1. Andi Jehovah ta da u pasi fuu du?

JEHOVAH ta da u pasi fuu taki da useei unfa u kë libi. A ta lei u unfa u sa du bunu soni, söseei a ta heepi u fuu du soni di ta kai ku ën (Ps. 119:173). Te u ta wooko ku di köni u Gadu di dë u feni a di Wöutu fëën, nöö a ta heepi u fuu du bunu soni.​—Heb. 5:14.

2. Andi sa pasa ku u baka te u buta taa woo du wan soni?

² Aluwasi u buta taa woo du wan bunu soni seei, tökuseei a sa ta taanga da u fuu kaba di soni di u bi bigi dë. Buta pakisei a dee woto aki: Wan njönku baaa buta taa a o lesi hii di Bëibel. A lesi ën wantu wiki, ma te u kaba fëën a disa u lesi. Wan sisa buta taa a o du di kowoonu pioniliwooko, ma hiniwan juu a ta buta daka ta puu. Dee gaanwomi u wan kemeente fiti buka taa de o nango ta luku dee baaa ku dee sisa u di kemeente a de pisi möön hia, ma baka wantu liba, de an bigi seei jeti. Dee sëmbë aki tuu buta taa de o du wan soni, ma de an kaba di soni di de bi bigi ku ën. Di wan seei soni nöö bi miti dee bakama u Keesitu a Kolenti a di ten u Paulosu. Boo luku andi u sa lei u di woto u de.

3. Andi dee sëmbë u Kolenti bi buta taa de o du, ma andi bi ko pasa?

³ A di pisiten u di jaa 55 baka Keesitu, hën dee sëmbë u Kolenti bi buta taa de bi o du wan fanöudu soni. De bi ko jei taa di libi bi ta taanga da dee baaa ku dee sisa u de dee bi ta libi a Jelusalen ku Judea, söseei taa dee woto kemeente bi ta pii möni u de heepi de. Dee sëmbë u Kolenti bi abi bunuhati, söseei de bi lo’ u da sëmbë soni. Fëën mbei de bi buta taa deseei  bi o heepi tu, hën de hakisi Paulosu ee unfa de sa heepi. A bi sikifi biifi manda da de u piki de andi de bi musu du, söseei a bi manda Titusi faa go heepi de ku di möni di de bi ta pii (1 Kol. 16:1; 2 Kol. 8:6). Ma wantu liba baka di dë, hën Paulosu ko jei taa dee sëmbë u Kolenti an bi pii di möni jeti. Di soni dë bi mbei taa de an bi sa kaba pii di möni u de bi sa mandëën go makandi ku di möni di dee woto kemeente bi da, u de tja go a Jelusalen.​—2 Kol. 9:4, 5.

4. Andi Paulosu bi da dee sëmbë u Kolenti taanga u de du, te u luku di soni di sikifi a 2 Kolenti 8:7, 10, 11?

⁴ Dee sëmbë u Kolenti bi buta taa de bi o du wan bunu soni, nöö Paulosu bi gafa de, u di de bi lei taa de abi wan taanga biibi, söseei u di de bi lei taa de bi kë da wotowan soni. Ma a bi da de taanga tu u de du di soni di de bi buta taa de o du. (Lesi 2 Kolenti 8:7, 10, 11.) Di woto u de ta lei u taa Keesitu sëmbë di taanga a di biibi seei, a sa ta taanga da u de du wan soni di de bi buta taa de o du.

5. Un hakisi woo piki a di woto aki?

⁵ Kandë a sa taanga da u leti kuma dee Keesitu sëmbë u Kolenti, u du wan soni di u bi buta taa woo du. Faandi mbei di soni dë sa ta taanga da u? Wë u di u da zöndu libisëmbë, mbei a sa pasa taa wa ta du wan soni di u bi musu du wantewante. Boiti di dë, soni di wa bi mëni sa mbei taa wa du di soni di u bi buta taa woo du (Peleik. 9:11; Lom. 7:18). Andi u musu du fuu luku ee woo du wan soni di u bi buta taa woo du jeti nasö ee a dë fuu tooka di soni dë? Andi u musu du fuu sa kaba du wan soni di u buta taa woo du?

6. Na un ten u sa tooka wan soni di u bi buta taa woo du?

⁶ So u dee soni dee u du kaa, wa sa tooka de möön. Wa o tooka di buta di u buta taa woo dini Jehovah, söseei woo hoi useei a di sëmbë di u ku ën tööu (Mat. 16:24; 19:6). Ma so soni dë di u musu tooka. Faandi mbei u taki sö? Wë u di soni ta tooka a u libi, mbei so juu a ta dë fanöudu u tooka so soni di u bi buta taa woo du. Andi sa heepi u fuu du soni a wan möön bunu fasi?

