sa toona ko a libi baka (Mateosi 22:32). Nöunöu kaa di Tata fuu ta da u sömëni bunu. Di Bëibel ta taki taa: „Dee sëmbë dee abi Jehovah kuma Gadu u de, dë bunu. Dee sëmbë dee a tei ko gudu fëën, dë bunu.”​—Psalöm 33:12.