1-2. Te u luku Tjabukama 8:27-31, 35-38, nöö andi bi da di Etiopia womi taanga faa tei dopu?

I KË tei dopu fii sa ko dë wan bakama u Keesitu ö? Di lobi di so sëmbë lobi Jehovah, ku di tei di de ta tei dee soni dee a ta du da de u bigi, mbei de ko dë bakama u Keesitu. Buta pakisei a wan womi di bi ta wooko da di mujëë Könu u Etiopia.

² Di Etiopia womi aki bi du dee soni dee a bi lei a di Wöutu u Gadu wantewante. (Lesi Tjabukama 8:27-31, 35-38.) Unfa a du feni taanga u du di soni aki? A musu u dë sö taa a bi lobi di Wöutu u Gadu. A bi ta lesi wan pisi u di buku Jesaaja di a bi dë a wan hasiwagi nango nëën köndë. Di Filipi bi fan ku di womi aki, hën di womi bi ko tei di soni di Jesosi bi du dëën, u bigi seei. Ma faandi mbei di Etiopia womi aki bi go a Jelusalen? Wë u di di womi aki bi bigi ko lobi Jehovah kaa. Unfa u du sabi di soni aki? A bi go dini Jehovah a Jelusalen. A bi disa di keiki ka a bi nango, hën a ko nama ku dee sëmbë dee bi ta dini di tuutuu Gadu. Wë di lobi di di womi aki bi lobi Jehovah, hën wë i si mbei a tei dopu ko dë wan bakama u Keesitu.​—Mat. 28:19.

3. Andi sa tapa wan sëmbë faa tei dopu? (Luku di pisi „ Un pei sëmbë i dë tuutuu?”)

³ Te i lobi Jehovah, nöö di soni dë o mbei i feni taanga fii go tei dopu. Ma lobi sa mbei ja tei dopu tu. Na un fasi? Luku wantu woto. Kandë i lobi dee famii fii, nasö dee mati fii dee an ta dini Jehovah, nöö kandë i ta fëëë taa de o ko ta buuse i te i tei dopu (Mat. 10:37). Nasö kandë i lobi wanlö soni di Gadu ta buuse, nöö a ta taanga da i fii disa dee soni dë (Ps. 97:10). Nasö kandë de kiija i a wan wosudendu ka un bi lo’ u hoi dee  gaan piizii daka di ta nama ku poipoi keiki. Kandë i ta pakisei unfa dee ten dë bi suti da i seei. Fëën mbei a sa dë sö taa a taanga da i fii disa dee soni aki, di an ta kai ku Jehovah (1 Kol. 10:20, 21). Fëën mbei a dë fanöudu u hakisi iseei di soni aki: „Andi mi lobi möön gaanfa, nasö ambë mi lobi möön gaanfa?”

4. Andi da di möön fanöudu soni di o mbei joo kë tei dopu?

⁴ Sömëni bunu soni dë di i musu ta lobi, söseei di i musu ta tei u bigi. Kandë ufö i bigi lei soni ku dee Jehovah Kotoigi, i bi ko lobi di Bëibel kaa. Nöö kandë i bi ko lobi Jesosi tu. Ma nöunöu fa i ko sabi soni u dee Jehovah Kotoigi, nöö kandë i lobi di dë di i ta dë makandi ku de. Ma te i ko lobi dee bunu soni dë, nöö an kë taki nömönömö taa joo kë buta i libi a Jehovah maun, nöö i tei dopu. Di möön fanöudu soni di o mbei i kë tei dopu, hën da u di i lobi Jehovah Gadu seei. Te i lobi Jehovah möön hii woto soni, nöö ja o mbei na wan sëmbë, nasö na wan soni tapa i fii dini Jehovah. Di lobi di i lobi Jehovah o mbei i kë tei dopu, söseei a o heepi i fii hoi iseei nëën baka te i dopu kaa.

