1-3. (a) Konda unfa u musu ta si dee tuutuu lei dee dë a di Bëibel. (Luku di peentje a bigi u di woto.) (b) Andi woo luku a di woto aki?

A DI ten aki, a ta pasa taa sëmbë ta bai soni a wënkë, nöö bakaten de ta toona tjëën go baka. Nöö te sëmbë manda tei wan soni a Internet, nöö a sa pasa möön gaanfa taa de toona manda di soni go. Kandë de ta ko si taa wan soni du di soni di de bai nasö kandë te de si di soni, nöö de an ta lobi ën möön. Fëën mbei de ta tei wan woto soni nëën kamian, nasö de ta hakisi dee sëmbë dee sei di soni da de u de da de di möni u de baka.

² Wa bi o kë du di soni aki ku dee soni dee u lei a di Bëibel. Te u „bai” di tuutuu lei tei kaa, nöö nöiti woo kë „sei” ën. Hën da te u ko sabi ën kaa, nöö nöiti woo kë disëën. (Lesi Nöngö 23:23; 1 Timoteo 2:4) A di woto di pasa, u bi si taa a ta tei ten u lei soni u u di tuutuu lei. U bi si tu taa kandë u bi disa wan wooko di bi ta mbei u ta feni gaan hia möni. Kandë wa bi ko ta hulu so sëmbë möön, kandë u bi tooka di fasi fa u bi ta pakisei ku di fasi fa u bi ta du soni. Kandë u bi disa so soni di u bi  guwenti du, di an ta kai ku Gadu. Ma u dë seiki taa na wan u dee soni dee u disa dë, dii kuma dee bunu dee u ta feni u di u ko sabi soni u di tuutuu lei.

³ Jesosi bi konda wan woto u wan womi di ta suku konda kuma paaleli sö, faa bai. Di di womi ko feni wan gaan waiti paaleli, hën a sei hii soni di a bi abi sö taa a bi sa bai ën. Di paaleli aki da dee lei dee nama ku di Könuköndë u Gadu. Wë Jesosi bi konda di woto aki u lei unfa dee sëmbë dee bi ta suku di tuutuu lei bi o wai tjika te de feni ën (Mateosi 13:45, 46). Di u ko sabi soni u di tuutuu lei nasö dee lei dee nama ku di Könuköndë u Gadu ku hii dee woto lei u Bëibel, nöö useei bi dë kabakaba u disa hiniwan soni fuu bi sa ko sabi möön soni u dee lei aki. Ee u ta tei di tuutuu lei u bigi jeti, nöö wa o go disëën nöiti. Ma a pasa taa so dinima u Gadu an bi ko ta tei di lei aki u bigi möön, hën te u kaba fëën de go disëën. Wa kë du di soni aki nöiti! U musu du di soni di di Bëibel taki. A ta taki taa u musu „ta piki di lei u Masa Gadu” go dou. (Lesi 3 Johanisi 2-4.) Di soni aki kë taki taa u musu ta buta di tuutuu lei a di fosu kamian, nöö a musu dë u si a di fasi fa u ta libi. Ma faandi mbei wan sëmbë bi o kë „sei” di tuu, nasö faandi mbei a bi o kë disëën? Söseei unfa a sa waka taa wan sëmbë „sei” di tuu? Andi sa heepi u fu wa go du di soni aki? Andi u sa du fuu ko „ta piki di lei u Masa Gadu” möön gaanfa?

4. Faandi mbei so sëmbë bi disa di lei u Gadu a di ten u Jesosi?

⁴ A di ten u Jesosi, nöö so sëmbë bi tei di lei, ma de bi ko disëën bakaten. Wan daka, Jesosi bi du wan foombo soni u da wanlö hia sëmbë soni u njan, nöö dee sëmbë dë bi faakëën go a woto banda u di ze u Galilea. Ma di de go dou ala, hën Jesosi bi taki wan soni di an bi kai ku de. A bi taki taa: „Ee wan sëmbë ja tei di sinkii u Mi di ko Libisëmbë Mii aki kuma njanjan fii, nöö ee ja tei di buuu u mi kuma wata di i ta bebe, nöö ja feni libi seei eti e.” Ka u dee sëmbë aki bi hakisi Jesosi andi a bi kë taki ku di soni dë, hën de taa: „Maingë, andi da dee soni a ta lei dë? Ambë tjika u tei de?” Te u kaba fëën, „hën sömëni u dee sëmbë bi ta waka nëën baka kumutu go disëën, de an dë ku ën möön”.​—Johanisi 6:53-66.

