1. Un bunu soni di lusupaima mbei taa u sa ko abi?

DI LUSUPAIMA u Jesosi Keesitu ta mbei u feni sömëni gaan bunu. Wan u dee gaan bunu di a ta mbei u feni, hën da a da dee mii u Adam dee ta du soni a wan leti fasi di okasi u de sa ko dë a di famii u Gadu baka. Wan woto gaan bunu, hën da woo sa libi waiwai u teego. Boiti di dë, di lusupaima nama ku woto fanöudu soni di hii sëmbë a liba ala ku goonliba aki tuu musu sabi.​—Hebelejën 1:8, 9.

2. (a) Un fanöudu soni di nama ku liba ala ku goonliba aki Jesosi bi taki a di begi fëën? (Luku di peentje a bigi u di woto.) (b) Andi woo luku a di woto aki?

² Söwan tu jaa ufö Jesosi bi dëdë, hën a bi lei dee bakama fëën unfa de musu begi, di a bi begi taa: „U Tata di dë a liba ala, be di në fii ko santa e. Be di Könuköndë fii ko. Be di kë fii pasa a goonliba aki leti kumafa a ta pasa a liba ala” (Mateosi 6:9, 10, NW). Boo go luku unfa di lusupaima nama ku di santa di di në u Jehovah musu ko santa, di tii di di Könuköndë u Gadu musu tii, söseei di pasa di di kë u Gadu musu pasa a goonliba aki.

3. Andi di në u Jehovah ta lei u fëën? Unfa Saatan bi kë poi Jehovah në?

³ Di fosu soni, hën da Jesosi bi begi be di në u Jehovah ko santa, nasö taa sëmbë musu ta si di në dë kuma wan santa në. Di në u Jehovah ta lei un pei Gadu a dë. A dë di möön makiti Gadu u mundu, nöö a ta du soni a wan leti fasi möön hii libisëmbë. Jesosi bi kai ën di ’Taata di dë limbolimbo söndö föutu’ (Johanisi 17:11). U di Jehovah dë santa, mbei hiniwan soni di a ta du ku hiniwan wëti di a ta buta dë santa tu. A di djai u Eden, Saatan bi hakisi Eva a wan köni fasi ee Gadu hën bi abi di leti u buta wëti da libisëmbë. A bi mindi soni da Jehovah, nöö a bi kë poi ën në.​—Kenesesi 3:1-5

4. Na un fasi Jesosi bi lei taa di në u Gadu dë santa?

⁴ Jesosi bi lobi di në u Jehovah seei, nöö a bi du hii soni di a bi sa du u mbei di në u Gadu ko santa (Johanisi 17:25, 26). Unfa a bi du di soni aki? Wë Jesosi bi heepi wotowan u de ko si taa dee wëti u Jehovah bunu seei, söseei taa hiniwan soni di a ta hakisi u fuu du da soni di sa tja wini ko da u. Jesosi bi ta mbei sëmbë ko sabi di soni aki ku di fasi fa a bi ta libi, söseei ku dee soni dee a bi ta lei sëmbë. (Lesi Psalöm 40:8-10.) Hii fa Saatan bi mbei Jesosi tja sitaafu u tefa a dëdë, tökuseei Jesosi bi hoi hënseei a Gadu. A bi lei taa wan sëmbë di an abi zöndu sa ta piki Jehovah buka hii juu.

5. Unfa u sa lei taa u ta si di në u Jehovah kuma wan santa në?

⁵ Unfa u sa lei taa u lobi di në u Jehovah? Wë u sa lei ën ku di fasi fa u ta tja useei. Jehovah kë fuu dë limbolimbo söndö föutu. (Lesi 1 Petuisi 1:15, 16.) Di soni aki kë taki taa hën wanwan nöö u musu ta dini, söseei taa u musu ta piki hën buka a soni ku hii u hati. Aluwasi sëmbë ta du ku u, tökuseei woo ta mbei hii möiti u libi kumafa Jehovah ta lei u. Te u ta libi ku dee wëti u Jehovah, nöö u ta tja gafa ko da di në fëën (Mateosi 5:14-16). U ta lei taa dee wëti u Jehovah bunu, söseei taa Saatan da wan mindisonima. U da zöndu libisëmbë, nöö woo ta mbei föutu. Ma te u mbei wan föutu, nöö u ta tjali u di soni di u du, söseei u ta mbei hii möiti u na du soni di o poi Jehovah në.​—Psalöm 79:9.

