Wan sëmbë di biinga lesi di woto aki, sa hakisi hënseei di soni aki. Ma dee tëkisi dee ta taki u di woto aki ta lei taa tu womi bi dë di de bi ta kai Mefibosëti, nöö u sa lei wan soni a di woto aki te u luku baka andi bi pasa.

Saulosu di bi dë Könu u Isaëli, bi abi seibi womi mii ku tu mujëë mii. Di fosu womi mii fëën de bi ta kai Jonatan. Baka di dë, hën a pai wan womi mii de kai Mefibosëti ku wan u dee mujëë fëën de kai Lisipa. Ma Jonatan seei bi abi wan womi mii de kai Mefibosëti. Hën da Könu Saulosu bi abi wan womi mii de kai Mefibosëti, ku wan mii kai ën avo de kai sö tu.

A wan ten, Könu Saulosu bi bia baka da dee Gibion sëmbë di bi ta libi makandi ku dee Isaëli sëmbë, nöö a bi kë kii hii de tuu puu. Nöö a djei kuma a bi kii sömëni u de kaa. Di soni aki an bi bunu seepiseepi. Ma faandi mbei? Wë u di a di ten u Josua, dee gaanwomi u Isaëli bi mbei wan buka ku dee Gibion sëmbë taa de bi o libi fiifii ku de.​—Jos. 9:3-27.

Di buka aki an bi puu di Saulosu toon Könu. Ka u di Könu bi libi bunu ku dee Gibion sëmbë kumafa di buka bi mbei, a bi kë kii de. Di soni aki bi mbei taa „Saulosu ku hën wosudendu [bi] ko a’ buuu-paima” (2 Sam. 21:1). Ma baka wan pisiten, hën Dafiti bi ko toon Könu. Dee Gibion sëmbë dee bi fika a libi, bi go fan ku Könu Dafiti u di gaan hogi di bi pasa. Dafiti bi hakisi de andi da di paima di de musu paka u seeka di gaan hogi soni di Saulosu du, sö taa Jehovah bi sa mbei Isaëli feni gaan bunu. Dee Gibion sëmbë an bi hakisi möni, ma de bi hakisi u de da de seibi womi mii u di womi di bi „suku u kii hii u tuu puu”, sö taa de bi sa kii de (Nöb. 35:30, 31). Dafiti bi da de andi de bi hakisi.​—2 Sam. 21:2-6.

A di ten dë, Saulosu ku Jonatan bi dëdë kaa, ma di mii u Jonatan de kai Mefibosëti bi dë ku libi jeti. A bi kisi wan makei di a bi dë mii, nöö an bi sa waka möön. Fëën mbei di hën avo bi feti ku dee Gibion sëmbë, an bi dë a dendu. Dafiti seei bi mbei wan buka ku hën mati Jonatan. Di buka aki bi o tja bunu ko da dee bakamii u Jonatan, nöö di mii fëën de kai Mefibosëti bi dë a dendu tu (1 Sam. 18:1; 20:42). Di tëkisi taki taa: „Könu [Dafiti] bi lei taa a abi tjalihati u Mefibosëti, di womi mii u Jonatan di dë di mii u Saulosu, u di de bi mbei wan buka a Jehovah fesi.”​—2 Sam. 21:7.

Ma tökuseei Dafiti bi du andi dee Gibion sëmbë hakisi ën. A bi da de tu womi mii u Saulosu, ku feifi mii di bi kai Saulosu avo. Nöö wan u dee mii u Saulosu di a bi da de, de bi ta kai Mefibosëti (2 Sam. 21:8, 9). Di fasi fa Dafiti bi du soni, bi mbei taa di köndë an bi abi buuu-paima möön.

Di soni di pasa aki na wan awooten woto nöö. Di wëti u Gadu bi dë limbolimbo u fusutan. A bi taki taa: „Wan musu kii wan mii u di hën tata du hogi” (Deto. 24:16). Jehovah an bi o da de pasi u de du sö ku dee tu womi mii u Saulosu, söseei ku dee feifi mii dee bi kai ën avo, ee de an bi a’ maun a dendu. Di seei wëti ta taki go dou taa: „Di sëmbë seei di du di hogi, hën o dëdë.” A djei kuma dee tu mii u Saulosu, ku dee feifi mii dee bi kai ën avo aki, bi abi wan maun a di kii di Saulosu bi kë kii hii dee Gibion sëmbë kaba. Fëën mbei de bi paka u di hogi di de du.

Di woto aki ta lei u taa wan sëmbë an sa du hogi, nöö a taki taa a du ën, u di sëmbë mandëën faa du ën. Wan nöngö ta taki taa: ’Mbei di pasi ka i ta buta i futu ko liii, nöö joo waka söndö fëëë.’​—Nöng. 4:24-27; Ef. 5:15.