1-2. (a) Faandi mbei a ta taanga da sömëni sëmbë u biibi dee sëmbë dee ta tei fesi? (b) Andi woo luku a di woto aki?

A TA taanga da sömëni sëmbë a di ten aki u de ta futoou dee sëmbë dee ta tei fesi. Te de luku fa politikima, ku heiheima di ta wooko a lanti kamian ta du soni, nöö de ta si taa de ta möön du soni u heepi dee guduma, nöö de an ta heepi pooti sëmbë, söseei de an ta koti kuutu a wan leti fasi da de. Di Bëibel seei ta taki taa: „Sensi di libisëmbë bigi tii wotowan, an tja bunu ko da de” (Peleik. 8:9). Boiti di dë, sömëni keiki fesima ta du soni di an bunu. Di soni aki mbei taa so sëmbë an ko ta biibi Gadu möön. Fëën mbei te wan sëmbë kë fuu lei ën soni u Bëibel, nöö u musu mbei taanga möiti u heepi ën faa ko ta biibi Jehovah, ku dee sëmbë dee a buta u tei fesi dëën a goonliba aki.

² Ma na sëmbë di ta lei soni u Bëibel nöö musu lei u biibi Jehovah ku di ölganisaasi fëën. Dee sëmbë dee dë a di tuutuu lei sömëni jaa longi seei musu ta biibi hii juu taa di fasi fa Jehovah kë fuu ta du soni, ta dë di möön bunuwan hii juu. So juu a sa pasa taa soni sa miti u ka u musu lei taa u ta biibi Jehovah. A di woto aki, woo taki na u ten a dë fanöudu fuu lei taa u abi biibi. A dë fanöudu fuu lei taa u abi biibi te u ta lesi so woto a Bëibel, te di ölganisaasi u Jehovah piki u wan soni fuu du, ku te tesi o miti u a di ten di ta ko.

3. Unfa so woto u Bëibel sa mbei taa wa ta futoou di fasi fa Jehovah ta kuutu soni?

 ³ Te u ta lesi di Wöutu u Gadu, nöö kandë u sa ta hakisi useei so soni u di fasi fa Jehovah bi libi ku so sëmbë, nasö u di fasi fa a bi du so soni. Te u luku di buku Nöbu, nöö u ta si taa Jehovah ta taki taa de bi musu kii wan Isaëli womi, u di a bi go suku udu a Saba Daka. A di u tu buku u Samuëli, u ta lesi taa wantu höndö jaa baka di dë, Jehovah bi da Könu Dafiti paadon hii fa a bi tei sëmbë mujëë, söseei hii fa a bi mbei de kii wan sëmbë (Nöb. 15:32, 35; 2 Sam. 12:9, 13). Kandë u ta hakisi useei taa: ’Faandi mbei Jehovah bi da Dafiti paadon hii fa a bi mbei de kii wan sëmbë, söseei hii fa a bi tei sëmbë mujëë, ma a bi mbei de kii wan womi di an bi du sö wan gaan zöndu kuma di Dafiti bi du?’ Fuu sa piki di soni aki, nöö boo luku dii soni di u musu hoi a pakisei te u ta lesi di Bëibel.

4. Unfa Kenesesi 18:20, 21 ku Detolonomi 10:17 ta heepi u fuu ko abi möön futoou a di fasi fa Jehovah ta kuutu soni?

⁴Na hii juu di Bëibel ta taki finifini u wan woto. Te u luku di woto u Dafiti, nöö u ta si taa a bi ta tjali tuutuu u dee soni dee a bi du (Ps. 51:2-4). Ma wa sabi un pei sëmbë di womi di bi pasa di wëti u di Saba Daka bi dë. A bi tjali u di soni di a bi du ö? A bi pasa dee wëti u Jehovah kaa a di ten di pasa u? De bi bai ën a soni kaa, hën an bi jei ö? Di Bëibel an taki na wan u dee soni aki. Ma tökuseei u sa dë seiki u di soni aki: Jehovah da wan Gadu di „na wan hogi libi dë nëën” (Deto. 32:4). A ta sabi hii soni finifini ufö a kuutu wan soni. An ta kuutu sëmbë u di a jei wan soni, söseei an ta kuutu de a fesi söndö u sabi unfa wan soni dë. (Lesi Kenesesi 18:20, 21; Detolonomi 10:17.) Möön u ta ko sabi Jehovah ku dee wëti fëën, möön u ta ko abi futoou a di fasi fa a ta kuutu soni. Aluwasi u bi o kë sabi soni u wan woto u Bëibel di u lesi ma wa sa feni na wan soni di nama ku di woto dë nöunöu, tökuseei dee soni dee u ko sabi u di Gadu fuu, mbei u dë seiki taa a dë wan Gadu di ta „du soni a wan leti fasi hii juu”.​—Ps. 145:17.

