WOTO 13
Unfa Jehovah ta tjubi i?
„Fa Masa Gaangadu sai dë, dee sëmbë, un sa a’ futoou nëën taa a o mbei un ko dë gingin a di biibi. Nöö a o ta tjubi unu tu, be di didibi an feni pasi faa du unu hogi.”—2 TES. 3:3.
KANDA 124 Boo ta hoi useei a Jehovah
WANTU SONI U DI WOTO a
1. Faandi mbei Jesosi bi hakisi Jehovah faa tjubi dee bakama fëën?
A DI lasiti ndeti di Jesosi bi dë a goonliba aki, a bi ta pakisei dee soni dee bi o miti dee bakama fëën. U di Jesosi bi lobi dee mati fëën, mbei a bi hakisi hën Tata faa „tjubi de be di didibi an musu wini de” (Joh. 17:14, 15). Jesosi bi sabi taa baka te a toona go a liba ala, Saatan bi o ta du ku sëmbë go dou, solanga de kë ko dë dinima u Jehovah. A dë gbelingbelin u si taa dee sëmbë u Jehovah bi o abi heepi fanöudu.
2. Andi sa heepi u fuu dë seiki taa Jehovah o ta piki dee begi fuu?
2 Jehovah bi piki di begi u Jesosi, u di a lobi di Womi Mii fëën. Ee u ta mbei hii möiti u du soni u Jehovah wai ku u, nöö a o lobi u tu. Söseei a o ta piki dee begi fuu te u ta hakisi ën faa heepi u. Jehovah da wan Tata di lobi dee mii fëën. Fëën mbei a o ta luku de hii juu. Ee Jehovah an bi ta du sö, nöö di soni dë bi o sa poi hën në!
3. Faandi mbei a dë fanöudu u Jehovah tjubi u, a di ten aki?
3 Jehovah hën ta tjubi u, nöö u abi ën fanöudu gaanfa seei a di ten aki. De puu Saatan a liba ala vinde ko a goonliba aki, nöö „a ko ku taanga hatiboonu” (Ako. 12:12). A mbei so u dee sëmbë dee ta du ku u, ko ta si kuma, „Gadu wë de ta heepi fa de ta du dë” (Joh. 16:2). Sëmbë dë tu di an ta biibi a Gadu, nöö de ta du ku u u di wa ta du soni kumafa dee sëmbë u di goonliba aki ta du soni. Ma aluwasi sëmbë ta du ku u u peipei soni hedi, tökuseei wa ta fëëë. Faandi mbei? Wë u di di Wöutu u Gadu ta taki taa: „Fa Masa Gaangadu sai dë, dee sëmbë, un sa a’ futoou nëën taa a o mbei un ko dë gingin a di biibi. Nöö a o ta tjubi unu tu, be di didibi an feni pasi faa du unu hogi” (2 Tes. 3:3). Unfa Jehovah ta tjubi u? Boo taki u tu fasi fa a ta du di soni dë?
JEHOVAH TA DA U FETILAI
4. Andi Jehovah da u fuu sa tjubi useei, te u luku Efeise 6:13-17?
4 Jehovah da u fetilai di sa tjubi u te Saatan ta feti ku u. (Lesi Efeise 6:13-17.) Dee fetilai aki bunu, nöö de sa heepi u tuutuu! Ma di wan kodo fasi fa de sa heepi u, hën da te u ta wooko ku hii de tuu. Andi hiniwan u dee fetilai aki kë taki? Boo taki u hiniwan u de.
5. Andi da di banti di de ta tai a mindi, nöö faandi mbei u musu banti useei ku ën?
5 Dee lei dee sikifi a di Wöutu u Gadu, dë kuma di banti di de ta tai a mindi. Faandi mbei u musu ta banti useei ku di banti aki? Wë u di a Saatan „mindi soni ku lëgëdë kumutu” (Joh. 8:44). Dusudusu jaa longi kaa a ta mindi soni, nöö a „ta ganjan sëmbë a hii di goonliba”! (Ako. 12:9) Ma dee lei dee dë a di Bëibel ta heepi u u Saatan an feni u ganjan. Unfa u ta bisi di banti aki? U ta du sö te u ta lei soni u Jehovah, te u ta dini ën a wan tuutuu fasi ku di santa jeje fëën di a ta da u, söseei te u ta du soni ku wan limbo hati hii juu.—Joh. 4:24; Ef. 4:25; Heb. 13:18.
