1-2. (a) Andi da di möön fanöudu wooko di di kemeente u Keesitu sëmbë musu ta du, te u luku andi Jesosi bi taki a Mateosi 28:18-20? (b) Un hakisi woo piki a di woto aki?

A BI musu u dë sö taa dee apösutu bi ta wai gaanfa seei di de bi ko makandi a wan kuun. Baka di Jesosi dëdë toona weki ko a libi baka, hën a bi hakisi dee bakama fëën u de ko miti ën a di kamian dë (Mat. 28:16). A kan taa a di daka dë nëën Jesosi bi ko ’a möön leki feifi höndö u dee bakama fëën’ (1 Kol. 15:6). Faandi mbei Jesosi bi hakisi dee bakama fëën u de ko miti ën a di kamian dë? Wë a bi o da de wan wooko u de du. A bi piki de taa: „Un go a hii nasiön sëmbë, nöö un mbei de ko dë bakama u mi.”​—Lesi Mateosi 28:18-20, NW.

² Dee bakama u Jesosi dee bi jei di soni aki di daka dë, de bi ko dë sëmbë u di fosu Kemeente u Keesitu sëmbë. Di möön fanöudu wooko di di kemeente dë bi musu ta du, hën da de bi musu mbei möön hia sëmbë ko dë bakama u Keesitu. * A di ten aki dusudusu kemeente u Keesitu sëmbë dë a hii së u goonliba, nöö di möön fanöudu wooko di deseei ta du tu, hën da de ta mbei sëmbë ko dë bakama u Keesitu. A di woto aki woo piki fö hakisi: Faandi mbei di mbei di u musu mbei sëmbë ko dë bakama u Keesitu dë fanöudu sö? Andi ku andi u musu du u mbei sëmbë ko dë bakama u Keesitu? Hii Keesitu sëmbë ta du di  wooko aki ö? Faandi mbei u musu abi pasensi fuu sa du di wooko aki?

3. Faandi mbei di mbei di u musu mbei sëmbë ko dë bakama u Keesitu dë fanöudu sö, te u luku Johanisi 14:6 ku 17:3?

³ Faandi mbei di mbei di u musu mbei sëmbë ko dë bakama u Keesitu dë fanöudu sö? Wë u di sëmbë di dë bakama u Keesitu wanwan nöö sa ko dë mati u Gadu. Boiti di dë, dee sëmbë dee ta waka a Keesitu baka ta ko abi wan möön bunu libi nöunöu kaa, söseei de abi di biibi u libi u teego a goonliba aki. (Lesi Johanisi 14:6; 17:3.) A dë sö tuu taa Jesosi da u wan gaan wooko fuu du, ma wa ta du di wooko aki ku useei kaakiti. Apösutu Paulosu bi taki unfa hën ku wanlö woto biibima bi ta si di wooko aki. A bi taki taa: „Gadu buta u tuu fuu ta heepi ën a di wooko. U ku ën ta wooko makandi” (1 Kol. 3:9). U ta tei ën u bigi seei taa Gadu da u kuma zöndu libisëmbë di wooko aki fuu du!

4. Andi u sa lei a di woto u Ivan ku Matilde?

⁴ Di mbei di u ta mbei sëmbë ko dë bakama u Keesitu, da wan wooko di sa mbei u ta dë waiwai seei. Luku di woto u wan baaa de kai Ivan ku hën mujëë Matilde, di ta libi a Kolombia. De bi peleiki da wan njönku kijoo de kai Davier, hën a bi piki de taa: „Mi kë tooka soni a mi libi, ma ma sa.” Davier bi ta du wan sport ka de ta feti. A bi ta tei drugs, ta bebe daan dööngö, nöö a bi ta libi ku wan mujëë de ta kai Erika, ma de an bi tööu. Baaa Ivan bi taki taa: „U bi bigi nango ta lei ën soni u Bëibel. A bi ta libi a wan longi kamian, nöö u bi ta lëi sömëni juu longi ku baisigi a dee pötöpötö pasi. Baka di Erika si taa Davier bigi bia libi, hën hënseei bigi lei soni u Bëibel tu.” Baka wan pisiten, hën Davier an bi ta tei drugs möön, an bi ta bebe daan ta dööngö möön, söseei an bi ta du di feti sport möön. Hën ku Erika seei bi ko tööu. Matilde taki taa: „Di Davier ku Erika tei dopu a di jaa 2016, hën u toona mëni taa Davier bi lo’ u taki taa: ’Mi kë tooka, ma ma sa.’ Di soni aki bi mbei u wai seei tee taa u bigi këë.” An dë u taki taa u ta wai seei te u ta heepi sëmbë u de ko dë bakama u Keesitu.

