So Kotoigi ta wooko ku dee njunjun soni dee könima mbei aki u fan ku dee famii u de, nasö u fan ku woto Kotoigi. Ma wan Kotoigi di ta si soni kumafa Jehovah ta si soni, ta buta pakisei a di soni aki: „Wan köni sëmbë ta si taa hogi o miti ën, nöö a ta kule go tjubi. Ma di sëmbë söndö öndöfeni ta waka go dou, nöö fëën mbei a musu kisi sitaafu.”​—Nöng. 27:12.

U sabi taa Jehovah kë tjubi u. Nöö fëën mbei wa ta nama ku sëmbë di sa paati u ku wotowan a di kemeente, ku sëmbë di de puu a di kemeente, nasö ku sëmbë di ta lei wotowan poipoi soni (Lom. 16:17; 1 Kol. 5:11; 2 Joh. 10, 11). So juu a ta pasa taa sëmbë a di kemeente an ta tja deseei a wan fasi di fiti (2 Tim. 2:20, 21). Te joo tei sëmbë ko mati fii, nöö hoi di soni di u taki aki a pakisei. A sa taanga da u fuu tei mati ku köni te u ta fan ku de a Internet.

A dë fanöudu seei fuu köni te woo suku mati a Internet ka sömëni sëmbë ta fan ku deseei. So Keesitu sëmbë bi ko dë a dee gaan kulupu aki ka de ta fan ku peipei sëmbë, nöö soni an bi waka bunu da de. Ma unfa wan baaa nasö wan sisa sa du soni ku köni te de kai ën faa ko nama ku wan kulupu u höndö nasö dusu sëmbë, u de ta fan ku deseei a Internet? Wë a o dë wan taanga soni u de ko sabi ee hiniwan u dee sëmbë dë taanga a di biibi. Psalöm 26:4 ta taki taa: „Ma ta nama ku sëmbë di ta ganjan sëmbë, söseei mi ta kule da sëmbë di ta tjubi ambë de dë tuutuu.” We di tëkisi aki an ta lei u taa a dë wan möön köni soni te sëmbë dee u sabi bumbuu wanwan u ta fan ku de a Internet ö?

Ma aluwasi a dë wan piki kulupu ka sëmbë ta fan ku deseei a Internet, tökuseei wan Keesitu sëmbë musu ta luku ee un mëni ten a o ta tei faa ta du di soni dë, ma söseei a musu ta buta mëni a dee soni di sëmbë o ta taki a di kulupu. Wa musu ta fii taa u musu u fan ku wan sëmbë, aluwasi fuun soni di sëmbë kë taki, nasö aluwasi un longi woon fan. Paulosu bi bai Timoteo faa ta köni ku sëmbë di ta „waka nango ta ko ta daama a dee wosuwosu ta tjökö buka a sëmbë soni ta lëgëdë ta konda soni di an dë fanöudu” (1 Tim. 5:13). Wë a di ten aki u sa du di wan seei soni ku dee telefön nasö tablet fuu, nasö ku wotowan ka u nango a Internet u fan ku sëmbë.

Wan Keesitu sëmbë di taanga a di biibi an o haika soni ka sëmbë ta kuutu wotowan, nasö ka de ta konda tjubitjubi woto u wotowan. Söseei an o kuutu wotowan nasö taki tjubitjubi woto u de (Ps. 15:3; Nöng. 20:19). Söseei an o haika mindimindi woto, nasö woto di sëmbë mbei di an kaba dë sö tuutuu, nöö an o konda de da wotowan tu (Ef. 4:25). U ta feni sömëni soni a di jw.org, u ta feni soni a JW Broadcasting^®, di sa taanga di biibi fuu. Söseei ala u sa feni woto di dë tuu.

So Kotoigi ta wooko ku app nasö website u sei soni, u bai soni, u taki u soni di de abi ta sei, nasö u suku wookoma. Dee lö soni dë an nama ku di dini di u ta dini Jehovah. Keesitu sëmbë di an kë ko dë wan sëmbë di „lobi möni”, an o ta wooko ku dee website nasö app aki, u mbei „möni” a dee baaa ku dee sisa fëën.​—Heb. 13:5.

Boo taa wan baaa hakisi baaa ku sisa u de pii möni u heepi baaa ku sisa di abi möni fuka, nasö di abi heepi fanöudu u di wan gaan hogi miti de. U musu wooko ku dee app ka u sa ta sikifi soni da sëmbë u du di soni aki ö? U lobi dee baaa ku dee sisa fuu, nöö u ta booko u hedi ku de, söseei u ta heepi de te de dë a fuka, nöö u ta da de taanga tu (Jak. 2:15, 16). Ma ee a dee app nasö soni ka u sa ta sikifi soni manda da wotowan, u ta kë seeka soni u heepi de, nöö a ta möön taanga da di bëikantoo, nasö di kemeente, u de heepi de (1 Tim. 5:3, 4, 9, 10, 16). Wë an dë u taki taa na wan fuu kë u wotowan pakisei taa u hën abi wan apaiti faantiwöutu u luku dee sikapu u Gadu, na sö nö?

U kë u Jehovah hën kisi gafa (1 Kol. 10:31). Fëën mbei te woo wooko ku wan app, nasö woto website, nasö soni ka un mëni sëmbë sa ta fan ku deseei, nöö buta pakisei a dee hogi dee a sa tja ko, söseei ta köni fa i ta wooko ku de.