5. Andi sa pasa ku di fasi fa u ta si soni, u di u da zöndu libisëmbë? (Söseei luku di pisi „ Zöndu ta mbei u ta si soni a wan föutu fasi”.)

⁵U di u da zöndu libisëmbë, mbei wa sa ta  kuutu soni a wan leti fasi hii juu. Gadu mbei u kumafa hënseei dë. Fëën mbei u ta kë si taa sëmbë ta libi bunu ku wotowan (Ken. 1:26). Ma u di u da zöndu libisëmbë, mbei a sa pasa taa u kuutu soni a wan föutu fasi, hii fa u sa pakisei taa u sabi hii soni finifini. Kandë i ta mëni di woto u Jona jeti. Jona hati bi boonu ku Jehovah, u di Jehovah bi abi tjalihati u dee sëmbë u Ninifei (Jona 3:10–4:1). Ma pakisei andi bi ko pasa u di Jehovah bi abi tjalihati. Möön leki 120.000 sëmbë u di foto Ninifei an bi dëdë, u di de bi lei taa de bi tjali u dee zöndu di de bi du. A dë gbelingbelin u si taa Jona hën bi musu tooka di fasi fa a ta si soni, ma na Jehovah.

6. Faandi mbei Jehovah an musu u piki u andi ku andi a o du?

⁶Jehovah an musu u konda da u faandi mbei a ta du so soni. A dë sö tuu taa Jehovah bi da dee dinima fëën a di ten di pasa di okasi u de bi sa taki unfa de bi ta pakisei u wan soni di a bi du, nasö di a bi buta taa a bi o du (Ken. 18:25; Jona 4:2, 3). So juu Jehovah bi ta konda faandi mbei a bi o du wan soni (Jona 4:10, 11). Ma Jehovah an musu u konda da u faandi mbei a du wan soni. U di Jehovah da di sëmbë di mbei u, mbei an musu u taki fiti ku u ufö a du wan soni, nasö baka te a du wan soni.​—Jes. 40:13, 14; 55:9.

7. Andi sa ta taanga da u, nöö faandi mbei a sa taanga da u?

⁷ U ta futoou Jehovah ku hii u hati taa hii juu a ta du andi bunu. Ma di soni di sa ta taanga da u, hën da fuu futoou dee sëmbë dee a buta u tei fesi. Wë kandë u sa ta hakisi useei ee dee sëmbë dee abi faantiwöutu a di ölganisaasi u Jehovah ta du soni kumafa Jehovah taki, nasö kumafa deseei kë. A kan taa so sëmbë di bi ta libi na awooten bi ta hakisi deseei di soni aki. Luku di woto di u bi taki fëën a  palaklafu 3. Kandë wan famii u di womi di bi pasa di wëti di bi nama ku di Saba daka, bi sa ta hakisi hënseei ee Mosesi bi hakisi Jehovah bumbuu tjika ufö a taki taa de bi musu kii di womi. Nöö kandë wan mati u Ulia, di bi dë wan bakamii u Hëti, di Dafiti bi duumi ku di mujëë fëën, bi sa ta pakisei taa Dafiti bi wooko ku di makiti fëën fu an feni sitaafu u di soni di a du. Wë wa sa taki taa u ta futoou Jehovah ee wa ta futoou dee sëmbë dee a buta u tei fesi, u di hënseei ta futoou dee sëmbë aki.

8. Unfa dee soni dee sikifi a Tjabukama 16:4, 5 ta kai ku di fasi fa soni seti a di kemeente u Keesitu sëmbë a di ten aki?

