Jack ku Marie-Line bi bigi du di hii-ten diniwooko a di jaa 1988. U di de bi ta dë kabakaba u du hiniwan wooko da Jehovah, mbei de bi du peipei wooko a di köndë de kai Guadeloupe ku Frans-Guyana. Nöunöu di bëikantoo u Gaan Faansi köndë ta luku di wooko a dee tu köndë aki. Boo hakisi Baaa Jack ku Sisa Marie-Line wantu soni.

Faandi mbei un bigi du di hii-ten diniwooko?

Marie-Line: Di mi bi dë miii jeti, mi ku mi mama bi ta peleiki makandi hii daka a Guadeloupe. Mi mama bi dë wan Kotoigi di bi ta dini Jehovah ku hii hën hati. Mi lo’ sëmbë. Fëën mbei di mi kaba siköö a di jaa 1985, mi bigi du di pioniliwooko.

Jack: Di mi bi ta göö ta ko bigi, mi bi lo’ u dë makandi ku baaa ku sisa di bi ta du di hii-ten diniwooko, söseei dee bi lobi di peleikiwooko. Mi bi ta du di heepi pioniliwooko te mi bi abi fakansi. So juu, a sata ku sonde u bi ta tei wan besi, nöö u bi nango peleiki makandi ku dee baaa ku dee sisa dee bi ta du di pioniliwooko. U bi ta peleiki hii daka ku de, nöö bakaten u bi nango a wan kamian go sun. Dee ten dë bi suti seei!

Di mi ku Marie-Line tööu a di jaa 1988, hën mi hakisi miseei taa: ’Faandi mbei wa ta du di peleikiwooko möön gaanfa, biga soni an ta tapa u fuu du di soni dë?’ Bakaten mi bi bigi du di pioniliwooko makandi ku Marie-Line. Wan jaa baka di dë, baka di u bi go a di pionili-siköö, hën u bigi du di apaiti-pioniliwooko. U bi ta du sömëni wooko di u bi lobi seei a Guadeloupe, ma bakaten de bi hakisi u fuu foloisi go libi a Frans-Guyana.

A dee jaa dee pasa un bi du sömëni wooko a di dini u Jehovah. Andi bi heepi unu fuun sa ta du dee wooko aki?

Marie-Line: Dee baaa u di Bëtëli u Frans-Guyana bi sabi taa di tëkisi di u möön lobi da Jesaaja 6:8. Fëën mbei te de bi ta bëli u, nöö de bi ta hakisi u: „Un sabi di tëkisi di un bi möön lobi jeti ö?” Te de bi ta hakisi u di soni aki, nöö u bi ta fusutan kaa taa de bi o da u wan woto faantiwöutu. Hii juu u bi ta taki taa: „Luku u aki! Manda u!”

Wa bi ta luku ee di njunjun faantiwöutu di u feni bunu möön dee wotowan dee u bi abi, u di a  bi sa pasa taa wa tei di njunjun faantiwöutu u bigi möön. U bi ta mbei möiti tu fuu ko sabi dee baaa ku dee sisa u di kamian ka u bi foloisi go.

Jack: So baaa ku sisa dee bi lobi u gaanfa, an bi ta kë fuu foloisi go a woto kamian, u di de bi ta kë fuu dë ku de. Ma di u bi foloisi kumutu a Guadeloupe, hën wan baaa toona mëni u di soni di Jesosi bi taki a Mateosi 13:38. A bi taki taa: „Di goon doti, hën da hii di goonliba.” Fëën mbei te u bi musu du wan woto wooko, nöö u bi ta toona mëni baka taa di seei wooko u ta du jeti, hii fa wa dë a di wan seei kamian möön. Di möön fanöudu soni, da dee sëmbë dee u musu ta peleiki da!

