1-2. (a) Andi ta heepi u fuu sa ta pasa dee daka te fuka ta miti u? (b) Andi woo taki a di woto aki?

SÖMËNI fuu bi taki di soni aki kaa: „Te mi pakisei di soni di bi miti mi, nöö mi ta si taa ma bi o sa hoi dou ku di u miseei kaakiti.” I bi taki di soni aki wan daka kaa u? Kandë i bi taki di soni aki baka di i bi si taa i bi hoi dou hii fa i bi dë ku gaan suwaki, nasö hii fa wan sëmbë fii bi lasi libi. Te i ta pakisei di fuka dë, nöö i ta si taa i bi sa pasa dee daka dë, u di di santa jeje u Jehovah bi da i „di gaan kaakiti” di an ta kumutu a libisëmbë.​—2 Kol. 4:7-9.

² U abi di santa jeje fanöudu tu faa heepi u fuu finga futu da di hogi goonliba aki (1 Joh. 5:19). Boiti di dë, u abi kaakiti fanöudu fuu sa finga futu da „dee taku jeje” (Ef. 6:12, NW). Woo taki u tu fasi fa di santa jeje ta heepi u fuu du dee soni aki. Baka di dë, nöö woo luku andi u musu du fuu sa feni di heepi u di santa jeje te dou.

3. Andi da wan fasi fa Jehovah ta heepi u fuu hoi dou te fuka ta miti u?

³ Di santa jeje u Jehovah ta da u di kaakiti nasö di taanga di u abi fanöudu fuu sa du dee soni dee u musu du, hii fa fuka ta miti u. Apösutu Paulosu bi sabi taa a bi sa dini Jehovah go dou hii fa fuka bi ta miti ën, u di a bi da „di kaakiti u [Masa Jesosi] Keesitu” pasi faa heepi ën (2 Kol. 12:9). Di Paulosu bi go du di sëndëlengiwooko fëën di u tu pasi, nöö na peleiki nöö a bi ta peleiki da te a hia sëmbë, ma a bi ta wooko tu faa bi sa sölugu hënseei. A bi tuwë lai na Akila ku Pesila pisi a Kolenti. Akila ku Pesila bi ta mbei tenti ta sei. Nöö u di Paulosu bi ta mbei tenti tu, mbei so daka a bi ta wooko makandi ku de (Tjab. 18:1-4). Di santa jeje bi da Paulosu di kaakiti faa bi sa ta peleiki, söseei faa bi sa ta wooko u sölugu hënseei.

4. Andi bi ta taanga da Paulosu, te u luku 2 Kolenti 12:7b-9?

 ⁴ Lesi 2 Kolenti 12:7b-9. Andi Paulosu bi kë taki a di tëkisi aki, di a bi taki taa wan soni bi ta toobi ën, nöö di soni dë bi ta ’tjökö ën leti kuma maka’? Ee wan maka tjökö i, hën a booko fika a i sinkii, nöö a o hati i gaanfa seei. Hën da Paulosu bi kë lei taa a bi abi wan fuka fëën di bi ta toobi ën gaanfa, leti kuma te maka tjökö i. A bi taki taa di fuka dë bi dë dëën kuma ’Gadu disa pasi da Didibi, hën Didibi manda wan futuboi fëën ko naki ën’. Kandë na Saatan ku dee taku jeje fëën, de bi du soni ku Paulosu. Ma kandë di de si taa Paulosu bi dë ku wan fuka, hën de suku u mbei di fuka ko möön taanga dëën faa tja. Di soni dë bi dë dëën kuma wan sëmbë bi ta zin di „maka” faa denda go möön gaanfa nëën sinkii. Andi Paulosu bi du?

5. Unfa Jehovah bi piki dee begi u Paulosu?

⁵ Bigibigi Paulosu bi kë u Gadu puu di „maka” dëën. A bi taki taa: „Dii pasi mi begi a wan apaiti fasi fu Masa [Jehovah] musu puu di lö soni naandë a mi liba.” Ma hii fa Paulosu bi begi Jehovah faa puu di maka dëën, tökuseei di maka bi fika dë ta tjökö ën jeti. Di soni aki kë taki taa Jehovah an bi piki dee begi u Paulosu ö? Wë nönö, na seei. Jehovah bi piki dee begi fëën. Jehovah an bi puu di fuka fëën, ma a bi dëën di kaakiti di a bi abi fanöudu faa hoi dou. Jehovah bi taki taa: „Te wan sëmbë kaakiti ku saanfa-u-du fëën kaba, nöö nëën mi sa feni pasi u wooko nëën liba ku di kaakiti u mi awaa” (2 Kol. 12:8, 9). Gadu bi da Paulosu kötöhati, söseei a bi heepi ën faa dë waiwai go dou!​—Fil. 4:4-7.