6. Unfa a du ko taa Jehovah sa si u kuma sëmbë di ta libi a wan leti fasi hii fa u da zöndu libisëmbë?

⁶ Aluwasi ee u da wan salufuwan nasö ee u da wan u dee „oto sikafu”, tökuseei Jehovah sa da u paadon u dee zöndu fuu ee u buta biibi a di lusupaima. Dee sëmbë dee buta de libi a Gadu maun, de a ta tei kuma dinima fëën. A ta si dee salufuwan kuma womi mii fëën di ta libi a wan leti fasi, söseei a ta si dee „oto sikafu” kuma mati fëën di ta libi a wan leti fasi (Johanisi 10:16; Loomë 5:1, 2; Jakobosi 2:21-25). Fëën mbei nöunöu kaa di lusupaima ta mbei u sa ko dë gaan mati ku di Tata fuu, söseei u sa ta mbei di në fëën ko santa tu.

7. Un bunu di lusupaima o mbei u feni?

⁷ A di nëbai begi u Jesosi, a bi taki taa: „Be di könuköndë fii ko.” Unfa di lusupaima nama ku di Könuköndë u Gadu? Wë Jesosi ku 144.000 sëmbë di a tei puu a goonliba aki o tii makandi a di Könuköndë u Gadu. Di lusupaima ta mbei taa dee sëmbë aki sa weki baka u de go libi a liba ala (Akoalimbo 5:9, 10; 14:1). De o dë könu ku mindima, nöö de ku Jesosi o tii hii di goonliba wan dusu  jaa longi. A di ten dë, Jehovah o tei di Könuköndë u mbei di goonliba toon wan paladëisi, söseei u mbei libisëmbë an ko abi zöndu möön. Dee dinima u Jehovah dee dë a liba ala, ku dee dë a goonliba aki tuu o ko dë wan famii (Akoalimbo 5:13; 20:6). Jesosi o kii Saatan, nöö a o puu hii dee fuka dee Saatan ta tja ko da u.​—Kenesesi 3:15.

8. (a) Unfa Jesosi bi heepi dee bakama fëën u de ko fusutan taa di Könuköndë u Gadu dë wan fanöudu soni? (b) Andi u ta du u heepi di Könuköndë u Gadu a di ten aki?

⁸ Jesosi bi heepi dee bakama fëën u de ko fusutan unfa di Könuköndë u Gadu dë fanöudu tjika. Unfa a bi du ën? Wë wantewante baka di Jesosi tei dopu, hën a bigi paaja di „bunu buka u di Könuköndë u Gadu” a hii kamian ka a bi nango (Lukasi 4:43, NW). Söseei a bi piki dee bakama fëën taa de musu go paaja di bunu buka a „hii dee köndëköndë u goonliba” (Tjabukama 1:6-8). Di paaja di u ta paaja di bunu buka u di Könuköndë a di ten aki, ta mbei sëmbë feni di okasi u lei soni u di lusupaima, söseei u de ko dë sëmbë di ta saka deseei a di Könuköndë u Gadu basu. U ta lei taa u da sëmbë di ta saka useei a di Könuköndë basu hii juu, u di u ta heepi dee salufuwan u paaja di bunu buka a hii së u goonliba.​—Mateosi 24:14; 25:40.

9. Faandi mbei u sa dë seiki taa Jehovah o mbei di soni di a bi kë du da libisëmbë pasa tuutuu?

⁹ Andi Jesosi bi kë taki di a bi taki taa: „Be di kë fii pasa”? Te Jehovah taki taa wan soni o pasa, nöö a o pasa tuutuu (Jesaaja 55:11). Di hopo di Saatan bi hopo fia ku Jehovah an bi o sa tapa Jehovah u du andi a bi abi a pakisei. Unfa Jehovah bi kë u di goonliba ko dë? A bi kë u di goonliba fuu ku dee mii u Adam ku Eva dee an bi o abi zöndu (Kenesesi 1:28). Ee Adam ku Eva bi dëdë ufö de pai miii, nöö di kë di Gadu bi kë u di goonliba fuu ku dee mii u de an bi o pasa. Fëën mbei Jehovah bi da de pasi u de pai miii. Di lusupaima ta da hii sëmbë di ta buta biibi a Gadu, di okasi u de sa ko dë sëmbë di an abi zöndu möön, söseei u de libi u teego. Jehovah lobi sëmbë, nöö a kë fuu feni di suti libi di a bi kë da u.