5. Un hakisi woo luku?

⁵ Jesosi bi taki taa u musu lobi Jehovah ku hii u hati, ku hii u libi, ku hii u fusutan, söseei ku hii u kaakiti (Maik. 12:30). Unfa i sa ko lobi Jehovah sö gaanfa, söseei unfa i sa ko ta lesipeki ën sö gaanfa? Wë te u ta pakisei unfa Jehovah lobi u tjika, nöö useei ta kë toona lobi ën tu (1 Joh. 4:19). Unfa joo ko ta fii, söseei andi joo ko ta du te i mbei möiti fii ko abi di apaiti lobi aki? *

6. Andi da wan fasi fa i sa ko sabi soni u Jehovah, te i luku Loomë 1:20?

⁶ Lei soni u Jehovah a dee soni dee a mbei. (Lesi Loomë 1:20; Akoalimbo 4:11) Buta pakisei a dee folo ku dee mbeti dee Jehovah mbei, nöö luku unfa dee soni dë ta lei unfa a köni tjika. Buta pakisei tu a di apaiti fasi fa Jehovah mbei di sinkii fuu (Ps. 139:14). Pakisei di kaakiti di Jehovah buta a di sonu. Nöö na di sonu wanwan dë a liba ala, milionmilion woto soni dë di Gadu mbei buta a liba ala (Jes. 40:26). * Ee i ta pakisei fundu u dee soni dee Jehovah mbei, nöö a o mbei i ko ta möön lesipeki Jehovah. Ma na di sabi di joo ko sabi unfa Jehovah köni tjika, ku unfa a abi kaakiti tjika wanwan o mbei i ku ën ko dë gaan mati. Ma ee i kë ko ta lobi Jehovah möön gaanfa, nöö i musu ko sabi möön soni fëën.

7. Fuun soni i musu ta dë seiki fëën, ee i kë ko ta möön lobi Jehovah?

⁷ I musu dë seiki taa Jehovah lobi i apaiti. A ta taanga da i fii biibi taa di Gadu di mbei liba ala ku goonliba aki, sabi i ö, söseei taa a ta booko hën hedi ku i ö? Wë ee a ta taanga da i fii biibi, nöö hoi a pakisei taa Jehovah „an dë longi poi ku hibiwan fuu” (Tjab. 17:26-28). A ta „öndösuku hiniwan sëmbë hati”, nöö a paamusi i di soni di Dafiti bi piki Salumon, ka a bi taki taa: „Ee i suku ën baka, nöö a o mbei i feni ën” (1 Klon. 28:9). Wë di soni mbei i ta lei soni u Bëibel nöunöu, hën da u di Jehovah „hai i ko” nëën (Jel. 31:3). Möön i ta ko fusutan hii dee soni di Jehovah du da i, möön joo ko ta lobi ën.

8. Unfa i sa lei taa i ta tei ën u bigi taa Jehovah lobi u?

⁸ Wan fasi fa u sa lei taa u lobi Jehovah, hën da te u ta begi ën. Joo ko ta möön lobi Gadu te i ta konda hii dee bookohedi fii dëën,  söseei te i ta dëën tangi u hii dee soni dee a ta du da i. I ku Jehovah o ko dë möön gaan mati te i ta si unfa a ta piki dee begi fii (Ps. 116:1). Joo ko dë seiki taa Jehovah ta fusutan i. Ma ee i kë fii ku Jehovah ko dë möön gaan mati, nöö i musu ko sabi andi a lobi ku andi an lobi, söseei i musu ko sabi faandi mbei a ta du so soni. I musu ko sabi unfa a kë fii ta libi tu. Di wan kodo fasi fa i sa ko sabi unfa a kë fuu libi, hën da te i ta lei soni a di Wöutu fëën, di Bëibel.

9. Unfa i sa lei taa i ta tei ën u bigi taa i abi di Bëibel?

⁹ Mbei möiti fii ko ta tei di Wöutu u Gadu, u bigi. Di Bëibel wanwan sa heepi i fii ko sabi unfa Jehovah dë tuutuu, ku andi a abi a pakisei da libisëmbë. I ta lei taa i ta tei ën u bigi taa i feni di Bëibel, te i ta lesi ën hiniwan daka, te i ta seeka iseei a fesi te wan sëmbë o ko u lei i soni u Bëibel, söseei te i ta du dee soni dee i ta lei (Ps. 119:97, 99; Joh. 17:17). I abi wan skeima fii ta lesi di Bëibel ö? I ta wooko ku di skeima u, sö taa i sa ta lesi di Bëibel hiniwan daka u?

