1. Te u luku Mateosi 24:9, nöö faandi mbei an musu bigi da u te u si taa dee sëmbë u di goonliba aki ta buuse u?

 JEHOVAH mbei u a sö wan fasi taa u sa lobi wotowan, söseei a mbei u a sö wan fasi taa u sa ta fii bunu te wotowan ta lei taa de lobi u. Fëën mbei wa lobi ën te wan sëmbë ta buuse u. Kandë u ta fëëë seei tu. Wan sisa de kai Georgina, di ta libi a Europa bi taki taa: „Di mi bi abi 14 jaa, mi mama an bi lobi mi möön, u di mi bi bigi ta dini Jehovah. Mi bi ta tjali seei, söseei mi bi ta fii kuma mi dë mi wanwan. Mi bi bigi ta pakisei taa kandë mi bi ta du wan hogi soni.” b Wan baaa de kai Danylo bi taki taa: „Di dee sodati bi naki mi, di de bi kosi mi, söseei di de bi taki taa de o du wan hogi ku mi, u di mi dë wan Jehovah Kotoigi, nöö mi bi ta fëëë seei. Söseei mi bi fii sen.” A ta hati u te sëmbë ta libi hogi ku u, ma an ta foondo u. Jesosi bi taki a fesi taa sëmbë o buuse u.​—Lesi Mateosi 24:9.

2-3. Faandi mbei sëmbë an lobi dee bakama u Jesosi?

² Dee sëmbë u di goonliba aki, an lobi dee bakama u Jesosi. Faandi mbei de an lobi de? Wë u di leti kuma Jesosi, wa „dë ku de a wan së” (Joh. 15:17-19). U ta lesipeki dee tiima, ma wa ta dini de, söseei wa ta dini woto soni u di köndë tu. Jehovah wanwan tö u ta dini. U ta biibi taa Gadu abi leti u tii libisëmbë, ma Saatan ku dee bakama fëën ta hopo fia ku Gadu (Ken. 3:1-5, 15). Te u ta peleiki, u ta piki sëmbë taa di Könuköndë u Gadu nöö sa puu u a fuka, söseei taa dee tiima u di Könuköndë dë o kii hii sëmbë di an kë saka deseei nëën basu (Dan. 2:44;  Ako. 19:19-21). Di buka di u ta paaja aki, da bunu buka da dee bunuhati sëmbë, ma an dë wan bunu buka da dee hogihati sëmbë.​—Ps. 37:10, 11.

³ Sëmbë ta buuse u tu u di u ta hoi dee wëti u Gadu. Dee wëti u Gadu tooka ku dee wëti u di goonliba aki. Gadu bi kii dee sëmbë u di foto Sodom ku di foto Gomola u di de bi ta libi fanafiti a di së u manu ku mujëë soni. Ma sömëni sëmbë a di ten aki an ta si kuma dee lö libi dë hogi (Jud. 7). U di u ta hoi dee wëti u Bëibel dee ta taki u dee lö libi dë, mbei sömëni sëmbë ta mbei u fa, söseei de ta taki taa wa lobi hii sëmbë.​—1 Pet. 4:3, 4.

4. Un pei fasi ta heepi u fuu hoi dou te sëmbë ta du ku u?

⁴ Andi sa heepi u fuu hoi dou, aluwasi sëmbë ta du ku u u di de buuse u? U musu biibi taa Jehovah o heepi u. Di biibi fuu sa dë kuma wan pei felu soni goboo sö, di musu ’tapa dee faja piiwa u di felantima’ (Ef. 6:16). Ma na biibi nöö u musu abi. U musu abi lobi tu. Faandi mbei u taki sö? U di „ee i lobi wan sëmbë, hati fii an o ta boonu ku ën hesihesi.” Lobi ta mbei u hoi dou, hii fa sëmbë ta du soni ku u di ta hati u (1 Kol. 13:4-7, 13). Wë boo luku unfa di lobi di u abi da Jehovah, di lobi di u abi da dee baaa ku dee sisa fuu, söseei di lobi di u abi da dee felantima fuu sa heepi u fuu hoi dou.