Te u ta dou a wan njunjun kamian, nöö u ta si unfa dee sëmbë u di kamian ta dë tifeedi ku di libi. Fëën mbei u ta mbei möiti fuu sa ta libi kuma dee sëmbë dë tu. Kandë dee soni di dee sëmbë u di kamian bi ta njan ta bebe bi dë njunjun soni da u, ma tökuseei u bi ta du kumafa de bi ta du. Ma an dë u taki taa u bi ta luku ee de bi bunu da di gösöntu fuu tu. U ta mbei möiti u konda soni u dee bunu pisi u hiniwan wooko di u ta du, da wotowan.

Marie-Line: U ta lei sömëni soni a dee baaa ku dee sisa dee ta libi a di kamian ka u go. Mi ta mëni wan soni di bi pasa kölö sö baka di u bi dou a Frans-Guyana. Wan daka, tjuba bi ta kai seei. U bi mëni taa u bi musu wakiti u te di tjuba pasa nöö u go du di peleikiwooko. Ma wan sisa ko hakisi mi taa: „I kaba fuu go u?” Wë a bi bigi da mi di a hakisi mi di soni aki. Fëën mbei mi toona hakisi ën taa: „Unfa woo go?” Hën a piki mi taa: „Tei di paazoo fii, nöö woo go ku baisigi.” Di daki dë mi ko sa’ u lëi baisigi ku paazoo jabijabi. Ee ma bi lei di soni aki, nöö ma bi o sa du di peleikiwooko te tjuba ta kai!

Un bi musu foloisi söwan 15 pasi. Un köni un abi da dee sëmbë dee musu ta foloisi tu?

Marie-Line: A ta taanga so juu te u musu foloisi. Ma a dë fanöudu fii abi wan wosu ka i sa ta fii bunu nëën dendu, te i kumutu a di peleikiwooko.

Jack: Te u foloisi go a wan woto wosu, nöö mi ta feifi dendu fëën. Ma te dee baaa u di bëikantoo sabi taa wa o fika longi poi a wan kamian, nöö de ta piki mi taa: „Jack o, an dë fii feifi di wosu aki e!”

Marie-Line bi ko sa’ u seeka lai te u bi musu foloisi go a wan woto kamian! A ta buta hii soni a dosu, nöö a ta sikifi a dee dosu andi dë a de dendu. A ta sikifi „wasi wosu”, „duumi kamba”, nasö „boi wosu”. Te u ta dou a di njunjun wosu fuu, nöö  u ta sabi naasë u musu buta dee dosu. A ta sikifi a pampia tu andi ku andi dë a dee dosu. A sö wan fasi u sa sabi andi dë a de dendu.

Marie-Line: U di u bi lei u seeka soni a wan bunu fasi, mbei u sa bigi wantewante ku di diniwooko fuu.

Unfa un ta seeka soni sö taa un sa ta „konda di bunu buka”nöömö?​—2 Tim. 4:5.

Marie-Line: A munde, u ta böö dendu ta seeka useei da dee komakandi. Dee woto daka u di wiki u nango a di peleikiwooko.

Jack: Hiniwan liba u musu ta wooko dou dee juu di de buta da u fuu dou, ma tökuseei na di dou di u musu dou dee juu da di möön gaan soni da u. Di du di u musu du di peleikiwooko da di möön gaan soni da u. Te u kumutu a wosu, nöö u ta mbei möiti fuu fan ku hii sëmbë di u ta miti, u te u dou wosu baka.

Marie-Line: Te u nango a wan kamian u böö dendu, nöö mi ta tja wantu talakitaati. So sëmbë ta ko a u u hakisi u soni u lesi, hii fa wa piki de taa u da Jehovah Kotoigi. Fëën mbei u ta köni ku dee soni dee u ta bisi ku di fasi fa u ta tja useei. Sëmbë ta buta pakisei a dee soni dë.

Jack: U ta peleiki da sëmbë tu, ku di du di u ta du soni da de. Te sëmbë ta tuwë pampia a goon, nöö mi ta pii de. Söseei te dee pau ta tuwë uwii a di djai, nöö mi ta haliki de puu. Dee sëmbë dee ta libi zuntu ku u, ta si te mi ta du dee soni aki, nöö de ta ko hakisi mi taa: „I abi wan Bëibel da mi ö?”

