1-2. Unfa u musu ta si dee fuka dee ta miti u, te u luku Mateosi 5:11?

JESOSI bi paamusi dee bakama fëën taa de bi o ta dë waiwai tuutuu. Ma a bi piki de tu taa fuka bi o ta miti de (Mat. 10:22, 23; Luk. 6:20-23). U wai taa u dë bakama u Keesitu. Ma unfa u ta fii u di u sabi taa dee famii fuu sa tapa u fu wa dini Jehovah möön, taa dee tiima sa du ku u, nasö taa dee sëmbë dee u ku de ta wooko a di wan kamian, nasö dee mii dee u ku de nango a di wan siköö sa mbei u du soni di an bunu? Wë an dë u taki taa u sa ko ta fëëë te u ta pakisei dee soni aki.

² Gaansë u sëmbë an ta fusutan unfa wan sëmbë sa ta dë waiwai te soni ta taanga dëën. Ma di Wöutu u Gadu ta piki u taa u musu ta dë waiwai te soni ta taanga da u. Jakobosi bi taki taa wa musu lasi hati te fuka ta miti u, ma u musu ta dë waiwai (Jak. 1:2, 12). Jesosi seei bi taki taa u musu ta dë waiwai te sëmbë ta du ku u. (Lesi Mateosi 5:11.) Ma unfa u sa ta dë waiwai hii fa soni ta taanga da u? Wë u sa lei sömëni soni a di biifi di Jakobosi bi manda da dee fesiten Keesitu sëmbë. Boo luku fosu andi bi ta taanga da dee Keesitu sëmbë aki.

3. Andi bi pasa kölö sö baka di Jakobosi bi ko dë wan bakama u Jesosi?

³ Kölö sö baka di wan baaa u Jesosi de kai Jakobosi bi ko dë wan bakama u Jesosi, hën sëmbë bi bigi ta du ku dee Keesitu sëmbë a Jelusalen (Tjab. 1:14; 5:17, 18). Söseei di de kii Sitefani, hën sömëni Keesitu sëmbë „kule paaja go a kamiankamian. So u de go a dee oto köndë u Judea, so u de go a Samalia”. So u de go te seei a Sipuusi ku Antiokia (Tjab. 7:58–8:1; 11:19). Sömëni fuka seei bi miti de Keesitu sëmbë aki. Ma tökuseei de bi ta paaja di bunu buka go dou a dee kamian ka de bi fusi go.  Te u kaba fëën, sömëni sëmbë bi ko dë Keesitu sëmbë, nöö sömëni kemeente bi ko dë a dee pisiwata u Loomë (1 Pet. 1:1). Ma sömëni fuka bi dë a pasi ta ko jeti.

4. Andi da wantu woto fuka di dee Keesitu sëmbë bi ta abi?

⁴ Dee fesiten Keesitu sëmbë bi musu ta hoi dou, hii fa peipei fuka bi ta miti de. A di pisiten u di jaa 50 Baka Keesitu, hën di Gaan Könu u Loomë de kai Kalaudio, bi taki taa hii dee Dju bi musu kumutu a Loomë. Fëën mbei dee Dju dee bi ko dë Keesitu sëmbë, bi musu foloisi go libi a woto kamian (Tjab. 18:1-3). A di pisiten u di jaa 61 Baka Keesitu, hën apösutu Paulosu bi taki taa sëmbë bi ta kosi dee baaa ku dee sisa fëën. De bi ta buta de a dunguwosu, nöö de bi ta fufuu soni u de (Heb. 10:32-34). Boiti di dë, so Keesitu sëmbë bi ta dë ku suwaki tu, nöö so u de bi dë pooti sëmbë.​—Lom. 15:26; Fil. 2:25-27.

5. Un hakisi woo piki a di woto aki?

⁵ Di Jakobosi bi sikifi di biifi fëën ufö di jaa 62 Baka Keesitu, a bi sabi un fuka bi ta miti dee baaa ku dee sisa. Jehovah bi mbei Jakobosi sikifi wan biifi manda da dee Keesitu sëmbë, u heepi de u de sa ta dë waiwai, hii fa fuka ta miti de. Woo luku di biifi di Jakobosi bi manda da dee Keesitu sëmbë, nöö woo piki dee dii hakisi aki: Andi da di wai di u musu ta wai, di Jakobosi bi taki soni fëën? Andi sa mbei wan Keesitu sëmbë an ta dë waiwai möön? Nöö unfa köni, biibi, ku degihati sa heepi u fuu sa ta dë waiwai hii fa fuka ta miti u?

