Jehovah kë taa tu sëmbë di tööu musu ta dë waiwai, söseei taa de musu ta lobi deseei go dou (Mat. 19:4-6). Ee a dë sö taa i kë tööu, nöö unfa i sa feni wan bumbuu womi nasö wan bumbuu mujëë fii ku ën tööu? U di Jehovah hën mbei u, mbei a sabi andi u musu du fuu sa abi wan bunu tööu libi. Fëën mbei ee i ta libi ku dee mama wëti dee a da u, nöö joo dë waiwai tuutuu. Boo buta pakisei a so u dee mama wëti aki.

Di fosu soni di u musu ko fusutan, da disi: „Di hati ta ganjan sëmbë möön hii soni, nöö a hogi seei” (Jel. 17:9). Te tu sëmbë di kë tööu ta lei sabi deseei, nöö hesihesi seei dee fii u de sa ko taanga sö tee taa a sa taanga da de u de wegi soni luku a wan bunu fasi, söseei u de du soni ku köni. Te tu sëmbë tööu ku deseei u di de an sa duwengi dee manu ku mujëë fii u de, nöö a lo’ u pasa taa te u kaba fëën de ta tjali (Nöng. 28:26). Fëën mbei an dë wan köni soni u de bigi lei unfa de ta fii da deseei tjika, nasö u de bigi paamusi deseei soni, hii fa de an kaba sabi deseei jeti.

Nöngö 22:3 ta taki taa: „Di köni sëmbë ta si di hogi ta ko miti ën, nöö a ta kule go tjubi, ma di sëmbë di an sabi soni ta waka go dou, nöö fëën mbei a musu tja sitaafu fëën.” Ma unfa a dë ku dee website ka sëmbë sa go suku sëmbë u de tööu? Hogi sa miti u ee u ta suku wan sëmbë fuu ku ën tööu, a dee website dë u? Wë a tjali taa so sëmbë di bi ta suku wan sëmbë a Internet u de tööu, bi miti ku sëmbë di bi ganjan de taa de lobi de. Boiti di dë, so sëmbë an ta buta de tuutuu në nasö tuutuu footoo u de a Internet, u di de ta suku u ganjan wotowan njan möni u de. A pasa kaa taa so u dee sëmbë aki bi taki seei taa de da Kotoigi.

Luku wan woto soni. So u dee website dee ta heepi sëmbë u de feni wan sëmbë u de tööu, ta wooko ku soni di sëmbë ta mbei buta a computer, u lei un pei sëmbë ku un pei sëmbë o fiti ku deseei. Ma soni an dë di ta lei taa dee soni aki ta heepi sëmbë tuutuu u de feni wan bumbuu womi nasö wan bumbuu mujëë u de ku ën sa tööu. I si kuma a bi o dë wan köni soni u buta futoou a wan soni di libisëmbë mbei, u heepi u ku sö wan fanöudu soni ö? Nöiti a o sa kan taa wan computer soni sa dë u futoou möön dee mama wëti u Bëibel.​—Nöng. 1:7; 3:5-7.

Wan mama wëti di sikifi a Nöngö 14:15 ta taki taa: „Wan sëmbë di na abi öndöfeni ta biibi hii soni di a jei, ma wan köni sëmbë ta luku bunu ka  a ta buta futu.” A bi o bunu fii lei sabi wan sëmbë bumbuu ufö i si ën kuma wan sëmbë di i ku ën sa tööu. Ma a sa taanga u du di soni aki te i ku di sëmbë ta miti a Internet. Wë a sa kan taa i ku di sëmbë ta manda footoo ku woto soni da unuseei, söseei taa un ta fan sömëni juu longi a Internet. Ma tökuseei i si kuma i sa taki taa i sabi di sëmbë dë tuutuu ö? So sëmbë di bi ta mëni taa de bi feni wan sëmbë di lobi de tuutuu, bi panta seei di de ku di sëmbë bi miti.

Di Psalöm sikifima bi taki taa: „Ma ta nama ku sëmbë di ta ganjan sëmbë, söseei mi ta kule da sëmbë di ta tjubi ambë de dë tuutuu” (Ps. 26:4). Sömëni sëmbë lo’ u mindi soni a dee website ka sëmbë nango suku sëmbë u tööu, u di de kë u wotowan si de kuma bumbuu sëmbë. De sa ta tjubi dee manii u de dee an bunu, nasö a sa kan taa dee manii u de an o ta dë u si te de ta manda bosikopu da sëmbë a Internet. Wë so u de sa ta taki taa de da Jehovah Kotoigi. Ma a dë sö taa de dë dopudopu Keesitu sëmbë u? De abi wan taanga biibi ö? De ku Jehovah dë gaan mati ö? Sëmbë ta lesipeki de a di kemeente ka de dë u? Naa de dë sëmbë di wotowan an sa waka a de baka? (1 Kol. 15:33; 2 Tim. 2:20, 21) De dë sëmbë di di Bëibel ta da pasi u de tööu baka u? A dë fanöudu fii ko sabi dee soni aki. Ma a sa taanga fii ko sabi de ee ja fan ku Kotoigi di sabi di sëmbë bumbuu (Nöng. 15:22). Boiti di dë, an bi o dë wan köni soni u wan dinima u Jehovah tööu ku wan sëmbë di an ta dini Jehovah.​—2 Kol. 6:14; 1 Kol. 7:39.

Hogi sa miti u a dee website ka sëmbë nango suku sëmbë u de tööu. Ma möön bunu fasi dë fa u sa feni wan sëmbë di u ku ën o sa tööu. Naasë i sa miti sö wan sëmbë? Wë ee lanti u wan köndë da sëmbë pasi u miti a gaan kulupu, nöö dee Jehovah Kotoigi sa ko lei sabi woto dinima möön bunu, a dee kemeente komakandi, dee keling-komakandi, dee könklësi, söseei a woto okasi ka baaa ku sisa ta ko makandi.

Ma te wa sa ko makandi kumafa di kolona siki ta paaja aki, nöö u ta hoi komakandi a Internet. Nöö a di lö fasi dë i sa ko sabi woto Kotoigi di an tööu jeti. A dee komakandi aki u sa lei sabi baaa nasö sisa di an tööu. Joo sa si tu fa de ta da piki a dee komakandi, söseei fa de ta lei taa de abi biibi (1 Tim. 6:11, 12). Kandë i ku di sëmbë o sa fan ku unuseei baka di komakandi tu, a wan soni de ta kai breakout room. Te i ku woto baaa ku sisa ko makandi a Internet u du soni makandi, nöö joo sa si unfa di sëmbë di i kë, ta du soni te a dë makandi ku wotowan. A sö wan fasi joo sa ko sabi unfa a dë tuutuu (1 Pet. 3:4). Baka wan pisiten, te i ku di sëmbë ko sabi unuseei möön bunu, nöö joo sa sabi ee un ta si soni di wan fasi, ee un kë du dee seei soni a di libi, söseei ee a bi o bunu fuun tööu ku unuseei.

Te sëmbë di an tööu ta wooko ku dee mama wëti u Bëibel te de ta suku wan sëmbë u de tööu, nöö de ta ko si taa di soni di di Bëibel ta taki da tuutuu soni. A ta taki taa: „Ee wan sëmbë feni wan bumbuu mujëë [nasö womi], hën da a feni wan bunu soni, nöö Jehovah o feni ën u bunu.”​—Nöng. 18:22.