DE PAI mi a di jaa 1926 a di foto Crooksville, di dë a Ohio na Amëëkanköndë. Mi mama ku mi tata an bi nango a keiki, ma de bi piki u dee aiti mii u de taa u musu go a keiki. Mi bi nango a wan keiki de ta kai Metodist keiki. Di mi bi abi 14 jaa, hën di hedima u di keiki da mi wan kado, u di mi bi go hii dee sonde u di jaa a keiki.

A di ten dë, wan mujëë di bi ta libi a u bandja de kai Margaret Walker bi bigi ko ta lei mi mama soni u Bëibel. Di mujëë bi dë wan Jehovah Kotoigi. Wan daka, hën mi go sindo haika tu. Ma mi mama bi pakisei taa mi bi o ko poi di studie fëën, nöö fëën mbei a bi piki mi taa mi musu go a döö. Ma mi bi ta haika jeti. Magaret ko a mi mama sömëni pasi. Wan daka hën a hakisi mi taa: „I sabi di në u Gadu ö?” Hën mi piki ën taa: „Hii sëmbë sabi taa hën në da Gadu.” Hën a toona piki mi taa: „Go tei di Bëibel fii, nöö suku Psalöm 83:18.” Mi du di soni di a piki mi, hën mi ko si taa di në u Gadu da Jehovah. Hën mi kule go a döö, hën mi piki dee mati u mi taa: „Te un go a wosu tide ndeti, nöö un suku Psalöm 83:18 a di Bëibel, nöö woon si di në u Gadu.” Boo taa peleiki mi bi bigi ta peleiki dë kaa.

Mi ko lei soni u Bëibel, hën mi tei dopu a di jaa 1941. An bi tei longi seei, hën de bi hakisi mi u hoi wan kemeente buku studie. Mi bi da mi mama ku dee baaa ku dee sisa u mi taanga u de ko a di komakandi dë. Nöö hii de tuu bi bigi ta ko a di buku studie di mi bi ta hoi. Ma mi tata an bi kë ko a di buku studie.

Mi bi kisi möön faantiwöutu a di kemeente, nöö mi bi ko abi sömëni buku u Jehovah Kotoigi. Wan daka, mi tata lei finga go a dee buku u mi, hën a taa: „I si dee soni dë u? I musu puu de a di wosu aki, nöö iseei sa go kumutu aki tu.” Hën wë mi ko foloisi go libi a wan foto di dë zuntu ku ka mi bi ta libi. De ta kai ën Zanesville, nöö a dë a Ohio. Ma mi bi nango a mi mama ku mi tata pisi jeti u go da dee wotowan taanga.

Mi tata bi ta mbei möiti u tapa mi mama fu an go a dee komakandi möön. So juu te a bi dë a pasi nango a zali, nöö a bi ta kule nëën baka, nöö a bi ta hai  ën tja ko a wosu. Ma mi mama bi ta kule pasa a di baka döö, nöö a bi nango fëën a komakandi. Mi bi piki mi mama taa: „Na booko i hedi. Papa o ko wei u kule a i baka.” Bakaten, mi tata an bi ta tapa mi mama möön, nöö a bi sa nango fëën a dee komakandi.

Di de bigi hoi di Teokalasia-siköö a di jaa 1943, hën mi bi bigi hoi taki a di kemeente ka mi bi dë. Dee lai di de bi ta da m’ bi heepi m’ u ko dë wan möön bunu takima.

A di jaa 1944, di de bi ta feti di u Tu Goonliba Feti, hën de bi piki mi taa mi bi musu go a sodati. De bi manda mi go a di sodati kampu de kai Fort Hayes a di foto Columbus di dë a Ohio. A di kamian dë, de öndösuku mi, hën de sikifi wantu soni u mi buta a pampia. Mi piki dee hedima u dee sodati taa ma o sa toon sodati. Hën de piki m’ taa mi sa go a wosu. Ma baka wantu daka, hën wan siköutu ko a mi pisi. Hën a piki mi taa: „Corwin Robison, de piki m’ taa mi musu ko tei i tja go söötö.”

Baka tu wiki di mi go a kuutu, hën di kuutubakaa piki mi taa: „Ee u mi wanwan, mi bi o söötö i hii i libi longi. I abi wan soni u taki ö?” Hën mi piki ën taa: „Mi lesipeki Masa, mi bi musu dë wan hedima u keiki. Dee dööbuka u dee sëmbë da di podium ka mi ta paaja di bunu buka u di Könuköndë da sömëni sëmbë.” Hën di kuutubakaa piki dee woto kuutuma taa: „Wan ko aki u taki ee di womi aki da wan hedima u keiki e. Ma un ko aki u taki ee a o go a sodati nasö ee an o go a sodati.” Ma an bi dou wan hafu juu seei, hën dee kuutuma dë taki taa mi lasi di kuutu. Hën di kuutubakaa taki taa de musu söötö mi feifi jaa a dunguwosu a di foto Ashland, di dë a Kentucky.