7. Andi u musu hakisi Jehovah, nöö faandi mbei u musu hakisi ën di soni dë?

⁷ Begi Jehovah faa da i köni. Jehovah bi mbei Jakobosi sikifi taa: „Dee sëmbë o, ee wan sëmbë i si taa ja a’ fusutan tjika a soni, nöö i musu begi Gadu faa da i fusutan e, nöö a o da i ën” (Jak. 1:5). Hii u tuu ta du soni so juu di ta lei taa wa abi „fusutan tjika” a so soni. Fëën mbei i musu hakisi Jehovah faa heepi i te joo buta taa joo du wan soni, nasö te joo luku ee i musu du wan soni jeti di i bi buta taa joo du. Te i du sö, nöö Jehovah o heepi i fii du soni a wan köni fasi.

8. Unfa u musu öndösuku soni luku ufö u buta taa woo du wan soni?

⁸ Öndösuku soni luku ufö i buta taa joo du wan soni. Öndösuku soni a di Wöutu u Gadu, lesi dee buku u di ölganisaasi u Jehovah, söseei fan ku sëmbë di i sabi taa o da i köni lai, ufö i buta taa joo du wan soni (Nöng. 20:18). A dë fanöudu fii öndösuku soni a dee lö fasi aki ufö i buta taa joo disa di wooko di i ta du, ufö i foloisi nasö ufö i buta na un siköö joo go, sö taa i sa feni möni fii sa sölugu iseei, söseei fii sa dini Jehovah go dou.

9. Un wini woo feni te u ta du soni ku wan limbo hati?

⁹ Luku faandi mbei i kë du di soni. Jehovah ta booko hën hedi ku di soni mbei u ta du so soni. (Nöng. 16:2) A kë taa u ta du hii soni ku wan limbohati. Fëën mbei te u buta taa woo du wan soni, nöö a musu dë taa u wan bunu soni hedi mbei u kë du ën. U musu köni fu wa ganjan useei, söseei fu wa ganjan wotowan tu. Ee wa du soni ku wan limbo hati, nöö a sa taanga da u fuu du di soni di u taa woo du.  Kandë wan njönku baaa buta taa a o du di pioniliwooko. Ma baka wan pisiten a ko ta taanga dëën u dou dee juu fëën, söseei an ta piizii u du di pioniliwooko möön. Wë a sa kan taa a bi pakisei taa a bi kë du di pioniliwooko u di a bi kë u Jehovah wai ku ën. Ma a sa dë taa a bi kë du di pioniliwooko u di a bi kë fëën mama ku hën tata wai ku ën nasö u wan woto sëmbë hedi.

10. Andi wan sëmbë musu du faa sa tooka soni nëën libi?

¹⁰ Luku di woto u wan sëmbë di bi ta lei soni u Bëibel, di bi kë disa sumuku. Bigibigi, a bi hoi hënseei fu an sumuku wan nasö tu wiki longi, ma bakaten a bi toona ta sumuku baka. Te u kaba fëën, hën a bi ko disa di sumuku di a bi ta sumuku. U di a lobi Jehovah, söseei u di a kë faa wai ku ën, mbei a disa di sumuku di a bi ta sumuku.​—Kol. 1:10; 3:23.

11. Faandi mbei i musu buta wan maaka di i kë dou?

¹¹ Buta wan maaka di i kë dou. Ee i dë seiki u di maaka di i kë dou, nöö an o taanga da i sö fii dou ën. Boo taa i buta taa joo ta lesi di Bëibel hiniwan daka. Ma ee ja mbei wan skeima fii ta lesi ën, nöö ja o sa du di soni di i buta taa joo du. * Kandë dee gaanwomi u wan kemeente buta taa de o nango ta luku dee sëmbë u di kemeente möön fa de bi guwenti u nango ta luku de, ma baka wan pisiten de an bi du di soni dë möönsö. Ee de kë du di soni di de buta taa de o du, nöö de sa hakisi deseei dee soni aki: „U buta un baaa ku un sisa woo go luku ö? U buta na un ten woo nango ta luku de u?”

12. Andi a sa dë fanöudu u du so juu, nöö faandi mbei?

¹² Buta maaka di i sa dou. Na wan fuu abi ten, gudu ku kaakiti tjika fuu du hii dee soni dee u bi o kë du. Fëën mbei u musu sabi andi u sa du ku andi wa sa du. So juu, a sa dë fanöudu u tooka wan maaka di i si taa ja o sa dou (Peleik. 3:6). Ma a sa dë taa di i luku di maaka fii te i kaba, hën i tooka so soni, hën i ko si taa joo sa dou ën. Wë nöö boo taki u feifi soni di i sa du, di sa heepi i fii dou di maaka di i buta.

13. Unfa i sa feni di kaakiti di i abi fanöudu fii sa du wan soni di i buta taa joo du?

¹³ Begi fii sa feni taanga fii hopo du di soni. Gadu sa da i „taanga” fii sa du di soni di i buta taa joo du (Fil. 2:13). Fëën mbei begi Jehovah faa da i di santa jeje fëën di o da i di kaakiti di i abi fanöudu. Begi ën go dou aluwasi i si kuma an ta piki dee begi fii hesi tjika. Jesosi bi taki taa: „I musu ta begi Masa Gadu nöömö e, nöö a o da i di soni di i ta begi ën.”​—Luk. 11:9, 13.