10. Andi da wan u dee apaiti soni di dë a di Bëibel?

¹⁰ Wan u dee apaiti soni u di Bëibel, hën da a ta konda woto u Jesosi, nöö dee sëmbë di si Jesosi ku wojo, bi sikifi dee soni aki. Di Bëibel da di wan kodo buku di ta konda finifini andi Jesosi du da i, nöö i sa futoou ën. Te joo ta lei dee soni dee Jesosi bi ta taki ku dee soni dee a bi ta du, nöö an dë u taki taa joo ta kë dë mati ku ën tu.

11. Andi o heepi i fii sa ko lobi Jehovah?

¹¹ I musu ko lobi Jesosi, nöö i ku Jehovah o ko dë möön gaan mati. Faandi mbei u sa taki sö? Wë u di Jesosi abi dee fasi di hën tata abi (Joh. 14:9). Fëën mbei möön i ta lei soni u Jesosi, möön joo ko ta fusutan soni u Jehovah, söseei möön joo ta tei dee soni dee a ta du da i u bigi. Pakisei unfa Jesosi bi ta lei taa a abi tjalihati u dee sëmbë dee wotowan bi ta si kuma sösö sëmbë. Pakisei unfa a bi ta fii da dee pooti sëmbë, dee sëmbë dee suwaki, ku dee sëmbë dee an bi abi saanfa-u-du u deseei. Pakisei dee wini dee i ta feni a dee lai dee Jesosi da i, söseei pakisei unfa di libi fii bi ko ta  waka möön bunu di i bi ko ta piki hën buka.​—Mat. 5:1-11; 7:24-27.

12. Te i ta lei soni u Jesosi, nöö andi joo kë du?

¹² Joo ko ta möön lobi Jehovah te i ta pakisei fundu u di lusupaima di Jehovah seti, sö taa i sa kisi paadon u dee zöndu fii (Mat. 20:28). Te i ko fusutan taa Jesosi bi dë kabakaba u dëdë da i, nöö di soni dë sa mbei i tjali u dee zöndu dee i bi du, söseei a sa mbei i hakisi Jehovah faa da i paadon (Tjab. 3:19, 20; 1 Joh. 1:9). Möön i ko ta lobi Jehovah ku Jesosi, möön joo ta kë dë makandi ku sëmbë di lobi de.

13. Andi Jehovah da i?

¹³ Lobi dee sëmbë dee lobi Jehovah. Kandë dee famii fii ku dee mati dee i bi abi, an o fusutan faandi mbei i kë buta i libi a Jehovah maun. Kandë de o ta du ku i. Ma Jehovah o heepi i, u di a o mbei dee baaa ku dee sisa u di kemeente ko dë kuma famii fii. Ee i ta dë makandi ku dee famii fii di Jehovah da i, nöö joo feni di lobi ku di heepi di i abi fanöudu (Maik. 10:29, 30; Heb. 10:24, 25). Kandë baka wan pisiten dee famii fii sa ko ta dini Jehovah, u di de o bigi ko ta hoi dee wëti fëën.​—1 Pet. 2:12.

14. Andi i ko fusutan u dee wëti u Jehovah te i luku 1 Johanisi 5:3?

¹⁴ Mbei möiti fii ko ta lobi dee wëti u Jehovah. Ufö i ko sabi soni u Jehovah, nöö kandë i bi abi fii seei wëti ta hoi, ma nöunöu i ko ta si taa dee wëti u Jehovah möön bunu. (Ps. 1:1-3; lesi 1 Johanisi 5:3.) Pakisei dee soni di di Bëibel ta taki da womi di tööu, da mujëë di abi manu, nasö da miii (Ef. 5:22–6:4). I bi si taa dee sëmbë fii wosudendu bi ko ta dë waiwai möön gaanfa te un bi wooko ku dee soni aki ö? I ko dë wan möön bunu sëmbë di i wooko ku di soni di di Bëibel ta taki u di köni di u musu ta köni ku sëmbë di woo tei ko dë mati fuu ö? I ko ta möön dë waiwai ö? (Nöng. 13:20; 1 Kol. 15:33) A musu u dë sö taa i piki aai a dee hakisi aki.