Di banti: Dee lei dee sikifi a di Wöutu u Gadu
6. Andi da di felu soni di ta tapa u hati mindi, nöö faandi mbei u musu bisi ën?
6 Dee wëti u Jehovah dë kuma di felu soni di ta tapa u hati mindi. Faandi mbei u musu bisi di felu soni aki? Wë leti kumafa di felu soni di wan sodati ta bisi tapa hën hati mindi, ta tjubi hën hati, sö nöö dee wëti u Jehovah ta tjubi u hati, sö taa dee hogi soni u di goonliba aki an tooka u (Nöng. 4:23). Jehovah kë taa u musu lobi ën ku hii u hati, söseei a kë taa u musu ta dini ën ku hii u hati (Mat. 22:36, 37). Fëën mbei Saatan ta suku fasi u mbei u ko lobi soni di Jehovah ta buuse. A kë fuu ko lobi dee soni u di goonliba fëën, sö taa wa dini Jehovah ku hii u hati möön (Jak. 4:4; 1 Joh. 2:15, 16). Nöö ee a si taa di soni dë an ta heepi, nöö a ta du ku u u mbei u fëëë, sö taa u sa du wan soni di Jehovah an lobi.
Di felu soni u tapa hati mindi: Dee wëti u Jehovah
7. Unfa u ta bisi di felu soni di ta tapa u hati mindi?
7 U ta bisi di felu soni di ta tapa u hati mindi, te u ta mbei möiti fuu libi ku dee wëti u Jehovah, dee ta taki andi da bunu ku andi da hogi (Ps. 97:10). So sëmbë sa ta si kuma dee wëti u Jehovah ta tapa u fuu du soni kumafa u kë. Ma ee wa ta libi ku dee wëti u Jehovah möön, nöö woo ko dë kuma wan sodati di dë a feti, hën a puu di felu soni di a bi bisi tapa hën hati mindi, u di a ta si kuma di soni dë hebi poi. Di soni dë an bi o dë wa bunu soni seepiseepi! Dee sëmbë dee lobi Jehovah an ta si kuma dee wëti fëën „hebi da u poi”, ma de ta fusutan taa de ta heepi u fu wa lasi u libi.—1 Joh. 5:3.
8. Andi a kë taki u dë ku susu taitai a u futu fuu go konda di bunu buka da sëmbë?
8 Paulosu bi da u taanga fuu dë ku susu taitai a u futu fuu go konda di bunu buka da sëmbë. Hën da hii juu seei u musu ta dë kabakaba u paaja di bunu buka u di Könuköndë. Te u ta konda soni u Bëibel da sëmbë, nöö di biibi fuu ta ko möön taanga. U ta feni taanga seei te u ta si fa dee sëmbë u Jehovah a hii së u goonliba, ta suku fasi u konda di bunu buka da sëmbë te de dë a wooko, a siköö, a kamian ka hia masikapei dë, söseei te de nango ta peleiki da sëmbë a de pisi. De ta suku u peleiki da sëmbë tu te de go a wënkë, te de go luku dee famii u de dee an ta dini Jehovah, söseei te de ta fan ku sëmbë di de sabi. De ta suku fasi u peleiki da sëmbë, aluwasi de ta dë a wosu, u di lanti buta wëti taa sëmbë an musu go a sitaati. Ee u bi o disa u du di peleikiwooko u di u ta fëëë, nöö u bi o dë kuma wan sodati di ta puu di susu fëën nëën futu, hii fa a dë a feti. Soni o sa du ën a futu hesihesi. Di soni dë o mbei a taanga dëën faa heepi hënseei te sëmbë ko feti ku ën, söseei an o sa du dee soni di di basi fëën ta piki ën.
Di susu: Di dë di u musu ta dë kabakaba u go konda di bunu buka
9. Faandi mbei a dë fanöudu fuu ta tja di goobo felu soni di u abi?
9 Di biibi di u abi a Gadu dë kuma wan pei felu soni goboo sö. U ta biibi taa Gadu o du hii dee soni dee a paamusi u. Di biibi dë o heepi fuu sa ’tapa dee faja piiwa u di felantima’ fuu. Faandi mbei u musu ta tja di goboo felu soni aki? Wë u di a ta heepi u sö taa dee sëmbë dee bia baka da di biibi an feni u ganjan, söseei a ta heepi u fu wa lasi hati te sëmbë ta taki hogi fuu. Ee wa abi biibi, nöö wa o sa hoi dou te sëmbë ta da u taanga fuu pasa dee wëti u Jehovah. Ma hiniwan pasi te u hoi dou te u dë a wooko nasö a siköö, hii fa sëmbë bi ta da u taanga fuu du wan soni di Jehovah an lobi, nöö a ta dë kuma u ta tja di goboo felu soni fuu (1 Pet. 3:15). Te wa kë tei wan wooko ka u bi o ta kisi hia möni, u di a bi o sa tapa u fuu dini Gadu go dou a wan bunu fasi, nöö a dë kuma u ta tja di goboo felu soni fuu (Heb. 13:5, 6). Te u ta dini Jehovah go dou hii fa sëmbë ta du ku u, nöö di goboo felu soni fuu hën ta heepi u.—1 Tes. 2:2.