⁸ A di ten aki, Jehovah tei di „köni saafu di dë u futoou” u tii di pisi u di ölganisaasi fëën di dë a goonliba aki (Mat. 24:45). Leti kumafa di Tii Kulupu u di ten u dee fesiten Keesitu sëmbë bi ta tii dee sëmbë u Gadu, sö nöö di Tii Kulupu a di ten aki ta tii dee sëmbë u Gadu a hii goonliba tu. Söseei de ta da dee gaanwomi dee ta tei fesi a dee kemeente lai. (Lesi Tjabukama 16:4, 5.) Dee gaanwomi seei ta toona da dee sëmbë u di kemeente lai. U ta lei taa u ta futoou di fasi fa Jehovah ta du soni, te u ta du dee soni di di ölganisaasi fëën ku dee gaanwomi ta piki u.

9. Na un ten a sa taanga da u fuu wooko makandi ku dee gaanwomi, nöö faandi mbei a sa taanga da u?

⁹ So juu a sa dë wan taanga soni da u fuu wooko makandi ku dee gaanwomi te de buta taa de o du wan soni. Te u luku dee jaa dee pasa aki, nöö de bi tooka soni a sömëni kemeente u dee keling. So pasi a bi pasa seei taa dee gaanwomi bi hakisi dee peleikima u de bi go a wan woto kemeente, sö taa de bi sa wooko ku dee Könuköndë zali a wan möön bunu fasi. Ee de hakisi u fuu go a wan woto kemeente, nöö a sa dë wan taanga soni da u fuu disa  dee famii ku dee mati fuu. Di ölganisaasi ta piki dee gaanwomi na un kemeente de musu manda hiniwan peleikima go u? Wë nönö. Di soni dë sa mbei a taanga da u fuu du andi dee gaanwomi taki. Ma Jehovah ta futoou dee gaanwomi taa de sa du dee lö soni dë, nöö fëën mbei useei musu futoou de tu. *

10. Faandi mbei u musu wooko makandi ku dee gaanwomi, te u luku andi sikifi a Hebelejën 13:17?

¹⁰ Faandi mbei u musu wooko makandi ku dee gaanwomi te de buta taa de o du wan soni, aluwasi ee di soni di de o du an ta kaba kai ku u? Wë u di te u ta du sö, nöö u ta heepi u dee sëmbë u Gadu ta libi kuma wan famii (Ef. 4:2, 3). Te hii sëmbë a di kemeente ta saka deseei, ta du andi dee gaanwomi ta piki de u de du, nöö soni ta waka bunu a di kemeente. (Lesi Hebelejën 13:17.) Ma di möön fanöudu soni, hën da u ta lei Jehovah taa u ta futoou ën, u di u ta wooko makandi ku dee sëmbë dee a ta futoou taa de sa tii u.​—Tjab. 20:28.

11. Andi sa heepi u fuu ko abi möön futoou a di fasi fa dee gaanwomi ta tii u?

¹¹ U sa ko abi möön futoou a di fasi fa dee gaanwomi ta tii u, te u ta hoi a pakisei taa de ta begi Gadu faa da de di santa jeje fëën, te de ta taki u soni di nama ku di kemeente. Boiti di dë, de ta wooko ku dee mama wëti u Bëibel, söseei ku dee lai di di ölganisaasi u Jehovah ta da de. De kë du soni di ta kai ku Jehovah, söseei de kë tii dee sëmbë u Gadu a di möön bunu fasi. Dee womi aki dee ta hoi deseei a Gadu sabi taa de abi u da Gadu faantiwöutu u di fasi fa de ta tja dee faantiwöutu u de (1 Pet. 5:2, 3). Buta pakisei a di soni aki: Hii fa u ta libi a wan goonliba ka keiki soni, politiki soni, ku di dë di sëmbë dë u wan woto lö, ta paati sëmbë ku sëmbë, tökuseei dee sëmbë u Jehovah ta dini ën kuma wan famii. Wë di soni aki ta pasa sö u di Jehovah hën ta heepi di ölganisaasi fëën!