5. Andi Jesosi bi sa du u di a bi lobi hën Tata?

⁵ Di ndeti ufö dee felantima u Jesosi bi kii ën, hën Jesosi bi piki dee bakama fëën taa: „Mi lobi mi Tata, fëën mbei baa ma ta biinga u mi puu miseei, ma mi ta hoi miseei tololoo a dee soni dee mi Tata buta da mi fu mi du” (Joh. 14:31). U di Jesosi bi lobi Jehovah mbei a bi sa hoi dou hii fa gaan fuka bi ta miti ën. Di lobi di u abi da Jehovah sa heepi u fuu hoi dou tu te gaan fuka miti u.

6. Unfa dee dinima u Jehovah ta si di hoi di de musu hoi dou te dee sëmbë u di goonliba aki ta du ku de, te u luku Loomë 5:3-5?

⁶ Di lobi di dee dinima u Jehovah lobi ën, ta heepi de u de hoi dou te sëmbë ta du ku de. Di dee sëmbë u di gaan kuutuwosu u dee Dju bi piki dee apösutu taa de an musu peleiki möön, hën di lobi di dee apösutu bi abi da Jehovah bi mbei de piki Gadu buka möön gaanfa möön libisëmbë buka (Tjab. 5:29; 1 Joh. 5:3). Di lobi di dee baaa ku dee sisa a di ten aki abi da Jehovah, ta heepi de u de hoi dou hii fa lanti ta du ku de seei. Te dee sëmbë u di goonliba aki ta du ku u, wa ta lasi hati, ma u ta wai.​—Tjab. 5:41; lesi Loomë 5:3-5.

7. Andi u musu du te dee famii fuu ta du ku u?

⁷ A sa ta möön taanga da u fuu hoi dou, te dee sëmbë dee ta du ku u da famii fuu. Te de ko si taa u kë sabi soni u Jehovah, nöö de sa ta si kuma sëmbë ko ganjan u. Kandë so u de o si kuma u lasi u fusutan. (Luku Maikusi 3:21.) Kandë de o du ku u seei. Ma di soni aki an musu foondo u. Jesosi bi taki taa: „Dee möön gaan felanti di wan sëmbë o abi, de o dë dee bëë fëën seei” (Mat. 10:36). Aluwasi fa dee famii fuu ta si u, tökuseei wa ta buuse de. Möön woo ko lobi Jehovah, möönmöön woo ko lobi woto sëmbë (Mat. 22:38, 39). Nöiti woo tapa u hoi dee wëti u Bëibel, u di u kë taa libisëmbë musu wai ku u.

8-9. Andi bi heepi wan sisa faa hoi dou, hii fa sëmbë bi ta du ku ën seei?

⁸ Georgina, di u bi taki soni fëën kaa, bi sa hoi dou hii fa hën mama bi ta du ku ën seei. Georgina bi taki taa: „Mi ku mi mama tuu bi bigi ta lei soni u Bëibel ku dee Kotoigi. Ma sikisi liba baka di u bi bigi lei soni u Bëibel, hën mi bi kë go a dee komakandi. Di mi mama si di soni dë, hën a bigi ta du ku mi. Bakaten mi bi  ko fusutan taa a bi ta hulu wanlö sëmbë dee kumutu a di biibi, nöö a bi bigi ta pakisei kuma de. A bi ta kosi mi, a bi ta hai mi hedi uwii, a bi ta peeta mi a tutu, söseei a bi ta tuwë dee buku u mi. Di mi tapa 15 jaa, hën mi dopu. U di mi mama bi kë tapa mi u ma dini Jehovah möön, mbei a bi buta mi a wan kamian ka de ta hoi miii di ta du hogi soni. Woto mujëë mii bi dë a di kamian di bi ta tei drugs, söseei di bi ta du peipei hogi. A ta möön taanga fii hoi dou te di sëmbë di ta du ku i, da wan sëmbë di bi musu lei taa a lobi i, söseei di bi musu lei taa a ta booko hën hedi ku i.”