6. Faandi mbei u sa taki taa wan Keesitu sëmbë sa ta dë waiwai hii fa fuka ta miti ën, te u luku Lukasi 6:22, 23?

⁶ So sëmbë ta pakisei taa te de abi wan bunu gösöntu, te de abi hia möni, nasö te soni ta  waka bunu a di wosudendu libi u de, nëën ufö de sa ta dë waiwai. Jakobosi bi taki taa di wai di wan sëmbë sa ta wai tuutuu, da wan fasi di di santa jeje u Gadu ta mbei sëmbë ko abi. Nöö di soni dë sa mbei wan sëmbë ta dë waiwai, aluwasi andi ta pasa nëën libi (Gal. 5:22). Wan Keesitu sëmbë sa ta dë waiwai tuutuu, u di a sabi taa a ta du soni di ta kai ku Jehovah, söseei u di a ta waka a Jesosi baka. (Lesi Lukasi 6:22, 23; Kol. 1:10, 11) Leti kumafa wan faja töngö ta tjuma go dou a wan lantei dendu, hii fa tjuba ta kai nasö ventu ta böö, sö nöö wan Keesitu sëmbë sa ta dë waiwai go dou aluwasi andi ta pasa. A sa ta dë waiwai go dou hii fa a dë ku suwaki, hii fa a abi möni fuka, hii fa sëmbë ta lafu ën ta mbei ën fa, nasö hii fa dee famii fëën nasö woto sëmbë ta du ku ën. Hiniwan juu te sëmbë ta du ku ën, nöö a ta ko ta dë möön waiwai. An ta lasi hati. Dee fuka dee ta miti u u di u ta hoi dou a di biibi ta lei taa u da tuutuu bakama u Keesitu (Mat. 10:22; 24:9; Joh. 15:20). Di soni dë mbei Jakobosi bi sa taki taa: „Wë nöö dee sëmbë, te soni miti unu a peipei futu nöö an musu bigi da unu poi e, ma wai un musu ta wai.”​—Jak. 1:2.

7-8. Faandi mbei di biibi fuu ta ko möön taanga te fuka ta miti u?

⁷ Jakobosi bi taki wan woto soni di ta mbei Keesitu sëmbë ta dë kabakaba u hoi dou, hii fa gaangaan soni ta miti de. A bi taki taa: „Ee ja disa di biibi i ta biibi nëën, nöö joo ko a’ degihati fii hoi go dou” (Jak. 1:3). Ee i buta wan felu soni go a faja dendu, nöö hën i puu ën tuusi a kötö wata, nöö di felu ta ko möön taanga. Sö nöö di biibi fuu ta ko möön taanga tu te u ta hoi dou te fuka ta miti u. Fëën mbei Jakobosi bi taki taa: „Fa joo ta hoi pasensi ta tja dee sitaafu dë, nöö hën o puu föutu a i buta i ko wan gbelingbelin sëmbë a Gadu wojo” (Jak. 1:4). Te u si unfa dee fuka dee ta miti u ta mbei di biibi fuu ko möön taanga, nöö möön woo ta hoi dou ku wai.

⁸ A di biifi di Johanisi bi sikifi, a bi taki u so u dee soni di sa mbei wa ta dë waiwai möön. Andi da dee soni dë, nöö unfa u sa köni u de an mbei wa ta dë waiwai möön?

9. Faandi mbei u abi köni fanöudu?

⁹ Soni di sa mbei wa ta dë waiwai möön: Te wa sabi andi u musu du. Te fuka ta miti u, nöö u kë suku heepi a Jehovah, u di u kë du soni di ta kai ku ën, u di u kë du soni di o heepi dee baaa ku dee sisa fuu, söseei u di u kë hoi useei a Jehovah (Jel. 10:23). U abi köni fanöudu fuu sa sabi andi u musu du, söseei fuu sa sabi andi u musu taki te dee felantima fuu ta du ku u. U sa lasi hati ee wa sabi andi u musu du, nöö di soni dë sa mbei wa ta dë waiwai möön..

10. Te u luku Jakobosi 1:5, nöö andi u musu du fuu sa ko abi köni?

 ¹⁰ Di soni di u sa du: U musu hakisi Jehovah faa da u köni. Ee u kë ta dë waiwai go dou te fuka ta miti u, nöö di fosu soni di u musu du, hën da u musu hakisi Jehovah faa da u köni fuu sa du soni a wan köni fasi. (Lesi Jakobosi 1:5.) Andi u musu du te u ta si kuma Jehovah an ta piki dee begi fuu wantewante? Jakobosi bi taki taa u musu ta begi Gadu nöömö. Jehovah hati an ta boonu te u ta hakisi ën nöömö faa da u köni. An o gandji da u. Te u ta begi di Tata fuu a liba ala faa da u köni fuu hoi dou te tesi ta miti u, nöö a o da u ën, u di „a lo’ u da sëmbë bumbuu soni” (Ps. 25:12, 13). A ta si dee fuka dee ta miti u, a ta fii da u, nöö a dë kabakaba u heepi u. Di soni dë ta mbei u ta dë waiwai tuutuu! Ma unfa Jehovah ta da u köni?