6. (a) Na un fasi Jehovah sa piki dee begi fuu? (b) Un soni di Gadu paamusi u a dee tëkisi dee dë a di palaklafu aki, ta da i taanga?

⁶ Iseei bi begi Jehovah faa puu i a wan fuka tu ö? Kandë i bi begi Jehovah sömëni pasi faa puu di fuka dë da i, ma di fuka an go möönsö nasö kandë a ko möön hogi seei. Di soni dë ta mbei i si kuma Jehovah an ta wai ku i ö? Wë ee sö i ta fii, nöö hoi di woto u Paulosu a pakisei. Leti kumafa Jehovah bi piki dee begi fëën, sö nöö a o piki dee begi fii tu! Kandë Jehovah an o puu di fuka da i, ma a sa mbei di santa jeje fëën da i di kaakiti di i abi fanöudu fii hoi dou (Ps. 61:3, 4). De sa ’fon i tuwë ku baka a goon’, ma Jehovah an o disa i.​—2 Kol. 4:8, 9; Fil. 4:13.

7-8. (a) Na un fasi di santa jeje dë kuma ventu di ta böö? (b) Unfa Petuisi bi taki taa di santa jeje ta wooko?

⁷ Andi da wan woto fasi fa di santa jeje ta heepi u? U sa tei di santa jeje maaka ku ventu di ta böö. Te di ventu ta böö bunu, nöö a sa tja wan sipi go dou ka a musu dou, hii fa di wata u di ze ta seki gaanfa. Sö nöö di santa jeje ta heepi u fuu dini Jehovah go dou hii fa fuka ta miti u, u te u dou a di njunjun goonliba di Gadu paamusi u.

⁸ U di apösutu Petuisi bi ta kisi fisi, mbei a bi sabi soni u di tja di sëmbë ta tja boto. Kandë u di soni dë mbei a maaka di fasi fa di santa jeje ta wooko ku di tja di sëmbë ta tja boto. Petuisi bi taki taa: „Na libisëmbë hën tja tjabukama woto ko, ma sëmbë bi tja buka u Gadu, u di di santa jeje bi ko a de liba.” Di Giiki wöutu di de puu ko „ko a de liba”, kë taki „tja”.​—2 Pet. 1:21, NW.

9. Andi Petuisi bi kë u sëmbë pakisei di a bi wooko ku di wöutu „tja”?

⁹ Andi Petuisi bi kë u sëmbë pakisei di a bi wooko ku di wöutu „tja”? Wë Lukasi hën bi sikifi di buku Tjabukama, nöö hënseei bi wooko ku di wan seei Giiki wöutu, di a bi kë lei unfa di ventu ta „tja” wan sipi (Tjab. 27:15). Wan womi di ta öndösuku soni u Bëibel bi taki taa di Petuisi bi taki taa di santa jeje bi „ko a [dee sëmbë dee sikifi Bëibel] liba”, nöö a bi taki ën a wan fasi di bi o mbei sëmbë pakisei wan sipi di dë a wata liba, di abi wan koosu u di ventu sa tjëën. U ta fusutan taa Petuisi bi ta lei taa leti  kumafa di ventu ta tja wan sipi faa musu go dou ka a musu dou, sö nöö di santa jeje bi tja dee tjabukama u Gadu ku dee sëmbë dee sikifi di Bëibel, u de bi sa du di wooko u de. Di womi di ta öndösuku soni u Bëibel di u bi taki soni fëën djunsu dë, bi taki tu taa „dee womi dee sikifi di Bëibel bi dë kuma boto di di boto koosu u de dë jabijabi”. De bi dë kabakaba u de du di wooko di di santa jeje bi ta manda de u de du. Jehovah bi du di soni di a bi musu du. A bi da de di „ventu” nasö di santa jeje fëën. Dee womi dee sikifi di Bëibel bi du di wooko di de bi da de u de du. De bi du andi di jeje bi manda de u de du.

10-11. Andi da dee tu soni dee u musu du fuu sa feni di heepi u di santa jeje? Konda wan woto.

¹⁰ Wë a di ten aki, Jehovah an ta wooko ku di santa jeje fëën u mbei sëmbë sikifi Bëibel möön. Ma tökuseei Jehovah ta wooko ku di santa jeje fëën u tja dee dinima fëën jeti. Jehovah ta du di soni di a musu du jeti. Andi u musu du fuu sa feni di heepi u di santa jeje? Wë u musu mbei möiti fuu du di soni di u musu du. Unfa u sa du di soni aki?

