Wan baaa de kai Nicolas ku hën mujëë Céline bi abi wan woto bookohedi. De bi foloisi go a wan woto kemeente kumafa di bëikantoo u Faansi bi hakisi de. Nicolas ku Céline bi taki taa: „Bigibigi u bi ta wai seei, ma bakaten hën u ko ta hangi dee mati fuu. Wa bi dë gaan mati ku dee baaa ku dee sisa u di kemeente ka u bi go jeti.” a U di a sa dë wan taanga soni da u te u tooka kemeente, mbei a bunu fuu hakisi useei andi sa heepi u fuu ta dë waiwai, söseei fuu ta wooko taanga a di kemeente ka u go. Andi wotowan sa du u heepi dee baaa ku dee sisa dë? Unfa i sa da dee baaa ku dee sisa taanga, söseei unfa i sa feni taanga tu?

FÖ MAMA WËTI DË DI SA HEEPI I

1. Buta futoou a Jehovah (Ps. 37:5). Wan sisa de kai Kazumi, di ta libi a di köndë Japan bi abi u foloisi kumutu a di kemeente ka a bi dë söwan 20 jaa longi, u di de bi manda hën manu faa go wooko a wan woto kamian. Unfa Kazumi bi mbei „Jehovah tii di libi [fëën]”? Kazumi bi taki taa: „Hii juu seei mi bi ta piki Jehovah fa mi bi ta fii. Mi bi ta konda dëën andi bi ta mbei mi ta fëëë, andi bi ta da mi bookohedi, söseei andi bi ta mbei mi ta fii taa mi dë mi wanwan. Hiniwan pasi te mi bi ta begi ën, nöö a bi ta da mi di taanga di mi bi abi fanöudu.”

Unfa i sa ko ta futoou Jehovah möön gaanfa? Wë leti kumafa wan soni di sëmbë paandi ta abi wata fanöudu faa göö, sö nöö di biibi fuu abi so soni fanöudu faa göö tu. Baaa Nicolas di u bi taki soni fëën a fesi, bi taki taa te a bi ta kai pakisei a dee woto u Abahamu, Jesosi, ku Paulosu, nöö di  futoou di a ta futoou Jehovah bi ta ko möön taanga, u di dee womi dë tuu bi disa soni di de bi lobi u de sa du soni kumafa Jehovah kë. Di abi di joo abi di guwenti u ta lei soni u Bëibel o heepi i te soni ko tooka a i libi, söseei a o heepi i fii sa ta da wotowan taanga a di njunjun kemeente ka i go.

2. Na tei di kemeente ka i dë maaka ku di kemeente ka i bi dë (Peleik. 7:10). Wan baaa de kai Jules bi foloisi kumutu a wan köndë fu Afiikan de kai Benin go na Amëëkanköndë. Nöö a bi musu mbei möiti u ko guwenti di fasi fa sëmbë bi ta libi a di köndë dë. A bi taki taa: „Mi bi ta si kuma mi bi musu ta konda mi libi da hiniwan njunjun sëmbë di mi bi ta miti.” U di an bi guwenti di soni dë, mbei an bi ta hulu dee baaa ku dee sisa u di kemeente sö möön. Ma baka di a ko sabi dee baaa ku dee sisa möön bunu, hën a ko ta si soni woto fasi. A bi taki taa: „Nöunöu mi ko fusutan taa hii u tuu dë di wan, an abi naasë u goonliba u go. Di wan kodo soni di tooka, hën da di fasi fa u ta fan ku di fasi fa u ta du soni. Wa musu kë u woto sëmbë tooka ko ta du soni kumafa u kë.” Fëën mbei u musu ta köni fu wa tei di kemeente ka u dë maaka ku di kemeente ka u bi dë. Wan sisa di ta du di pioniliwooko de kai Anne-Lise, bi taki taa: „Ma foloisi u mi go suku di soni di mi bi guwenti, ma mi foloisi u mi go lei njunjun soni.”