Un bi peleiki a sömëni longi kamian. Undi u dee kamian aki bi dë wan apaiti wan da unu?

Jack: A ta taanga fii dou a so kamian u Frans-Guyana. Sömëni pasi u bi musu lëi söwan 600 km a wan wiki dendu, nöö dee pasi an bi bunu. Wa sa fëëkëtë di ten di u bi go a St. Élie, di dë a di matu kamian de kai Amazon. U bi lëi sömëni juu longi ku wan hei wagi, hën bakaten u tei wan boto. Gaansë u dee sëmbë dee bi ta libi ala bi ta wooko goutu. So u de bi da u piki pisi goutu u lei taa de ta tei dee buku dee u bi da de, u bigi! A sapate u bi lei de wan fëlön u di ölganisaasi. Sömëni sëmbë u di kamian dë bi ko luku di fëlön.

Marie-Line: A wan ten di pasi aki, de bi hakisi Jack faa hoi di taki a di Ndeti Njanjan u Masa a wan köndë de kai Camopi. Fuu bi sa dou a di köndë dë, u bi musu waka fö juu longi ku boto a di Oyapock lio. U bi lobi ën tee.

Jack: Te di lio dëë, nöö dee dan ta hogi. Dee botoma bi musu ta köni ku dee dan dë. Ma dee dan ta dë gaan waiti soni u si. U bi lobi di waka dë seei. Hii fa 6 Kotoigi nöö bi dë a di kamian dë, tökuseei söwan 50 sëmbë bi ko mëni di dëdë u Jesosi ku u. A dee 50 sëmbë dë dendu i bi abi wanlö Ingi tu!

Marie-Line: Dee njönkuwan sa ta feni dee lö bunu aki tu, ee de du möön soni da Jehovah. I musu ta futoou Jehovah, nöö di biibi fii o ko möön taanga. Hii juu u ta si unfa Jehovah ta heepi u.

Un bi lei woto töngö u? A ta taanga da unu fuun lei wan woto töngö u?

Jack: Wë aai. Ma mi bi ko sa’ u fan dee töngö aki sö taa mi bi sa ta du di peleikiwooko, söseei u mi bi sa ta du soni a di kemeente. Mi bi musu hoi di Hei Wakitimawosu-lei a Saanatöngö *. Ma ma bi pena lesi Bëibel a zali jeti a Saanatöngö! Bakaten mi bi hakisi wan baaa ee a bi sa fusutan andi mi bi ta taki. A bi taki taa: „Wë, na hii soni u bi sa fusutan, ma a bi bunu seei.” Dee mii bi ta heepi mi gaanfa. Te mi bi mbei wan föutu, nöö dee mii bi ta piki mi, ma dee gaan sëmbë an bi ta piki mi soni. Mi bi lei sömëni soni a dee njönkuwan.

Marie-Line: A wan kamian ka u bi ta peleiki, mi bi musu lei peipei sëmbë, soni u Bëibel. Mi bi musu lei sëmbë soni u Bëibel a Faansitöngö, wotowan mi bi musu lei a Balazilitöngö, ku wotowan jeti a Saanatöngö. Wan sisa bi piki mi taa a bi o möön bunu u mi bigi fosu ku di sëmbë di ta fan di töngö di mi möön sa’ u fan. An bi tei longi seei ufö mi bi ko fusutan faandi mbei a bi piki mi di soni dë.

Wan daka, mi bi musu lei wan sëmbë soni u Bëibel a Saanatöngö, nöö di woto sëmbë di mi bi  musu lei soni u Bëibel, ta fan Balazilitöngö. Di mi bi bigi lei di u tu sëmbë soni u Bëibel, hën di sisa di mi ku ën bi dë, bi piki mi taa: „Marie-Line o, a djei kuma di mujëë an ta fusutan andi i ta taki e!” Di mi kisi miseei, hën mi ko fusutan taa mi bi ta fan Saanatöngö ku di mujëë ka u mi fan Balazilitöngö!

