SO JUU dee sëmbë dee bi sikifi Bëibel bi ta toona taki dee seei soni a di wan seei fasi baka. Buta pakisei a dii soni di bi sa mbei taa de bi du sö:

Di pisiten di de bi sikifi ën. Na awooten Isaëli, gaansë u dee sëmbë an bi abi u deseei pampia lolu u di Wëti a de pisi. Möön gaanfa te de bi ko makandi ku dee wotowan a di tenti u Gadu ufö de bi ta jei te de bi ta lesi di Wëti (Deto. 31:10-12). A musu u dë taa soni bi ta puu de pakisei te de bi ta haika, u di de bi ta dë taanputaanpu sömëni juu longi a wanlö hia sëmbë dendu (Neh. 8:2, 3, 7). A dee lö okasi dë, te de ta toona taki wan soni baka, nöö a ta möön heepi sëmbë u toona mëni wan fanöudu soni, söseei u du ën. Di soni dë bi o ta heepi dee sëmbë u de toona mëni hii dee pisi u dee wëti di Jehovah bi da de.​—Leif. 18:4-22; Deto. 5:1.

Di fasi fa de bi sikifi ën. So pisi u Bëibel ta dë kanda, nöö sö a dë ku di buku Psalöm, Kanda u Salumon, nasö Këëkanda. So juu wan kanda ta abi wan fasi fa de ta piki ën. Fëën mbei a ta dë ku di seei soni u jei sömëni pasi. Di soni dë ta heepi sëmbë u de an fëëkëtë di kanda. Buta pakisei a dee soni dee sikifi a Psalöm 115:9-11. A ta taki taa: „Isaëli, futoou Jehovah. Hën da di heepima fii, söseei hën da di felu soni di ta tjubi i. Un dee sëmbë u Alon, un futoou Jehovah. Hën da di heepima fuunu, söseei hën da di felu soni di ta tjubi unu. Un dee sëmbë dee ta lesipeki Jehovah, un futoou Jehovah. Hën da di heepima fuunu, söseei hën da di felu soni di ta tjubi unu.” I ta si fa di taki di dee kandama bi o ta taki dee soni aki, bi o ta heepi de u de an fëëkëtë dee fanöudu soni di di kanda ta taki ö?

U lei taa wan soni dë fanöudu. So juu dee sëmbë dee bi sikifi Bëibel bi ta toona sikifi dee seei soni baka, u lei taa dee soni dë dë fanöudu. Di Jehovah bi piki dee Isaëli sëmbë taa de an musu njan buuu, hën a bi mbei Mosesi toona piki de sömëni pasi faandi mbei de an bi musu du ën. Gadu bi kë u de fusutan gbelingbelin taa di libi u wan soni dë a di buuu fëën dendu, nöö di buuu fëën da libi (Leif. 17:11, 14). Bakaten, di dee apösutu ku dee gaanwomi u Jelusalen bi taki andi wan Keesitu sëmbë an musu du ee a kë u Gadu ta wai ku ën, hën de bi toona taki u di njan di wa musu ta njan buuu.​—Tjab. 15:20, 29.

Hii fa di Bëibel ta toona taki dee seei soni baka, tökuseei di soni dë an kë taki taa Jehovah kë faa ko dë wan guwenti da u. Jesosi bi taki taa: „Nöö te joo begi tu, nöö ja musu ta hai di fan nango langalanga nöömö e” (Mat. 6:7). Fëën mbei Jesosi bi konda da u andi da wantu u dee soni dee Gadu lobi fuu ta konda dëën te u ta begi ën (Mat. 6:9-13). A dë sö tuu taa u musu ta köni fu wa ta taki dee seei wöutu a di begi fuu nöömö, ma u sa ta taki u dee seei woto hiniwan juu te u ta begi.​—Mat. 7:7-11.

Na u sösö Gadu bi mbei de sikifi dee seei wöutu, nasö dee seei soni baka. A dë wan u dee fasi fa di Gaan Leima fuu ta lei u soni fuu sa feni wini.​—Jes. 48:17, 18.