⁹ Andi bi heepi Georgina faa hoi dou? A bi taki taa: „Di daka di mi mama bi bigi ta du ku mi, bi dë di daka di mi bi kaba lesi hii di Bëibel. Mi bi dë seiki taa mi bi feni di tuutuu lei, söseei mi bi ta fii kuma mi ku Jehovah bi ko dë möön gaan mati. Hii juu mi bi ta begi ën, nöö a bi ta haika dee begi u mi. Di mi bi ta libi a di kamian ka mi mama bi buta mi, hën wan sisa kai mi ko nëën pisi, hën u lei soni u Bëibel. A di pisiten dë, te mi bi nango a di Könuköndë zali, nöö dee baaa ku dee sisa bi ta da mi taanga. De bi tei mi kuma sëmbë u de. Mi bi ko si gbelingbelin taa Jehovah taanga möön dee sëmbë dee ta du ku u, antoobi ambë da di sëmbë di ta du ku u.”

10. Andi u sa dë seiki taa Jehovah Gadu o ta du da u?

¹⁰ Apösutu Paulosu bi taki taa „na wan kodo soni seei a hii di mundu di Gadu mbei aki abi di kaakiti u sa paati u ku di lobi di Gadu lobi u aki,  . .  fu di u nama ku Jesosi Keesitu di Masa fuu” (Lom. 8:38, 39). Hii fa fuka sa miti u u wan pisiten, tökuseei Jehovah o dë leti a u bandja u da kötöhati, söseei u da u taanga. Boiti di dë, kumafa u bi si a di woto u Georgina, Jehovah sa mbei dee baaa ku dee sisa u di kemeente heepi u.

11. Unfa di lobi di Jesosi bi taki fëën a Johanisi 15:12, 13, bi o sa heepi dee bakama fëën? Konda wan woto.

¹¹ Di ndeti ufö Jesosi dëdë, a bi toona mëni dee bakama fëën taa de musu ta lobi de na de. (Lesi Johanisi 15:12, 13.) Jesosi bi sabi taa te dee bakama fëën bi o lei taa de lobi de na de, nöö de bi o sa libi fiifii ku deseei, söseei de bi o sa hoi dou, hii fa dee sëmbë u di goonliba aki bi o buuse de. Luku di woto u dee baaa ku dee sisa u di kemeente u Tesalonika. Sensi di de hopo di kemeente dë, hën sëmbë ta du ku dee baaa ku dee sisa. Ma tökuseei de bi hoi dou, söseei de bi ta lobi de na de go dou  (1 Tes. 1:3, 6, 7). Paulosu bi da de taanga u de ta lei möön gaanfa taa de lobi de na de (1 Tes. 4:9, 10). U di de bi lobi deseei, mbei de bi o sa da dee sëmbë dee ta fii bookosaka taanga (1 Tes. 5:14). Dee baaa ku dee sisa aki, bi du andi Paulosu bi piki de, u di a di u tu biifi di a bi sikifi wan jaa baka di dë, hën a bi sa piki de taa: „Di lobi di un ta lobi unu na unu ta göö möönmöön” (2 Tes. 1:3-5). Di lobi di de bi abi bi heepi de u de hoi dou hii fa soni bi ta taanga da de.

12. Unfa wanlö baaa ku sisa bi lei taa de lobi de na de, a wan pisiten ka feti bi dë a de köndë?

¹² Pakisei di woto u Baaa Danylo, di u bi taki soni fëën kaa, ku hën mujëë. Hii fa wan gaan feti bi bigi a di foto ka de bi ta libi, tökuseei di baaa aki ku hën mujëë bi nango a dee komakandi. De bi ta du hii soni di de bi sa a peleikiwooko, söseei de bi ta paati soni u njan da dee baaa ku dee sisa. Wan daka hën wanlö sodati bi go a Baaa Danylo pisi. Dee sodati aki bi dë ku goni. Baaa Danylo bi taki taa: „De bi ta duwengi mi u mi taki taa ma dë wan Jehovah Kotoigi möön. Di ma bi kë du di soni aki, hën de fon mi, söseei de bi ta du kuma de bi o suti mi. Nöö ufö de go, de bi taki taa de o toona ko u kisi mi mujëë. Ma dee baaa ku dee sisa tja u go fuu tei wan talanwagi, sö taa u bi sa fusi go a wan woto foto. Ma o fëëkëtë di fasi fa de bi lei taa de lobi u. Di u bi dou a di woto foto, hën dee baaa ku dee sisa fu ala bi da u soni u njan, de bi heepi mi u mi feni wan wooko, söseei de bi heepi u feni wan wosu! Te u kaba fëën, a bi pasa taa u bi sa hoi baaa ku sisa a u pisi, u di so u de bi musu fusi kumutu a di foto ka de bi ta feti.” Dee lö woto aki ta lei taa te u ta lei taa u lobi unu na unu, nöö woo sa hoi dou hii fa sëmbë ta du ku u.