5. Andi da di fosu soni di u musu du ee u kë heepi sëmbë u de ko dë bakama u Keesitu?

⁵ Di fosu soni di u musu du te woo heepi sëmbë u de ko dë bakama u Keesitu, hën da u musu suku dee sëmbë dee kë lei soni u Jehovah (Mat. 10:11). U ta lei taa u da Kotoigi u Jehovah tuutuu te u ta konda soni fëën da hii sëmbë di u ta miti. Te u ta du di wooko di Keesitu bi manda u fuu du, nöö u ta lei taa u da tuutuu Keesitu sëmbë.

6. Andi u sa du u sëmbë sa kë haika dee soni dee u kë konda da de?

⁶ So sëmbë ta kë ko sabi soni u di Bëibel wantewante te u miti de, ma sömëni sëmbë an ta kë ko sabi soni u Bëibel sö gaanfa te u miti de di fosu pasi. Fëën mbei so juu a ta dë fanöudu fuu da de taanga u de kë ko sabi soni u Gadu. Wë ee u kë heepi sëmbë a di peleikiwooko, nöö u musu ta seeka useei bunu a fesi. I musu luku a fesi fuun soni joo taki fii sa hai sëmbë pakisei, nöö bakaten i musu luku unfa i sa bigi fan ku dee sëmbë te i miti de.

7. Unfa i sa bigi fan ku wan sëmbë, nöö faandi mbei i si kuma a dë fanöudu fii ta haika di sëmbë, söseei fii ta lei taa i ta lesipeki ën?

⁷ Kandë i sa hakisi wan sëmbë taa: „Mi sa hakisi i wan soni kölö sö u? Sömëni u dee fuka dee ta miti u a di ten aki, ta miti sëmbë a hii së u di goonliba. Ja si kuma u abi wan kodo tii fanöudu di o sa seeka hii dee fuka dee ta miti  sëmbë a hii së u goonliba u?” Baka di dë, i sa lesi Daniëli 2:44 da di sëmbë. Nasö kandë i sa hakisi wan sëmbë taa: „Unfa i si kuma u sa kiija miii u de ko abi lesipeki?” Baka di dë, nöö i sa lesi Detolonomi 6:6, 7. Aluwasi andi joo taki te i ta peleiki da wan sëmbë, pakisei un pei sëmbë di sëmbë dë. Pakisei un wini dee sëmbë o feni te i lei de soni u Bëibel. A dë fanöudu fii ta haika di sëmbë te a ta fan, nöö i musu ta lei taa i ta lesipeki di sëmbë tu. Te i du sö nöö joo sa möön fusutan de, söseei de o kë möön haika dee soni dee i ta taki.

8. Faandi mbei u musu ta mbei möiti nöömö fuu nango ta luku sëmbë di u bi miti kaa?

⁸ Ufö wan sëmbë taki taa a kë lei soni u Bëibel, kandë i musu ta mbei möiti fii nango ta luku ën baka. Faandi mbei? U di a sa dë taa di sëmbë an dë a wosu te u toona go luku ën baka, nasö a sa dë taa wa ta feni pasi u fan ku ën. Söseei, kandë i musu toona go luku di sëmbë sömëni pasi baka ufö a o kë lei soni u Bëibel. Hoi a pakisei taa ee i kë u wan soni di i paandi göö, nöö i musu ta toona ta munjëën hii juu baka. Sö nöö a dë ku wan sëmbë di bi haika di u bi konda soni u Bëibel dëën. A o ko ta lobi Jehovah ku Keesitu möön gaanfa te u ta toona go nëën u konda soni u di Wöutu u Gadu dëën.

9-10. Faandi mbei u sa taki taa hiniwan Keesitu sëmbë ta da wan maun a di suku di u ta suku dee limbohati sëmbë?

⁹ Hiniwan Keesitu sëmbë ta da wan maun a di suku di u ta suku dee limbohati sëmbë. U sa taki taa di wooko aki dë kuma te sëmbë ta suku wan mii di lasi. Na un futu? Pakisei di soni di bi pasa ku wan womi mii u dii jaa di bi lasi. Söwan 500 sëmbë bi go suku ën. Te u kaba fëën, söwan 20 juu longi baka di di mii lasi, hën wan u dee sëmbë ko feni ën a wan kalu goon. Ma di sëmbë an bi kë tja di në taa  hën feni di mii. A bi taki taa: „Höndöhöndö sëmbë bi suku ën fuu bi sa feni ën.”

