1. Un bunu fasi dë u si a dee sëmbë u Jehovah?

GAANDUWE kaa Bëibel bi taki taa dee sëmbë u Gadu bi o dë „kabakaba” u dini Jehovah, söseei u du dee soni dee Jesosi ta piki de (Ps. 110:3). Di tjabukama woto aki ta pasa a di ten aki. Hiniwan jaa dee dinima u Jehovah ta peleiki milionmilion juu longi. Sëmbë an ta paka de u de du di wooko aki, ma de ta du ën u di deseei kë. De ta buta ten a wan së u heepi dee baaa ku dee sisa u de ku dee soni di de abi fanöudu, de ta da de taanga, söseei de ta heepi de u de ko abi wan möön taanga biibi. Dee gaanwomi ku dee dinai ta tei sömëni juu u seeka deseei da dee soni di de ta hoi a dee komakandi. Söseei de nango luku dee baaa ku dee sisa a de pisi u da de taanga. Faandi mbei dee sëmbë u Jehovah ta du hii dee soni aki? De ta du dee soni aki u di de lobi Jehovah ku woto sëmbë.​—Mat. 22:37-39.

2. Unfa u sa djeesi Jesosi, te u luku Loomë 15:1-3?

² Jesosi bi ta möön booko hën hedi ku woto sëmbë, möön fa a bi ta booko hën hedi ku hënseei. U ta mbei möiti u djeesi ën. (Lesi Loomë 15:1-3.) Dee sëmbë dee ta djeesi ën o feni gaan bunu. Jesosi bi taki taa: ’Dee sëmbë dee ta da sëmbë soni, ta dë waiwai möön leki dee sëmbë dee ta feni.’​—Tjab. 20:35.

3. Andi woo luku a di woto aki?

 ³ A di woto aki woo luku so u dee soni di Jesosi bi disa faa bi sa heepi sëmbë, söseei woo luku unfa u sa djeesi ën. Söseei woo taki unfa u sa möön dë kabakaba fuu heepi wotowan.

4. Unfa Jesosi bi lei taa a bi ta booko hën hedi ku soni u wotowan möön dee fëën seei soni?

⁴Jesosi bi ta heepi sëmbë aluwasi a bi wei seei. Luku andi Jesosi bi du di sömëni sëmbë bi ko miti ën a wan kuun kamian zuntu ku Kapenaumi. Hii di ndeti Jesosi bi begi. A musu u dë sö taa a bi wei gaanfa seei, ma di a si dee sëmbë, hën tjali u de kisi ën, u di so u de bi pooti, söseei so u de bi dë ku suwaki. Na kula nöö a bi kula dee sëmbë, ma a bi hoi wan taki di bi da de taanga seei. Di taki dë da di taki di a bi hoi a di kuun liba.​—Luk. 6:12-20.

5. Unfa dee hedima u wosudendu ta lei taa de ta djeesi Jesosi te de wei?

⁵Di fasi fa dee hedima u wosudendu ta djeesi Jesosi. Buta pakisei a di soni aki: Wan hedima u wan wosudendu wooko wan hii daka longi, nöö hën a ko dou a wosu weiwei. Hii fa an bi kë hoi di Wosudendu Dini di ndeti dë möön, tökuseei a ta begi Jehovah faa dëën taanga faa sa hoi ën. Jehovah piki di begi fëën, hën de hoi di Wosudendu Dini kumafa de bi guwenti. Di soni aki heepi dee mii u de fusutan wan fanöudu soni. De ko fusutan taa de mama ku de tata ta si di dini u Jehovah kuma di möön fanöudu soni a de libi.

6. Konda wan woto u lei unfa Jesosi bi tei di ten fëën u heepi wotowan.

⁶Jesosi bi lo’ u tei di ten fëën u heepi wotowan. Pakisei unfa Jesosi bi fii di a bi jei taa de bi kii hën mati Johanisi di Dopuma. A musu u dë sö taa a bi tjali gaanfa seei. Di Bëibel ta taki taa: „Nöö fa Masa Jesosi jei di buka dë [nöö a bigi dëën tee]. Nöö hën a kumutu naandë, hën a subi a boto, u ku ën, hën u koti wata go a di oto së banda ala. Biga a bi kë fuu dë u wanwan pii ufö” (Mat. 14:10-13). U sa fusutan faandi mbei Jesosi bi kë dë hën wanwan. Sömëni fuu ta kë dë u  wanwan te u ta tjali. Ma Jesosi an bi feni pasi faa dë hën wanwan. Wanlö hia sëmbë bi go ta wakiti ën a di kamian ufö a dou. Andi Jesosi bi du? A bi si taa dee sëmbë abi heepi fanöudu, hën „tjali u de kisi ën”. A bi si taa de bi kë ko sabi soni u Gadu gaanfa seei, hën a bigi lei de soni wantewante. An bi lei de wantu soni nöö, ma a bi „lei de sömëni soni”.​—Maik. 6:31-34; Luk. 9:10, 11.