5, 6. (a) Faandi mbei so sëmbë nango disa di lei u Gadu a di ten aki? (b) Unfa a sa waka taa wan sëmbë ta kumutu a di tuutuu lei pikipiki u te a go disëën?

⁵ A di ten aki, a ta pasa taa so sëmbë nango disa di tuutuu lei tu. Faandi mbei? Wë so sëmbë ta du di soni aki u di dee baaa ko ta fusutan wan Bëibel tëkisi wan woto fasi nasö u di wan baaa di hia sëmbë sabi, taki wan soni nasö du wan soni di toobi de. Wotowan go disa di tuutuu lei u di de an bi lobi di da di wan sëmbë bi da de lai nasö u di de ku wan sëmbë bi kisi wan gaan toobi a di kemeente. Wotowan go haika dee poipoi lei u dee sëmbë dee kumutu a di tuutuu lei nasö kandë de go haika soni di sëmbë ta mindi da u. Dee soni aki da wantu u dee soni di mbei so sëmbë go disa Jehovah ku di kemeente (Hebelejën 3:12-14). A bi o dë wan bunu soni seei ee de bi ta futoou Jesosi kumafa Petuisi bi ta du ën! Di Jesosi bi taki di soni di an bi kai ku dee sëmbë, hën Jesosi bi hakisi dee apösutu fëën ee de seei bi o go disëën tu, hën Petuisi piki ën taa: „Masa o, na ambë seei u sa go möönsö? Biga i nöö abi  dee wöutu dee ta da sëmbë libi u teego.”​—Johanisi 6:67-69.

⁶ So sëmbë bi ta kumutu a di tuutuu lei pikipiki u te de go disëën söndö u de mëni. Wan sëmbë di ta kumutu a di tuutuu lei pikipiki, dë kuma wan boto di dë a wan lampeesi ta diipi nango siii sö. Di Bëibel ta piki u taa u musu ta köni be di soni aki an miti u (Hebelejën 2:1). A lo’ u pasa taa te wan sëmbë ta kumutu a di tuutuu lei pikipiki, nöö an ta dë ku di mëni taa kumutu a ta kumutu a di lei. Ma an ta mbei möiti möön fu hën ku Jehovah sa dë mati go dou, nöö te u kaba fëën, a sa pasa taa hën ku Jehovah ko poi. Unfa u sa köni be di soni aki an pasa ku u nöiti?

7. Andi o heepi u fu wa sei di tuu?

⁷ Ee u kë ta waka a di leti pasi, nöö u musu ta tei hii dee soni dee Jehovah ta piki u, söseei u musu ta libi ku de tu. Di tuutuu lei ku di libi di u musu ta libi ku dee mama wëti u Bëibel musu dë di möön fanöudu soni da u. Di Könu Dafiti bi begi Jehovah, hën a bi paamusi Jehovah taa: „Mi o waka a di leti pasi fii” (Psalöm 86:11). Dafiti bi buta taa a bi o mbei hii möiti faa waka a di leti pasi. Nöö sö useei musu du tu. Ee wa du di soni aki, nöö a sa pasa taa u bigi ta pakisei dee soni dee u bi disa fuu bi sa ko a di tuutuu lei, nöö kandë woo kë go du so u dee soni dë baka. Ma wa sa taki taa woo tei so u dee lei u Bëibel, nöö u disa so u de. A di woto di pasa, u bi taki u feifi soni di kandë u bi disa fuu bi sa lei soni u di tuutuu lei, söseei fuu bi sa libi ku dee soni dee u bi ta lei. Nöunöu woo luku unfa u sa köni be wa toona bia go a dee soni dë möön.​—Mateosi 6:19.