11. Un woto soni u musu du fuu sa ko abi köni?

¹¹ Jehovah ta da u köni ku di Wöutu fëën (Nöng. 2:6). Ee u kë feni di köni aki, nöö u musu ta lei soni a di Wöutu u Gadu, söseei a dee buku fuu dee ta taki soni u Bëibel. Ma na lei nöö u musu ta lei soni u Bëibel. U musu ta du dee soni dee u ta lei tu. Jakobosi bi taki taa: „Wan musu ta haika Gadu Wöutu nöö a kaba e, ma un musu ta du dee soni dee di Wöutu ta manda u fuu du” (Jak. 1:22). Te u ta du andi Gadu ta manda u fuu du, nöö wa o ta du soni kumafa u kë nöö a kaba, ma woo ta möön libi fiifii ku wotowan, söseei woo ta abi tjalihati u de (Jak. 3:17). Dee fasi aki ta heepi u fuu sa dë waiwai, aluwasi un fuka ta miti u.

12. Faandi mbei a dë fanöudu fuu ko sabi soni u Bëibel bumbuu?

¹² Di Wöutu u Gadu dë kuma wan sipei. A ta heepi u fuu ko sabi andi u sa du möön bunu (Jak. 1:23-25). Kandë te u kaba lei soni u Bëibel, nöö u sa ko si taa u musu mbei möiti u hati fuu an ta boonu sö möön. Jehovah sa heepi u fuu hoi useei, te wan soni pasa di sa mbei hati fuu boonu. U di hati fuu an o  ta boonu hesi, mbei woo sa du soni a wan bunu fasi te soni ta miti u. Woo sa du soni ku limbolimbo fusutan (Jak. 3:13). A dë fanöudu seei fuu ko sabi soni u Bëibel bumbuu!

13. Faandi mbei a bunu fuu ko sabi soni u dee sëmbë di di Bëibel ta taki soni u de?

¹³ So juu te u mbei wan föutu ufö u ta ko sabi taa u musu ta köni ku so soni. Ma na di fasi dë da di bunu fasi u lei soni. Wan möön bunu fasi u lei soni, hën da te u ta lei soni a di fasi fa woto sëmbë bi du soni. Fëën mbei Jakobosi ta piki u fuu buta pakisei a di fasi fa so sëmbë bi du soni. Wantu u dee sëmbë dë da Abahamu, Lakabu, Jöpu, ku Elia (Jak. 2:21-26; 5:10, 11, 17, 18). Dee dinima u Jehovah aki bi ta dë waiwai go dou, hii fa fuka bi ta miti de. Di fasi fa de bi hoi dou ta lei taa useei sa hoi dou tu, u di Jehovah o heepi u.

14-15. Faandi mbei u musu du wan soni wantewante te wa dë seiki u wan soni?

¹⁴ Soni di sa mbei wa ta dë waiwai möön: Te wa dë seiki u soni. So juu a sa ta taanga da u fuu fusutan dee soni dee sikifi a di Wöutu u Gadu. Nasö kandë Jehovah an piki dee begi fuu a di fasi di u bi mëni taa a bi o du ën. Dee soni aki sa mbei wa ko sabi möön unfa soni dë tuutuu. Nöö ee wa du wan soni wantewante, di biibi fuu sa ko suwaki, nöö u ku Jehovah an o dë mati möön (Jak. 1:7, 8). A sa mbei tu taa wa feni dee bunu dee Gadu paamusi u.

¹⁵ Apösutu Paulosu bi taki taa dee soni dee u ta dë ku di mëni taa woo feni, dë da u kuma wan hanka (Heb. 6:19). Te wan gaan ventu ta böö, nöö wan hanka ta hoi wan sipi fu an diipi go naki. Ma ee di këti u di hanka an koti, nëën ufö a o sa heepi di sipi. Leti kumafa sukufu sa njan di këti u wan hanka koti, sö nöö di biibi fuu sa ko suwaki ee wa dë seiki u dee soni dee u ta lei. Te tesi miti wan sëmbë di an dë seiki u dee soni dee a ta lei, nöö di soni dë sa mbei an biibi dee soni dee Jehovah paamusi u möön. A o dë kuma di soni di Jakobosi bi taki. A bi taki taa sö wan sëmbë ’dë kuma sekiwata nango ta ko. Tide a biibi disi, amanjan a biibi di dë’ (Jak. 1:6). A o taanga da sö wan sëmbë faa ta dë waiwai!

