Dë waiwai hii fa i ta wakiti Jehovah ku pasensi
I TA wakiti di ten ka Jehovah o puu hii hogidu, söseei ka a o mbei hii soni ko njunjun ö? (Ako. 21:1-5) Wë an dë u taki! Ma na hii juu a ta dë wan kösökösö soni u wakiti Jehovah ku pasensi, möönmöön te fuka ta miti u. Hati fuu sa ko suwaki te wa feni wan soni a di juu di u ta wakiti ën.—Nöng. 13:12.
Ma tökuseei Jehovah kë fuu ta wakiti ën ku pasensi faa du soni a di möön bunu ten di a buta. Faandi mbei Jehovah kë fuu wakiti? Andi sa heepi u fuu ta dë waiwai hii fa u ta wakiti?
FAANDI MBEI JEHOVAH KË FUU WAKITI?
Di Bëibel ta taki taa: „Ma Jehovah o ta wakiti unu, u di a kë du wan bunu da unu. A o hopo du wan soni u lei taa a abi tjalihati fuunu. Biga Jehovah da wan Gadu di ta kuutu soni a wan leti fasi. Dee sëmbë dee ta wakiti ën o feni gaan bunu” (Jes 30:18). Jesaaja bi konda di soni aki da dee Dju dee bi abi taanga jesi (Jes 30:1). Ma dee wöutu dë bi ta da dee Dju dee an bi bia baka da Jehovah taanga, nöö a ta da dee dinima u Jehovah taanga a di ten aki tu.
Useei musu ta wakiti ku pasensi, u di Jehovah ta wakiti ku pasensi. A buta wan ten ka a o puu di hogi goonliba aki a pasi, nöö a ta wakiti u di ten dë dou (Mat. 24:36). A di ten dë, a o de gbelingbelin u si taa dee soni dee Saatan ta taki u Jehovah ku dee dinima fëën, da mindimindi woto. Jehovah o puu Saatan a pasi ku hii dee sëmbë dee o dë ku ën a wan së, ma a o „lei taa a abi tjalihati [fuu]”.
A kan taa Jehovah an o puu dee fuka fuu ufö di ten dë dou, ma tökuseei a kë fuu sabi taa u sa ta dë waiwai hii fa u ta wakiti ën ku pasensi. Kumafa Jesaaja bi taki, nöö u sa ta dë waiwai te u ta wakiti seei u wan gaan bunu soni pasa (Jes 30:18). a Wë nöö unfa u sa ta dë waiwai? Dee fö soni dee woo taki aki sa heepi u.
UNFA U SA TA DË WAIWAI HII FA U TA WAKITI?
Buta pakisei a dee bunu soni dee ta pasa a di libi fii. Könu Dafiti bi si sömëni hogi soni nëën libi (Ps 37:35). Ma tökuseei a bi sikifi taa: „Dë pii te i dë a Jehovah fesi, nöö ta wakiti ën ku hii i hati. Na mbei a toobi i gaanfa poi te wotowan ta du soni u mbei libi u de waka bunu, te i ta si fa de ta du dee hogi di de ta pakisei” (Ps 37:7). Dafiti seei bi du di soni aki, u di a bi buta hii hën pakisei a dee soni dee Jehovah bi paamusi ën. Söseei a bi ta tei hii dee gaan bunu dee Jehovah bi ta du dëën u bigi (Ps. 40:5). Ee useei ta buta pakisei a dee bunu soni dee ta pasa a di libi fuu tu, söseei te wa ta buta pakisei a dee hogi soni dee ta pasa, nöö an o taanga da u sö möön fuu wakiti Jehovah.
Un musu ta dë kabakaba u gafa Jehovah. A kan taa Dafiti hën bi sikifi Psalöm 71. A bi taki taa: „Ma mim mi o ta wakiti nöömö, nöö mi o ta gafa i möön gaanfa” (Ps. 71:14). Unfa a bi o gafa Jehovah? A bi o konda soni u Jehovah da wotowan, söseei a bi o kanda gafëën (Ps. 71:16, 23). Leti kuma Dafiti, useei sa ta dë waiwai hii fa u ta wakiti Jehovah. U ta gafëën te u ta du di peleikiwooko, te u ta fan ku woto sëmbë, söseei te u ta kanda dee kanda fuu. Woto pasi te joo kanda wan u dee kanda fuu möön, nöö i buta pakisei a dee wöutu, nöö joo si fa de o mbei i fii bunu.
A bunu fii ta dë makandi ku dee baaa ku dee sisa, sö taa i sa feni taanga a de. Di soni bi ta taanga da Dafiti, hën a bi piki Jehovah taa: „Mi o ta buta futoou a i në makandi ku dee sëmbë dee ta hoi deseei a i, biga di soni dë dë wan bunu soni” (Ps. 52:9). Useei sa feni taanga te u ta dë makandi ku dee baaa ku dee sisa fuu tu. Na a dee komakandi ku di peleikiwooko wanwan nöö u ta feni di taanga dë, ma u ta feni ën a dee pisiten ka u ta du soni u piizii makandi tu.—Lom. 1:11, 12.
Ko ta möön biibi dee soni dee Gadu paamusi u. Psalöm 62:5 ta taki taa: „Ku pasensi mi o wakiti Gadu, u di hën ta mbei mi ko dë seiki taa soni o waka bunu.” A dë wan gaan fanöudu soni seei fuu ko abi wan möön taanga biibi, möönmöön ee di kaba an ta ko hesi tjika kumafa u ta mëni. U musu dë seiki taa dee soni dee Jehovah paamusi u o pasa tuutuu, aluwasi un longi woo abi u wakiti. U sa ko abi wan möön taanga biibi te u ta lei soni a di Wöutu u Gadu. U sa lei soni u Jehovah, u dee tjabukama woto, söseei u sa lei soni u di fasi fa hii dee pisi u Bëibel ta kai a wan, hii fa tookatooka sëmbë hën sikifi ën (Ps. 1:2, 3). Boiti di dë, u musu ta ’begi nöömö ku di kaakiti u di santa jeje’, sö taa u ku Jehovah sa dë mati go dou, hii fa u ta wakiti faa mbei u feni teego libi kumafa a paamusi u.—Jud. 20, 21.
Leti kuma Könu Dafiti, iseei sa dë seiki taa Jehovah ta buta pakisei a dee sëmbë dee ta wakiti ën, söseei a ta lei de taa a abi wan apaiti lobi da de (Ps. 33:18, 22). I musu ta wakiti Jehovah ku pasensi go dou. Joo lei taa i ta du di soni dë, te i ta buta pakisei a dee bunu soni dee ta miti i, te i ta gafa Jehovah, te i ta du soni u mbei di biibi fii ko möön taanga, söseei te i ta dë makandi ku dee baaa ku dee sisa fii, fii sa feni taanga a de.
a Di wöutu di de puu ko „ta wakiti”, sa kë taki „ta hangi, nasö ta dë ku di biibi taa wan soni o pasa”. Di soni aki ta lei u taa an dë wan föutu soni ee u kë gaanfa seei u Jehovah puu dee fuka fuu.