¹⁰ Sömëni sëmbë dë kuma di mii dë. De lasi a wan pei fasi. Saanfa-u-du u de kaba, nöö de kë u sëmbë ko heepi de (Ef. 2:12). A pasa aiti milion sëmbë di ta suku dee lö sëmbë dë. Kandë iseei an feni wan sëmbë fii ta lei soni u Bëibel. Ma kandë woto peleikima di ta peleiki a di wan seei kamian ka i ta peleiki, feni sëmbë di kë ko sabi soni u di tuutuu lei di dë a di Wöutu u Gadu. Te wan baaa nasö wan sisa feni wan sëmbë di kë toon wan bakama u Keesitu, nöö hii dee peleikima dee ta suku dee lö sëmbë aki sa ta wai tu.

11. Ee ja ta lei sëmbë soni u Bëibel, nöö na un woto fasi i sa heepi sëmbë u de ko toon bakama u Keesitu?

¹¹ Ee a dë taa ja ta lei sëmbë soni u Bëibel nöunöu, tökuseei i sa heepi sëmbë u de ko toon bakama u Keesitu. I sa ta fan ku dee sëmbë dee ta ko u di fosu pasi a komakandi, nöö i sa ta heepi de tu. Ee i ta lei de a sö wan fasi taa i lobi de, nöö de o si taa u da tuutuu bakama u Keesitu (Joh. 13:34, 35). Dee piki dee i ta da te i dë a komakandi, ta lei dee njunjun sëmbë dee ta ko a komakandi unfa de sa konda soni u di biibi u de ku hii de hati da wotowan, söseei a o lei de u de sa ta da piki a wan fasi di fiti. Boiti di dë, i sa nango a di peleikiwooko ku wan njunjun peleikima, nöö i sa heepi ën faa wooko ku di Bëibel u lei sëmbë soni. Te i ta du sö, nöö i ta lei ën unfa a sa djeesi Keesitu.​—Luk. 10:25-28.

12. U musu abi wan apaiti köni ufö u sa heepi sëmbë u de ko toon bakama u Jesosi ö? Konda wan woto.

¹² Na wan fuu musu si kuma u musu abi wan apaiti köni ufö u sa lei sëmbë soni u de sa ko toon bakama u Jesosi. Faandi mbei u taki sö? Luku di woto u wan sisa de kai Faustina, di ta libi a di köndë Bolifia. An bi sa’ u lesi di a bi ko ta nama ku dee Jehovah Kotoigi. Ma nöunöu a ko sa’ u lesi pikisö. A dopu nöunöu, nöö a lo’ u lei sëmbë soni u Bëibel. Hiniwan wiki a ta lei feifi sëmbë soni u Bëibel. Hii fa Faustina an sa lesi sö bunu kuma gaansë u dee sëmbë dee a ta lei soni u Bëibel, tökuseei a bi heepi sikisi sëmbë u de tei dopu.​—Luk. 10:21.

13. Un wini u ta feni te u ta heepi sëmbë u de ko dë bakama u Keesitu aluwasi u abi hia soni ta du?

¹³ Hii fa sömëni Keesitu sëmbë ta abi te a hia fanöudu soni ta du, tökuseei de ta feni ten u de ta lei sëmbë soni u Bëibel, nöö a ta mbei de ta dë waiwai seei. Luku di woto u wan sisa de kai Melanie di ta libi na Alaska. Hën wanwan bi ta kiija wan piki mujëë mii fëën u aiti jaa. A bi abi wan wooko ta du a hii di wiki dendu tu, söseei a bi ta heepi wan u dee gaansëmbë fëën di bi abi di siki de kai kankël. Melanie wanwan bi dë Kotoigi a di kamian ka a bi ta libi. A bi lo’ u begi Jehovah faa dëën taanga faa sa go peleiki hii fa di wei bi ta kötö, u di a bi kë feni sëmbë di a bi o sa ta lei soni u Bëibel. Te u kaba fëën, a bi ko miti wan mujëë de kai Sara, di bi  wai seei di a ko jei taa Gadu abi wan në. Baka wan pisiten, hën Sara bi kë lei soni u Bëibel. Melanie taki taa: „Feeda ndeti, nöö mi bi ta wei seei, ma tökuseei mi ku di mujëë mii u mi bi nango lei Sara soni u Bëibel, nöö u bi ta feni wini fëën seei. U bi ta wai seei te u bi ta öndösuku soni fuu piki dee soni di Sara bi hakisi u, nöö u bi ta wai seei te u bi ta si unfa hën ku Jehovah bi ta ko möön dë mati.” Sara bi ta hoi dou te sëmbë bi ta du ku ën. A bi puu hën në a di keiki ka a bi nango, hën a tei dopu tu.