16. Andi u musu du te wa dë seiki u wan soni?

¹⁶ Di soni di u sa du: U musu öndösuku soni u di biibi fuu ko möön taanga. Du wan soni wantewante. A di pisiten di di tjabukama Elia bi dë a libi, dee sëmbë u Jehovah an bi ta biibi so soni möön. Elia bi piki de taa: „Un longi woon dë ta biabia jeti fuun du wan soni? Ee Jehovah da di tuutuu Gadu, nöö un go dini ën. Ma ee Baali hën da di tuutuu gadu, nöö un go dini ën” (1 Kön. 18:21). A di ten aki useei musu du wan soni wantewante. Useei musu go öndösuku soni fuu ko dë seiki taa Jehovah da di tuutuu Gadu, taa di Bëibel da di Wöutu fëën, söseei taa dee Jehovah Kotoigi da dee sëmbë fëën (1 Tes. 5:21). Te u ta du dee soni aki, nöö woo ko dë seiki taa dee soni dee u ta biibi da tuutuu soni, nöö di biibi fuu o ko möön taanga. Ee ja kaba dë seiki u wan soni di nama ku di biibi fuu, nöö i sa hakisi dee gaanwomi u de heepi i. Ee u kë ta dini Jehovah waiwai go dou, nöö wa musu biabia u du wan soni!

17. Andi o pasa ku u te u lasi hati?

¹⁷ Soni di sa mbei wa ta dë waiwai möön: Te u lasihati. Di Wöutu u Gadu ta taki taa: „I ta fii bookosaka te fuka ta miti i ö? Ee sö a dë, hën da ja o abi kaakiti tjika” (Nöng. 24:10). Di Hebelejën Wöutu di de puu ko „bookosaka”, sa kë taki „lasi hati”. Ee i lasi hati, ja o ta dë waiwai möön.

18. Andi a kë taki taa wan sëmbë ta hoi dou?

¹⁸ Di soni di u sa du: U musu biibi taa Jehovah o da u di degihati di u abi fanöudu fuu sa hoi dou. U musu abi degihati ee u kë hoi dou te fuka ta miti u (Jak. 5:11). Di wöutu di Jakobosi  bi puu ko „hoi degihati”, kë taki wan sëmbë di ta taanpu gingin ka a dë. Di soni aki ta mbei u mëni wan sodati di abi degihati, di an ta kule kumutu ka a dë, te dee felantima fëën ta ko feti ku ën.

19. Andi u sa lei na apösutu Paulosu?

¹⁹ Apösutu Paulosu da wan sëmbë di u sa djeesi a di degihati di a bi abi, söseei a di fasi fa a bi hoi dou. So juu a bi ta lasi hati. Ma a bi sa hoi dou, u di a bi abi di biibi taa Jehovah bi o dëën di kaakiti di a bi abi fanöudu, faa bi sa hoi dou (2 Kol. 12:8-10; Fil. 4:13). Useei sa lei taa u abi di lö degihati dë tu ee u fusutan taa u abi Jehovah fanöudu faa heepi u fuu hoi dou.​—Jak. 4:10.

20-21. Fuun soni u sa dë seiki?

²⁰ U sa dë seiki taa na Gadu hën ta sitaafu u te fuka ta miti u. Jakobosi bi mbei u dë seiki u di soni aki. A bi taki taa: „Te tesi ta miti wan sëmbë, nöö an musu taa: ’Gadu hën ta pooba mi’, biga na wan sëmbë sa pooba Gadu ku hogi, nöö Gadu seei an ta pooba sëmbë tu” (Jak. 1:13). Te u dë seiki u di soni aki, nöö u ku di Tata fuu a liba ala o ko dë möön gaan mati.​—Jak. 4:8.

²¹ Jehovah „an ta tooka” (Jak. 1:17). A bi ta heepi dee fesiten Keesitu sëmbë u de hoi dou, te fuka bi ta miti de. Nöö sö nöö a o heepi u fuu hoi dou a di ten aki tu. Begi Jehovah faa da i köni, biibi, ku degihati. A o piki di begi fii. Nöö i sa dë seiki taa a o heepi i fii sa ta dë waiwai go dou, hii fa fuka ta miti i!