Dee gaanwomi seei musu ta köni u de an tei di kemeente ka de dë maaka ku di kemeente ka de bi dë. Na u di dee baaa u di njunjun kemeente ta du soni woto fasi, mbei u sa taki taa de an ta du soni bunu. A bi o bunu fii mbei möiti u ko sabi unfa soni dë a di pisiwata dë ufö i piki wotowan andi de musu du (Peleik. 3:1, 7b). A bi o möön bunu fii lei dee wotowan fii unfa de musu du soni, ku di fasi fa i ta tja iseei, ka fii ta duwengi de u de du soni kumafa i kë.​—2 Kol. 1:24.

3. I musu ta dë kabakaba u du hii soni di i sa du a di kemeente (Fil. 1:27). Hii fa sömëni soni ta dë u du te u foloisi, tökuseei a dë fanöudu fuu nango bigibigi kaa a dee komakandi a zali ee u sa. Ee dee baaa ku dee sisa u di njunjun kemeente fii an si i wan daka, nasö ee de an sabi i, nöö a o taanga da de u de heepi i. Wan sisa de kai Lucinda, di bi foloisi makandi ku dee tu mujëë mii fëën go a wan gaan foto u Zuid-Afiikan, bi taki taa: „Dee mati u mi bi da mi taanga u mi mbei möiti u ko sabi dee baaa ku dee sisa u di njunjun kemeente u mi möön bunu, u mi ta peleiki makandi ku de, söseei u mi ta da piki a dee komakandi. Boiti di dë, u bi piki dee baaa taa de sa ta hoi peleikiwooko komakandi a u pisi.”

„Te u ta wooko makandi” ku dee baaa ku sisa u di njunjun kemeente fuu, nöö di soni dë o heepi u fuu ta da useei taanga. Dee gaanwomi bi da sisa Anne-Lise taanga faa mbei möiti u peleiki ku hii dee baaa ku dee sisa u di kemeente. Wë unfa soni bi waka dëën bakaten? Anne-Lise bi taki taa: „Di soni dë da wan u dee gaan soni di ta heepi wan sëmbë faa ko ta fii bunu a di kemeente.” Boiti di dë, te u ta heepi seeka di Könuköndë zali, nöö di soni dë o lei taa u da wan sëmbë u di kemeente. Möön joo ta dë kabakaba u du hii soni di i sa du a di  kemeente, möön dee baaa ku dee sisa o ta fii bunu u dë makandi ku i, söseei joo ta möön si de kuma i famii.

4. Mbei möiti fii ko abi njunjun mati (2 Kol. 6:11-13). Te u ta lei wotowan taa u ta booko u hedi ku de, nöö an o taanga da u sö fuu ku de ko dë mati. Fëën mbei a bi o bunu fii ta mbei möiti u dou fuuku a dee komakandi, söseei fu ja ta biinga go a wosu te di komakandi kaba, sö taa i sa ta abi ten tjika u da woto ku dee wotowan. Mbei möiti u ko sabi de në. Te i ta hoi sëmbë në a hedi, te i ta dë waiwai ku de, söseei te de an ta fëëë u ko fan ku i, nöö de o kë ko dë mati ku i.

Ka fii ta booko i hedi ta du soni u dee baaa ku dee sisa ko lobi i, nöö a bi o bunu fii mbei möiti u de ko sabi unfa i dë tuutuu. I sa du soni kumafa Lucinda bi taki. A bi taki taa: „Nöunöu u abi bumbuu mati, u di u bi ta kai sëmbë ko a u pisi. Wa bi ta wakiti u de fosu kai u.”

„I MUSU TA TEI WOTOWAN KU WAI”

A sa dë wan taanga soni da so sëmbë u de denda go a wan Könuköndë zali, ka sömëni sëmbë dë di de an sabi. Andi i sa du u heepi de u de fii bunu? Apösutu Paulosu bi da u taanga fuu ta tei wotowan ku wai „leti kumafa Keesitu bi tei [u] ku wai” (Lom. 15:7). Dee gaanwomi sa djeesi Keesitu te de ta lei dee njunjun baaa ku sisa taa de ta wai ku de. (Luku di pisi „ Andi i sa du u soni waka bunu da i te joo foloisi”.) Fuu taki ën kumafa a dë, nöö hii dee sëmbë u di kemeente tuu sa heepi dee njunjun baaa ku sisa u de ta fii bunu a di kemeente.