14. (a) Unfa di heepi di u ta heepi sëmbë u de ko dë bakama u Jesosi, dë kuma di kisi di sëmbë ta kisi fisi? (b) Andi di soni di Paulosu sikifi a 2 Timoteo 4:1, 2, ta da i taanga fii du?

¹⁴ Aluwasi kandë ja ta feni sëmbë u heepi de u de ko dë bakama u Keesitu, tökuseei i musu ta suku go dou. Jesosi bi taki taa dee sëmbë dee ta heepi sëmbë u de ko dë bakama fëën, dë kuma sëmbë di ta kisi fisi. So juu wan sëmbë di ta kisi fisi, ta wakiti sömëni juu longi ufö a kisi fisi. Möön gaanfa de lo’ u wooko a gaan ndeti, nasö a fuuku mamate, nasö so juu de musu go te seei a wan longi kamian (Luk. 5:5). Sö nöö so peleikima ta wooko sömëni juu longi u de suku sëmbë di kë ko sabi soni u di tuutuu lei, söseei de nango a peipei kamian tu u de suku dee lö sëmbë dë. Faandi mbei de ta du di soni aki? Wë de ta du di soni aki u de sa ta miti möön hia sëmbë. Dee peleikima dee ta mbei di lö möiti aki, lo’ u miti sëmbë di ta kë sabi soni u di buka di u ta paaja. A bi o bunu ee iseei suku fasi u peleiki a wan juu ka i sa möön miti sëmbë, nasö fii peleiki a wan kamian ka sëmbë lo’ u dë möön gaanfa.​—Lesi 2 Timoteo 4:1, 2.

15. Faandi mbei u musu abi pasensi te u ta lei sëmbë soni u Bëibel?

 ¹⁵ Faandi mbei u musu abi pasensi te u ta lei sëmbë soni u Bëibel? Wan u dee soni di mbei u musu abi pasensi, hën da u di u musu heepi dee sëmbë dee u ta lei soni u Bëibel u de ko sabi dee lei u Bëibel, söseei u de ko lobi de tu. U musu heepi de u de ko sabi Jehovah, u di hën mbei sëmbë sikifi di Bëibel, söseei u musu heepi de u de ko lobi Jehovah tu. Na lei nöö u musu ta lei de andi Jesosi piki u fuu du, ma u musu lei de unfa de musu libi ku dee soni di Jesosi piki u. U musu abi pasensi ku de te u ta heepi de u de libi ku dee mama wëti u Bëibel. So u de ta tooka di fasi fa de ta pakisei ku di fasi fa de ta tja deseei, a wantu liba dendu nöö, ma wotowan ta tei möön longi.

16. Andi i lei a di woto u Raúl?

¹⁶ Wan baaa di bi ta du di sëndëlengiwooko a Pelu, bi si unfa a ta bunu te i abi pasensi. A bi taki taa: „Mi bi lei wan womi de kai Raúl soni a tu u dee buku fuu. Ma tökuseei a bi ta taanga dëën u tooka soni nëën libi. Soni an bi ta waka bunu a di tööu libi fëën, a bi ta kosi sëmbë, söseei dee mii fëën an bi ta lesipeki ën u di an bi ta tja hënseei a wan bunu fasi. Ma a bi ta ko a dee komakandi. Fëën mbei mi bi ta heepi hën ku dee sëmbë fëën wosudendu go dou. Baka dii jaa, hën a ko tei dopu.”

17. Andi woo luku a di woto di ta ko?

¹⁷ Jesosi bi piki u fuu ’go a hii nasiön sëmbë, nöö u musu mbei de ko dë bakama fëën’. Fuu sa du di soni aki, nöö a ta pasa möön gaanfa taa u musu ta fan ku sëmbë di an ta pakisei kumafa u ta pakisei, nasö u musu ta fan ku sëmbë di an nango a keiki, nasö ku sëmbë di an ta biibi taa wan Gadu dë. A di woto di ta ko, woo luku unfa u sa ta peleiki da dee sëmbë dë.