10. Un wini di lusupaima ta tja ko da dee sëmbë dee dëdë?

¹⁰ Unfa a dë ku dee milionmilion sëmbë dee dëdë söndö u de feni di okasi u ko sabi Jehovah? Jehovah kë u sëmbë musu dë a libi. Fëën mbei dee sëmbë dee dëdë seei a o weki ko a libi baka. Di lusupaima ta mbei taa de sa toona ko a libi baka. De o sa lei soni u Jehovah, nöö de o sa libi u teego (Tjabukama 24:15). Jehovah hën ta da u libi. Te Jehovah o toona tja dee sëmbë dee dëdë ko a libi baka, nöö a o ko dë di Tata u de (Psalöm 36:9). A di begi di Jesosi bi begi, a bi taki taa Jehovah da „u Tata a liba” ala (Mateosi 6:9). Jehovah da Jesosi wan gaan faantiwöutu u weki dee dëdë sëmbë ko a libi baka. Jesosi bi taki taa: „Miseei wë disi kaa e, di ta weki sëmbë a dëdë ta da de libi.”​—Johanisi 6:40, 44; 11:25.

11. Andi Gadu abi a pakisei da dee „gaan hia sëmbë”?

¹¹ Jesosi bi taki söseei taa: „Un dee sëmbë aki dee ta du kumafa Gadu kë, nöö unu wë da mi mama ku mi baaa ku mi sisa e” (Maikusi 3:35). Gadu kë taa sëmbë u hii pei nasiön, ku hii pei lö, ku hii pei föluku, dee ta fan hii dee peipei töngö o ko dë dinima fëën. Di Bëibel ta taki taa dee sëmbë aki da „wanlö gaan hia sëmbë dë taanputaanpu a di  Sikafumii fesi. De hia tee sëmbë an tjika u konda de”. Dee sëmbë aki ta buta biibi a di lusupaima, nöö de kë piki Gadu buka. De ta gafëën, nöö de ta taki taa: „I wë da di Gadu fuu, di dë sindosindo a di könubangi, nöö a ju ku di Sikafumii wë hii heepi ta kumutu ta ko a u libisëmbë aki.”​—Akoalimbo 7:9, 10.

12. Andi u ta lei a di soni di Jesosi bi taki a di begi fëën, di nama ku di soni di Jehovah abi a pakisei da libisëmbë?

¹² A di begi u Jesosi u lei sömëni soni u Jehovah ku dee soni dee a abi a pakisei da libisëmbë. Di fosu soni di u lei, hën da u musu du hii soni di u sa du u mbei di në u Jehovah ko santa, söseei u musu ta gafëën tu (Jesaaja 8:13). Di lusupaima u Jesosi mbei taa u sa feni libi, söseei a ta tja gafa ko da di në u Gadu. Di në u Jesosi seei kë taki „Jehovah da di heepima”. Di u tu soni, hën da Jehovah o wooko ku di Könuköndë fëën, u mbei libisëmbë di ta piki ën buka feni hii dee bunu di di lusupaima o tja ko. Nöö di u dii soni, hën da u dë seiki taa na wan soni sa tapa Jehovah faa du dee soni di a abi a pakisei.​—Psalöm 135:6; Jesaaja 46:9, 10.

13. Faandi mbei u ta tei dopu?

¹³ Wan fasi fa u sa lei taa u ta tei di lusupaima u bigi, hën da te u buta u libi a Gadu maun, nöö u tei dopu. A sö wan fasi u ta lei taa u ta buta biibi a di lusupaima, söseei taa u ’dë u Jehovah’ (Loomë 14:8). Te u tei dopu, nöö u ta hakisi Jehovah faa da u „wan limbolimbo hati” (1 Petuisi 3:21). Jehovah ta piki u te a ta mbei u feni dee wini di di lusupaima ta tja ko da u. Nöö u dë seiki taa a o da u hii dee soni dee a paamusi u.​—Loomë 8:32.