¹¹ Buta pakisei a di woto aki. Ee wan botoma kë u di ventu musu heepi ën, nöö a musu du tu soni. Di fosu soni di a musu du, hën da a musu tja di boto fëën go ka di ventu ta böö. Wë biga di boto fëën an o sa go a fesi ee a go dë a wan lampeesi ku di boto, a wan kamian ka di ventu an ta böö. Di u tu soni di a musu du, hën da a musu jabi di boto koosu fëën tuu. Di boto koosu musu dë jabijabi, ma te di ventu ta böö ta naki di koosu, ufö di boto sa go a fesi. Wë sö nöö a dë tu taa te di santa jeje ta heepi u ufö woo sa dini Jehovah go dou. Ee u kë taa di santa jeje musu heepi u, nöö u musu du tu soni. Di fosu soni di u musu du, hën da u musu buta useei ka di santa jeje u Gadu sa dou a u. Di soni aki kë taki taa u musu ta du dee soni di di santa jeje u Gadu ta manda dee dinima fëën u de du. Di u tu soni di u musu du, hën da u musu „jabi di boto koosu” fuu tuu. Di soni aki kë taki taa u musu du dee soni aki kumafa u sa du de bunu  tjika (Ps. 119:32). Te u ta du dee soni aki, nöö di santa jeje o tja u pasa hii fa di wata ta seki. Di soni aki kë taki taa a o da u di taanga fuu dini Jehovah go dou ku hii u hati, u te u dou a di njunjun goonliba.

12. Fuun soni woo taki nöunöu?

¹² Wë u taki u tu fasi fa di santa jeje ta heepi u. Di santa jeje ta da u kaakiti, nöö a ta heepi u fuu sa dini Jehovah go dou, te tesi ta miti u. Di santa jeje ta tii u tu, söseei a ta heepi u fuu du di wooko di Jehovah kë taa u musu du, nöö di soni dë o mbei u feni di libi u teego. Nöunöu woo taki u fö soni di u musu du, fuu sa feni di heepi u di santa jeje te dou.

13. Andi Gadu Wöutu sa du da u te u luku 2 Timoteo 3:16, 17, ma andi u musu du?

¹³ Di fosu soni di i musu du, hën da i musu ta lei soni a di Wöutu u Gadu. (Lesi 2 Timoteo 3:16, 17.) Gadu bi tei di santa jeje fëën u mbei dee sëmbë dee sikifi di Bëibel ko sabi andi a bi kë u de sikifi. Te u ta lesi di Bëibel ta pakisei fundu u dee soni dee u ta lesi, nöö dee lei u Gadu ta saka go a u hati ku u fusutan. De ta mbei u tooka soni a u libi u Gadu sa wai ku u (Hebelejën 4:12). Ma fuu sa feni di heepi u di santa jeje te dou, nöö u musu ta tei ten ta lei soni u Bëibel, ta pakisei fundu u dee soni dee u ta lesi. Te u ta du sö, nöö di Wöutu u Gadu o tii u a hii dee soni dee u ta taki ku hii dee soni dee u ta du.

14. (a) Faandi mbei u sa taki taa di santa jeje ta dë a dee komakandi fuu? (b) Andi o heepi u fuu sa feni di heepi u di santa jeje te dou, te u dë a dee komakandi fuu?

¹⁴ Di u tu soni di i musu du, hën da i musu ta ko makandi ku dee woto dinima u Gadu (Ps. 22:22). Dee komakandi fuu da kamian ka „di ventu ta böö”. Di santa jeje u Gadu ta dë a dee komakandi fuu (Ako. 2:29). Faandi mbei u sa taki di soni aki? Wë u sa taki sö u di te u ko makandi ku dee baaa ku dee sisa fuu, nöö u ta begi u di santa jeje dë ku u, u ta kanda Könuköndë kanda di ta taki soni u di Wöutu u Gadu, söseei u ta haika taki di nama ku Bëibel. Dee baaa dee ta hoi dee taki aki da baaa di di santa jeje buta a wooko. Di wan seei santa jeje dë hën ta heepi dee sisa u de sa seeka dee soni di de musu hoi a dee komakandi, söseei a ta heepi de u de hoi de tu. Ma ee u kë feni di heepi u di santa jeje te dou, nöö u musu ta seeka useei fuu sa ta da piki a dee komakandi. Te u ta du di soni aki, nöö woo dë kabakaba fuu sa feni di heepi u di santa jeje te dou, leti kumafa di boto ta feni heepi a di ventu te di „boto koosu fëën dë jabijabi”.