8. Konda wan woto di ta lei unfa di fasi fa wan Keesitu sëmbë ta du soni ku di ten fëën, sa mbei a ta kumutu pikipiki a di tuutuu lei?

⁸ Di ten fii. Ee wa kë faa dë taa u ta kumutu a di tuutuu lei pikipiki, nöö u musu ta wooko ku di ten fuu a wan köni fasi go dou. Ee wa ta wooko ku di ten fuu a wan köni fasi, nöö a sa pasa taa u lasi ten a soni di u ta du u mbei piizii. Dee soni dë sa dë soni kuma di go di u nango a Internet nasö di luku di u ta luku teefei. Hii fa an musu u hogi ee u ta du dee soni aki, tökuseei a sa pasa taa u tei di ten di u bi ta tei u lei soni u Bëibel, nasö di u bi nango a di peleikiwooko, u go du dee soni aki. Sö wan soni bi miti Emma. * (Luku di pisi a basu.) Sensi di a bi dë miii, a bi lobi hasi, nöö a bi nango köi ku hasi solanga a bi feni pasi faa du ën. Ma háti fëën bi bigi fon mën u di a bi ko ta fii taa a bi ta lasi ten a di soni aki baka. Fëën mbei a bi buta taa a bi o tooka di fasi fa a bi ta du soni. Emma bi lei soni a di woto u sisa Cory Wells, wan sisa di bi lobi hasi tu. * (Luku di pisi a basu.) Nöunöu Emma ta tei di ten fëën u dini Jehovah möön gaanfa, söseei a ta feni möön ten faa sa ta dë ku dee famii fëën ku dee mati fëën dee ta dini Jehovah tu. A ta fii taa hën ku Gadu ko dë möön gaan mati, söseei a ta wai taa a ta wooko ku di ten fëën a wan köni fasi.

9. Unfa a sa waka taa u mbei gudu ko dë gaan soni da u poi?

 ⁹ Dee gudu dee i abi. Ee u kë ta waka a di leti pasi go dou, nöö wa musu mbei gudu ko dë gaan soni da u poi. Di u bi ko sabi soni u di tuutuu lei, hën u ko si taa di dini di u musu ta dini Jehovah bunu gaanfa möön gudu, nöö u bi dë kabakaba u disa dee soni dë fuu bi sa ko a di tuutuu lei. Ma möön di ten ta pasa, möön u sa ta si fa sëmbë ta bai dee möön njunjun soni di könima ta mbei nasö woto soni. Nöö di soni aki sa mbei u ko ta si kuma u ta lasi wan soni. Te u kaba fëën, nöö kandë wa o dë tifeedi möön ku dee soni dee u abi, nöö woo ko ta buta pakisei a di ko di u musu ko abi möön hia gudu, ka fuu buta pakisei a di dini di u musu ta dini Jehovah. Di soni aki ta mbei u mëni di soni di bi pasa ku Demasi. A bi lobi „dee soni u goonliba aki” tee taa a disa di wooko di hën ku apösutu Paulosu bi ta du (2 Timoteo 4:10). A kan taa Demasi bi lobi gudu möön di dini di a bi musu dini Gadu. Nasö kandë an bi kë disa so soni möön faa bi sa dini Gadu makandi ku Paulosu. Andi u ta lei a di woto aki? Wë kandë u bi lobi gudu ufö u ko a di tuutuu lei, nöö ee wa köni nöö a sa pasa taa u toona ko lobi gudu kumafa u bi lobi ën fosu. Di soni aki sa mbei wa ko lobi di tuutuu lei möön.

10. Ku un soni u musu ta köni?

¹⁰ Dee famii fii ku dee mati fii. Ee u kë ta waka a di leti pasi go dou, nöö wa musu mbei sëmbë di an ta dini Jehovah puu u a di leti pasi. Di u bi ko sabi soni u di tuutuu lei, hën u ku dee mati fuu ku dee famii fuu dee an ta dini Jehovah, bi ko dë woto fasi. Kandë so u de an bi abi toobi taa u ko a di tuutuu lei, ma kandë wotowan an bi lobi ën (1 Petuisi 4:4). Wë an dë u taki taa woo ta mbei hii möiti fuu libi bunu ku dee sëmbë fuu. Ma wa sa booko dee wëti u Jehovah u di u kë du soni di ta kai ku de. Boiti di dë, 1 Kolenti 15:33 ta piki u taa dee mati fuu musu dë sëmbë di lobi Jehovah.