Di goboo felu soni: Di biibi di u abi a Gadu ku dee soni dee a paamusi u
10. Andi da di felu kaapusa, nöö faandi mbei u musu bisi ën?
10 Di felu kaapusa da dee soni dee Jehovah paamusi u. A paamusi u taa a o paka hii dee sëmbë dee ta du soni kumafa a kë, söseei taa ee u ko dëdë seei, nöö a o weki u ko a libi baka (1 Tes. 5:8; 1 Tim. 4:10; Tit. 1:1, 2). Leti kumafa di felu kaapusa di wan sodati ta bisi ta tjubi hën hedi, sö nöö dee soni di Jehovah paamusi u ta tjubi di pakisei fuu. Unfa sö? Wë dee soni dee Jehovah paamusi u ta heepi u fuu ta buta hii u pakisei a dee soni dee woo feni. Di soni dë ta heepi u fu wa bookosaka te fuka miti u. Unfa u ta bisi di felu kaapusa aki? Wë u ta du sö te u ta mbei möiti fuu ta si soni kumafa Gadu ta si soni. Wan fasi fa u ta du ën, hën da wa ta biinga a gudu baka, ma u ta buta futoou a Gadu.—Ps. 26:2; 104:34; 1 Tim. 6:17.
Di felu kaapusa: Di paamusi di Gadu paamusi u taa woo libi u teego
11. Andi da di së ufangi, nöö faandi mbei a dë fanöudu fuu wooko ku ën?
11 Di së ufangi da di Wöutu u Gadu, di Bëibel. Di së ufangi aki ta koti hii soni jabi, u heepi u fuu sabi un woto da mindimindi woto. Söseei a ta heepi u fu wa dë saafu u poipoi lei, söseei fu wa dë saafu u guwenti di an bunu (2 Kol. 10:4, 5; 2 Tim. 3:16, 17; Heb. 4:12). U ta lei u wooko ku di së ufangi aki a wan bunu fasi te di ölganisaasi u Gadu ta lei u soni, söseei te u ta lei soni u Bëibel (2 Tim. 2:15). Ma boiti dee fetilai dee Jehovah da u aki, a ta da u wan woto soni di ta tjubi u tu. Andi da di soni dë?
Di së ufangi: Di Wöutu u Gadu, di Bëibel
WA MUSU U FETI U WANWAN
12. Un woto soni u abi fanöudu?
12 Wan sodati di abi öndöfeni sabi taa an sa feti wini wan hii kulupu sodati hën wanwan. Dee woto sodati di hën ku de dë a wan së, musu heepi ën. Wë sö nöö wa sa finga futu da Saatan ku dee bakama fëën u wanwan. A dë fanöudu u dee baaa ku dee sisa fuu heepi u. Jehovah da u sëmbë di sa heepi u. Dee sëmbë dë da dee baaa ku dee sisa fuu dee dë a hii së u goonliba, ’dee ta biibi Masa Jesosi kuma u’.—1 Pet. 2:17.
13. Un wini u ta feni a dee komakandi, kumafa Hebelejën 10:24, 25 ta taki?
13 Wan fasi fa u ta feni heepi, da te u nango a dee komakandi. (Lesi Hebelejën 10:24, 25.) Hii u tuu ta fii bookosaka so juu. Te u ta fii bookosaka, nöö u sa feni taanga a dee komakandi. Dee soni di dee baaa ku dee sisa fuu ta taki a dee komakandi ta da u taanga. Dee taki di de ta hoi, ku dee demo di de ta hoi, ta da u taanga fuu dini Jehovah go dou. U ta feni taanga tu te u ta fan ku dee baaa ku dee sisa fuu ufö di komakandi bigi, söseei te u ta fan ku de baka te di komakandi kaba (1 Tes. 5:14). Boiti di dë, dee komakandi fuu ta da u pasi fuu sa heepi wotowan, nöö di soni dë ta mbei u ta dë waiwai (Tjab. 20:35; Lom. 1:11, 12). Dee komakandi fuu ta heepi u a woto fasi tu. De ta heepi u fuu ko möön sa’ u lei sëmbë soni, söseei fuu ko möön sa’ u peleiki da sëmbë. De ta heepi u fuu ko möön sa’ u peleiki da sëmbë ku dee soni dee u abi u lei sëmbë soni. Fëën mbei i musu ta seeka iseei bunu da dee komakandi. I musu ta haika bunu te i dë a komakandi. Te di komakandi kaba, nöö du dee soni dee i bi lei nëën. Te i ta du dee soni aki, nöö joo ko dë wan bumbuu sodati u Jesosi Keesitu.—2 Tim. 2:3.
