DI WËTI u Mosesi bi ta da dee Isaëli sëmbë pasi, u de bi sa tja bakaa pomba ku piki pomba tuu go tjuma da Jehovah. Te di Wëti bi ta taki u dee soni di de bi sa tja go tjuma da Gadu, nöö a bi lo’ u taki u dee tu fou aki makandi. Ee ja bi abi wan u de, nöö i bi sa tja di wotowan go tjuma da Gadu (Leif. 1:14; 12:8; 14:30). Faandi mbei di soni aki bi dë wan bunu soni? Wë wan u dee soni, hën da na hii juu i bi sa feni piki pomba. Unfa a du waka?

Di piki pomba an bi ta dë a wan kamian, ma a bi ta dë u feni a Isaëli te di wei bi kendi. Hiniwan jaa, te tinimu-liba dou, nöö de bi ta buwa kumutu a di pisiwata u Isaëli, nöö de bi nango a woto köndë ka di wei bi ta möön kendi. Baka di dë, de bi ta toona buwa ko a Isaëli te di kamian bi ta kendi baka (Kanda. 2:11, 12; Jel. 8:7). Di soni aki kë taki taa na awooten Isaëli, a bi ta taanga da dee Isaëli sëmbë u de feni piki pomba u tja go tjuma da Gadu te di wei bi kötö.

Ma di bakaa pomba lo’ u dë a wan kamian, nöö fëën mbei i bi sa feni de a Isaëli a hiniwan pisiten u di jaa. Boiti di dë, sëmbë bi ta kiija bakaa pomba. (Luku Johanisi 2:14, 16.) Wan buku ta taki taa: „Hii dee boiti kamian ku dee foto u Palësitina bi abi bakaa pomba di sëmbë bi ta kiija. Hiniwan sëmbë di bi abi wosu, bi abi wan kamian nasö wan baaku a di wosu sinkii fëën, ka a bi ta kiija pomba.”​—Luku Jesaaja 60:8.

Jehovah bi ta lei taa a abi lobi, söseei taa a ta hoi sëmbë a pakisei, u di a bi ta da dee Isaëli sëmbë pasi u de tja fou go tjuma dëën, di de bi sa feni a hiniwan pisiten u di jaa.