14. Faandi mbei Jehovah ta piki u fuu lobi wotowan?

¹⁴ Hii soni di Jehovah ta du, a ta du u di a lobi u gaanfa seei. A kë u hii dee dinima fëën ko ta djeesi ën, söseei de musu lobi de na de (1 Johanisi 4:8-11). Te u lobi wotowan, nöö u ta mbei a dë gbelingbelin u si taa u kë dë miii u di Tata fuu a liba ala (Mateosi 5:43-48). Dee tu möön gaan wëti, hën da u musu lobi Jehovah, söseei u musu lobi wotowan tu (Mateosi 22:37-40). Wan fasi fa u sa lei taa u lobi sëmbë, hën da te u ta lei de soni u di bunu buka u di Könuköndë. Ee u lobi wotowan  kumafa Jehovah taki, möönmöön dee baaa ku dee sisa fuu, nöö di lobi di u lobi ën „o ko dë telutelu”.​—1 Johanisi 4:12, 20.

15. (a) Un gaan bunu Jehovah ta da u nöunöu? (b) Un gaan bunu Jehovah o da u a di ten di ta ko?

¹⁵ Jehovah ta mbei u abi di futoou taa te u ta buta biibi a di lusupaima, nöö ’an o hoi u a bëë möön’. A ta da u paadon ku hii hën hati. (Lesi Tjabukama 3:19-21.) Kumafa u bi taki a di woto aki kaa, nöö di lusupaima mbei taa Jehovah sa tei libisëmbë ko dë miii fëën a liba ala. Dee sëmbë aki de da dee salufuwan (Loomë 8:15-17). Jehovah ta kai dee „oto sikafu” u de ko dë famii fëën a goonliba aki. Baka te de ko dë telutelu söndö zöndu, nöö Saatan o pooba de wan lasiti pasi. Ee de hoi deseei a Jehovah, nöö a o tei de ko mii fëën tu (Loomë 8:20, 21; Akoalimbo 20:7-9). Hii juu Jehovah o ta lobi dee mii fëën. U teego woo ta feni gaan bunu u di lusupaima (Hebelejën 9:12). Jehovah da u di gaan dii kado aki, nöö na wan sëmbë o sa tei ën puu a u.

16. Unfa di lusupaima ta heepi u fuu ko fii?

¹⁶ Ee u ta tjali u dee zöndu fuu, nöö Didibi an o sa du na wan soni u puu u a di famii u Jehovah. Jesosi dëdë „wan kodo pasi tö”. Wan kodo pasi bi tjika u Jesosi paka di lusupaima da u (Hebelejën 9:24-26). Adam tja dëdë ko da u, ma di lusupaima u Jesosi o tja teego libi ko da u. Di lusupaima sa mbei u ko fii u di goonliba u Saatan, söseei a sa mbei wa ta fëëë dëdë möön.​—Hebelejën 2:14, 15.

17. Unfa i ta fii u di lobi di Jehovah lobi i?

¹⁷ Dee soni dee Gadu paamusi u o pasa tuutuu. Leti kumafa dee wëti dee Jehovah buta da di goonliba an ta tooka, sö nöö Jehovah an o tooka möönsö. Nöiti a o mbei u tjali u di an du di soni di a taki (Maleaki 3:6). Boiti di libi di Jehovah da u, a ta da u möön soni. A ta mbei u fii taa a lobi u. „Wë fa u ta taki aki, nöö hën mbei u ko sabi tuutuu taa Gadu lobi u. Biga Gadu, hën abi lobi” (1 Johanisi 4:16). Hii juu Jehovah ta du dee soni dee a paamusi. Abiti möön di goonliba o ko toon wan gaan waiti paladëisi. Hii sëmbë o ta djeesi Jehovah, nöö de o ta lobi wotowan tu. Nöö hii dee dinima u Jehovah dee dë a liba ala ku goonliba aki tuu, o taki taa: „Aai Masa Gadu, i wanwan tö nöö musu feni gafa, ku nëbai, ku köni, ku tangi, ku lesipeki, ku makiti ku hii kaakiti a mundu. I wanwan nöö abi de fu teego nöömö. A tan sö.”​—Akoalimbo 7:12.