14. Unfa di soni di sikifi a Nöngö 21:5 sa heepi i fii sa du dee soni dee i buta taa joo du?

¹⁴ Taki unfa joo du di soni. (Lesi Nöngö 21:5.) Fii sa kaba hiniwan soni di i bigi u du, nöö i musu taki unfa joo du ën fii sa kabëën. Te i taki kaa unfa joo du wan soni, nöö i musu du soni kumafa i taki. Sö a dë tu taa ee i buta taa joo du wan soni, nöö buta hii dee soni dee i musu du tuu a pampia. Te i musu du wan gaan soni, nöö luku fa i sa du ën pikipiki fii sa si fa i nango a fesi. Paulosu bi piki dee sëmbë u Kolenti u de „buta möni a wan së hiniwan fosu daka u di wiki” (1 Kol. 16:2, NW). Te i ta du soni pikipiki fii sa kabëën, nöö ja o ta si kuma ja sa du di soni di i buta taa joo du.

15. Unfa soni o waka te i sikifi a fesi unfa i kë du wan soni?

¹⁵ Ee i sikifi dee soni dee i kë du buta a pampia, nasö a woto soni, nöö an o taanga da i fii du de (1 Kol. 14:40). Di ölganisaasi u Jehovah da dee gaanwomi u kemeente di lai u de musu buta wan u dee gaanwomi faa ta sikifi dee soni  di de buta taa de o du. A musu ta sikifi ambë ku ambë musu du wan wooko, söseei na un ten de musu kaba di wooko. Soni ta waka möön bunu da dee gaanwomi dee ta du soni a di lö fasi aki (1 Kol. 9:26). Kandë i sa du di wan seei soni te a nama ku soni dee i buta taa joo du. Hiniwan daka i sa ta sikifi dee soni dee i buta taa joo du a di daka dë, nöö i musu sikifi di fosu soni di i kë du te kisi di lasiti soni di i musu du. Di soni aki sa heepi i fii sa ta kaba dee soni dee i buta taa joo du, söseei fii sa ta du möön soni.

16. Andi dë fanöudu fii sa kaba du dee soni dee i buta taa joo du, nöö unfa Loomë 12:11 ta lei taa sö di soni aki dë tuu?

¹⁶ Mbei möiti fii sa du di soni di i buta taa joo du. A sa taanga fii du dee soni dee i sikifi, söseei fii sa kaba de. (Lesi Loomë 12:11.) Paulosu bi piki Timoteo faa ta ’mbei möiti’ nöömö fa ko sa’ u lei sëmbë soni a wan möön bunu fasi. U sa du di soni Paulosu bi taki aluwasi andi u kë du da Jehovah.​—1 Tim. 4:13, 16.

17. Unfa Efeise 5:15, 16 sa heepi u te u buta taa woo du wan soni?

¹⁷ Wooko ku di ten fii a wan köni fasi. (Lesi Efeise 5:15, 16.) Buta wan ten ka joo du di soni di i kë du, nöö na puu di ten di i buta dë. Na dë piii ta wakiti di möön bunu ten fii du di soni, biga di ten dë an o dou möönsö (Peleik. 11:4). Köni be ja tei di ten fii du soni di an dë sö fanöudu, sö taa ja abi di kaakiti möön fii sa du dee soni dee dë möön fanöudu (Fil. 1:10). Ee a sa, nöö du dee soni dë a wan ten ka sëmbë an o puu i pakisei a dee soni dee i musu du. Piki wotowan taa joo du soni a di lö juu dë. Kandë i sa tapa di tëlëfön fii nasö i sa lesi dee bosikopu di de manda da i, a wan woto ten. *

18-19. Andi sa heepi i fii go dou ku wan soni di i buta taa joo du, aluwasi a ta taanga da i fii du ën?

¹⁸ Pakisei dee wini dee joo feni te i du di soni di i buta taa joo du. Di wini di joo feni te i du wan soni, dë kuma di wai di i ta wai te i dou a wan kamian. Ee i kë dou a di kamian ka i nango, nöö ja o toona aluwasi ee i musu go waka a wan woto pasi, u di di pasi tapa. Sö nöö a dë taa ee u buta pakisei a dee wini dee woo feni te u kaba du wan soni di u bi buta taa woo du, nöö wa o disa aluwasi a ta taanga da u, nasö aluwasi soni ta tapa u.​—Gal. 6:9.

¹⁹ A ta taanga u du wan soni di u buta taa woo du. Ma Jehovah sa da i di köni ku di kaakiti di i abi fanöudu, fii sa ta du di soni di i bi bigi u te i kabëën.