11. Unfa u sa köni be wa ko ta pakisei soni di an bunu, söseei fu wa ko ta du soni di an bunu?

¹¹ Soni di u bi ta pakisei, ku soni di u bi ta du, di an bi bunu. Ee u kë ta waka a di leti pasi, nöö u musu dë limbolimbo a Jehovah wojo. (Jesaaja 35:8; lesi 1 Petuisi 1:14-16.) Di u bi ko sabi soni u di tuutuu lei, hën u bi tooka soni a u libi fuu bi sa libi ku dee wëti u Bëibel. So fuu bi tooka soni gaanfa seei. Ma tökuseei u musu ta köni be wa disa di libi di u ko ta libi a wan fasi di ta kai ku Gadu, fuu go ta libi a wan fasi di na fiti. Andi sa heepi u fu wa go du soni di an fiti? Pakisei di soni di Jehovah du da u fuu bi sa ko dë limbolimbo nëën wojo. A manda Jesosi Keesitu, di wan kodo Womi Mii fëën, ko dëdë da u (1 Petuisi 1:18, 19). Ee u kë ta dë limbolimbo a Jehovah wojo, nöö hii juu u musu ta hoi a pakisei unfa di paima di Jesosi paka da u bigi tjika.

12, 13. (a) Faandi mbei u musu ta si dee daka di sëmbë ta hoi a di ten aki kumafa Jehovah ta si de? (b) Fuun soni woo taki nöunöu?

¹² Guwenti, ku soni di sëmbë ta du, di an ta kai ku Gadu. Dee famii fuu, dee sëmbë dee u ku de ta wooko a di wan kamian, ku dee mii dee u ku de nango a di wan siköö, sa kë duwengi u fuu hoi dee daka di de ta hoi, kuma fujai daka, nasö dee gaan daka di de ta hoi a di köndë ka u ta dë. Andi sa heepi u fu wa hoi daka di an ta kai ku Gadu? U musu ta hoi a pakisei faandi mbei Jehovah an kë fuu hoi dee daka aki. U sa öndösuku soni a dee buku fuu, fuu ko sabi faandi mbei  sëmbë ko ta hoi so u dee daka aki. Te u pakisei fundu u di soni di mbei wa ta hoi dee daka aki, nöö u ta dë seiki taa u ta waka a wan fasi „di Gadu lobi” (Efeise 5:10). Ee u ta futoou Jehovah ku di Wöutu fëën, nöö wa o abi toobi ku andi woto sëmbë ta taki.​—Nöngö 29:25.

¹³ Wa kë kumutu a di pasi di u dë aki, ma u kë ta waka nëën nöömö. Andi sa heepi u fuu sa ta waka a di pasi aki go dou? Wë dii soni dë di u sa du.

14. (a) Unfa di lei di woo ta lei soni u Bëibel o heepi u fu wa go disa di tuutuu lei? (b) Faandi mbei u musu abi köni ku fusutan, söseei faandi mbei u musu mbei dee lei u Bëibel leti u buta a pasi?

¹⁴ Di fosu soni di i musu du fii sa waka a di pasi u Gadu go dou, hën da i musu ta lei soni a di Bëibel, söseei i musu ta pakisei fundu u dee soni dee i ta lei. Buta wan ten ka joo ta du dee soni aki. Möön i lei soni u Bëibel, möön joo ko lobi di tuutuu lei, nöö möön joo ko dë kabakaba fu ja go disëën. Nöngö 23:23 ta taki taa u musu „bai di tuu tei”, söseei taa u musu bai „köni, lai, ku fusutan”. Wa musu sabi dee lei u Bëibel nöö a kaba. Ma u musu ta libi ku dee soni dee u ta lei. U sa taki taa u ta ko abi fusutan u soni, te u ko sabi unfa u musu tja dee soni dee u ta lei ku dee soni dee u bi lei kaa ko a wan, fuu sa libi ku de. Köni ta heepi u fuu du dee soni dee u ta lei. So juu di tuutuu lei ta leti u buta a pasi, u di a ta mbei u ko si andi ku andi u musu tooka a u libi. Te u ko sabi dee soni aki kaa, nöö u musu tooka de wantewante. Di Bëibel ta taki taa di leti di di tuutuu lei ta leti u buta a pasi, bunu möön soofu.​—Nöngö 8:10.