7-8. Konda wan woto di ta lei taa dee gaanwomi ta djeesi Jesosi, te wan sëmbë abi heepi fanöudu.

⁷Di fasi fa dee gaanwomi ta djeesi Jesosi. U dë ku tangi da dee soni di dee gaanwomi ta du u heepi u. Sömëni baaa ku sisa a di kemeente an sabi hii dee soni di dee gaanwomi ta du u heepi wotowan. Te wan sëmbë musu go a hatiwosu hesihesi, nöö dee baaa dee ta wooko makandi ku dee hatiwosu, ta seeka soni u heepi dee baaa ku dee sisa u de. Möön gaanfa dee lö soni aki lo’ u pasa a gaan ndeti! Ma u di de ta booko de hedi ku dee baaa ku dee sisa dee dë ku wan fuka, mbei dee gaanwomi aki ku de wosudendu ta möön buta pakisei a di heepi di de musu heepi wotowan.

⁸ Dee gaanwomi seei ta heepi mbei Könuköndë zali ku woto kamian ka u ta dini Gadu, söseei de ta heepi wotowan te wan gaan hogi pasa a wan kamian. Kandë useei ta si fa dee gaanwomi a di kemeente ka u dë, ta tei ten ta lei u soni, söseei fa de ta da u taanga. Wë a fiti fuu gafa hii dee baaa aki ku di wosudendu u de. Be Jehovah dë ku de! Ma dee gaanwomi musu du soni a wan köni fasi tu. De an musu ta du soni a di kemeente te nöö de an ta abi ten da de wosudendu.

9. Un fasi hii Keesitu sëmbë musu mbei möiti u de ko abi, te u luku Filipi 2:4, 5?

⁹ Lesi Filipi 2:4, 5. Na hii u tuu dë gaanwomi, ma tökuseei hii u tuu sa djeesi Jesosi a di dë di a bi ta dë kabakaba u heepi wotowan. Di Bëibel ta taki taa Jesosi „ko a goonliba aki ko dë kuma wan futuboi u libisëmbë” (Fil. 2:7). Luku andi u sa lei u di vers aki. Wan bunu futuboi ta mbei möiti u du hii soni fëën masa sa wai ku ën. U di u da futuboi u Jehovah, söseei u di u ta heepi dee baaa ku dee sisa fuu, mbei u kë ta du soni di o mbei de wai ku u. U sa du di soni aki te u ta buta pakisei a dee soni di woo taki u de nöunöu.

10. Andi u sa hakisi useei?

¹⁰Buta pakisei a di fasi fa i ta du soni. Hakisi iseei dee soni aki: ’Mi ta dë kabakaba u tei di ten u mi ku di kaakiti di mi abi, u heepi wotowan u? Andi mi o du ee de hakisi mi u mi go luku wan baaa di ko gaandi kaa a wan kamian ka de ta luku gaansëmbë, nasö u mi ta tja wan sisa di ko gaandi kaa nango a dee komakandi? Mi ta dë kabakaba u heepi te dee baaa ta suku sëmbë u seeka wan kamian ka u ta hoi könklësi, nasö te de ta suku sëmbë u seeka di Könuköndë zali ö?’ Jehovah ta wai ku u te u ta dë kabakaba u tei di ten fuu ku dee soni dee u abi, u dini ën, söseei u heepi wotowan. Andi u sa du ee u ko si taa u sa du soni a wan möön bunu fasi?

11. Unfa begi sa heepi u fuu ta dë kabakaba u heepi wotowan?

¹¹Begi Jehovah ku hii i hati. Boo taa i ko si taa a dë fanöudu fii mbei möiti fii go a fesi a so soni, ma ja ta feni di taanga tjika u du ën. Te a dë sö, nöö i musu begi Jehovah. Piki ën unfa i ta fii tuutuu. Konda da Jehovah unfa i ta fii, nöö hakisi ën faa ’wooko a i hati fii kë du dee soni dee ta dëën piizii, söseei faa da i taanga tu fii sa du de’.​—Fil. 2:13.

12. Unfa dee njönku baaa dee dopu kaa sa heepi di ölganisaasi u Jehovah?

¹² Ee i da wan njönku baaa di dopu kaa, nöö hakisi Jehovah faa heepi i fii sa kë du möön soni a di kemeente. A so köndë, gaanwomi hia a dee kemeente möön dinai, nöö sömëni u dee dinai aki dë gaansëmbë kaa. U di di ölganisaasi ta ko möön bigi, mbei u abi möön hia njönku baaa fanöudu u heepi dee gaanwomi u de luku dee sëmbë u Jehovah. Ee i dë kabakaba u heepi ka de abi i fanöudu, nöö joo ta dë waiwai. Faandi mbei u taki sö? Wë u di joo mbei Jehovah wai ku i, dee baaa o si taa i dë kabakaba u heepi wotowan, söseei joo ta fii bunu u di i ta du di soni dë.

13-14. Andi u sa du u heepi dee baaa ku dee sisa fuu? (Luku di peentje u di kafiti.)