13. Unfa di santa jeje ta heepi u fuu dini Jehovah go dou, hii fa sëmbë ta du ku u?

¹³ Jesosi bi piki dee bakama fëën taa de musu ta lobi de felantima (Mat. 5:44, 45). Di soni aki da wan kösökösö soni ö? Wë nönö, na seei! Ma woo sa du ën, u di di santa jeje u Gadu o heepi u. Di jeje u Gadu ta mbei sëmbë ko abi lobi, pasensi, tjalihati u sëmbë, saapifasi, söseei a ta heepi sëmbë u de duwengi deseei (Gal. 5:22, 23). Dee fasi aki ta heepi u fuu hoi dou, hii fa sëmbë ta du ku u. Sömëni sëmbë an ta du ku u möön, u di de manu, nasö de mujëë, de mii, nasö di sëmbë di ta libi a di bandja, bi lei taa de abi dee fasi aki. So u de bigi dini Jehovah seei. Fëën mbei ee i si taa a  ta taanga da i fii lobi dee sëmbë dee ta du ku i u di i ta dini Jehovah, nöö i sa begi Jehovah faa da i di santa jeje fëën (Luk. 11:13). I sa biibi taa di möön bunu soni fii du, hën da fii piki Gadu buka hii juu.​—Nöng. 3:5-7.

14-15. Unfa Loomë 12:17-21 bi heepi Yasmeen faa lobi ën manu go dou, hii fa a bi ta du ku ën?

¹⁴ Luku di woto u wan sisa de kai Yasmeen. Di sisa aki ta libi a dee pisiwata u di Mindiköndë ze. Di a bi ko toon wan Jehovah Kotoigi, hën hën manu bi kë tapëën fu an dini Gadu möön, u di a bi ta si kuma sëmbë bi ta ganjan di mujëë fëën. Di womi bi bigi ta kosi ën. Söseei a bi piki dee famii fëën, wan keiki fesima, ku wan bonuma taa de musu taki taa de o du wan hogi ku ën, söseei taa a ta poi di wosudendu libi fëën. A bi pasa wan pasi taa di sisa aki manu bi kosi dee baaa ku dee sisa di de bi ta hoi wan kemeente komakandi! Yasmeen bi këë sömëni pasi, u di hën manu an bi ta libi bunu ku ën.

¹⁵ Di Yasmeen bi nango a dee komakandi, nöö dee baaa ku dee sisa bi ta dëën kötöhati. Dee gaanwomi bi ta dëën taanga faa libi ku dee soni dee sikifi a Loomë 12:17-21. (Lesi ën.) Yasmeen bi taki taa: „A bi taanga da mi u mi du. Ma mi bi hakisi Jehovah faa heepi mi, söseei mi bi ta mbei taanga möiti u mi du soni kumafa di Bëibel ta taki. Fëën mbei di mi manu bi ta sundju di boiwosu, mi bi ta seekëën ko limbo baka. Te a bi ta kosi mi, mi bi ta piki ën a wan saapi fasi. Nöö di a bi ko dë ku suwaki, mi bi sölugu ën.”

16-17. Andi i lei u di woto u Yasmeen?