15. Unfa di tuutuu lei ta heepi u kumafa wan banti bi ta heepi wan sodati?

¹⁵ Di u tu soni di i musu du fii sa waka a di pasi u Gadu go dou, hën da hii daka i musu ta dë kabakaba fii libi ku dee soni dee i ta lei. Di Bëibel ta tei di tuu, maaka ku wan banti di wan sodati ta tei u banti mindi (Efeise 6:14). Na awooten, sö wan banti bi ta bunu da wan sodati faa go a feti. Ma di sodati bi musu banti hënseei bumbuu. Ee an bi du di soni aki, nöö a bi o ko dë taa di banti aan heepi dëën. Unfa di tuu ta heepi u kumafa di banti ta heepi wan sodati? Wë ee u ta libi ku dee lei u Bëibel hii juu, nöö de o heepi u fu wa si soni a wan föutu fasi, söseei de o heepi u fuu du soni a wan köni fasi. Dee lei u Bëibel o heepi u fuu du soni di bunu, te u dë ku wan gaan fuka, nasö te hati fuu ta manda u fuu du wan soni di an bunu. Leti kumafa wan sodati an bi o go a feti söndö di banti fëën, sö wa bi o kë disa di tuutuu lei tu. U musu ta wooko ku dee lei u Bëibel hii juu. Wan sodati bi ta hëngi di feti ufangi fëën a di banti fëën tu. Boo luku unfa useei sa du sö wan soni tu.

16. Unfa di lei di u ta lei sëmbë soni u di tuutuu lei ta heepi u fuu sa ta waka a di pasi u Gadu go dou?

 ¹⁶ Di u dii soni di i musu du fii sa waka a di pasi u Gadu go dou, hën da i musu ta lei sëmbë soni u Bëibel kumafa i sa lei dou. Di Bëibel dë kuma wan feti ufangi. Leti kumafa wan sodati ta panjan di ufangi fëën bumbuu te a ta feti, sö nöö useei musu sa’ u wooko ku di Wöutu u Gadu tu (Efeise 6:17). U tuu sa ko sa’ u lei sëmbë soni u Bëibel möön bunu, hën da woo „ta tei di wöutu u Gadu ta lei ën leti kumafa a dë” (2 Timoteo 2:15). Te u ta tei di Bëibel u lei sëmbë soni, nöö u ta ko sabi möön soni u Bëibel, söseei u ta ko möön lobi dee soni dë. Te u kaba fëën, nöö woo ko möön dë kabakaba u waka a di pasi u Gadu go dou.

17. Faandi mbei i ta tei di tuutuu lei u bigi?

¹⁷ Di tuutuu lei di u dë nëën aki da wan dii kado di Jehovah da u. A ta mbei u ku di Tata fuu di dë a liba ala, ko dë möön gaan mati. Di ko di u ku Jehovah ko dë mati da wan gaan soni di u musu ta tei u bigi seei. Jehovah lei u sömëni soni kaa, ma u sabi taa a o lei u sömëni soni jeti! Jehovah paamusi u taa a o ta lei u soni u teego. Fëën mbei i musu ta tei di tuutuu lei u bigi, kumafa i bi o tei wan dii paaleli u bigi. I musu ta „bai di tuu tei”, nöö ja musu „sei ën”. Te i ta du sö, nöö joo hoi iseei a di buka di i bi mbei ku Jehovah, kumafa Dafiti seei bi du ën. A bi piki Jehovah taa: „Mi o waka a di leti pasi fii.”​—Psalöm 86:11.