Dee tu fosu wiki, mi bi dë a dunguwosu a di foto Columbus di dë a Ohio, nöö ma bi kumutu a di kamba u mi di fosu daka. Hën mi piki Jehovah taa: „Ma o sa dë a di dunguwosu aki feifi jaa longi. Ma saandi mi musu du.”

Di debooko fëën, hën dee wakitima jabi di döö da mi be mi go waka pikisö. Hën mi waka go taanpu a wan djanga womi bandja, di de bi söötö tu. Hën u taanpu ta luku go a döö a wan fënsë. Hën a hakisi mi taa: „Andi tja i ko aki, satima?’ Hën mi piki ën taa: „Mi da wan Jehovah Kotoigi.” Hën a taa: „Tuu ö? Nöö faandi mbei i dë aki?” Hën mi toona piki ën taa: „Jehovah Kotoigi an nango a feti go kii sëmbë.” Hën a taa: „Unfa de sa söötö i u di ja kë kii sëmbë? Sëmbë di ta kii sëmbë de ta söötö. Ma ta fusutan di soni aki.” Hën mi taa: „Ma ta fusutëën tu.”

Hën a piki mi taa: „Teni-a-feifi jaa longi de bi söötö mi a wan woto dunguwosu, nöö na ala mi bi ta lesi dee buku fuunu.” Di di womi piki mi di soni aki, hën mi begi Jehovah. Mi piki ën taa: „Jehovah o, heepi mi be di womi aki dë ku mi a wan së.” Wantewante dë, hën di womi taki taa: „Ee wan u dee ma aki toobi i, nöö piki mi.” Di womi aki de bi ta kai Paul. Wë di mi bi dë a di dunguwosu dë, nöö na wan u dee 50 womi di bi sai dë, bi toobi mi.

 Di dee siköutu puu mi naandë manda go a di dunguwosu u Ashland, hën mi ko miti wanlö baaa di bi sai dë kaa. De heepi mi ku wanlö woto sëmbë, fuu hoi useei a Jehovah. De bi ta da u wan pisi u Bëibel fuu ta lesi hiniwan wiki, nöö u bi ta seeka wanlö hakisi ku piki da dee komakandi dee u bi ta hoi. Di kamba ka u bi dë a di dunguwosu bi dë wan gaan kamba di bi abi sömëni bedi. Wan baaa bi dë di bi ta lei u ka u bi o peleiki. A bi lo’ u piki mi taa: „Robison, i abi di faantiwöutu u luku sö wan bedi ku sö wan bedi. Hiniwan sëmbë di ko a di bedi aki, i musu ta peleiki da. An musu go kumutu aki, nöö ja peleiki dëën e.” Sö di peleikiwooko fuu bi seti a di dunguwosu.

Di u Tu Goonliba Feti bi ko kaba a di jaa 1945, ma mi bi dë a dunguwosu u wan pisiten jeti. Mi bi ta booko mi hedi ku dee famii u mi. Biga mi tata bi piki mi taa: „Ee ja dë aki möön, nöö mi sa du andi mi kë ku dee wotowan dee fika aki.” Di de puu mi a dunguwosu, ma bi sa biibi andi mi si. Seibi sëmbë u dee famii u mi bi nango a dee komakandi, nöö wan u dee sisa u mi bi tei dopu, hii fa di tata fuu bi ta du ku ën.

Di di feti bigi a Kolea a di jaa 1950, hën de toona piki mi di u tu pasi taa mi musu go a sodati. Mi bi musu go a di sodati kampu a Fort Hayes. Di de kaba luku andi ku andi mi sa u du, hën wan siköutu piki mi taa: „I da wan u dee möön bunu sëmbë di u sa tei.” Hën mi taa: „A bunu, ma ma o go a sodati.” Hën mi taki di soni di sikifi a 2 Timoteo 2:3. Mi piki ën taa: „Mi da wan sodati u Keesitu kaa.” Hën di sodati dë piii te wan pisi, hën a taki taa: „I sa go.”

Kölö sö baka di dë, hën mi go a di Bëtëli komakandi a di könklësi di bi hoi a di foto Cincinnati, di dë a Ohio. Baaa Milton Henschel bi piki u taa de abi sëmbë fanöudu di kë wooko taanga da di Könuköndë. Mi bi fuu di pampia u go a Bëtëli, hën de tei mi. Mi bigi wooko a tanvuuwata-liba u di jaa 1954, nöö sensi di ten dë mi dë a Bëtëli.

Hii juu mi bi ta abi sömëni wooko u du a Bëtëli. Sömëni jaa longi mi bi musu ta luku dee masini dee ta boi kendi wata da dee kantoo ku di kamian ka de ta doloki buku. Söseei mi bi ta wooko a dee kamian ka de ta hoi gaan komakandi na Amëëkanköndë.