¹⁶ U di Yasmeen bi ta lei hën manu taa a lobi ën, mbei a bi feni gaan bunu bakaten. Yasmeen bi taki taa: „Mi manu bi bigi ta futoou mi möön gaanfa, u di a bi sabi taa ma ta mindi soni. A bi bigi ta haika mi te u bi ta taki soni u Gadu, söseei a bi taki taa a bi o mbei möiti fuu sa libi fiifii a di wosu. Nöunöu a ta da mi taanga u mi go a dee komakandi. Mi ku mi manu ko dë möön gaan mati, söseei u ta libi fiifii a di wosu. Mi ta wakiti di ten ka mi ku mi manu o dini Jehovah makandi.”

¹⁷ Di woto u Yasmeen ta lei u taa „ee i lobi wan sëmbë, joo ta tjubi ën fu an kisi sen a lanti. Joo ta suku di bunu pisi fëën nöömö. Joo a’ di mëni taa na sö nöö a o dë, te wan ten seei a o ko bunu nöömö. Ja o lasi hati nëën möönsö” (1 Kol. 13:4, 7). A ta hati u seei te sëmbë ta buuse u, ma lobi taanga möön buuse. Te u ta lei taa u lobi wotowan, nöö de sa tooka di fasi fa de ta pakisei fuu, söseei di fasi fa de ta pakisei u Jehovah. Di soni dë ta mbei Jehovah fii piizii. Ma aluwasi ee dee felantima fuu ta  du ku u go dou, tökuseei u sa ta dë waiwai. Unfa sö?

18. Faandi mbei u sa taki taa u sa ta dë waiwai, hii fa sëmbë ta du ku u?

¹⁸ Jesosi bi taki taa: „Un dë bunu e, un dee sëmbë oto sëmbë an sa si a wojo” (Luk. 6:22). Wa ta piki sëmbë taa de musu buuse u. Söseei an ta dë wan suti soni da u te sëmbë ta du ku u u di biibi fuu hedi. Wë faandi mbei u taki taa u sa ta dë waiwai hii fa sëmbë ta du ku u? Boo taki u dii soni. Di fosu soni da, te u ta hoi dou, nöö Gadu ta wai ku u (1 Pet. 4:13, 14). Di u tu soni da, di biibi fuu ta ko möön taanga (1 Pet. 1:7). Nöö di u dii soni hën da, woo feni wan gaan dii gudu. Hën da di libi u teego.​—Lom. 2:6, 7.

19. Faandi mbei dee apösutu bi dë ku wai baka di sëmbë bi wipi de?

¹⁹ Kölö sö baka di Jesosi bi weki ko a libi baka, hën dee apösutu bi ko si taa wan sëmbë sa ta dë waiwai, hii fa sëmbë ta du ku ën. Dee apösutu bi dë ku wai, baka di sëmbë bi wipi de, söseei baka di de bi piki de u de an peleiki möön. Faandi mbei? Wë „fu di Masa Gadu bi si taa de bumbuu tjika u de tja sen fu Masa Jesosi në hedi” (Tjab. 5:40-42). De bi lobi de Masa gaanfa. Fëën mbei de an bi ta fëëë dee felantima u de. Söseei de bi lei taa de lobi de Masa tuutuu, u di de bi paaja di bunu buka go dou. A di ten aki, sömëni baaa ku sisa fuu ta dini Jehovah go dou, hii fa soni ta taanga da de. De sabi taa Jehovah an o fëëkëtë dee bunu soni di de bi ta du, ku di lei di de ta lei taa de lobi ën.​—Heb. 6:10.

20. Fuun soni woo taki a di woto baka disi?

²⁰ Solanga di goonliba aki dë, sëmbë o ta buuse u (Joh. 15:19). Ma wa abi fu fëëë. A di woto di ta ko baka disi, woo si taa Jehovah ’o mbei u ko dë gingin a di biibi. Nöö a o ta tjubi u tu’ (2 Tes. 3:3). Fëën mbei boo ta lobi Jehovah go dou. Boo ta lobi dee baaa ku dee sisa fuu, söseei boo lobi dee felantima fuu go dou. Te u ta du dee soni aki, woo ta libi fiifii ku useei, di biibi fuu o ko möön taanga, woo tja gafa ko da Jehovah, söseei woo ta lei taa lobi taanga möön buuse.