15. Andi i sa du ee a ta taanga da i fii ko sabi unfa i musu libi ku dee mama wëti u Bëibel?

¹⁵ Kandë so juu a o ta taanga da i fii sabi unfa i musu libi ku dee mama wëti dee i ta lei a Bëibel. Fëën mbei Jehovah ta wooko ku di ölganisaasi fëën u da i buku di ta heepi i fii fusutan dee soni dee sikifi a di Bëibel möön bunu. Dee buku aki, o heepi i fii ko sabi andi bunu ku andi an bunu (Heb. 5:13, 14). Te i lesi dee buku fuu, söseei te i öndösuku soni a de finifini, nöö joo ko si unfa dee soni dee dë a dee buku aki, bunu da u. Söseei joo si taa de ta taki soni kumafa soni dë tuutuu. Te i ko si dee soni aki, nöö joo kë ko dë a di ölganisaasi u Jehovah.

16. Unfa Jehovah seeka dee sëmbë fëën?

¹⁶ Mbei möiti fii ko lobi di ölganisaasi u Jehovah, söseei fii wooko makandi ku ën. Jehovah paati dee sëmbë fëën a dee peipei kemeente. Jesosi, di Womi Mii fëën, ta tei fesi a hii dee kemeente aki (Ef. 1:22; 5:23). Jesosi buta wantu salufu baaa u tei fesi a di wooko di a kë taa musu du a di ten aki. Jesosi bi taki taa dee baaa aki da di kulupu de kai „di köni saafu di dë u futoou”. Dee baaa aki abi di faantiwöutu u heepi i fii ku Gadu sa dë gaan mati go dou (Mat. 24:45-47). Wan u dee fasi fa di saafu di dë u futoou ta luku i, hën da te de ta sölugu taa gaanwomi dë di sa heepi i, söseei di sa tjubi i u hogi an miti i (Jes. 32:1, 2; Heb. 13:17; 1 Pet. 5:2, 3). Dee gaanwomi dë kabakaba u du hii soni di de sa du da i. De ta dë kabakaba u da i kötöhati, söseei de dë kabakaba u heepi i fii ku Jehovah ko dë möön gaan mati. Ma wan u dee möön gaan soni di de sa heepi i fii du, hën da de sa heepi i fii toona heepi wotowan u de ko sabi soni u Jehovah.​—Ef. 4:11-13.

17. Faandi mbei u ta konda soni u Jehovah da wotowan, te u luku di soni di sikifi a Loomë 10:10, 13, 14?

 ¹⁷ Heepi wotowan u de ko lobi Jehovah. Jesosi bi piki dee bakama fëën taa de musu lei woto sëmbë soni u Jehovah (Mat. 28:19, 20). A sa pasa taa u piki Jesosi buka u di u sabi taa u musu u du ën. Ma te i ko lobi Jehovah möön gaanfa, nöö joo fii kumafa apösutu Petuisi ku apösutu Johanisi bi ta fii di de bi taki taa: „Wë nöö wa sa tjubi dee soni u wojo bi si ku dee u jesi bi jei. U musu konda de nöömö” (Tjab. 4:20). Woo ta dë waiwai seei ee u heepi wan sëmbë faa ko lobi Jehovah. U sa fusutan unfa Filipi bi wai tjika di a bi heepi di womi u Etiopia faa a ko sabi soni u di Wöutu u Gadu, söseei faa tei dopu! Te i ta du soni kumafa Filipi bi ta du soni, söseei te i ta piki Jesosi buka u di joo ta du di peleikiwooko, nöö i ta lei taa i kë toon wan Jehovah Kotoigi (Lesi Loomë 10:10, 13, 14). Te a ko dë sö, nöö joo kë taki di soni di di womi u Etiopia bi taki. A bi taki: „Na u mi dopu wante nö?”​—Tjab. 8:36.

18. Andi woo luku a di woto di ta ko?

¹⁸ Di tei di joo tei dopu da di möön gaan soni di joo du a di libi fii. U di a dë sö wan gaan soni, mbei i musu pakisei luku andi ku andi o dë fanöudu fii ta du. Andi i musu ko sabi u di tei di sëmbë ta tei dopu? Andi i musu du ufö i tei dopu, söseei andi i musu ta du bakaten? Woo luku dee hakisi aki a di woto di ta ko.