NA AWOOTEN, wan futuboi di de bi buta faa ta luku di wosu fëën masa, bi ta luku di wosu fëën masa nasö dee gudu fëën dëën. Di Hebelejën wöutu ku di Giiki wöutu di de puu ko „futuboi di de bi buta faa luku di wosu fëën masa”, bi kë taki „fesima”, nasö „sëmbë di ta hoi wan wosu”.

Josëfu bi dë di womi mii u wan womi de kai Jakopu. Di Josëfu bi dë saafu a Egepiti, nöö a bi ko dë di futuboi di bi ta luku di wosu u di masa fëën. Di masa u Josëfu bi „disa hii soni a Josëfu maun faa luku dëën” (Ken. 39:2-6). Bakaten di Josëfu seei bi ko dë wan tiima a Egepiti, hën a bi buta wan futuboi faa ta luku di wosu fëën tu.​—Ken. 44:4.

Di Jesosi bi dë a goonliba aki, dee sëmbë dee bi abi goon an bi ta libi zuntu ku di goon u de, ma de bi lo’ u libi a foto. Fëën mbei dee sëmbë dë bi ta buta futuboi u de luku fa dee wookoma bi ta du di wooko u de a di goon.

Ambë de bi ta tei buta futuboi? Di womi de kai Columella, bi dë wan womi u Loomë di bi ta sikifi buku a di ten u dee fesiten Keesitu sëmbë. Di womi dë bi taki taa wan sëmbë di de bi o tei ko dë „wan fesima nasö wan futuboi, bi musu dë wan sëmbë di bi sa’ soni u goon wooko”. A bi musu dë wan sëmbë di bi o ta „mbei dee wookoma du di wooko u de, ma an bi musu ta libi ku de a wan hogihati fasi”. Di womi aki bi taki tu taa di möön fanöudu soni, hën da wan futuboi an bi musu ta si kuma a sabi hii soni, ma a bi musu ta dë kabakaba u lei njunjun soni.

Di Wöutu u Gadu ta tei di wooko di de ta du a di kemeente, maaka ku wan futuboi ku di wooko di a ta du. Apösutu Petuisi bi da dee Keesitu sëmbë taanga u de ’ta wooko ku di köni di Gadu da de a wan fasi di ta heepi otowan. Biga Gadu bi da de peipei köni ku ën bunuhati’.​—1 Pet. 4:10.

Jesosi seei bi da wan woto u wan futuboi a Lukasi 16:1-8. Boiti di dë, Jesosi bi taki a wan tjabukama woto di nama ku di dë di a bi o dë könu ta tii, taa a bi o buta wan „köni saafu di dë u futoou” nasö „wan futuboi” a wooko. Di wooko di di futuboi dë bi o ta du, hën a da a bi o ta lei dee bakama u Keesitu soni u Bëibel, a dee lasiti daka u di goonliba aki (Mat. 24:45-47; Luk. 12:42). U dë ku tangi a hati seei taa u sa ta feni dee buku ku dee woto soni di di futuboi di dë u futoou ta seeka da u dee dinima u Gadu, a hii së u goonliba.