¹³Buta pakisei a dee soni dee wotowan ta abi fanöudu. Apösutu Paulosu bi piki dee Keesitu sëmbë a Judea taa: „Wan musu fëëkëtë u ta libi bunu ku sëmbë e, ta paati dee bunu dee un abi da unu na unu. Biga Gadu ta tei dee lö libi dë tu kuma wanlö peesenti un ta tja ko dëën, nöö a ta wai ku de seei” (Heb. 13:16). Wan bunu soni seei a bi piki de dë! Kölö sö baka di a bi piki de di soni dë, hën dee Keesitu sëmbë dee bi dë a Judea bi musu go disa wosu u de, wooko u de, ku famii u de di an bi ta dini Jehovah, nöö de „kule hesihesi go tjubi a dee gaan kununu liba” (Mat. 24:16). A musu u dë sö taa a bi dë fanöudu seei u de ta heepi deseei a di ten dë. Wë ee de bi ta libi ku di soni di  Paulosu bi piki de, nöö soni an bi o taanga da de.

¹⁴ A kan taa na hii juu dee baaa ku dee sisa fuu o ta piki u andi de abi fanöudu. Boo taa di mujëë u wan baaa ko lasi libi. Nöö kandë di baaa abi sëmbë fanöudu u heepi ën ku njanjan soni, ku wosu wooko, nasö kandë a abi sëmbë fanöudu u ta tjëën go ku wagi a kamian. A kan taa an o kë toobi u. Ma a bi o tei ën u bigi seei ee u go heepi ën söndö faa hakisi u. Wa musu hoi taa wan woto sëmbë o heepi ën, nasö taa hii juu a o ta piki u andi a abi fanöudu. Hakisi iseei di soni aki: ’Ee i mi bi dë nëën kamian, ku andi mi bi o kë u sëmbë heepi mi?’

15. Andi u musu du ee u kë heepi wotowan?

¹⁵Mbei wotowan fii taa hii juu de sa ko hakisi i fii heepi de. A musu u dë sö taa i sabi baaa ku sisa a di kemeente ka i dë, di ta dë kabakaba u heepi wotowan hii juu. Na wan daka seei de ta mbei u fii taa u ta toobi de. U sabi taa de o dë kabakaba u heepi u te u abi heepi fanöudu, nöö u bi o kë dë kuma de. Wan gaanwomi de kai Alan di abi 45 jaa, kë dë wan sëmbë di wotowan an ta fëëë u de go suku heepi nëën. Baaa Alan bi kai pakisei a di fasi fa Jesosi bi ta du soni, nöö a bi taki taa: „Jesosi bi abi hia soni u du, ma tökuseei sëmbë an bi ta fëëë u hakisi ën faa heepi de a soni, aluwasi ee de bi njönku nasö ee de bi dë gaansëmbë. De bi sabi taa Jesosi bi ta booko hën hedi ku de tuutuu. Mi kë dë seei kuma Jesosi, nöö mi kë u sëmbë sabi mi kuma wan sëmbë di ta booko hën hedi ku wotowan, söseei di lobi wotowan.”

16. Unfa di soni di sikifi a Psalöm 119:59, 60 sa heepi u fuu waka soifi a Jesosi baka?

¹⁶ Wa musu lasi hati ee u ta si taa wa ta du soni hii juu kumafa Jesosi bi ta du soni  (Jak. 3:2). Wan sëmbë di ta lei soni an o sa du hii soni soifi kuma di sëmbë di ta lei ën soni. Ma ee a ta lei wan soni a dee föutu dee a ta mbei, söseei ee a ta mbei hii möiti u djeesi di sëmbë di ta lei ën soni ka a sa djeesi ën dou, nöö a o ko sa’ u du soni möön bunu. Sö nöö a dë taa, ee u ta mbei möiti u du dee soni dee u ta lei a Bëibel, söseei te u ta mbei möiti u du de möön bunu, nöö woo sa waka soifi a Jesosi baka.​—Lesi Psalöm 119:59, 60.

17-18. Un bunu woo feni te u ta djeesi Jesosi?

¹⁷ Te u ta dë kabakaba u heepi sëmbë, nöö wotowan o feni taanga u du di wan seei soni tu. Wan gaanwomi de kai Tim bi taki taa: „So baaa di njönku seei toon dinai. Wan u dee soni di mbei taa de toon dinai, da di si di de si fa wotowan bi ta dë kabakaba u heepi wotowan. Di soni di dee njönku baaa aki du, mbei taa de bi sa heepi di kemeente, söseei de bi sa möön heepi dee gaanwomi tu.”

¹⁸ U ta libi a wan goonliba ka sëmbë ta buta pakisei a deseei nöö. Ma dee sëmbë u Jehovah an dë sö. U ta feni taanga te u ta luku fa Jesosi bi ta heepi wotowan, nöö u dë kabakaba u du di wan seei soni tu. Wë wa sa du soni leti kumafa a bi ta du soni, ma tökuseei u sa „waka nëën baka” (1 Pet. 2:21). Te u mbei möiti u djeesi Jesosi, nöö woo dë waiwai u di u ta du soni u Jehovah feni u u bunu.