Dee sëmbë di unu ku de bi wooko makandi lobi unu seei. Unfa a waka taa un ku de bi ko dë gaan mati sö?

Jack: Wë Nöngö 11:25 ta taki taa: „Soni o ta waka bunu da wan sëmbë di lo’ u da wotowan soni.” Hii juu u ta abi ten da wotowan, söseei u ta dë kabakaba u du soni da de. Te u musu seeka di Könuköndë zali, nöö so baaa lo’ u piki mi taa: „Be dee peleikima du ën.” Ma mi ta piki de taa: „Mi da wan peleikima tu e. Solanga wooko dë u du, nöö mi kë heepi tu.” Hii fa so juu u ta kë abi ten da useei, tökuseei wa ta kë taa di soni dë musu tapa u fu wa du bunu da wotowan.

Marie-Line: U ta mbei möiti u lei dee baaa ku dee sisa fuu taa u ta booko u hedi ku de. A sö wan fasi u ta ko sabi ee de kë u wan sëmbë luku dee mii u de da de, nasö ee de kë u wan sëmbë go tei dee mii u de te siköö kumutu. Te u sabi sö, nöö u ta seeka soni sö taa u sa ta heepi de. Te u ta dë kabakaba u heepi wotowan, nöö u ku de ta ko dë gaan mati.

Un gaan bunu un bi feni u di un bi nango wooko ka de bi abi möön hia peleikima fanöudu?

Jack: U di u ta du di hii-ten diniwooko, mbei u ko feni sömëni gaan bunu. U bi ta feni pasi u si dee waitiwaiti soni di Jehovah mbei. Hii fa so juu soni bi ta taanga da u, tökuseei u ta dë bööböö, u di u sabi taa dee sëmbë u Jehovah dë a hii së, nöö u sabi taa de o ta heepi u.

Di mi bi njönku, de bi buta mi a dunguwosu a Frans-Guyana, u di ma bi kë feti da di köndë. Nöiti mi bi mëni taa mi bi o toona go a di köndë dë kuma wan sëndëlengi, di ta peleiki da dee sëmbë dee dë a dunguwosu. Jehovah ta mbei u feni sömëni gaan bunu tuutuu!

Marie-Line: Di soni di ta heepi mi u möön dë waiwai, hën da te mi ta du soni da wotowan. U ta wai seei u dini Jehovah. A ta heepi mi ku mi manu fuu ko dë möön gaan mati ku useei. So juu Jack ta hakisi mi ee u sa kai wan baaa ku hën mujëë ko a u pisi u de njan wan soni makandi ku u, u di de abi taanga fanöudu. Te a ta hakisi mi sö, nöö mi lo’ u piki ën taa: „Di seei soni mi bi kë hakisi i!” A lo’ u pasa taa u ta pakisei di seei soni.

Jack: Na tumisi longi pasa, hën data piki mi taa mi abi di siki de kai kankël. Mi bi lo’ u piki Marie-Line wan soni di an bi ta kë jei. Mi bi ta piki ën taa: „Mi lobi, ee a ko pasa taa mi dëdë amanjan, nöö a o dë taa ma libi longi. Ma tökuseei mi ta wai taa mi bi ta du di möön fanöudu soni. Hën da di du di mi bi du hii soni di mi bi sa du, a di dini di mi ta dini Jehovah.”​—Ken. 25:8.

Marie-Line: Jehovah bi da u faantiwöutu di wa bi pena mëni taa woo feni wan daka. Jehovah mbei u feni sömëni gaan bunu. U ta futoou Gadu gaanfa. Fëën mbei aluwasi ka di ölganisaasi fëën ta hakisi u fuu go, woo go!