Di tei di u musu ta tei wotowan ku wai, an kë taki nöö taa u musu ta kai sëmbë ko a u pisi. Ma a kë taki tu taa u musu ta du soni u heepi de. Wan sisa bi tei ten tja wan woto sisa waka lontu di köndë, nöö a bi lei ën unfa a sa waka ku besi ku talanwagi go ka a kë. Dee soni di di sisa bi du dë bi dou di woto sisa hati seei. Dee soni dë bi heepi di sisa di foloisi ko faa ko guwenti di köndë.

A SA HEEPI I FII GO A FESI A DI BIIBI

Te wan atiti ta göö, nöö a ta tooka sinkii sömëni pasi ufö dee hanza fëën ta taanga tjika faa sa  buwa. So nöö te i foloisi go a wan njunjun kemeente, nöö i musu puu hii soni di sa mbei ja sa go a fesi a di dini di i ta dini Jehovah. Nicolas ku Céline bi taki taa: „Te i foloisi, nöö di soni dë sa heepi fii go a fesi. Di u ko guwenti ku njunjun sëmbë, ku njunjun kamian, hën di soni aki bi heepi u fuu ko abi njunjun fasi.” Jean-Charles bi taki a bigi u di woto aki unfa di wosudendu fëën bi feni wini di de bi foloisi go a wan njunjun kemeente. A bi taki taa: „A di njunjun kemeente dee mii fuu bi go a fesi a di biibi, söseei de ku Jehovah bi ko dë möön gaan mati. Baka wantu liba, hën di mujëë mii fuu bigi ta hoi demo a dee mindiwiki komakandi, söseei di womi mii fuu ko toon wan peleikima di na dopu jeti.”

Ee a ko dë sö taa ja sa foloisi go a wan kamian ka heepi dë fanöudu, nöö a bi o bunu seei fii du kuma di kemeente fii ko dë wan njunjun kemeente da i, nöö i wooko ku wantu u dee soni dee u taki a di woto aki. Buta futoou a Jehovah, nöö ta mbei buka u wooko ku wotowan a di peleikiwooko. Söseei mbei möiti u ko dë möön bunu mati ku dee baaa ku sisa dee i sabi kaa, nasö ta da de taanga. Kandë i sa heepi dee sëmbë dee abi heepi fanöudu. Leti kumafa u sabi kaa, nöö lobi da wan u dee fasi di ta lei taa u da tuutuu Keesitu sëmbë. Fëën mbei i sa dë seiki taa te i ta lei taa i lobi wotowan, nöö di soni dë o heepi i fii ku Jehovah ko dë möön gaan mati (Joh. 13:35). I sa dë seiki taa ’Gadu ta tei dee lö libi dë tu kuma wanlö peesenti u ta tja go dëën, nöö a ta wai ku de seei’.​—Heb. 13:16.

Hii fa an dë wan kösökösö soni, tökuseei sömëni baaa ku sisa bi dë waiwai a di njunjun kemeente di de go. Sö nöö iseei sa dë ku piizii tu! Anne-Lise bi taki taa: „Di tooka di mi bi tooka kemeente bi heepi mi u mi bi sa möön jabi mi hati da wotowan.” Kazumi seei sabi nöunöu taa „te i foloisi go a wan njunjun kemeente, nöö i ta si unfa Jehovah ta heepi i a sömëni fasi”. Jules bi taki taa: „Di mi toon mati ku baaa ku sisa a di kemeente, hën mi ko ta fii bunu a di kemeente. Nöunöu mi ta fii seei ta mi da wan sëmbë u di kemeente, nöö a o taanga da mi seei u foloisi baka.”