Mi lobi fa de ta du soni a Bëtëli. Dee soni di mi lobi da di daka wöutu ku di Bëibel di u ta lesi hiniwan mamate. Söseei mi lobi di Hei Wakitimawosu di u ta luku makandi ku di Bëtëli famii ku di peleiki di mi ta peleiki ku dee baaa ku dee sisa u di kemeente ka mi nango. Te i luku ën bunu, nöö dee soni aki da soni di hiniwan wosudendu di dë Jehovah Kotoigi musu ta du hii juu. Te mama ku tata ta luku di daka wöutu makandi ku dee mii u de hiniwan daka, te de ta du di Wosudendu Dini hiniwan wiki, söseei te de ta da piki a dee komakandi, ku te de ta paaja di bunu buka fajafaja, nöö hii sëmbë a di wosudendu o dë gaan mati ku Jehovah u nöömö.

 Mi ko abi sömëni mati a Bëtëli ku di kemeente tuu. So u dee mati u mi bi dë salufuwan, nöö de go a Gadu Köndë kaa. Mi bi abi woto mati di an bi dë salufuwan tu. Ma hii dee dinima u Jehovah da zöndu libisëmbë te kisi dee sëmbë dee ta wooko a Bëtëli seei. Te mi ku wan baaa bi kisi toobi, nöö hii juu mi bi ta mbei möiti u mi ku ën ko bunu baka. Mi bi ta pakisei di tëkisi u Mateosi 5:23, 24, söseei mi bi ta pakisei andi mi ku ën bi sa du fuu ko bunu baka. A taanga u piki wan sëmbë taa: „Piimisi taa mi du sö wan soni ku i.” Ma gaansë u dee toobi ta seeka te i hakisi wan sëmbë be a da i paadon.

Nöunöu a ko ta taanga da mi u go peleiki da sëmbë a de pisi, u di mi ko gaandi kaa, ma mi nango dou. Mi bi sabi wan Sinëisi mujëë mii di ta fan Manderijntöngö. Nöö mi lo’ u go fan ku dee Sinëisi sëmbë a sitaati. So juu te mi go peleiki a mamate, nöö mi bi ta paati 30 nasö 40 buku da sëmbë di kë sabi möön soni u Bëibel.

Mi bi abi wan gobaka a China tu! Wan daka hën wan mujëë mii lafu mukii da mi di a bi dë ta paati pampia u wan kamian ka de ta sei fuuta. Mi toona lafu mukii dëën baka, hën mi dëën wan Hei Wakitimawosu ku wan Ontwaakt! a Sinëisitöngö. A tei de, hën a piki mi taa hën de kai Katie. Baka di dë di a si mi möön, hën a ko fan ku mi. Mi lei unfa de ta kai dee fuuta ku dee guluntu a Ingisitöngö. Söseei mi booko Bëibel tëkisi dëën a piki möni, hën a tei di Bëibel lei-buku. Baka wantu wiki, hën ma bi ko ta si ën möön.

Baka wantu liba, hën mi da wan woto mujëë mii wan Hei Wakitimawosu ku wan Ontwaakt! Wë di mujëë mii aki bi ta paati pampia u wan kamian ka de ta sei fuuta tu, nöö a bi tei dee buku. Di wiki baka di dë, hën di mujëë mii aki tëndë di tëlëfön fëën da mi, hën a taa: „Fan ku China.” Hën mi taki taa: „Ma sabi na wan sëmbë a China.” Ma a bi kë nömönömö u mi tei di tëlëfön. Hën wë mi tei di tëlëfön, hën mi taki taa: „Hallo i ta fan ku Robison.” Hën di sëmbë piki taa: „Robby, i ta fan ku Katie. Mi toona ko a China baka.” Hën mi taa: „China?” Hën Katie piki taa: „Aai. I sabi di mujëë mii di da i di tëlëfön u? Mi sisa wë e. I bi lei mi sömëni bunu soni, nöö gaantangi lei ën kumafa i bi lei mi tu.” Hën mi piki ën taa: „Katie, mi o du andi mi sa du e. Gaantangi u di i piki mi ka i dë.” Kölö sö baka di dë, hën mi fan ku di sisa u Katie di lasiti pasi. Ma sabi naasë dee tu mujëë mii aki dë nöunöu, ma mi ta wensi taa de lei möön soni u Jehovah go dou.

Mi dini Jehovah 73 jaa longi, nöö mi wai seei taa a heepi mi u ma go nama ku feti, söseei u mi hoi miseei nëën di mi bi dë dunguwosu. Boiti di dë, dee baaa ku dee sisa u mi bi piki mi taa di hoi di mi bi hoi dou di mi tata bi ta du ku mi, bi heepi de. Te u kaba fëën, mi mama ku sikisi u dee baaa ku dee sisa u mi, bi ko tei dopu. Mi tata an bi ko ta du ku u sö möön, nöö a bi nango a so u dee komakandi ufö a dëdë.

Ee Gadu kë, nöö dee sëmbë u mi ku dee mati u mi dee dëdë o toona ko a libi baka a di njunjun goonliba. Pakisei fa woo ta wai u dini Jehovah u teego makandi ku dee sëmbë dee u lobi! *​—Luku di pisi a basu.