12. Andi ku andi dee gaanwomi ta luku u de sa sabi ee wan sëmbë ta tjali tuutuu u wan zöndu di a du?

¹² Jehovah da dee gaanwomi wan gaan faantiwöutu. Di faantiwöutu dë, da u heepi di kemeente faa ta dë limbolimbo. Ee wan Keesitu sëmbë du wan gaan zöndu, nöö Jehovah kë taa dee gaanwomi musu öndösuku luku ee di sëmbë dë sa fika a di kemeente nasö ee de musu puu ën a di kemeente. Wan woto soni di de musu du tu, hën da de musu ko sabi ee di sëmbë ta tjali tuutuu u di soni di a du. Di sëmbë sa taki taa a ta tjali u di soni di a du, ma a dë sö taa a ta buuse di soni di a du tuutuu ö? A dë kabakaba u na du di zöndu dë möön u? Ee taku mati hën mbei taa a go du wan zöndu, a dë kabakaba u disa dee taku mati dë u? Ufö dee gaanwomi öndösuku soni, de ta begi, nöö de ta luku andi di Bëibel ta taki u di soni di di sëmbë du. Ma de ta luku tu unfa di sëmbë ta pakisei u di soni di a du. Te de du dee soni aki, nöö nëën ufö de ta luku ee sö wan sëmbë sa fika a di kemeente nasö ee de musu puu ën a di kemeente. So pasi, a ta pasa taa de musu puu ën a di kemeente.​—1 Kol. 5:11-13.

13. Ku andi u sa ta booko u hedi te de puu wan famii fuu nasö wan mati fuu a di kemeente?

¹³ Na un ten a sa taanga da u fuu futoou dee gaanwomi? Ee di sëmbë di de puu a di kemeente an dë wan famii fuu nasö wan mati fuu, nöö an ta dë wan taanga soni da u te dee gaanwomi puu ën a di kemeente. Ma kandë u sa si di soni aki wan woto fasi ee di sëmbë di de puu a di kemeente dë wan gaan mati fuu. Kandë u sa ta hakisi useei ee dee gaanwomi öndösuku hii soni luku finifini, nasö u sa ta hakisi useei ee de kuutu di soni a di fasi fa  Jehovah bi o kuutu ën. Andi sa heepi u fuu si soni a di soifi fasi te sö wan soni pasa?

14. Andi sa heepi u ee a ta toobi u di dee gaanwomi puu wan famii fuu nasö wan mati fuu a di kemeente?

¹⁴ U musu hoi a pakisei taa di puu di de ta puu sëmbë a kemeente da wan soni di Jehovah seei seti, nöö di soni aki ta tja wini ko da di kemeente, söseei a ta heepi di sëmbë di de puu a di kemeente tu. Ee de an puu wan sëmbë di an ta tjali u wan zöndu di a du a di kemeente, nöö di soni dë sa mbei wotowan a di kemeente du di zöndu dë tu (Gal. 5:9). Boiti di dë, di sëmbë an o ta si kuma di soni di a du dë hogi sö, nöö di soni dë an o dëën taanga faa tooka di fasi fa a ta pakisei. Söseei an o dëën taanga faa tooka di fasi fa a ta du soni, sö taa Jehovah sa feni ën bunu baka (Peleik. 8:11). U sa dë seiki taa dee gaanwomi dee ta luku ee wan sëmbë musu puu a di kemeente, an ta si di faantiwöutu u de kuma wan pëëpëë soni. De ta hoi a pakisei taa, leti kuma dee kuutuma naa awooten Isaëli, de „an ta koti kuutu da libisëmbë, ma da Jehovah”.​—2 Klon. 19:6, 7.

15. Faandi mbei nöunöu kaa u musu ko ta möön biibi dee soni dee Jehovah ta piki u?

¹⁵ Möön di kaba u di goonliba aki ta zuntu, möön u musu ta futoou Jehovah te a o du wan soni. Faandi mbei? Wë u di a kan taa a di pisiten u di gaan fuka, de o piki u fuu du soni di sa taanga da u fuu du. An dë u taki taa Jehovah an o ko fan ku u. Ma a o mbei dee sëmbë dee a buta u tei fesi piki u andi u musu du. A di ten dë, an bi o bunu seepiseepi fuu dë ta hakisi useei ee a Jehovah di lai kumutu tuutuu, nasö ee dee baaa dee ta tei fesi ta du andi de kë. Joo futoou Jehovah ku di ölganisaasi fëën a di apaiti pisiten dë u? Wë joo sa piki di hakisi dë te i ta hakisi iseei unfa i ta si dee soni di dee baaa dee ta tei fesi a di ten aki ta taki. Ee nöunöu kaa i ta biibi dee soni di dee baaa ta piki u, söseei ee i ta piki de buka wantewante, nöö joo sa du di wan seei soni a di pisiten u di gaan fuka.​—Luk. 16:10.