14. Un woto soni u abi di ta heepi u?
14 Milionmilion ëngëli seei ta heepi u tu. Pakisei andi wan kodo ëngëli sa du! (Jes. 37:36) Nöö pakisei andi wan hii kulupu ëngëli sa du. Na wan libisëmbë, söseei na wan taku jeje taanga kuma dee ëngëli u Jehovah. Jehovah abi hii makiti. Fëën mbei ee Jehovah dë ku u a wan së, nöö hii juu woo taanga möön dee felantima fuu, aluwasi fa de hia tjika (Kuutm. 6:16). U sa dë seiki u di soni aki! Hoi dee soni aki a pakisei te wan sëmbë di i ku ën ta wooko a di wan kamian, nasö te wan mii di i ku ën nango a di wan siköö, nasö te wan famii fii di an ta dini Jehovah, taki wan soni nasö du wan soni di ta mbei i fëëë. Hoi a pakisei taa ja dë i wanwan a di feti aki, u di i ta du andi Jehovah piki i fii du.
JEHOVAH O TA TJUBI U GO DOU
15. Faandi mbei sëmbë an o sa tapa dee sëmbë u Gadu u de du di peleikiwooko, te u luku Jesaaja 54:15, 17?
15 Sömëni soni dë di mbei dee sëmbë u di goonliba u Saatan aki sa buuse u. Wa ta tei së na wan tjë sö seei a politiki soni, söseei wa nango a feti. U ta heepi sëmbë u de ko sabi Gadu në, u ta peleiki ta piki sëmbë taa di Könuköndë u Gadu nöö sa tja bööböö libi ko, söseei u ta hoi dee wëti u Gadu. U ta heepi sëmbë u de ko sabi taa di tiima u di goonliba aki da wan mindisonima di abi hogihati, söseei a ta kii sëmbë (Joh. 8:44). U ta konda da sëmbë tu taa abiti möön di goonliba u Saatan aki o booko kaba a sösö. Ma nöiti Saatan ku dee bakama fëën o sa tapa u fu wa du di peleikiwooko. Woo ta tei hiniwan okasi di u abi, u gafa Jehovah go dou! Hii fa Saatan abi makiti gaanfa, tökuseei an bi sa tapa di bosikopu u di Könuköndë fu an paaja te dou hii di goonliba. Di soni aki bi sa pasa sö, u di Jehovah ta tjubi u.—Lesi Jesaaja 54:15, 17.
16. Unfa Jehovah o tjubi dee sëmbë fëën a di pisiten u di gaan fuka?
16 Andi o pasa abiti möön? Jehovah o tjubi u a tu foombo fasi a di pisiten u di gaan fuka. Di fosu soni, hën da a o tjubi dee dinima fëën dee ta hoi deseei nëën, te a o mbei dee könu u di goonliba aki booko di Gaan Babilon kaba a sösö. Di Gaan Babilon dë, da hii dee poipoi keiki tuu (Ako. 17:16-18; 18:2, 4). Baka di dë, nöö a o tjubi dee sëmbë fëën na Amagedon, te a o booko dee woto pisi u di goonliba u Saatan kaba a sösö.—Ako. 7:9, 10; 16:14, 16.
17. Un wini u ta feni te u ta mbei möiti fuu ku Jehovah dë mati go dou?
17 Te u ta mbei möiti fuu ku Jehovah dë mati go dou, nöö Saatan an o sa du wan soni ku u di an o sa seeka möön. Fuu taki ën kumafa a dë, nöö Saatan de o kii, nöö an o sa ko a libi nöiti möön (Lom. 16:20). Fëën mbei i musu wooko ku hii dee fetilai dee Gadu da u. Hii juu i musu ta wooko ku de! Na suku u feti di feti aki i wanwan. Heepi dee baaa ku dee sisa fii, söseei du dee soni dee Jehovah ta piki i fii du. Ee i ta du dee soni aki, nöö i sa dë seiki taa di Tata fii di dë a liba ala o ta da i taanga, söseei a o ta tjubi i.—Jes. 41:10.
KANDA 149 Wan kanda u gafa Jehovah te a wini feti
a Di Bëibel ta piki u taa Jehovah o ta da u taanga, söseei taa a o ta tjubi u da hiniwan soni di sa kaba u a sösö, nasö di sa mbei u ku ën an dë mati möön. Woo piki dee hakisi aki, a di woto aki: Faandi mbei a dë fanöudu u sëmbë tjubi u? Unfa Jehovah ta tjubi u? Andi u musu du fuu sa feni heepi a Jehovah?