Jesaaja 60:1 ta taki taa: „Mujëë, hopo nöö i tuwë limbo, biga di limbo fii ko. Di hei u Jehovah ta tuwë limbo a i.” Te i lesi dee woto vers dee ta ko a di tëkisi aki baka, nöö i ta fusutan taa di „mujëë” aki da Sion nasö Jelusalen, di mama foto u Juda u di ten ala a (Jes. 60:14; 62:1, 2). Te di tëkisi aki ta taki soni u di foto Jelusalen, nöö a ta taki soni u hii dee Isaëli sëmbë tuu. Dee soni dee Jesaaja taki aki ta mbei u hakisi useei tu soni. Di fosu soni da: Na un ten Jelusalen bi „hopo” tuwë limbo, söseei unfa a bi du ën? Nöö di u tu soni da: Dee soni dee Jesaaja bi taki, bi o pasa a wan möön apaiti fasi a di ten fuu aki ö?

Na un ten Jelusalen bi „hopo” tuwë limbo, söseei unfa a bi du ën? Jelusalen ku di Wosu u Gadu bi fika bookobooko, di dee Dju bi dë a katibo 70 jaa longi a Babilon. Ma baka di dee sëmbë u Media ku Pëlsia feti tei Babilon, hën sömëni u dee Isaëli sëmbë dee bi ta dë a dee pisiwata ka Babilon bi ta tii, bi feni pasi u de toona go a de köndë, nöö de seti di tuutuu biibi baka (Ësl. 1:1-4). A di jaa 537 Bifö Keesitu, hën so u dee Dju u dee 12 lö u Isaëli bi du di soni dë (Jes. 60:4). De bi bigi ta tjuma soni da Jehovah, ta hoi dee gaan piizii daka dee Gadu bi da de u de ta hoi, söseei de bi bigi mbei di Wosu u Gadu baka (Ësl. 3:1-4, 7-11; 6:16-22). A bi ko pasa taa di hei u Jehovah bi bigi ta tuwë limbo a Jelusalen baka. Hën da a dee sëmbë u Gadu. A sö wan fasi deseei bi ko dë kuma wan faja, di bi ta tuwë limbo da dee woto köndë sëmbë dee bi dë a dungu, u di de an bi sabi Jehovah.

Ma na hii soni u di tjabukama woto u Jesaaja bi pasa a di ten dë. Dee Isaëli sëmbë an bi piki Gadu buka go dou (Neh. 13:27; Mal. 1:6-8; 2:13, 14; Mat. 15:7-9). Bakaten de bi bia baka da Jesosi Keesitu seei, di bi dë di Mësiasi (Mat. 27:1, 2). Nöö sëmbë bi ko booko Jelusalen ku di Wosu u Gadu kaba a sösö, a di jaa 70 Baka Keesitu. Di pasi dë bi dë di u tu pasi di de booko Jelusalen ku di Wosu u Gadu.

Jehovah bi taki a fesi taa sö soni bi o pasa (Dan. 9:24-27). A dë gbelingbelin u si taa an bi abi a pakisei taa di Jelusalen u goonliba aki, hën bi musu mbei hii dee soni dee nama ku di tjabukama woto u Jesaaja kapitë 60 pasa tuutuu.

Dee soni dee Jesaaja bi taki, bi o pasa a wan möön apaiti fasi a di ten fuu aki ö? Aai. Ma de bi o pasa ku wan woto mujëë. Di mujëë dë da „di Jelusalen u liba ala”. Apösutu Paulosu bi taki wan soni u di mujëë dë. A bi taki taa: „Hën da u mama” (Gal. 4:26). Di Jelusalen u liba ala da di pisi u di ölganisaasi u Gadu di dë a liba ala, di dee ëngëli fëën dë nëën. „Dee mii” fëën da Jesosi ku dee 144.000 Keesitu sëmbë di Gadu salufu ku di jeje fëën u de go tii ku Jesosi a liba ala, leti kuma Paulosu. Dee Keesitu sëmbë dee Gadu salufu, da wan „santa föluku”. De da „di Isaëli u Gadu”.​—1 Pet. 2:9; Gal. 6:16.

Unfa di Jelusalen u liba ala bi ’hopo tuwë limbo’? Wë a bi tei dee mii fëën dee dë a goonliba aki, dee Gadu salufu ku di jeje fëën, u de hopo tuwë di limbo dë. Luku unfa dee soni dee bi pasa ku dee mii dë, ta kai ku dee soni dee sikifi a Jesaaja kapitë 60.

Dee salufuwan bi musu „hopo” u di de bi ko dë a dungu a di së u di biibi. Di soni dë bi pasa ku de, di di „taku uwii” bi ko hia möön de baka di dee apösutu dëdë. Di taku uwii dë da dee sëmbë dee  bi ta djei Keesitu sëmbë, dee bi ta paaja poipoi lei (Mat. 13:37-43). A di ten dë, de bi ko dë a katibo a di Gaan Babilon, nöö di Gaan Babilon dë da hii dee poipoi keiki u goonliba tuu. Dee salufuwan bi fika a katibo u te „di kaba pisiten u di goonliba aki” dou. Di pisiten dë bigi a di jaa 1914 (Mat. 13:39, 40). Wantu jaa baka di dë, a di jaa 1919, hën de bi kumutu a katibo, hën de bigi tuwë limbo wantewante, u di de bi bigi du di peleikiwooko fajafaja. b A dee jaa dee bi pasa baka di dë, sëmbë u hii pei nasiön bi ko a di limbo dë tu, te kisi dee sëmbë u di Isaëli u Gadu dee bi musu ko jeti. Dee sëmbë u di Isaëli u Gadu dë, da „dee könu” di Jesaaja 60:3 ta taki soni u de.​—Ako. 5:9, 10.

A di ten di ta ko, dee salufuwan o tuwë di limbo u Jehovah a wan möön apaiti fasi. Unfa sö? Te de dëdë, söseei te Gadu tei de go a liba ala, nöö de o ko dë wan pisi u di „Njunjun Jelusalen”, nasö di tööu mujëë u Jesosi. Di tööu mujëë dë da hii dee 144.000 könu ku mindima tuu.​—Ako. 14:1; 21:1, 2, 24; 22:3-5.

Di Njunjun Jelusalen o du wan gaan wooko u mbei dee soni dee sikifi a Jesaaja 60:1 pasa tuutuu. (Luku Jesaaja 60:1, 3, 5, 11, 19, 20 ku Akoalimbo 21:2, 9-11, 22-26.) Leti kumafa di Jelusalen u goonliba aki bi dë di kamian ka sëmbë bi ta dë ta tii na awooten Isaëli, sö nöö di Njunjun Jelusalen ku Jesosi, o ko dë di tii di o ta tii libisëmbë a di njunjun goonliba. Unfa di Njunjun Jelusalen „ta kumutu a Gadu ala ta saka ta ko”? Wë a ta du sö, u di a ta buta pakisei a di goonliba aki. Dee sëmbë dee ta lesipeki Gadu, dee kumutu a dee tookatooka nasiön, „o waka a di limbo fëën”. Ma na di dë nöö. De o kumutu a zöndu ku dëdë basu tu (Ako. 21:3, 4, 24). Te u kaba fëën, „hii soni o ko bunu baka” kumafa Jesaaja ku dee woto tjabukama bi taki (Tjab. 3:21). Hii soni bigi ko bunu baka di Keesitu toon Könu, nöö a o kaba di wooko dë a kaba u di Dusu Jaa Tii fëën.