16. Andi o sa mbei a taanga da u fuu futoou Jehovah te a o kuutu soni a di ten di ta ko?

¹⁶ A bunu fuu pakisei andi woo du te Jehovah o kuutu soni a di kaba pisiten u di goonliba aki. U kë seei taa dee sëmbë dee an ta dini Jehovah musu bigi dini Jehovah ufö di kaba dou, te kisi dee famii fuu tu. Na Amagedon, Jehovah o da Jesosi pasi faa kuutu de (Mat. 25:31-33; 2 Tes. 1:7-9). Na u o taki ambë Jehovah musu abi tjalihati da ku ambë an musu abi tjalihati da (Mat. 25:34, 41, 46). Woo futoou di fasi fa Jehovah o kuutu soni ö, naa woo disa u dini Jehovah, u di di fasi fa a kuutu soni an kai ku u? A dë gbelingbelin u  si taa u musu mbei möiti nöunöu kaa fuu ko ta futoou Jehovah möön gaanfa, sö taa u sa futoou ën ku hii u hati a di ten di ta ko.

17. Un wini woo feni a di njunjun goonliba, u di u bi futoou Jehovah?

¹⁷ Pakisei unfa woo fii te u si dee bunu dee woo feni a di njunjun goonliba, u di u bi futoou Jehovah. Poipoi biibi an o dë möön, dee sëmbë dee ta bai soni ta sei an o dë möön, nöö dee tiima u di goonliba aki seei an o dë möön tu. Dee sëmbë aki ta pena wotowan, söseei de tja sömëni fuka ko da de. Siki, gaandi, ku di dëdë di sëmbë fuu ta dëdë an o dë möön. De o söötö Saatan ku dee taku jeje fëën wan dusu jaa longi. Hii dee hogi dee bi ta pasa u di de bi hopo fia ku Gadu an o dë möön (Ako. 20:2, 3). Woo wai seei u di u bi futoou Jehovah!

18. Andi u sa lei a di woto u dee Isaëli sëmbë, di sikifi a Nöbu 11:4-6 ku 21:5?

¹⁸ A kan taa a di njunjun goonliba soni o sa pasa ka a o dë fuu lei ee u ta futoou Jehovah. Pakisei andi bi pasa kölö sö baka di dee Isaëli sëmbë bi kumutu a katibo a Egepiti. So u dee Isaëli sëmbë bi bigi ta kaagi, u di de bi kë dee soni di de bi ta njan a Egepiti, nöö de an bi ta tei di mana di Jehovah bi ta da de u bigi. (Lesi Nöbu 11:4-6; 21:5.) A sa pasa taa u pakisei a di lö fasi aki tu a di pisiten baka di gaan fuka u? Wa sabi unfa woo abi u wooko tjika u seeka di goonliba faa sa toon wan paladëisi. A kan taa hia wooko o dë u du, nöö kandë bigibigi soni o taanga da u pikisö. Woo kaagi Jehovah u di fasi fa a o sölugu u a di ten dë u? U sa dë seiki taa ee u ta tei dee soni dee Jehovah ta du da u a di ten aki u bigi, nöö woo sa tei dee soni dee a du da u a di ten dë u bigi tu.

19. Andi i bi o taa da dee möön fanöudu soni dee u lei a di woto aki?

¹⁹ Hii juu Jehovah ta du soni a wan bunu fasi. U musu biibi di soni aki. Söseei u musu futoou dee sëmbë dee Jehovah buta u wooko dëën. Na fëëkëtë di soni di Jehovah bi mbei di tjabukama Jesaaja taki. A bi taki taa: „Ee un kë dë taanga, nöö di wan kodo soni di un musu du, hën da fuun dë piii, nöö un futoou mi.”​—Jes. 30:15.