A BËIBEL ten, wan womi nasö hën famii bi ta tja gudu go da di famii u wan mujëë di hën ku ën o tööu. De bi ta tja diidii soni, mbeti, nasö möni tu. So juu di womi bi musu wooko da di famii u di mujëë ufö a sa feni di mujëë. Sö wan soni bi pasa ku Jakopu. A bi wooko seibi jaa longi da Lakëli tata, u di a bi kë tööu ku Lakëli (Ken. 29:17, 18, 20). Faandi mbei dee Isaëli sëmbë bi ta du di soni aki?

Wan mujëë de kai Carol Meyers, di ta öndösuku soni u Bëibel bi taki taa: „A kan taa te wan sëmbë bi ta tja gudu go da di famii, nöö de bi ta paka di famii u di mujëë, u di an o dë ku de naandë möön u du wooko da de. Möönmöön ee a bi ta heepi de wooko goon.” So juu di tja di de bi ta tja gudu go da di famii u di mujëë, bi ta mbei taa dee tu famii dë bi ko ta möön libi ku deseei. A sö wan fasi de bi sa ta heepi deseei te soni ko taanga. Boiti di dë, dee gudu dë, bi ta lei taa di mujëë o tööu, söseei taa a o kumutu nëën tata wosu go libi ku hën manu.

Di soni aki an bi kë taki taa i bi sa bai wan mujëë nasö taa i bi sa sei ën. Wan buku bi taki taa: „Di da di de bi ta da di famii u di mujëë mii möni, nasö woto soni, bi ta mbei a djei kuma dee Isaëli sëmbë bi ta bai wan soni. Ma an bi dë taa paka de bi ta paka de u feni di mujëë, ma wan soni de bi ta da di famii u di mujëë u heepi de.”

A so köndë u di ten aki, i abi sëmbë di ta du di soni aki jeti. Te Keesitu sëmbë ta hakisi gudu da wan mujëë mii u de, nöö de musu ’mbei hii sëmbë ko sabi taa de dë kabakaba u fiti deseei a hii futu’, nöö de an musu hakisi hia soni poi (Fil. 4:5; 1 Kol. 10:32, 33). A di lö fasi aki, de o lei taa de an „abi langawojo”, söseei taa de an giii da soni (2 Tim. 3:2). Boiti di dë, di womi an o abi fu pusa di tööu daka u te a sa paka dee soni. Nasö ee a dë taa a ta du di pioniliwooko, nöö an abi fu disa di diniwooko fëën, u di a musu suku wooko faa sa paka de.

A so köndë, de abi wëti di nama ku di soni aki. Keesitu sëmbë musu hoi dee wëti aki, ee de ta libi a sö wan köndë. Faandi mbei? Wë di Wöutu u Gadu taki taa Keesitu sëmbë „musu ta saka a dee tii u lanti basu”, söseei de musu ta piki de buka a soni ee de an ta mbei de pasa Gadu wëti.​—Lom. 13:1; Tjab. 5:29.