15. Unfa di santa jeje ta heepi u te u dë a di peleikiwooko?

¹⁵ Di u dii soni di i musu du, hën da i musu ta du di peleikiwooko. Te u ta tei di Bëibel u lei sëmbë soni te u dë a di peleikiwooko, nöö u ta da di santa jeje pasi faa heepi u a di diniwooko fuu (Lom. 15:18, 19). Ma ee i kë feni di heepi u di santa jeje te dou, nöö i musu ta du di peleikiwooko hii juu, söseei i musu ta wooko ku di Bëibel solanga i feni pasi fii du ën. Wan fasi fa i sa heepi sëmbë möön bunu te i dë a di peleikiwooko, da te i ta wooko ku di fasi fa dee baaa ta lei u taa u sa fan ku sëmbë. I sa feni dee soni aki a Di libi ku di diniwooko fuu komakandi buku.

16. Andi da di möön bunu fasi fa u sa feni di heepi u di santa jeje?

¹⁶ Di u fö soni di i musu du, hën da i musu ta begi Jehovah (Mat. 7:7-11; Luk. 11:13). Di möön bunu fasi fa i sa feni di heepi u di santa jeje, hën da te i ta begi hakisi Jehovah faa da i ën. Na wan soni sa tapa dee begi fuu u de an dou a Jehovah, söseei na wan soni sa tapa di jeje u Jehovah fu an dou a u. Di santa jeje sa heepi u aluwasi ee u dë a dunguwosu. Saatan seei an sa tapa u fu wa feni di santa jeje (Jak. 1:17). Unfa u musu begi sö taa u feni di heepi u di santa jeje te dou? Fuu piki di hakisi aki, boo taki soni di  nama ku begi. Woo luku wan woto di Jesosi bi da, di sikifi a di buku Lukasi. *

17. Andi u sa lei u begi te u luku di woto di Jesosi bi konda a Lukasi 11:5-9, 13?

¹⁷ Lesi Lukasi 11:5-9, 13. Di woto di Jesosi bi da ta lei u unfa u musu begi fuu sa feni di heepi u di santa jeje. Di womi a di woto di Jesosi bi da, bi feni di soni di a bi ta suku u di a bi ta hakisi „nöömö”. An bi fëëë u go hakisi di mati fëën faa heepi ën, hii fa a bi dë gaan ndeti kaa (Luk. 11:8). * Andi Jesosi bi taki taa u sa lei a di woto aki? A bi taki taa: „I musu ta begi Masa Gadu nöömö e, nöö a o da i di soni di i ta begi ën. I musu ta suku di soni i abi fanöudu nëën, nöö joo feni ën. I musu ta naki di döö fëën, nöö a o jabi ën da i.” Andi u sa lei a di woto aki? U ta lei taa ee u kë feni di heepi u di santa jeje, nöö u musu begi Jehovah nöömö faa da u ën.

18. Faandi mbei u sa dë seiki taa Jehovah o da u di santa jeje fëën, te u luku di woto di Jesosi bi konda?

¹⁸ Di woto di Jesosi bi konda, ta heepi u tu fuu fusutan faandi mbei Jehovah o da u di santa jeje fëën. Di womi di Jesosi bi ta taki soni fëën bi kë sölugu di sëmbë di bi ko nëën. A bi ta fii taa a bi musu seeka soni u njan da di sëmbë di bi ko luku ën a gaan ndeti, ma an bi abi na wan soni u dëën faa njan. Jesosi bi taki taa di mati u di womi bi dëën di bëëë, u di di womi bi ta hakisi ën di bëëë nöömö. Andi Jesosi bi kë lei u ku di soni aki? Wë ee wan zöndu libisëmbë seei ta dë kabakaba u heepi di wotowan fëën u di a ta hakisi ën nöömö faa heepi ën, nöö u sa dë seiki taa di bunuhati Tata fuu di dë a liba ala, o heepi dee sëmbë dee ta hakisi ën nöömö faa da de di santa jeje fëën! Wë fëën mbei, u sa dë seiki taa te u ta begi Jehovah ta hakisi ën faa da u di santa jeje fëën, nöö a o haika di begi fuu.​—Ps. 10:17; 66:19.

19. Faandi mbei u sa dë seiki taa u sa hoi dou?

¹⁹ U sa dë seiki taa u sa hoi dou, hii fa Saatan ta du ku u hii juu. Faandi mbei u taki sö? Wë u di di santa jeje ta heepi u a tu fasi. Di fosu fasi fa a ta heepi u, hën da a ta da u di kaakiti di u abi fanöudu fuu hoi dou, hii fa fuka ta miti u. Di u tu fasi fa a ta heepi u, hën da a ta heepi u fuu sa dini Jehovah go dou, u te u dou a di njunjun goonliba. Boo mbei taanga möiti fuu sa feni di heepi u di santa jeje te dou!